Read Southern Kisi Sa᷅m 24 Bible Online

Sa᷅m 24 - Southern Kisi bible

Sa᷅m 24

¹[23] Mɛ̄lɛ̄ka̍ Ya̍a̍wɛ̄ɛ̄ ndu̍ nɔ̍ chi̍e̍ēŋndo̍ kpo̍u̍ ni̍, a̍ nyɛ̄ o̍ nyɛ̍ cho̍ lēni᷄ŋ. Chi̍e̍ēŋndo̍ kpo̍u̍ a̍ wānā o̍ wāna̍ cho̍ lēni᷄ŋ, Mɛ̄lɛ̄ka̍ nɔ̍ ni̍.

²Mbo̍ tāŋgūl ndu̍ o̍ mɛ̄ŋmā yīŋgi̍lɛ̍i̍ma̍ cho̍ o̍ chi̍e̍ēŋndo̍ bɛ̄ŋgu̍ wa̍ŋ chōo̍. O̍ mɛ̄ŋmā yīŋgi̍lɛ̍i̍ma̍ bɛ̍ndūa̍ŋ bɛ̄ŋgu̍ di̍ o̍ chɛ̍ŋ a̍ chīīyīī ndūɛ̍i̍ chɔ̄ūwɔ̄ɔ̍ ni̍.

³Ō nɛ̄ɛ̍ni̍a̍ā cho̍ yɛ̍ ā bɛ̄ndāā mā he᷄l o̍ pēmbīi̍ Mɛ̄lɛ̄ka̍ Ya̍a̍wɛ̄ɛ̄ ve̍ chōo̍? Ō nɛ̄ɛ̍ni̍a̍ā cho̍ yɛ̍ ā bɛ̄ndāā mā lūɛ̄ī o̍ chīɛ̄ī ndɔ̍ kāsīo̍o̍ ni᷄ŋ?

⁴Wānāa̍ nɔ̍ ka̍ālā kɛ̄ndɛ̄la̍ŋ ndu̍yɛ̍ ma̍ nɔ̄ kɔ̄ltā dīāndāāla̍ŋ nda̍, a̍ so̍o̍lūū nyɛ̄m chēle̍ŋ, kɛ̄lɛ̄ŋgāā mā chūa̍ būŋgāŋ lāchōōwā le̍ wa̍, nda̍ lu̍ɛ̍ī lo̍ŋ ni̍.

⁵Wānāā wāā nu̍a̍ā, Mɛ̄lɛ̄ka̍ Ya̍a̍wɛ̄ɛ̄ chō nda̍ sa̍lā dɔ̄wɔ̄ɔ̄, ndu̍yɛ̍ mbō pīŋi̍ nda̍, ndu̍yɛ̍ mbō chu̍a̍ nda̍ māā wānāa̍ cho̍ sa̍kpō ndu̍ pi̍la̍ o̍ hɔ̄l.

⁶Wānāā wāā nu̍a̍ā nda̍ hu᷅ŋ nāa̍ Mɛ̄lɛ̄ka̍ chūā ni̍, nda̍ si᷅m Mɛ̍lɛ̄ka̍ Che̍kɔ̍pū wo̍ o̍ hɔ̄l mā sōōlu̍u̍ ndu̍ ni̍.

⁷Lā kūmbi̍ di̍ōla̍ŋ wo̍ŋgbo̍ŋ, lā kūmbi̍ di̍ōla̍ cho̍ la᷅ŋ kāni̍ ma̍si̍ndɛ̄ la̍ŋ, lā kūmbi̍ la̍ŋ mī māsā bɛ̍ndū cho̍ o̍ nāŋɔ̄ɔ̍ ni᷄ŋ ndo̍ lūɛ̄ī.

⁸Ō nɛ̄ɛ̍nɛ̍ cho̍ yɛ̍ māsā bɛ̍ndū cho̍ ko̍ŋ o̍ nāŋɔ̄ɔ̍ ni᷄ŋ ndo̍? Mɛ̄lɛ̄ka̍ Ya̍a̍wɛ̄ɛ̄ ndu̍ cho̍ māsā bɛ̍ndū ko̍ŋ ni̍. Ō chō wāna̍ dīāllūŋ kālā, ndu̍yɛ̍ ō chō wāna̍ kpāāyā bɛ̍ndū. Ndu̍ ya᷅m chɔ̍ūla̍ŋ ni̍.

⁹Lā kūmbi̍ di̍ōla̍ŋ wo̍ŋgbo̍ŋ, lā kūmbi̍ di̍ōla̍ cho̍ la᷅ŋ kāni̍ ma̍si̍ndɛ̄ la̍ŋ. Lā kūmbi̍ la̍ŋ mī māsā bɛ̍ndū cho̍ o̍ nāŋɔ̄ɔ̍ ni᷄ŋ ndo̍ lūɛ̄ī.

¹⁰Ō nɛ̄ɛ̍nɛ̍ cho̍ yɛ̍ māsā bɛ̍ndū cho̍ ko̍ŋ o̍ nāŋɔ̄ɔ̍ ni᷄ŋ ndo̍? Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, ndu̍ cho̍ māsā bɛ̍ndōo̍ o̍ cho̍ o̍ nāŋɔ̄ɔ̍ ni᷄ŋ ndo̍ ni̍.