Read Southern Kisi Sa᷅m 145 Bible Online

Sa᷅m 145 - Southern Kisi bible

Sa᷅m 145

¹[111] Nu᷄m cho̍ Mɛ̄lɛ̄ka̍ nūu̍ ni̍, Māsa̍ nī bɛ̍ndo̍o̍, I̍ cho̍ nu̍m sāŋgālā, ndu̍yɛ̍ le̍ te̍le̍ŋ o̍ te̍le̍ŋ mī wa̍ wāŋnda̍ di̍mu̍llo̍ a̍ mɛ̄ɛ̍ ŋ̄ chō ō bɛ̄ndū yɛ̍ o̍kɔ̄ɔ̄.

²I̍ cho̍ nu̍m sāŋgālā lēpāa̍ o̍ lēpāa̍, ndu̍yɛ̍ le̍ te̍le̍ŋ o̍ te̍le̍ŋ mī wa̍ dīōlā nūmnda̍ŋ hēēlōo̍ te̍mā.

³Mɛ̄lɛ̄ka̍ Ya̍a̍wɛ̄ɛ̄ ā cho̍ ō bɛ̄ndū, ā chō ō bɛ̄ndū le̍ mā sɔ̄la̍ sāŋgālāa̍. Wāna̍ chi̍e̍e̍ nɔ̍lā mbō si̍na̍ mɛ̄ɛ̍ kpɛ̍ ŋ̄ cho̍ ō bɛ̄ndū yɛ̍ le̍.

⁴Mɛ̄lɛ̄ka̍, wāŋnda̍ yu̍ŋgu̍la̍ŋ o̍ yu̍ŋgu̍la̍ŋ ni᷄ŋ ā wā ni̍ŋ di̍mīo̍o̍ a̍ wa̍lta̍ nu̍mnda̍ŋ o̍kɔ̄ɔ̄. Ā wā ni̍ŋ di̍mīo̍o̍ a̍ wa̍lta̍ nu̍mndā kɔ̄ndɔ̄fi̍lta̍ŋ o̍kɔ̄ɔ̄.

⁵Ā wā ni̍ŋ di̍mīo̍o̍ a̍ nāŋɔ̄ɔ̄ nūm bɛ̍ndōo̍ o̍kɔ̄ɔ̄, ndu̍yɛ̍ a̍ kpāāyā nu̍m lēmāsāa̍. Le̍ te̍le̍ŋ o̍ te̍le̍ŋ, i̍ cho̍ wā yi̍ya᷄ŋndo̍ a̍ wa̍lta̍ nu̍mndā kɔ̄ndɔ̄fi̍lta̍ŋ o̍kɔ̄ɔ̄.

⁶Wāŋnda̍ wā ni̍ŋ di̍mīo̍o̍ a̍ wa̍lta̍ nu̍mndā kpāāyāla̍ bɛ̄ndūla̍ŋ o̍kɔ̄ɔ̄. Ndu̍yɛ̍ I̍ wa᷅ ni̍ŋ wa᷅ŋnda̍ dīmūllo̍ a̍ wa̍lta̍ nu̍mndā bɛ̄ndūla̍ŋ o̍kɔ̄ɔ̄.

⁷Wānā o̍ wānā o̍ wa᷅ ni̍ŋ di̍mīo̍o̍ a̍ wa̍lta̍ kɛ̍ndɛ̄lā bɛ̄ndūlā ŋ̄ tōsa̍ la̍ŋ o̍kɔ̄ɔ̄, ndu̍yɛ̍ mā sōli̍ chōnde̍i̍ a̍ mɛ̄ɛ̍ ŋ̄ chō wāna̍ īkɛ̄ndɛ̄ yɛ̍ o̍kɔ̄ɔ̄.

⁸Mɛ̍lɛ̄ka̍ Ya̍a̍wɛ̄ɛ̄, ā chō wāna̍ īnyīɛ̍ɛ̍, ndu̍yɛ̍ ma̍ wā wāna̍ īkɛ̄ndɛ̄. A̍ cho̍ wa᷅na̍ dɔ̍u̍nu᷄ŋ tu̍mbe̍ chɔ̍ chɔ̍ le̍, ndu̍yɛ̍ ā nɔ̄ ka̍a̍la̍ te̍le̍ŋ o̍ te̍le̍ŋ ndo̍.

⁹Mɛ̄lɛ̄ka̍ Ya̍a̍wɛ̄ɛ̄, ā cho̍ wānā kɛ̍ndɛ̄ nāa̍ wānā o̍ wānā chu̍a̍. Ā nɔ̄ nyīɛ̍ɛ̍ye̍ le̍ nyɛ̄ o̍ nyɛ̄ yōōmāā ŋ̄ to̍o̍si̍a̍a̍.

¹⁰Mɛ̄lɛ̄ka̍ Ya̍a̍wɛ̄ɛ̄, wānā o̍ wānā ŋ̄ tōōsi̍a̍a̍ a̍ bālā nūmnda̍ŋ, nda̍ kpo̍u̍ ā chō nu̍m sāŋgālā. Wānāā nūmnda̍ kpo̍u̍, ā chō dīōlā nūmnda̍ŋ hēēlū te̍mā.

¹¹Ā chō wā dīmu̍la᷅ŋndo̍ a̍ mɛ̄ɛ̍ māsāle̍ nu̍mnde̍ŋ lē chō māsāle̍ lɛ̍bɛ̍ɛ̍ yɛ̍, ndu̍yɛ̍ mā dīmi̍ a̍ kpāāyā nu̍mndo̍ o̍kɔ̄ɔ̄.

¹²O̍ ko̍ŋ, ŋ̄wāŋndā chīe̍e̍ kpo̍u̍, mā sīna̍ a̍ wa̍lta̍ nu̍mndā kpāāyāla̍ŋ o̍kɔ̄ɔ̄, ndu̍yɛ̍ mā sīna̍ a̍ mɛ̄ɛ̍ māsāle̍ nu̍mnde̍ŋ lē chō māsāle̍ lēbɛ̄ɛ̄ yɛ̍.

¹³Māsāle̍ nu̍mnde̍ŋ lē chō le̍ fɛ̍ɛ̍ŋ a̍ fɛ̍ɛ̍ŋ. Nu᷄m cho̍ māsāa̍ ŋ̄wāŋndā chīe̍e̍ cho̍o̍ le̍ fɛ̍ɛ̍ŋ a̍ fɛ̍ɛ̍ŋ ni̍. Mɛ̄lɛ̄ka̍ Ya̍a̍wɛ̄ɛ̄, ā chō wāna̍ lo᷅ o̍ lēdīōm o̍ būŋgāŋ nūmndo̍ŋ chūa̍a̍ ni᷄ŋ. Ā chō wāna̍ īnyīɛ̍ɛ̍ o̍ nyɛ̄ o̍ nyɛ̄ ni᷄ŋ ŋ̄ to̍sa̍.

¹⁴Wānāa̍ cho̍ o̍ nyɛ̄ pālāa̍ ni᷄ŋ nda̍, nūm Mɛ̄lɛ̄ka̍ Ya̍a̍wɛ̄ɛ̄ mā ma̍lā nda̍, wānāa̍ cho̍ a̍ kɔ̄ltā tāmbɛ̍i̍la̍ŋ nda̍, mā nyɔ̄ɔ̄lu̍ nda̍ kɔ̄lta̍ŋ.

¹⁵Nyāā yōōmāa̍ kpo̍u̍, nūm nda̍ tīīnda̍ŋ le̍ nda̍ nyɛ̄ dīa̍a̍ kīo̍o̍ ni̍, ndu̍yɛ̍ a̍ te̍le̍ŋnda̍ nda̍ nɔ̄ le̍ nyɛ̄ dīa̍a̍ sɔ̄lāa̍ la̍ŋ ŋ̄ kē nda̍ nyɛ̄ dīāā ni̍.

¹⁶Ndu̍yɛ̍ mā ke̍ nda̍ ndu̍ a̍ kɔ̄l nūmndo̍ kpo̍u̍, mā to̍sa̍ mī wānā o̍ wānā hi̍ni̍ kɔ̄l.

¹⁷Mɛ̄lɛ̄ka̍ Ya̍a̍wɛ̄ɛ̄, ā chō sa̍kpō o̍ nyɛ̄ o̍ nyɛ̄ ni̍ŋ ŋ̄ to̍sa̍, ndu̍yɛ̍ ā chō wāna̍ īkɛ̄ndɛ̄ nāa̍ wānā o̍ wānā chu̍a̍.

¹⁸A̍ chō ō bɛ̍ɛ̍ndīa̍ŋ le̍ te̍le̍ŋ o̍ te̍le̍ŋ le̍ wānāa̍ nyu̍nā nu̍m dīōm nda̍ mālāa̍, wānāa̍ nyu̍nā nu̍m dīōm o̍ tōnya̍a̍ chōo̍ wa̍.

¹⁹Wānāa̍ nɔ̍ bɛ̄ɛ̄le̍ŋ le̍ nūm nda̍, mā ke̍ nda̍ nyɛ̄ o̍ nyɛ̄ nda̍ hāu̍ bā, ndu̍yɛ̍ mā tūɛ̄ī pīɛ̄īlē ndāle̍ŋ, mā chīīndi̍a̍a̍ nda̍.

²⁰Wānāa̍ ka̍a̍la̍ nūm Mɛ̄lɛ̄ka̍ Ya̍a̍wɛ̄ɛ̄ wa̍ ki̍nɛ̍i̍, māndāa̍ ŋ̄ ma̍ndā nda̍ ni̍, kɛ̍ wānāā dɛ̍nɛ̍ wɔ̍ɔ̍ŋnda̍ nda̍, mā tɛ̄ɛ̄mbu̍u̍ nda̍.

²¹I̍ cho̍ Mɛ̄lɛ̄ka̍ Ya̍a̍wɛ̄ɛ̍ sāŋgālā le̍ te̍le̍ŋ o̍ te̍le̍ŋ. Nya̍ nyɛ̄ o̍ nyɛ̄ yōōmāā, lā sāŋga̍la̍ di̍o̍la̍ ndɔ̄la̍ kāsīla̍ŋ le̍ fɛ̍ɛ̍ŋ a̍ fɛ̍ɛ̍ŋ.