Read Southern Kisi Sa᷅m 28 Bible Online

Sa᷅m 28 - Southern Kisi bible

Sa᷅m 28

¹[27] O̍o̍ Mɛ̄lɛ̄ka̍ Ya̍a̍wɛ̄ɛ̄, I̍ cho̍ nu̍m vēēlōo̍ le̍ ya̍ mālāa̍. Nūm ya̍ I̍ ti̍i̍nda̍ŋ le̍ ya̍ māndāa̍ ni̍, le̍la̍ŋ kɛ̍ɛ̄ ya̍ dīōm mūlī le̍ a̍ yāndi̍i̍. Tē ā mu̍li̍ ya̍ dīōm te̍ mɛ̄ɛ̍ I̍ cho̍ wu̍.

²Tē I̍ wa̍ nu̍m vēēlōo̍ le̍ ya̍ mālāa̍ pɛ̍, ya̍ŋ ya̍ nīla̍ŋ fɔ̍. I̍ he̍e̍lu̍ bāla̍ŋ kūmbū chīɛ̄ī nu᷄m kāsīo̍o̍ mi̍ wa᷅ kōŋu̍llo̍ le̍ mā ma̍la̍ ya̍.

³Tē a̍ wa̍ wānāā dɛ̍nɛ̍ wɔ̍ɔ̍ŋnda̍ nyɛ̄ pālāa̍ tūsīo̍o̍ chōo̍ pɛ̍, mɔ̍sɔ̄ŋā ya̍ na̍a̍ nda̍ le̍. Wānāā wɔ̄ɔ̍ŋnda̍ a̍ su̍a̍ā ha̍ā sɔ̄ɔ̍ŋ kɛ̍ndɔ᷄ŋ nāa̍ wānāā nda̍ chīɛ̄ɛ̄li̍āŋ nda̍ chūā, kɛ̍ ndu̍yɛ̍ mā tūūnūŋ sɔ̍ɔ̍ŋ wɔ̍ɔ̍ŋndo̍ŋ o̍ lākɔ̄l le̍ nda̍ wa̍, tē a̍ wa̍ nda̍ nyɛ̄ pālāa̍ tūsīo̍o̍ chōo̍ pɛ̍, mɔ̍sɔ̄ŋā na̍a̍ na̍a̍ nda̍ le̍.

⁴Pa̍a̍wa̍ nda̍ mɛ̄ɛ̍ kūɛ̍ɛ̍la̍ ndāla̍ŋ lā chō yɛ̍. Tu̍si̍ nda̍ nyɛ̄ pālāa̍ chōo̍ le̍ dɛ̍nɛ̍ wɔ̍ɔ̍ŋ nda̍ tōsa̍ wo̍. Pa̍a̍wa̍ nda̍ tūu̍le̍ŋ mɛ̄ɛ̍ yɔ̄ŋndā wɔ̍ɔ̍ŋndo̍ chō yɛ̍.

⁵Ā būūla̍ŋ a̍ wa̍lta̍ Mɛ̄lɛ̄ka̍ Ya̍a̍wɛ̄ɛ̄ to̍sa̍ la̍ŋ te̍, a būūla̍ŋ a̍ nyɛ̄m o̍ to̍o̍si̍a̍a̍ wo̍ŋ te̍. Le̍la̍ŋ, Mɛ̄lɛ̄ka̍ Ya̍a̍wɛ̄ɛ̄ cho̍ nda̍ tɛ̄ɛ̄mbūū le̍ fɛ̍ɛ̍ŋ a̍ fɛ̍ɛ̍ŋ.

⁶I̍ yɔ̍ŋgu̍ sāŋgālāa̍ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍, kāni̍ fu̍u̍le̍, mɛ̄ɛ̍ ya̍ I̍ ko̍ŋgu̍l nāa̍ ndu̍ chu̍a̍ le̍ mālāa̍, mbo̍ mūlī ya̍ dīōm.

⁷Wāna̍ ma̍ndā ya̍ wo̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍. Ndu̍ ma̍ndā ya̍ ni̍ nyɛ̄ yɔ̍nūŋ ya̍ le̍. Ndu̍ ya̍ I̍ ti̍i̍nda̍ŋ le̍ ya̍ mālāa̍ ni̍, ndu̍yɛ̍ mbo̍ tōsā mi̍ na̍ŋ kɔ̄l. Le̍ he̍ī, I̍ cho̍ chōndo̍ŋ sōlī mī me̍l ndu̍ ba̍li̍ka̍ a̍ kɔ̄l kɛ̄ndɛ̄ bɛ̄ndōo̍.

⁸Mɛ̄lɛ̄ka̍ Ya̍a̍wɛ̄ɛ̄ cho̍ wāna̍ ma̍ndā wa̍nāā ndūa̍a̍ wo̍ ni̍. Ndu̍ ma̍ndā ma᷅sa̍ ndɔ̍ o̍ hɛ̍li̍ wo̍ ni̍, nyɛ̄ yɔ̍nūŋ ndu̍ le̍.

⁹Pi̍ŋi̍ wa̍nāā nūmnda̍, Mɛ̄lɛ̄ka̍ Ya̍a̍wɛ̄ɛ̄. To̍sa̍l nda̍ dɛ̍nɛ̍ kɛ̍ndɔ̄ɔ̍. Wa̍ nda̍ hɔ̄lte̍ŋ mɛ̄ɛ̍ wānā ma̍ndāā lāsāa̍ nɔ̄ hɔ᷅lte̍ŋ o̍ sāa̍ ndūa̍a̍ yɛ̍, ndu̍yɛ̍ mī bā nūmndo̍ wa̍ nda̍ chōo̍ le̍ fɛ̍ɛ̍ŋ a̍ fɛ̍ɛ̍ŋ.