Read Southern Kisi Sa᷅m 30 Bible Online

Sa᷅m 30 - Southern Kisi bible

Sa᷅m 30

¹[29] Mɛ̄lɛ̄ka̍ Ya̍a̍wɛ̄ɛ̄, I̍ cho̍ nu̍m sāŋgālā, fo̍ndōle̍ le̍ mɛ̄ɛ̍ ŋ̄ bāŋa̍ ya̍ yɛ̍. A̍ chi̍ɔ̍u̍ ya̍, a̍ chɛ̍l mī ya̍a̍mɔ̍ɔ̍wa̍ ā kānya̍l la̍ hɔ̄lte̍ŋ mā ma᷄m ya̍ le̍.

²O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍, mi̍ pi̍ɛ̍ī nu̍m le̍ mā ma̍la̍ ya̍, ndu̍yɛ̍ ma̍ lō o̍ ko̍ŋ ma̍ si̍ŋgi̍ ya̍.

³Ā bīī ma̍ chīɔ̄ū ya̍, ma̍ sōlī ya̍ o̍ pīɔ̍mndo̍ ni᷄ŋ. I̍ wa̍ tēndu̍ pīɔ̍m ma̍ mīŋgī ya̍ yōōmū.

⁴Nya̍ wānāa̍ cho̍ le̍ Mɛ̄lɛ̄ka̍ Ya̍a̍wɛ̄ɛ̄ wa̍ ki̍nɛ̍i̍, lā sōli̍ cho̍ndo̍ŋ mī lā lōōnu̍ŋ māā Mɛ̄lɛ̄ka̍ chō wāna̍ kāsī, ndu̍yɛ̍ mī lā me᷄l ndu̍ ba̍li̍ka̍.

⁵Tu̍mbe̍ o̍ du̍a̍u̍nūŋ ndo̍, le̍ te̍le̍ŋ bi̍ŋgī ko̍ni̍, kɛ̍ dɛ̍nɛ̍ kɛ̍ndɛ̄ o̍ to̍sāl wa᷅ŋndo̍ wo̍ ndu̍ ndu̍, ha̍a̍a̍ a̍ wānā ko̍ŋ yōōmū ndɔ̄ɔ̍, dɛ̍nɛ̍ kɛ̍ndɛ̄ kōŋ chō ndu̍ chōo̍. Mī sūɛ̍i̍ chɛ̍ŋī wa̍nā ve̍ ī yɔ̄nu̍ŋ na̍a̍, pi̍i̍ pi̍i̍ ŋ̄ lɔ̄l cha̍ŋndo̍, kɛ̍ le̍ kɔ̄la̍ŋ a̍ pāa̍le̍ŋ sīɔ̍ɔ̍ mī ŋ̄ sɔ̄la̍ kɔ̄l nyɔ̄ɔ̄lāa̍.

⁶Bōōndi̍i̍ ya̍ I̍ wa̍ o̍ dɛ̍nɛ̍ kɛ̍ndɔ̄ɔ̍ ni᷄ŋ nde̍, mi̍ di̍mī a̍a̍, “Nyɛ̄ o̍ nyɛ̄ nɔ̍lā ya̍ hīīlūū le̍.”

⁷Mɛ̄lɛ̄ka̍ Ya̍a̍wɛ̄ɛ̄, a̍ to̍sa̍l la̍ dɛ̍nɛ̍ kɛ̍ndɔ̄ɔ̍ ta̍u̍. Mɛ̄ɛ̍ chi̍o̍o̍ wā nu̍a̍ā ō bālāā a̍ pēmbo᷄ŋ yɛ̍, le̍nde̍ ŋ̄ chō ya̍ māndāa̍ ni̍. Kɛ̍ ndu̍yɛ̍, mɛ̄ɛ̍ ŋ̄ mūlu̍l la̍ kɔ̄ɔ̍ mi̍ sīōōŋnde̍ bīī ya̍.

⁸Mɛ̄lɛ̄ka̍ Ya̍a̍wɛ̄ɛ̄, mi̍ I̍ ve̍e̍lū nu̍m, mi̍ nyɔ̍ɔ̍lū nu̍m le̍ mā tūīīnu̍ŋ ya̍ īnyīɛ̍ɛ̍.

⁹Tē I̍ vi᷅ pɛ̍, ɔ̍ɔ̄ tɔ̄nɔ̍ ŋ̄ sɔ̄lā o̍ ya̍ ni̍ŋ ndo̍? Tē dīāllūŋ nu᷄ŋ ŋ̄ kūɛ̄ o̍ sɛ̄īyo̍ ni᷄ŋ, mī ŋ̄ sīmnu᷄ŋ pu̍u̍lū pɛ̍, pūūlū fo̍ndō kōŋ ō nɔ̄lā pa̍ mbō sāŋga̍la̍ nu̍m? Tē wāŋndo̍ ō vī ni᷅ŋ pɛ̍, ō nɔ̄lā lɛ̍ mbō sāŋga̍la̍ nu̍m? Ō nɔ̄lā mbō chɔ᷄m wāŋnda̍ a̍ mɛ̄ɛ̍ ŋ̄ chō o̍ tōnya̍a̍ chōo̍ le̍ lɔ̍ɔ̍ lɔ̍ɔ̍ yɛ̍?

¹⁰O̍o̍ Mɛ̄lɛ̄ka̍ Ya̍a̍wɛ̄ɛ̄, yāndi̍i̍ tu̍e̍i̍ pi̍ɛ̍īlē nīle̍ŋ mā tūīīnu̍ŋ ya̍ īnyīɛ̍ɛ̍. Ma̍la̍ ya̍ fɔ̍, Mɛ̄lɛ̄ka̍ Ya̍a̍wɛ̄ɛ̄.

¹¹Kɔ̄l tāmbɛ̍i̍ ya̍ wa̍ ni᷄ŋ ndo̍, ā bīī ma̍ fāŋā ndu̍, ndu̍yɛ̍ ma̍ nɛ̄ŋī ya̍ kɔ̄l, mi̍ ya᷅. A̍ fa̍ŋa̍ mɔ̍nɛ̍i̍ wa̍ ya̍ chōo̍ ve̍, ma̍ mīŋgī ya̍ kɔ̄l nya̍a̍lo̍o̍ kē sɔ̍ŋgɔ̍ ko̍ŋ.

¹²Le̍la̍ŋ I̍ me̍ī kpo̍so̍ŋ te̍, mɛ̄ɛ̍ mī li̍sa̍ nu̍m o̍ chōnde̍i̍ ni᷄ŋ. Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍, le̍ fɛ̍ɛ̍ŋ a̍ fɛ̍ɛ̍ŋ I̍ cho̍ nu̍m ba̍li̍ka̍a̍ mēllo̍.