Read Southern Kisi Sa᷅m 148 Bible Online

Sa᷅m 148 - Southern Kisi bible

Sa᷅m 148

¹Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄! Nya̍ wānā o̍ wāna̍ cho̍ o̍ ha̍la̍a̍ ni̍ŋ cho̍o̍ cho̍o̍, lā sāŋga̍la̍ Mɛ̍lɛ̄ka̍ Ya̍a̍wɛ̄ɛ̄! Lā sāŋga̍la̍ ndu̍, nya̍ cho̍ o̍ fo̍ndāŋnda̍ŋ chōo̍ cho̍o̍ wa̍!

²Lā sāŋga̍la̍ ndu̍, nya̍ ki̍i̍la̍a̍ ndūa̍a̍ kpo̍u̍! Lā sāŋga̍la̍ ndu̍, nya̍ so̍vɛ̄i̍ya̍a̍ ndūa̍a̍ kpo̍u̍ cho̍o̍ cho̍o̍!

³Pāa̍le̍ŋ a̍ pāŋge̍i̍, lā sāŋga̍la̍ ndu̍! Lōo̍ŋ o̍ ha̍la̍a̍ ni᷄ŋ cho̍o̍ cho̍o̍ kpo̍u̍, lā sāŋga̍la̍ ndu̍!

⁴Lā sāŋga̍la̍ ndu̍, nya̍ nyɛ̄ o̍ nyɛ̍ cho̍ o̍ ha̍la̍a̍ ni᷄ŋ cho̍o̍ cho̍o̍, a̍ nya̍ mɛ̄ŋma̍ cho̍ o̍ ha̍la̍a̍ ni᷄ŋ cho̍o̍ cho̍o̍ wa̍ŋ!

⁵Nyɛ̄ o̍ nyɛ̄ cho̍ o̍ ha̍la̍a̍ ni᷄ŋ cho̍o̍ cho̍o̍, ā nɔ̄ mā sāŋga̍la̍ Mɛ̄lɛ̄ka̍ Ya̍a̍wɛ̄ɛ̄! Kāni̍ fo̍ndōle̍, ndu̍ to̍o̍si̍a̍a̍ nyɔ̄ɔ̍ŋ mu᷅ŋ kpo̍u̍ a̍ dīōmnde̍ fu̍la̍ ndu̍ o̍ sōndō le̍ŋ ni̍.

⁶Ndu̍ to̍o̍si̍a̍a̍ mu̍ŋ o̍ fo̍ndāŋndā ŋ̍ cho̍ la̍ŋ le̍ fɛ̍ɛ̍ŋ a̍ fɛ̍ɛ̍ŋ ni̍. Ndu̍yɛ̍ nyɛ̄ o̍ nyɛ̄ o̍ di̍mu̍l mu̍ŋ le̍ tōsāa̍ pɛ̍, ŋ̄ so̍lī ndu̍ dīōm te̍.

⁷Lā sāŋga̍la̍ Mɛ̍lɛ̄ka̍ Ya̍a̍wɛ̄ɛ̄ o̍ chi̍e̍ēŋndo̍ ni᷄ŋ, nya̍ nyāā yōōmāa̍ tɔ̍ɔ̍ma̍a̍ bɛ̍ndūa̍a̍ o̍ pēe̍ mɛ̄ŋmā īhɛ᷄llo̍ ni᷄ŋ ni̍, a̍ nya̍ nyāā yōōmāa̍ kpo̍u̍ o̍ fo̍ndāŋndā yīŋgi̍lɛ̍i̍la̍ bɛ̍ndūla̍ŋ,

⁸a̍ ta̍ŋnda̍ŋ, a̍ lōōŋ ŋ̍kpu̍ŋgba᷄ŋ, a̍ mɔ᷄m ŋ̍kpu̍ŋgbāa̍, ndu̍yɛ̍ a̍ mɔ᷄m yu̍u̍yu̍u̍ wo̍, a̍ hūēīyīī bɛ̄ndūe̍i̍, nda̍ kpo̍u̍ mā to̍sā nyɛ̄ Mɛ̄lɛ̄ka̍ ō dīmūl nda̍ wo̍.

⁹Lā sāŋga̍la̍ ndu̍, nya̍ pēmbūŋ pɔ̄mbɔ᷄ŋ, a̍ nya̍ lūāŋūŋ bɛ̄ndo᷄ŋ, a̍ yɔ̄mīī kūāmɛ̄i̍, a̍ būndɛ̍la̍ŋ,

¹⁰a̍ vīsīāā yōndūa̍a̍, ndu̍yɛ̍ a̍ chɔ̄lūa̍a̍ kpo̍u̍, a̍ nyāā yōōmāa̍ ku̍ā lɛ̄ŋ o̍ dēmbēla̍ŋ chōo̍ wa̍, a̍ yōūwāa̍ ba̍lū cho̍o̍ cho̍o̍ wa̍.

¹¹Lā sāŋga̍la̍ ndu̍, nya̍ māsāā bɛ̍ndūa̍a̍, a̍ nya̍ wāŋnda̍ kpo̍u̍, a̍ nya̍ wānāā bɛ̄ndūa̍a̍, ndu̍yɛ̍ a̍ nya̍ cho̍ wāŋnda̍ chōo̍ ma̍sāa̍ o̍ chi̍e̍ēŋndo̍ ni᷄ŋ nda̍.

¹²Lā sāŋga̍la̍ ndu̍, nya̍ ŋ̄wāŋndā chīe̍e̍ kpo̍u̍, chūā lāāndū ni̍, chūā pīāāndū ni̍, bɛ̄ndū yūvɛ̍i̍ ni̍, chūāāmbɔ̄ pɔ̄mbɔ̄ ni̍.

¹³Ā nɔ̄ mā sāŋga̍la̍ Mɛ̄lɛ̄ka̍ Ya̍a̍wɛ̄ɛ̄, mɛ̄ɛ̍ nda̍ chō kpo̍u̍. Kāni̍ fo̍ndōle̍, dīōlā ndɔ̄la̍ŋ lā chō lā bɛ̄ndū mi̍ lā hīāū lādīō o̍ lādīō o̍ chi̍e̍ēŋndo̍ ni᷄ŋ. Ndu̍yɛ̍ nāŋɔ̄ɔ̄ ndɔ̄ bɛ̍ndōo̍ ō chō ō tīūwāā o̍ chi̍e̍ēŋndo̍ ni᷄ŋ, a̍ ɛ̄chɛ̍nɛ̄ kpo̍u̍.

¹⁴Ndu̍ to̍sa̍ ni̍ mi̍ lɛ̄ŋnde̍ wānāā ndūa̍a̍ lē sīmnu᷄ŋ lɛ᷅ŋndē kpāāyāle̍ bɛ̍ndū, le̍ mī wānāa̍ ndūa̍a̍ cho̍ le̍ ndu̍ wa̍, ā sɔ̄la̍ bɛ̄ɛ̄le̍ŋ, nda̍ yɔ̍nūŋ ni̍ māā wāŋnda̍ I̍sɔ̄lūɛ̄ī, wānāā ndūa̍a̍ kɔ̄l la̍. Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄!