Read Southern Kisi Sa᷅m 27 Bible Online

Sa᷅m 27 - Southern Kisi bible

Sa᷅m 27

¹[26] Mɛ̄lɛ̄ka̍ Ya̍a̍wɛ̄ɛ̄ ndu̍ cho̍ nyɛ̄ nī wa̍wo̍ŋndo̍ ni̍, ndu̍yɛ̍ ndu̍ pi̍ŋī ya̍ ni̍, le̍ he̍ī, I̍ yɔ᷅ŋ i̍si̍o̍o̍ŋ le̍ wānā o̍ wānā le̍. Mɛ̄ɛ̍ fo̍ndāŋndo̍ wā nu̍a̍ā ō bālāā a̍ sāāsā ka̍lā ka̍lāa̍ le̍ ndu̍ māndāa̍ yɛ̍, le̍nde̍ Mɛ̄lɛ̄ka̍ Ya̍a̍wɛ̄ɛ̄ ma̍ndā yo̍o̍mū nūu̍ ni̍. Le̍la̍ŋ, sīōōŋīi̍ bi̍ī ya̍ le̍ wānā o̍ wānā le̍.

²Ā yɔ᷄ŋ bɛ̍ɛ̍ mī wānāā dɛ̍nɛ̍ wɔ̍ɔ̍ŋnda̍ ā hu᷄ŋ de᷅l la̍ chōo̍ le̍ ya̍ dīyɔ̄ɔ̍, ā nɔ̍lā ya̍ le̍, yōmɔ̄ɔ̍ ya̍ I̍ ya᷅m nda̍ ni̍.

³Ā yɔ᷄ŋ bɛ̍ɛ̍ mī so̍vɛ̄i̍ya̍ hīŋ fāŋgā bɛ̍ndōo̍, mā hu᷄ŋ lu̍e̍ī ya̍ o̍ pi̍ŋndo̍ ni᷄ŋ sīōōŋīī bi̍ī ya̍ le̍. Ya̍a̍mɔ̍ɔ̍wa̍ ā hu᷄ŋ sa̍ā ya̍ bɛ̍ɛ̍ a̍ sɔ̍ŋgɔ̄ɔ̍, hīōūwɔ̄ɔ̍ ya̍ I̍ hi̍a̍ū la̍chi̍ a̍ Mɛ̄lɛ̄ka̍ tīīnda᷄ŋndo̍ ni̍.

⁴Sūɛ̍i̍ ī pīlɛ̍ kpe̍ ya̍ I̍ cho̍ Mɛ̄lɛ̄ka̍ Ya̍a̍wɛ̄ɛ̄ nyūnāa̍ ni̍, ndi̍ yɔ̍nūŋ ni̍ māā mbō tōsa̍ mī hi̍o̍ū lāchī a̍ wāa̍ o̍ ndu̍ lo̍ chi̍ɛ̍īni̍ŋ ha̍a̍a̍ a̍ yōōmū nūu̍. I̍ hɛ̍na̍ŋ mī wa̍ lo̍ŋ mī wa̍ nāŋɔ̄ɔ̄ ndɔ̍ kɔ̄ndɔ̄fi̍llo̍ chɔ̄ɔ̍, ndu̍yɛ̍ mī wa̍ ndu̍ nyūnāa̍ mbō sīla̍ ya̍.

⁵Mbō mānda̍ ya̍ o̍ te̍le̍ŋ kpūndɔ̍ɔ̍ ni᷄ŋ, mbō lūe̍i̍ ya̍ o̍ ndu̍lo̍ chi̍ɛ̍ī ni̍ŋ, mbō kɛ̄si̍ ya̍ nāa̍ te̍māa̍ nāa̍ nyɛ̄ o̍ nyɛ̄ yɔ̍nūŋ ya̍ le̍ wa̍.

⁶O̍ ko̍ŋ, mī ye᷅m ya̍a̍mɔ̍ɔ̍wa̍a̍ nīa̍a̍ ba̍lu̍ ya̍ wa̍. Mī lu̍ɛ̍ī o̍ chīɛ̍i̍ Mɛ̄lɛ̄ka̍a̍ ni᷄ŋ, mī so̍li̍ sa̍lāla̍ŋ o̍ ndu̍lo̍, ndu̍yɛ̍ mī cho̍ndu̍ chōo̍ cho̍o̍ a̍ nya̍a̍lo̍o̍ mī sa̍ŋga̍la̍ Mɛ̄lɛ̄ka̍ Ya̍a̍wɛ̄ɛ̄.

⁷O̍o̍ Mɛ̄lɛ̄ka̍ Ya̍a̍wɛ̄ɛ̄, tē I̍ ko̍ŋgu̍l nāa̍ nūm chu̍a̍ le̍ ya̍ mālāa̍ pɛ̍, yāndi̍i̍ tu̍i̍i̍nu̍ŋ ya̍ īnyīɛ̍ɛ̍ mā mu̍li̍ ya̍ dīōm.

⁸Mɛ̄ɛ̍ ŋ̄ vēēlu̍ āā, “Hu̍ŋ mā hu̍ŋ so̍o̍lūū ya̍,” mi̍ di̍mī a̍ kɔ̄l nūu̍ kpo̍u̍ a̍a̍, “Mi̍ chē ya̍, I̍ hi᷅ŋ mī so̍o̍lu̍u̍ nu̍m, Mɛ̄lɛ̄ka̍ Ya̍a̍wɛ̄ɛ̄.”

⁹Le̍la̍ŋ, vi᷅ŋ ya̍ hɔ̄lāā nūmnda̍ le̍ Mɛ̄lɛ̄ka̍. Du̍a̍u̍nu᷄ŋ tu̍mbe̍ a̍ ya̍ bu̍ɛ̍ī nūmndo̍ mā kɛ̍ɛ̍ ya̍ le̍. Nu᷄m pi̍ŋi̍ ya̍ o̍ kpūndɛ̍la̍ŋ ni᷄ŋ kpo̍u̍ ni̍, le̍la̍ŋ yāndi̍i̍ kɛ̍ɛ̄ ya̍ le̍ Mɛ̄lɛ̄ka̍, ma᷅l la̍ le̍ wāna̍ nī pi̍ŋīa̍a̍.

¹⁰Tē ō wa̍ pɛ̍ mī fi̍nyā nūu̍ nda̍ kāla̍ nūu̍ ā kɛ̄ɛ̍ ya̍, Mɛ̄lɛ̄ka̍ Ya̍a̍wɛ̄ɛ̄ ndu̍ nɔ̍lā mbō chu̍a̍ ya̍ mbō mānda̍ ya̍.

¹¹Mɛ̄lɛ̄ka̍ Ya̍a̍wɛ̄ɛ̄, pɛ̍ɛ̍ku̍ ya̍ sɔ̄ɔ̍ŋ nu̍m ŋ̄ yēēma̍ ya̍ mī to̍sa̍ wo̍ŋ, mā chɔ̍m ya̍ nɛ̄ī nu̍m sa̍kpōo̍ mī ku̍ɛ̄ lēchōo̍, kāni̍ fu̍u̍le̍, I̍ nɔ̍ ya̍a̍mɔ̍ɔ̍wa̍ kɔ̄ɔ̄lī fāŋgā.

¹²Ma᷅l la̍ ya̍a̍mɔ̍ɔ̍wa̍a̍ nīa̍a̍ o̍ bā le̍. Ya̍a̍mɔ̍ɔ̍wa̍a̍ chɔ̍m ha̍ā sɔ̄ɔ̍ŋ lāchōōwa᷄ŋ ya̍ chōo̍, ma̍ wā ya̍ kɔ̄ŋgɔ̄līa̍ŋnda̍ŋ nda̍, ma᷅l la̍ nda̍ o̍ bā le̍.

¹³I̍ si̍nā māā I̍ cho̍ lō yōōmū wānāa̍ Mɛ̄lɛ̄ka̍ Ya̍a̍wɛ̄ɛ̄ wa̍ tɛ̄ɛ̄ŋ ha̍a̍a̍, mī sɔ̍la̍ dɛ̍nɛ̍ ndɔ̄ kɛ̍ndɔ̄ɔ̍.

¹⁴Ti̍i̍nda̍ŋ Mɛ̍lɛ̄ka̍ Ya̍a̍wɛ̄ɛ̄, nɔ̍ ti̍i̍nda᷄ŋndo̍, ta̍mbū kɔ̄l te̍. Ti̍i̍nda̍ŋ Mɛ̍lɛ̄ka̍ Ya̍a̍wɛ̄ɛ̄.