Read Southern Kisi Sa᷅m 31 Bible Online

Sa᷅m 31 - Southern Kisi bible

Sa᷅m 31

¹[30] Mɛ̄lɛ̄ka̍ Ya̍a̍wɛ̄ɛ̄, I̍ hi᷅ŋ nāa̍ nūm chu̍a̍ le̍ mā ma̍nda̍ ya̍, chɛ᷅l mī si̍ɔ̍mbu̍la̍ bi̍ī ya̍ le̍. Mɛ̄lɛ̄ka̍ tōnya̍a̍ ŋ̄ chō ni̍, pi̍ŋi̍ yo̍o̍mū nūu̍.

²Ya̍ŋ ya̍ nīla̍ŋ Mɛ̄lɛ̄ka̍, mā ke̍le̍ŋa̍ ya̍ chīɔ̄ū. Ma̍nda̍ ya̍ mɛ̄ɛ̍ wāŋndo̍ ō vīāŋnūŋ nu̍a̍ā o̍ pōū kpo̍o̍wa̍a̍ bɛ̄ŋgu̍ yɛ̍. Pi̍ŋi̍ ya̍ mɛ̄ɛ̍ wāŋndo̍ wā nu̍a̍ā o̍ fo̍nda̍ cho̍ ō bɛ̄ɛ̄ndīāā ō kālā ka̍lā wo̍, nyɛ̄ nyɛ̄ yɔ̍nūŋ ndu̍ le̍ yɛ̍.

³Nu᷄m cho̍ pōū kpo̍o̍wa̍a̍, kɛ̄lɛ̄ŋgāā fo̍ndā kālā ka̍lā ya̍ vi̍a̍ŋnūŋ ndo̍ ni̍. Chɔ̍m ya̍ nɛ̄i̍ ya̍ I̍ nɔ̍ mī ku̍ɛ̄ chōo̍ wo̍, ndu̍yɛ̍, mā ma̍nda̍ ya̍, le̍ hāli̍kpe̍ŋ mī dīōlā nūmnda̍ŋ lā sɔ̄la̍ bɛ̄ɛ̄le̍ŋ.

⁴Nu᷄m cho̍ wāna̍ ma̍ndā ya̍ wo̍ ni̍, le̍la̍ŋ ma̍la̍ ya̍ mī kpɛ̍kpɛ̍la̍ yāŋɔ̄ɔ̄lē ya̍a̍mɔ̍ɔ̍wa̍ kɛ̍su̍l la̍ le̍ŋ.

⁵I̍ yɔ̍ŋgu̍ŋ nāa̍ nūm chu̍a̍, le̍ mā ma̍nda̍ ya̍. Le̍la̍ŋ, chi̍i̍ndi̍a̍a̍ yo̍o̍mū nūu̍, Mɛ̄lɛ̄ka̍ Ya̍a̍wɛ̄ɛ̄, kāni̍ fu̍u̍le̍ nu᷄m cho̍ Mɛ̄lɛ̄ka̍ wānā ti̍i̍ndāŋ ndo̍ ni̍.

⁶Wānāa̍ so̍o̍lūū nyɛ᷅m chēle̍ŋ ndo̍ŋ nda̍ a̍ tu̍l nda̍ yɛ̄le̍ŋ. Kɛ̍ ya̍ ya̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ ya̍ I̍ dɔ̍ū tīīnda᷄ŋ nūu̍ ni̍.

⁷I̍ cho̍ wā a̍ kɔ̄l kɛ̄ndɛ̄ mī I̍ dɔ̍ɔ̍nu᷄ŋ nya̍a̍le̍, kāni̍ fu̍u̍le̍, le̍ kāālā bɛ̄ndū ŋ̄ kāāla̍ ya̍ wo̍. Ā chē nyɛ̄ nī ki̍ndīlāa̍, ma̍ sīnā dɛ̍nɛ̍ nī pa̍lāa̍.

⁸A̍ chɛ᷅l mī ya̍a̍mɔ̍ɔ̍wa̍a̍ nīa̍a̍ ā tīu̍ ya̍ bā le̍, ndu̍yɛ̍ ma̍ sōlī ya̍ nāa̍ ya̍ wa̍ wa̍ ma̍ yāā ya̍ nāa̍ nyɛ̄ o̍ nyɛ̄ yɔ̍nūŋ ya̍ le̍ wa̍.

⁹Tūīīnu̍ŋ ya̍ īnyīɛ̍ɛ̍ fɔ̍, Mɛ̄lɛ̄ka̍ Ya̍a̍wɛ̄ɛ̄, kāni̍ fu̍u̍le̍, kpūndɔ̍ɔ̍ chō ya̍ chōo̍. Hɔ̄lta̍ŋ lā yɔ̄nu̍ŋ ya̍ ni᷅ŋ yi̍fīdīī a̍ cha᷄ŋndo̍. Dīāllo̍ŋ kpo̍u̍ ŋ̄ chō ya̍ ŋ̄ yɔ̄kpɛ̍i̍ a̍ nyɛ̄ pālāa̍.

¹⁰I̍ yɔ̍kpa̍ ni᷅ŋ bɔ̄ɔ̍ ā kɔ̄l tāmbɛ̍i̍yo̍, yōōmū nūu̍ dɔ̄ɔ̄na̍ŋ ni᷅ŋ a̍ mɔ̍nɛ̍i̍ cho̍ ya̍ chōo̍ ve̍. Māyōōmū bɛ̍ɛ̍ I̍ nɔ̍ lɛ̍ le̍, a̍ sɔ̄ɔ̍ŋ pa̍la᷄ŋ. I̍ yɔ̍nu̍ŋ ni᷅ŋ pāāla̍ŋ kpo̍so̍ŋ.

¹¹Ya̍a̍mɔ̍ɔ̍wa̍a̍ nīa̍a̍ kpo̍u̍ ā chūe̍ lɛ̍ ya̍ māā I̍ cho̍ nyɛ̄ o̍ nyɛ̍ le̍, tāāma̍ fa̍ū ā na̍a̍ ŋ̄ chīɛ̄ɛ̄li̍āŋ nda̍. Wānāā na̍a̍ ŋ̄ sīīni̍āŋ nda̍ bɛ̍ɛ̍, wōo̍ nda̍ chō ya̍ ni᷅ŋ ni̍. Tē I̍ fu̍la̍ o̍ bɛ̍ɛ̄ pɛ̍, wāŋnda̍ chɔ̄ɔ̍ ya̍ ko̍ni̍ mā nyāānu̍ŋ ya̍.

¹²Wāŋnda̍ fa̍ū ā pūɛ̄ɛ̄nu̍ŋ a̍ ya̍, mɛ̄ɛ̍ wāŋndo̍ wū nu̍a̍ā mā pūɛ̄ɛ̄nu̍ŋ a̍ ndu̍ yɛ̍. I̍ si̍mnu᷄ŋ ni᷅ŋ nyɛ̄ vīāūwāā o̍ sa᷄l.

¹³I̍ cho̍ ya̍a̍mɔ̍ɔ̍wa̍a̍ nīa̍a̍ kpo̍u̍ sɔ̍ɔ̍ŋ to̍o̍lo᷄ŋ tūēīyɔ̄ɔ̍, bā o̍ bā fe̍e̍. Sɔ̄ɔ̍ŋ ŋ̄sīōōŋndo̍ŋ ŋ̄ chō ya̍ ŋ̄ bālāā kpɔ̍kɔ̍su̍. Ā chō ya̍ de̍fo̍o̍ yīīyo̍. Ā chō kɛ̄ɛ̄sīa̍a̍ le̍ ya̍ dīyɔ̄ɔ̍.

¹⁴Kɛ̍ ndu̍yɛ̍, nūm ya̍ I̍ ti̍i̍nda̍ŋ ni̍, Mɛ̄lɛ̄ka̍ Ya̍a̍wɛ̄ɛ̄. Mi̍ di̍mī a̍a̍, “Nu᷄m cho̍ Mɛ̄lɛ̄ka̍ nūu̍ ni̍.”

¹⁵Nu̍m o̍ bā yōōmū nūu̍ ō chō ni̍. Chi̍i̍ndi̍a̍a̍ yo̍o̍mū nūu̍ ya̍a̍mɔ̍ɔ̍wa̍a̍ ni̍a̍a̍ tɛ̄ɛ̄ŋ, a̍ cho̍ ha̍ā ya̍ nyɛ̄ pālāa̍ tūsīo̍o̍ chōo̍ wa̍.

¹⁶Ya̍ bu̍ɛ̍ī nu̍m cho̍ nu̍m sāāŋgīāllo̍ wo̍, to̍sa̍l la̍ dɛ̍nɛ̍ kɛ̍ndɛ̄. Yi̍ya̍ŋ a̍ kāālā bɛ̄ndū ŋ̄ kāāla̍ ya̍ wo̍ mā pi̍ŋi̍ yōōmū nūu̍.

¹⁷I̍ cho̍ nu̍m vēēlōo̍, Mɛ̄lɛ̄ka̍ Ya̍a̍wɛ̄ɛ̄, chɛ᷅l mī si̍ɔ̍mbu̍la̍ bi̍ī ya̍ le̍. Si̍ɔ̍mbu̍la̍ŋ lā bīi̍ wa̍nāā dɛ̍nɛ̍ wɔ̍ɔ̍ŋnda̍. Sa̍su̍ nda̍ mā nyīndū nda̍ o̍ sɛ̄īyo̍ ni᷄ŋ nāa̍ wa̍nā su̍ū le̍ wa̍.

¹⁸Ki̍nda̍ wa̍nāā lāchōōwāā kāŋ sōndōla̍ŋ kpɔ̍kū, nda̍ yɔ̍nūŋ ni̍ māā wānāā yōŋgāā bɛ̄ndūa̍a̍ fa̍ū, wānāā hɔ̄lāā hēēlāā bɛ̄ndūa̍a̍, a̍ di̍mūl wa̍nāā tōnya̍a̍ Mɛ̄lɛ̄ka̍a̍ dīōmndā wɔ̄ɔ̍ŋnda̍ŋ nda̍.

¹⁹Wānāa̍ nɔ̍ sīōōŋīī nūmnde̍ ndu̍yɛ̍ ma̍ kē nu̍m bɛ̄ɛ̄le̍ŋ nda̍, dɛ̍nɛ̍ kɛ̍ndɛ̄ ŋ̄ kɛ̄si̍ le̍ nda̍ wo̍ ō chō ō bɔ̄ɔ̍. Wānāa̍ dɔ̍ū ka̍ŋ ti̍i̍nda᷄ŋ ndāa̍ o̍ nūm ni̍ŋ nda̍, wāŋnda̍ kpo̍u̍ ā chā ni̍ŋ mɛ̄ɛ̍ ŋ̄ māndā ni̍ŋ nda̍ yɛ̍.

²⁰Nāa̍ nūm pi̍la̍ cho̍ wa̍, lo̍ŋ ŋ̄ vīāŋ ni̍ŋ nda̍ ni̍, o̍ ko̍ŋ, sɔ̄ɔ̍ŋ wɔ̍ɔ̍ŋ wāŋnda̍ kɛ̄ɛ̄sīāā le̍ nda̍ wo̍ŋ, ŋ̄ ko̍māl nda̍ le̍. Nāa̍ ŋ̄ vīāŋ ni̍ŋ nda̍ wa̍, dīōm o̍ dīōm wɔ̄ɔ̍ŋ ya̍a̍mɔ̍ɔ̍wa̍a̍ ndāa̍ a̍ dīmi̍ a̍ nda̍ o̍kɔ̄ɔ̄, ō ko̍māl nda̍ le̍.

²¹I̍ me̍l Mɛ̄lɛ̄ka̍ Ya̍a̍wɛ̄ɛ̄ ba̍li̍ka̍, kāni̍ fu̍u̍le̍, bōōndi̍i̍ ya̍a̍mɔ̍ɔ̍wa̍ ā de᷄l la̍ chōo̍ ā sɔ̍ŋgɔ̄ɔ̍, ma̍ wōū ya̍ o̍ pi̍ŋndo̍ ni᷄ŋ nde̍, mbo̍ chɔ̄m ya̍ kāālā bɛ̄ndū o̍ ka̍a̍la̍ ya̍ wo̍.

²²A̍ bōōndi̍i̍ ke̍ŋ, sīōōŋnde̍ wa̍ ya̍, mi̍ di̍mi̍ a̍a̍, “Mɛ̄lɛ̄ka̍ chīi̍ ya̍ tōūwɔ̄ɔ̄, mbo̍ fāŋā ya̍ ndu̍ īkɛ̄i̍.” Kɛ̍ ndu̍yɛ̍, mɛ̄ɛ̍ ya̍ I̍ ve̍e̍lu̍ ndu̍ le̍ ya̍ mālāa̍, mbo̍ mbō mūlī ya̍ dīōm.

²³Nya̍ bu̍ɛ̍i̍yāā ndūāā sa̍kpūa̍a̍ ki̍nɛ̍i̍, lā kāāla̍ Mɛ̄lɛ̄ka̍ Ya̍a̍wɛ̄ɛ̄. Māndāa̍ Mɛ̄lɛ̄ka̍ Ya̍a̍wɛ̄ɛ̄ ma̍ndā bu̍ɛ̍i̍yāa̍ cho̍ sa̍kpō a̍ ndu̍ wa̍ ni̍. Kɛ̍ wānāa̍ to̍sā yo̍ŋgāa̍ wa̍ ki̍nɛ̍i̍, nyɛ̍ pālāa̍ o̍ tu̍sī nda̍ chōo̍ o̍ ka̍lā ka̍lā, mɛ̄ɛ̍ nda̍ nɔ̄ kūēē le̍ ndu̍ sɔ̄lāa̍ yɛ̍ ni̍.

²⁴Le̍la̍ŋ, nya̍ nɔ̍ hɔ̄lte̍ŋ o̍ nɛ̄ī le̍ Mɛ̄lɛ̄ka̍ Ya̍a̍wɛ̄ɛ̄ mālā ndɔ̄ɔ̍ wa̍ ki̍nɛ̍i̍, lā sīmu̍l kɔ᷅lta̍ŋ, mī lā si᷄m a̍ dīāllūŋ kālā nyɛ̄ kɛ̄ndɛ̄ yi̍.