Read Southern Kisi Sa᷅m 143 Bible Online

Sa᷅m 143 - Southern Kisi bible

Sa᷅m 143

¹[109] O̍o̍ Mɛ̄lɛ̄ka̍ Ya̍a̍wɛ̄ɛ̄, yāndi̍i̍ tu̍e̍i̍ pi̍ɛ̍i̍lē nīle̍ŋ. Ya̍ŋ ni᷅la̍ŋ o̍ pīɛ̄īlē nīle̍ŋ Mɛ̄lɛ̄ka̍, mā tu̍i̍i̍nu̍ŋ ya̍ īnyīɛ̍ɛ̍. Mɛ̄ɛ̍ ŋ̄ chō wānā sa̍kpō, ndu̍yɛ̍ ma̍ wā wāna̍ tōnya̍ yɛ̍, yāndi̍i̍ mu̍li̍ ya̍ dīōm.

²Kɔ̍ɔ̍sā a̍ ya̍ bu̍ɛ̍ī nūmndo̍ mā tu̍si̍ ya̍ nyɛ̄ pālāa̍ chōo̍ le̍, kāni̍ fo̍ndōle̍, wānā o̍ wānā cho̍ sa̍kpō nu̍m o̍ hɔ̄l te̍.

³Ya̍a̍mɔ̍ɔ̍wa̍a̍ nīa̍a̍ ā lo̍ o̍ ko̍ŋ ma̍ tīsā ya̍ kīlta̍ŋ kɔ̄ɔ̄lī. Ā tūsi̍ ya̍ nyɛ̄ pālāa̍ chōo̍, ma̍ fūūlūū ya̍ sōndōo̍ lɛ̄ŋ mɛ̍ɛ̄. Ā tōsa̍ mi̍ wa᷅ o̍ nyūmnda̍ŋ ni᷄ŋ, mɛ̄ɛ̍ wānāa̍ vi᷅ ni᷅ŋ sīndɛ̄ pa̍ wa̍ ā chō nu̍a̍ā o̍ nyūmnda̍ŋ ni᷄ŋ yɛ̍.

⁴Le̍la̍ŋ I̍ nɔ̍ ti̍i̍nda᷄ŋ o̍ tīīnda᷄ŋ te̍. Kɔ̄l nūu̍ ō tāmbu̍ ō bɔ̄ɔ̍.

⁵I̍ lo̍o̍nu̍ŋ a̍ pālɛ̍i̍ māsīndɛ̄i̍ o̍kɔ̄ɔ̄. I̍ yi̍ya̍ŋ a̍ nyɛ̄ o̍ nyɛ̄ ŋ̄ tōsa̍. Nyɛ̄ o̍ nyɛ̄ ŋ̄ tōsa̍ sīndɛ̄, ŋ̄ hīŋ ya̍ o̍ kɔ̄l kpo̍u̍.

⁶Nyɛ̄ kōŋ ya̍ I̍ he̍e̍lu̍ bāla̍ŋ chōo̍ cho̍o̍ ni̍, mi̍ wa᷅ nu̍m pīɛ̄īyo̍. Mɛ̄ɛ̍ lɛ̄ŋnde̍ŋ lē vēsā nu̍a̍ā, mī lē yēēma̍ pīɔ̍ɔ̍ yēēmā bɛ̄ndōo̍ yɛ̍, le̍nde̍ yēēmɛ̍i̍ chō o̍ kɔ̄l nūu̍ ni᷄ŋ le̍ nūm ni̍.

⁷Le̍la̍ŋ yāndi̍i̍ Mɛ̄lɛ̄ka̍ Ya̍a̍wɛ̄ɛ̄, ke̍le̍ŋa̍ ya̍ dīōmndo̍ mūli̍ fɔ̍. I̍ nɔ̍ lɛ̍ tīīnda᷄ŋ o̍ tīīnda᷄ŋ che᷅le̍ŋ o̍ yōōmū nūu̍ ni᷄ŋ te̍. Le̍la̍ŋ vi᷅ŋ ya̍ hɔ̄lla̍ le̍ Mɛ̄lɛ̄ka̍, yɔ̄ŋi̍ ya̍ I̍ sɔ̍la̍ pi̍ɔ̍mndo̍ mī ku̍ɛ̄ chi̍e̍e̍ pīɔ̍m.

⁸Īdīi̍ o̍ īdīi̍, yi̍ya̍la̍ŋ ya̍ a̍ kāālā nu̍m cho̍ le̍ te̍le̍ŋ o̍ te̍le̍ŋ ndo̍ o̍kɔ̄ɔ̄, kāni̍ fo̍ndōle̍, I̍ dɔ̍ū tīīnda᷄ŋ nūu̍ kpo̍u̍ o̍ nūm ni̍ŋ. Chɔ̍m ya̍ nɛ̄i̍ ya̍ I̍ ku̍ā cho̍o̍ wo̍ Mɛ̄lɛ̄ka̍, kāni̍ fo̍ndōle̍, nūm ya̍ I̍ nyu̍nā di̍o̍m le̍ ya̍ Mālāa̍ ni̍.

⁹I̍ hi᷅ŋ nāa̍ nūm chu̍a̍ le̍ mā ma̍nda̍ ya̍ Mɛ̄lɛ̄ka̍ Ya̍a̍wɛ̄ɛ̄, chi̍i̍di̍a̍a̍ ya̍ ya̍a̍mɔ̍ɔ̍wa̍a̍ nīa̍a̍ o̍ bā.

¹⁰Pɛ̍ɛ̍ku̍ ya̍ mɛ̄ɛ̍ ya̍ I̍ to̍sā nyɛ᷅ ŋ̄ hɛ̄na̍ŋndo̍ yɛ̍, kāni̍ fo̍ndōle̍, nu᷄m cho̍ Mɛ̄lɛ̄ka̍ nūu̍ ni̍. To̍sa̍ mī nyi̍nā nūmndo̍ ō tōl la̍ kɔ̄ɔ̄lī, mbō kūɛ̄ a̍ ya̍ o̍ nɛ̄ī kɛ̍ndɔ̄ɔ̍ chōo̍.

¹¹Chi̍i̍ndi̍a̍a̍ ya̍ Mɛ̄lɛ̄ka̍ Ya̍a̍wɛ̄ɛ̄, mɛ̄ɛ̍ ŋ̄ chūe̍l la̍ būŋgɛ̄i̍ yɛ̍. Mɛ̄ɛ̍ ŋ̄ chō wāna̍ kɛ̍ndɛ̄ yɛ̍, yāndi̍i̍ so̍li̍ ya̍ o̍ dɛ̍nɛ̍la̍ pālāālā ya̍ I̍ cho̍ ni᷄ŋ nda̍ŋ.

¹²Le̍ kāālā bɛ̄ndū ŋ̄ kāāla̍ ya̍ wo̍, di̍u̍ ya̍a̍mɔ̍ɔ̍wa̍a̍ nīa̍a̍, ndu̍yɛ̍ wānāa̍ cho̍ ya̍ nyɛ̄ pālāa̍ tūsīo̍o̍ chōo̍ wa̍ ki̍nɛ̍i̍, mā tɛ̍ɛ̍mbu̍u̍ nda̍, kāni̍ fo̍ndōle̍, bu̍ɛ̍ī nūmndo̍ ya̍ I̍ cho̍ ni̍.