Read Southern Kisi Sa᷅m 29 Bible Online

Sa᷅m 29 - Southern Kisi bible

Sa᷅m 29

¹[28] Nya̍ nyɛ̄ o̍ nyɛ̍ nɔ̍ kpāāyāa̍ o̍ ha̍la̍a̍ ni᷄ŋ, lā yɔ̄ŋgu̍ sa̍ŋgālāa̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍. Lā līsa̍ na̍ŋɔ̄ɔ̄ ndɔ̍ kɔ̄ndɔ̄fi̍llo̍ a̍ kpāāya̍ o̍ nɔ̍ wo̍.

²Lā ke̍ di̍o̍la̍ kɔ̄ndɔ̄fi̍lta̍ Mɛ̄lɛ̄ka̍ Ya̍a̍wɛ̄ɛ̄ la̍ŋ bɛ̄ɛ̄le̍ŋ ta̍u̍. Lā ba᷄ŋ wu᷅la̍ŋ mī lā sōōlu̍u̍ ndu̍ o̍ chīɛ̄ī ndɔ̍ kāsīo̍o̍ sōndōo̍.

³Mɛ̄lɛ̄ka̍ Ya̍a̍wɛ̄ɛ̄ cho̍ sūɛ̍i̍, pēe̍ mɛ̄ŋmā īhɛ᷄llo̍ chō kɔ̄la̍ŋ a̍ dīōm ndɔ̄ɔ̍ chɛ̄lɔ̄ɔ̍ kpu̍ū, tē ō sōō pɛ̍, nu̍a̍ā wānā tu̍ɛ̍ī āā ta᷅ŋnda̍ŋ ma̍ cho̍ dēŋīo̍o̍ ni̍. Mɛ̄lɛ̄ka̍ Ya̍a̍wɛ̄ɛ̄ cho̍ o̍ nāŋɔ̄ɔ̄ ndɔ̄ɔ̍ ni᷄ŋ ndo̍ ō chō dēŋīo̍o̍ o̍ pēe̍ mɛ̄ŋmā īhɛ᷄llo̍ chōo̍ māā lēta᷅ŋ.

⁴Mɛ̄lɛ̄ka̍ Ya̍a̍wɛ̄ɛ̄ dīōm ndɔ̄ɔ̍ nɔ̄ bɔ̄ɔ̍ kpa̍a̍yāa̍. Dīōm ndɔ̄ɔ̍ chō dīōm kɔ̄ndɔ̄fi̍li̍ bɛ̄ndū.

⁵Tē Mɛ̄lɛ̄ka̍ Ya̍a̍wɛ̄ɛ̄ so̍ō pɛ̍, yɔ̄mīī si̍dāā kɔ̄la̍ŋ a̍ yōmīo̍o̍, yɔ̄mīī si̍dāā Le̍ba̍nɔ̄ŋ bɛ̍ɛ̍ yōmīo̍o̍.

⁶Ō tōsa̍ mi̍ pēmbo᷄ŋ Le̍ba̍nɔ̄ŋ ŋ̍ nyi̍i̍yā, ŋ̄ hūūlu̍ pe̍su̍ pe̍su̍ māā chūīŋāā fɔ̍ŋndɔ̍. Ō tōsa̍ mi̍ Pēmbīī Ha̍a̍mɔ̄ŋnde̍ ī nyīīyā, mi̍ ī hūūlū ku̍ba̍ ku̍ba̍ māā nāū tōōyē fɔ̍ŋndɔ̍.

⁷Tē Mɛ̄lɛ̄ka̍ Ya̍a̍wɛ̄ɛ̄ so̍ō pɛ̍, yīŋnde̍ŋ lē kīōlu̍ wu̍lɛ̄ī.

⁸Ō tōsa̍ mi̍ lɛ̄ŋndē po̍lte̍ŋ lē nyīīyā, ō tōsa̍ mi̍ lɛ̄ŋndē po̍lte̍ŋ Kɛ̍dɛ̍sī le̍ nyi̍i̍yā.

⁹Tē Mɛ̄lɛ̄ka̍ Ya̍a̍wɛ̄ɛ̄ so̍ō pɛ̍, yɔ̄mīī ɔ̍kūe̍i̍ bɛ̍ɛ̍ hīīlɔ᷄ŋndo̍. Tē ō sōō pɛ̄, pēi̍ o̍ yɔ̄mnde̍ chīɛ̄ɛ̄lɔ᷄ŋndo̍. Ndu̍yɛ̍ wānā o̍ wāna̍ cho̍ o̍ chīɛ̍i̍ Mɛ̄lɛ̄ka̍a̍ ni᷄ŋ mā dēŋi̍ chōo̍ cho̍o̍ āā, “Mɛ̄lɛ̄ka̍, sāŋgālāa̍ chō o̍ nūm ndo̍.”

¹⁰Mɛ̄lɛ̄ka̍ Ya̍a̍wɛ̄ɛ̍ cho̍ māsāa̍ mɛ̄ŋmā yīŋgi̍lɛ̍i̍ma̍ bɛ̍ndūa̍ŋ chōo̍ ni̍. Ndu̍ cho̍ māsā bɛ̍ndōo̍ le̍ fɛ̍ɛ̍ŋ a̍ fɛ̍ɛ̍ŋ ni̍.

¹¹Mbɔ̄ māā Mɛ̄lɛ̄ka̍ Ya̍a̍wɛ̄ɛ̄, ō lūe̍i̍ wa̍nāā ndūa̍a̍ kpāāyāa̍ fɔ̍. Mbɔ̄ māā ō dɔ̄u̍ nda̍ sa̍lā mbō ke̍ nda̍ kɔ̄l nyūlōo̍ fɔ̍.