Read Southern Kisi Sa᷅m 20 Bible Online

Sa᷅m 20 - Southern Kisi bible

Sa᷅m 20

¹[18] Ŋ̄ chō Mɛ̄lɛ̄ka̍ pīɛ̄īyo̍ māā nūm Māsā bɛ̍ndōo̍, tē a̍ nyu̍na̍ Mɛ̄lɛ̄ka̍ Ya̍a̍wɛ̄ɛ̄ le̍ nu̍m mālāa̍ a̍ te̍le̍ŋnda̍ nyɛ̄ pālāāla̍ŋ pɛ̍, mbɔ̄ ō mūli̍ nu̍m dīōm mbō māla̍ nu̍m fɔ̍. Mbɔ̄ Mɛ̄lɛ̄ka̍ Che̍kɔ̍pū wo̍, ō mānda̍ nu̍m fɔ̍.

²Mbɔ̄ ō yɔ̄ŋgu̍ nu̍m mālāa̍ chɔ̄nɔ᷄ŋndo̍ ō chīɛ̍i̍ Mɛ̄lɛ̄ka̍a̍ ni᷄ŋ fɔ̍. Mbɔ̄ ō ke̍ nu̍m dɛ̍nɛ̍ kɛ̍ndɔ̄ɔ̍ chɔ̄nɔ᷄ŋndo̍ o̍ Pēmbīī Sa̍a̍yɔ̄ŋnde̍ chōo̍ fɔ̍.

³Mbɔ̄ nyɛ̄ o̍ nyɛ̄ ŋ̄ chō Mɛ̄lɛ̄ka̍ kīo̍o̍ ō chɛ᷄l ndu̍ fɔ̍. Sa̍lālā lūāmāālā ŋ̄ chō sōlīo̍o̍ o̍ ndu̍lo̍ la̍ŋ, ō hi̍ni̍ kɔ̍l a̍ la̍ŋ mbō chɛ᷄l la̍ŋ fɔ̍.

⁴Sɔ̄ɔ̍ŋ ŋ̄ yēēma̍ o̍ kɔ̄l nūmndo̍ ni᷄ŋ ndo̍ŋ ō ke̍ nu̍m mu̍ŋ fɔ̍. Ndu̍yɛ̍ sɔ̄ɔ̍ŋ ŋ̄ kɛ̄ɛ̄si̍a̍a̍ le̍ tōsāa̍ wo̍ŋ ki̍nɛ̍i̍, Mɛ̄lɛ̄ka̍ ō māla̍ nu̍m mā ti̍u̍ mu̍ŋ bā fɔ̍.

⁵Ndu̍yɛ̍ tē ā yēm ya̍a̍mɔ̍ɔ̍wa̍ pɛ̍, na̍a̍ kpo̍u̍ ŋ̄ chō dēŋī a̍ kɔ̄l kɛ̄ndɔ̄ɔ̍ mī ŋ̄ dɔ̄ɔ̄nu᷄ŋ nya̍a̍le̍, mī ŋ̄ sōli̍ chōndo̍ŋ mī ŋ̄ sāŋga̍la̍ Mɛ̄lɛ̄ka̍ nāa̍. Mbɔ̄ sɔ̄ɔ̍ŋ ŋ̄ chō Mɛ̄lɛ̄ka̍ Ya̍a̍wɛ̄ɛ̄ dīmūllo̍ o̍ pīɛ̄īle̍ŋ ni᷄ŋ ki̍nɛ̍i̍ yo̍ŋ, ō tōsa̍l nu̍m mu̍ŋ fɔ̍.

⁶I̍ si̍nā māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ māsa̍ ndɔ̄ɔ̍ mālā, māsa̍ o̍ su̍u̍ chūɛ̄īya̍ŋ o̍ lēbōl mbo̍ sīīŋgūū ndu̍ māsāa̍ wo̍. Ō chō lō ɛ̄chɛ̍nɛ̄ o̍ ndu̍lo̍ mbō mūli̍ ndu̍ dīōm, mbō tōsa̍ a̍ kpāāya̍ ndɔ̄ɔ̍ mī māsa̍ o̍ hɛ̍li̍ wo̍ o̍ yēm chɔ̄ūlā fāŋgā.

⁷Wāŋnda̍ ā pūm o̍ nyɛ̄m ndāa̍ŋ chɔ̄ūwo̍ŋ ni᷄ŋ nda̍ dɔ̄ū tīīnda᷄ŋ ndāa̍ ni̍, mɛ̄ɛ̍ nyɛ̄m nyāāna᷄ŋ su̍a̍a̍ ā nāŋ ndo̍ŋ ŋ̄ chō nu̍a̍ā yɛ̍, a̍ su̍a̍ā chɔ̄ūwa̍. Kɛ̍ na̍a̍ na̍a̍, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ndu̍ na̍a̍ ŋ̄ tīīnda̍ŋ ni̍.

⁸Kɛ̍ wānāā wāā nu̍a̍ā ŋ̄ chō nda̍ yōmɔ̄ɔ̄. Ā chō dēlɔ̄ɔ̄, kɛ̍ mī na̍a̍ ŋ̄ lo̍ īsīsi̍ yi̍ a̍ dīāllūŋ kālā.

⁹O̍o̍ Mɛ̄lɛ̄ka̍ Ya̍a̍wɛ̄ɛ̄, to̍sa̍ mī māsā na̍a̍ bɛ̄ndōo̍ ō yēm ya̍a̍mɔ̍ɔ̍wa̍. Tē ŋ̄ wa̍ nu̍m pīɛ̄īle̍ŋ pɛ̍, mu̍li̍ na̍a̍ dīōm fɔ̍.