Read Southern Kisi Sa᷅m 25 Bible Online

Sa᷅m 25 - Southern Kisi bible

Sa᷅m 25

¹[24] Mɛ̄lɛ̄ka̍ Ya̍a̍wɛ̄ɛ̄, I̍ cho̍ sūɛ̍i̍ nāa̍ nūm chu̍a̍ o̍ pīɛ̄īle̍ŋ ni᷄ŋ.

²Nūm ya̍ I̍ ti̍i̍nda̍ŋ ni̍, Mɛ̄lɛ̄ka̍ nūu̍, le̍la̍ŋ chɛ᷅l mī ya̍a̍mɔ̍ɔ̍wa̍a̍ nīa̍a̍ ā yēm ya̍ mī si̍ɔ̍mbu̍la̍ bi̍ī ya̍ le̍. Chɛ᷅l mī ya̍a̍mɔ̍ɔ̍wa̍a̍ nīa̍a̍ ā ma᷄m ya̍ le̍.

³Wānāa̍ du̍a̍ū ti̍i̍nda᷄ŋ ndāa̍ o̍ nūm ni̍ŋ nda̍, chɛ᷅l mī si̍ɔ̍mbu̍la̍ bi̍ī nda̍ le̍. Wānāa̍ si̍mu̍l nu̍m ha̍ā o̍ fo̍ndō fu̍u̍wo̍ chōo̍ wa̍, nda̍ ŋ̄ tōsa̍ ni̍ mī si̍ɔ̍mbu̍la̍ŋ lā bīī nda̍ le̍.

⁴Mɛ̄lɛ̄ka̍ Ya̍a̍wɛ̄ɛ̄, chɔ̍m ya̍ nɛ̄ī nu̍m tōnya̍a̍, mā pɛ̍ɛ̍ku̍ ya̍ sɔ̄ɔ̍ŋ nu̍mndo̍ŋ.

⁵Pɛ̍ɛ̍ku̍ ya̍ tōnya̍ cho̍ a̍ nūm o̍kɔ̄ɔ̄ wo̍, mī ku̍ɛ̄ lēchōo̍, kāni̍ fu̍u̍le̍, nu᷄m cho̍ Mɛ̄lɛ̄ka̍ pīŋī ya̍ wo̍ ni̍, ndu̍yɛ̍, nūm ya̍ ti̍i̍nda̍ŋ lɔ̍ɔ̍ lɔ̍ɔ̍ ni̍.

⁶Mɛ̄lɛ̄ka̍ Ya̍a̍wɛ̄ɛ̄, lo̍o̍nu̍ŋ a̍ mɛ̄ɛ̍ ŋ̄ chō wāna̍ īnyīɛ̍ɛ̍, ma̍ wā wāna̍ ka̍a̍la̍ ŋ̄wāŋndā chīe̍e̍ kāni̍ ma̍si̍ndɛ̄ yɛ̍.

⁷Bīōndɔ᷄ŋ o̍ bīōndɔ᷄ŋ ya̍ I̍ to̍sa̍, a̍ yɔ̄ŋ o̍ yɔ̄ŋ wɔ̄ɔ̍ŋ ya̍ I̍ to̍sa̍ o̍ īchūāāmbɔ̄ya̍, pu̍ɛ̍ɛ̍nu̍ŋ a̍ la̍ŋ kpo̍u̍. Mɛ̄lɛ̄ka̍ Ya̍a̍wɛ̄ɛ̄, a̍ ka̍a̍la̍ wānāā nūmnda̍ le̍ lɔ̍ɔ̍ lɔ̍ɔ̍, ndu̍yɛ̍, ma̍ wā nda̍ dɛ̍nɛ̍ kɛ̍ndɔ̄ɔ̍ tōsāllo̍. Yi̍ya̍ŋ a̍ he̍ī mā ma̍l la̍ le̍ yɔ̄ŋndā nīla̍ŋ wɔ̍ɔ̍ŋnda̍ŋ.

⁸Mɛ̄lɛ̄ka̍ Ya̍a̍wɛ̄ɛ̄ cho̍ wānā kɛ̍ndɛ̄, ndu̍yɛ̍, ō chō wānā sa̍kpō. Le̍ he̍ī, ō chō wānāā yɔ̄ŋ wɔ̄ɔ̍ŋnda̍ pɛ̄ɛ̄kū a̍ mɛ̄ɛ̍ nda̍ kūā o̍ nɛ̄i̍ ndɔ̄ sa̍na̍a̍ wo̍ chōo̍ yɛ̍.

⁹Wānāa̍ tu̍sīŋ, ā to̍sā yo̍ŋgā le̍ wa̍, chɔ̄mndo̍ o̍ chɔ᷅m nda̍ nɛ̄i̍ ndɔ̄ sa̍kpōo̍ ni̍, o̍ ko̍ŋ, mbō pɛ̄ɛ̄ku̍ nda̍, mā tōsa̍ nyɛ̄ o̍ hɛ̍na̍ŋ nda̍ mā tōsa̍ wo̍.

¹⁰Kpe̍ma̍ Mɛ̄lɛ̄ka̍ Ya̍a̍wɛ̄ɛ̄ yi̍i̍ nda̍ wānāā ndūa̍a̍ wo̍, wānā o̍ wāna̍ to̍sa̍ nyɛ̍ di̍mi̍ŋ o̍ kpe̍ma̍ ko̍ŋ ni᷄ŋ ndo̍ pɛ̍, ndu̍yɛ̍, mbō tōsa̍ nyɛ̄ Mɛ̄lɛ̄ka̍ dīmi̍ wo̍ pɛ̍, tōsāa̍ Mɛ̄lɛ̄ka̍ tōsā nyɛ᷅ o̍ chu̍a̍ būŋgɛ̄i̍ yo̍ ni̍, mbō māla̍ wānā ko̍ŋ māā wāna̍ o̍ ka̍a̍la̍, mbō chɔ᷄m wānā ko̍ŋ sa̍kpōyɛ̍i̍ ndūɛ̍i̍.

¹¹Mɛ̄lɛ̄ka̍ Ya̍a̍wɛ̄ɛ̄, mi̍ chē bɛ̍ɛ̍ mi̍ yɔ̄ŋndā wɔ̄ɔ̍ŋndā ya̍ I̍ to̍sa̍ la̍ŋ lā wā ta̍u̍ ni̍, kɛ̍ tūīīnu̍ŋ ya̍ īnyīɛ̍ɛ̍ mā ma̍l la̍ le̍ yɔ̄ŋndā nīla̍ wɔ̍ɔ̍ŋndā lāŋ, le̍ mī wāŋnda̍ ā ke̍ nu̍m bɛ̄ɛ̄le̍ŋ.

¹²Wānā o̍ wāna̍ nɔ̍ bɛ̄ɛ̄le̍ŋ le̍ Mɛ̄lɛ̄ka̍ Ya̍a̍wɛ̄ɛ̄ pɛ̍, wānā wa̍ā le̍nde̍ ndu̍ Mɛ̄lɛ̄ka̍ Ya̍a̍wɛ̄ɛ̄ o̍ pɛ̍ɛ̍kū le̍ kɔ̄la̍ŋ o̍ nɛ̄i̍ ndɔ̄ɔ̍ chōo̍ ni̍.

¹³Wānā wa̍ā le̍nde̍, le̍ te̍le̍ŋ o̍ te̍le̍ŋ o̍ dɛ̍nɛ̍ kɛ̍ndɔ̄ɔ̍ ni᷄ŋ o̍ wa᷅ ni̍. Ndu̍yɛ̍ chūāūwāā ndūa̍a̍ nda̍ lo̍ō ni̍ŋ lɛ᷅ŋnde̍ŋ ni̍.

¹⁴Wānāa̍ to̍sā nyɛ᷅ Mɛ̄lɛ̄ka̍ Ya̍a̍wɛ̄ɛ̄ di̍mī wo̍ wa̍, nda̍ cho̍ ndi̍a̍a̍mɔ̍ɔ̍wa̍a̍ ndūa̍a̍ ni̍, ndu̍yɛ̍ nda̍ o̍ chɔ᷅m mɛ̄ɛ̍ kpe̍ma̍ o̍ yi̍i̍ nda̍ wānāā ndūa̍a̍ wo̍ chō sūɛ̍i̍ kpe̍e̍kpe̍i̍ yɛ̍ ni̍.

¹⁵Le̍ lɔ̍ɔ̍ lɔ̍ɔ̍ fe̍e̍ Mɛ̄lɛ̄ka̍ Ya̍a̍wɛ̄ɛ̄ ya̍ I̍ ti̍i̍nda̍ŋ le̍ ya̍ mālāa̍ nī, kāni̍ fu̍u̍le̍ tē I̍ ha̍u̍ pɛ̍ mɛ̄ɛ̍ yōūwo̍ hāū o̍ yālāa̍ ni᷄ŋ yɛ̍, ndu̍ so̍lī ya̍ ni̍.

¹⁶O̍o̍ Mɛ̄lɛ̄ka̍ Ya̍a̍wɛ̄ɛ̄, mu̍li̍ hɔ᷅lla̍ o̍ ya̍ lo̍ mā ma̍la̍ ya̍ fɔ̍, kāni̍ fu̍u̍le̍, I̍ cho̍ bɔ̄ɔ̍ ya̍ pīlɛ̍ kpe̍e̍le̍, ndu̍yɛ̍, I̍ cho̍ ni᷅ŋ ō yɔ̄kpāā ta̍u̍.

¹⁷So̍li̍ ya̍ būūla᷄ŋnda̍ŋ o̍ kɔ̄l. Ba̍ŋa̍ ya̍ o̍ nyɛ̄ pālāa̍ ho̍ō ni᷄ŋ.

¹⁸Yi̍ya̍ŋ a̍ mɔ̍nɛ̍i̍ ya̍ cho̍ ni᷄ŋ nde̍, a̍ būūla᷄ŋnda̍ nīla̍ŋ, mā ma̍l la̍ le̍ yɔ̄ŋndā nīla̍ wɔ̍ɔ̍ŋnda̍ŋ.

¹⁹To̍fa̍ wɔ̍ ya̍a̍mɔ̍ɔ̍wa̍a̍ fa̍ŋgāā ya̍ I̍ nɔ̍ wa̍. To̍fa̍ wɔ̍ mɛ̄ɛ̍ nda̍ tu᷄l la̍ yɛ̍le̍ŋ tūl bɛ̄ndōo̍ yɛ̍.

²⁰O̍o̍ Mɛ̄lɛ̄ka̍ Ya̍a̍wɛ̄ɛ̄, ma̍nda̍ yo̍o̍mū nūu̍. Pi̍ŋi̍ yo̍o̍mū nūu̍. Chɛ᷅l mī ya̍a̍mɔ̍ɔ̍wa̍ yēm ya̍ mī si̍ɔ̍mbu̍la̍ŋ lā bīī ya̍ le̍, kāni̍ fu̍u̍le̍, nāa̍ nūm chu̍a̍ ya̍ I̍ hi᷅ŋ le̍ ya̍ māndāa̍ ni̍.

²¹O̍o̍ Mɛ̄lɛ̄ka̍ Ya̍a̍wɛ̄ɛ̄, I̍ cho̍ nu̍m nyūnāa̍ mā si̍i̍ŋgu̍u̍ ya̍ wānā sa̍kpō nu̍m o̍ hɔ̄l, kāni̍ fu̍u̍le̍, nūm ya̍ ti̍i̍nda̍ŋ ni̍.

²²O̍o̍ Mɛ̄lɛ̄ka̍, ba̍ŋa̍ na̍a̍ o̍ kpūndɛ̍la̍ŋ ni᷄ŋ, wānāā nūmnda̍ I̍sɔ̄lūɛ̄ī.