Read Southern Kisi Sa᷅m 19 Bible Online

Sa᷅m 19 - Southern Kisi bible

Sa᷅m 19

¹[17] Ha̍la̍a̍ o̍ chɔ᷄m kɔ̄ndɔ̄fi̍li̍yɛ̍i̍ Mɛ̄lɛ̄kɛ̍i̍, Ō chō dīmīo̍o̍ a̍ wa̍lta̍ Mɛ̄lɛ̄ka̍ tōsa̍ a̍ bālā ndɔ̄la̍ŋ nda̍ŋ o̍kɔ̄ɔ̄.

²Lēpāla̍ o̍ lēpāla̍ le̍ si̍ɔ̍ lē chō dīmīo̍o̍ a̍ kɔ̄ndɔ̄fi̍li̍yɛ̍ī Mɛ̄lɛ̄kɛ̍i̍ o̍kɔ̄ɔ̄. Mānyūm o̍ mānyūm ma̍ to̍l mā chō chɔ̄mndo̍ a̍ bɔ̄ɔ̍bɔ̍ɔ̍yɛ̍ī ndūɛ̍i̍ o̍kɔ̄ɔ̄.

³Nyɔ̄ɔ̍ŋ mu᷅ŋ ŋ̄ su̍ū nu̍a̍ā le̍, ndu̍yɛ̍ wānā tu̍i̍ī di̍ōmndā nyɔ̄ɔ̍ŋ mu᷅ŋ sūāā la̍ŋ te̍.

⁴Kɛ̍ ndu̍yɛ̍ nyɛ̄ ŋ̍ di̍mi̍ wo̍ tīūwo̍ chi̍e̍ēŋndo̍ kpo̍u̍. Yōōŋgu̍ kōŋ kɔ̄la̍ŋ bā o̍ bā fe̍e̍ o̍ chi̍e̍ēŋndo̍ chōo̍. Mi̍ Mɛ̄lɛ̄ka̍ tōōsīāl pāa̍le̍ŋ fo̍ndāŋ le̍ wa᷅ wo̍ o̍ ha̍la̍.

⁵Tē lē fūla̍ nāa̍ ndūāā ka̍ŋ īdīi̍ pɛ̍, nu̍a̍ ŋ̄ chā āā wānā pɔ̍nɔ̍ cho̍ la̍nɔ̍ɔ̍ chūa̍a̍ sɛ̄nɛ̄īyo̍ cho̍ fūlāa̍ o̍ ndu̍lo̍ chi̍ɛ̍īni̍ŋ a̍ kɔ̄l kɛ̄ndɔ̄ɔ̍ ni̍. Kɛ̄lɛ̄ŋgāā lē wā ko̍ mɛ̄ɛ̍ wāna̍ nya̍a̍nūŋ nya̍a̍nɔ᷄ŋ lābɛ̄ɛ̄la̍a̍ wo̍ ō wā nu̍a̍ā a̍ kɔ̄l kɛ̄ndɛ̄ le̍ nyāānɔ᷄ŋndo̍ nda̍ chāāŋāā ndūa̍a̍ yɛ̍.

⁶Tē pāa̍le̍ŋ le̍ chɛ᷄ŋ īdīi̍ o̍ ha̍la̍a̍ ni᷄ŋ ba̍a̍ pīlɔ̍ɔ̍ pɛ̍, lē lo̍ kɔ̄la̍ŋ kpo̍lo̍to̍to̍ mī lē fūūlu̍u̍ o̍ ha̍la̍a̍ kūmbōo̍ pīlɔ̍ɔ̍ di̍. Ndu̍yɛ̍, nyɛ̄ o̍ nyɛ̄ nɔ̍lā ha̍ŋgu̍lu̍ ndɔ̄ɔ̍ vīōŋnɔ᷄ŋ te̍.

⁷Sāwāla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ lā chō sa̍kpō. Lā lūēī na̍a̍ dīāllūŋ kālāŋ sɛ̄nɛ̄īyo̍ŋ. Sɔ̄ɔ̍ŋ Mɛ̄lɛ̄ka̍ Ya̍a̍wɛ̄ɛ̄ di̍mūl na̍a̍ le̍ tōsāa̍ wo̍ŋ ŋ̄ chō sɔ̄ɔ̍ŋ wānā ti̍i̍nda̍ŋ. Sɔ̄ɔ̍ŋ ndɔ̄ɔ̍ŋ ŋ̄ kē wa̍nāa̍ nɔ̍ kɔ̄l kālu̍ le̍ wa̍ tāāsi̍o̍o̍.

⁸Pɛ̄ɛ̄kūla̍ Mɛ̄lɛ̄ka̍ Ya̍a̍wɛ̄ɛ̄la̍ŋ lā chō sa̍na̍a̍. Lā kē wa̍nā kɔ᷅l kɛ̄ndɔ̄ɔ̍. Sāwāla̍ Mɛ̄lɛ̄ka̍ Ya̍a̍wɛ̄ɛ̄la̍ŋ lā chō sa̍kpō. Lā kē na̍a̍ sīnā pɛ̄ŋgo̍o̍ o̍ yōōmūlā nāāla̍ŋ ni᷄ŋ.

⁹Ō chō sūɛ̍i̍ kɛ̍ndɛ̄ mī wānā so̍o̍lu̍u̍ Mɛ̄lɛ̄ka̍ Ya̍a̍wɛ̄ɛ̄. Wāŋnda̍ chō lō ndu̍ sōōlūūwo̍ le̍ fɛ̍ɛ̍ŋ a̍ fɛ̍ɛ̍ŋ. Sɔ̄ɔ̍ŋ o̍ di̍mī māā wāŋnda̍ ā tōsa̍ wo̍ŋ ŋ̄ chō sɔ̄ɔ̍ŋ tōnya̍. Lāka̍fā o̍ lāka̍fā lā cho̍ le̍ni̍ŋ te̍.

¹⁰Ō bɛ̄ndā mī wānā ye̍e̍ma̍ sɔ̄ɔ̍ŋ mu̍ŋ mbō hīōū bɛ̍ɛ̍ mɛ̄ɛ̍ wāŋnda̍ yēēmā ko̍o̍līi̍yo̍ŋ yɛ̍, mbō hīōū mɛ̄ɛ̍ nda̍ yēēmā ko̍o̍līi̍ŋ kɛ̍ndɛ̄ kɛ̍ndɔ᷄ŋ yɛ̍. Sɔ̄ɔ̍ŋ ndɔ̄ɔ̍ŋ ŋ̄ yēēla̍ ŋ̄ hīōū līa̍a̍ŋ, ŋ̄ yēēla̍ ŋ̄ hīōū lɛ̄ma̍ kɛ̍ndɛ̄ kɛ̍ndīa̍ŋ.

¹¹Mɛ̄lɛ̄ka̍, sɔ̄ɔ̍ŋ nu̍mndo̍ŋ ŋ̄ tōsā mī bu̍ɛ̍ī nūmndo̍ ō sɔ̄la̍ sīlāa̍. Tē wānā to̍sa̍ nyɛ̄ ŋ̍ di̍mi̍ wo̍ pɛ̍, wānā ko̍ŋ tɔ̄nɔ̄ bɛ̍ndōo̍ pi̍la̍ o̍ sɔ̍lā ni̍.

¹²Wānā pi̍la̍ a̍ si̍nā bi̍o̍ndɔ᷄ŋ nu̍m te̍. Ma̍l la̍ le̍ sɔ̄ɔ̍ŋ wɔ̍ɔ̍ŋ ya̍ to̍sa̍ I̍ si̍nā pɛ̍ŋgu̍ le̍ wo̍ŋ.

¹³Ma̍nda̍ ya̍, sūɛ̍i̍ ya̍ si̍nā kpɛ̍sɛ̍kɛ̍ɛ̍ māā yɔ̄ŋ wɔ̄ɔ̍ŋndo̍ I̍ cho̍ ni̍ ve̍, māā I̍ to̍sā ndi̍ le̍. Chɛ᷅l mī yɔ̄ŋ wɔ̄ɔ̍ŋ wāā le̍nde̍ o̍ nɔ̍ ya̍ kpāāyāa̍ chōo̍ le̍. Tē ke̍ŋ I̍ yɔ̍nūŋ pɛ̍, I̍ nɔ̍ sɔ᷅ŋ o̍ sɔ̄ŋ te̍. Ndu̍yɛ̍, I̍ si̍mnūŋ ndɛ̍ wānā kɛ̍yāā nu̍m dīōm mī to̍sa̍ yɔ̄ŋ wɔ̄ɔ̍ŋ te̍.

¹⁴O̍o̍ Mɛ̄lɛ̄ka̍ Ya̍a̍wɛ̄ɛ̄, nu᷄m cho̍ pōū kpo̍o̍wa̍ ma̍ndā ya̍ wo̍, wāna̍ ni̍ pi̍ŋīa̍a̍ ya̍ wo̍. I̍ cho̍ pīɛ̄īle̍ŋ māā dīōmndā nīla̍ŋ, a̍ yīya᷄ŋnda̍ nīla̍ŋ, mī lā bɛ̄nda̍ nu̍m o̍ hɔ̄l fɔ̍.