Read Southern Kisi Sa᷅m 32 Bible Online

Sa᷅m 32 - Southern Kisi bible

Sa᷅m 32

¹[31] Wāna̍ Mɛ̄lɛ̄ka̍ Ya̍a̍wɛ̄ɛ̄ fa̍ŋā ho̍ō yɔ̄ŋ ndɔ̄ wɔ̍ɔ̍ŋndo̍, ndu̍yɛ̍ nyɛ̄ o̍ nyɛ̄ wɔ̄ɔ̍ŋ o̍ to̍sa̍ mbō ma̍l ndu̍ le̍ ndu̍ wo̍, wānā ko̍ŋ ō pɛ̄l tɔ̄nɔ̄ɔ̍.

²Wāna̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ᷅m ho̍ō yɔ̄ŋ ndɔ̄ wɔ̍ɔ̍ŋndo̍ chōo̍ le̍ wo̍, ndu̍yɛ̍ nīīlū o̍ nīīlū tūūndu̍ɛ̍i̍ cho̍ o̍ ndu̍ ni̍ŋ te̍ wo̍, wānā ko̍ŋ ō pɛ̄l tɔ̄nɔ̄ɔ̍.

³Bōōndi̍i̍ ya̍ i̍i̍ chɔ̍ɔ̍mu̍u̍ wɔ̍ yɔ᷅ŋndā nīla̍ wɔ̍ɔ̍ŋnda̍ŋ te̍ ve̍, kpɛ᷅ŋ ya̍ i̍i̍ ni̍i̍lū cha̍ŋndo̍, ndu̍yɛ̍ māyōōmū bɛ̍ɛ̍ ya̍ i̍i̍ nɔ̍ lɛ̍ le̍.

⁴Kāni̍ fu̍u̍le̍, le̍ pāa̍le̍ŋ a̍ nyūmnda̍ŋ nūm Mɛ̄lɛ̄ka̍ Ya̍a̍wɛ̄ɛ̄ a̍ wa̍ ya̍ nyɛ̄ pālāa̍ tūsīo̍o̍ chōo̍. Mi̍ yɔ̄nu᷄ŋ ni᷅ŋ nu̍a̍ā ta̍fōlō ta̍fōlō, mɛ̄ɛ̍ wɔ̄ɔ̄le̍ŋ le̍ vēēsīāā nu̍a̍ā nyɔ̄ɔ̍ yɛ̍.

⁵Mi̍ chɔ̍ɔ̍mūū yɔ̄ŋndā nīla̍ wɔ̍ɔ̍ŋnda̍ŋ nāa̍ nūm chu̍a̍. I̍ vi̍ŋ sɔ̍ɔ̍ŋ wɔ̍ɔ̍ŋ ya̍ I̍ to̍sa̍ wo̍ŋ te̍, mi̍ di̍mī a̍a̍, “I̍ cho̍ yɔ̄ŋndā nīla̍ wɔ̍ɔ̍ŋnda̍ŋ chɔ̄ɔ̄mūū nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍.” Ndu̍yɛ̍ ma̍ fāŋā yɔ̄ŋndā nīla̍ wɔ̍ɔ̍ŋnda̍ŋ ma̍ māl la̍ le̍ yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ ya̍ I̍ to̍sa̍.

⁶Le̍la̍ŋ, wānāa̍ la̍a̍la̍ŋ a̍ nūm Mɛ̄lɛ̄ka̍ Ya̍a̍wɛ̄ɛ̄ wa̍, ā pīɛ̍i̍ nu̍m, ko̍ŋ to̍sā bōōndi̍i̍ kpūndɔ̍ɔ̍ ō hūŋ le̍ nda̍ mīōlɔ̄ɔ̍ mɛ̄ɛ̍ mɛ̄ŋmā hūna᷄ŋ mā hūŋ nu̍a̍ā le̍ fo̍ndāa̍ chūa̍a̍ yɛ̍ vɛ̍, kpūndɛ̍ kōŋ ō ko̍māl nda̍ le̍.

⁷Nu᷄m cho̍ nāa̍ nīa̍a̍ ya̍ I̍ vi̍a̍ŋnūŋ nda̍ ni̍. Tē kpūndɔ̍ɔ̍ hīŋ pɛ̍ nu̍m ma̍ndā ya̍ ni̍. Tē a̍ ba̍ŋā yɛ̍ ya̍ pɛ̍, I̍ cho̍ndu̍ cho̍o̍ chōo̍ a̍ kɔ̄l kɛ̄ndɛ̄.

⁸Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, “I̍ cho̍ nu̍m pɛ̄ɛ̄kū, mī chɔ̍m nu̍m nɛ̄i̍ ŋ̄ nɔ̄ mā kūɛ̄ chōo̍ wo̍. I̍ cho̍ nu̍m sīlā ndu̍yɛ̍, mī ma̍nda̍ nu̍m nyɛ̄ yɔ̍nūŋ nu̍m te̍.

⁹Lā wa᷅ lādīɔ̄m, mɛ̄ɛ̍ so̍o̍, kɛ̄lɛ̄ŋgāā mɛ̄ɛ̍ vīsīāā yɛ̄yi̍i̍ mu̍ūli̍āŋnda̍ nɔ̄ dīɔ̄mnde̍ yɛ̍ le̍. So̍o̍ ni̍, vīsīāā yɛ̄yi̍i̍ mu̍ūli̍āŋnda̍ ni̍, le̍ mī ō pīlɛ̍ kūɛ̄ nāa̍ ŋ̄ hɛ̄nāŋ nda̍, mɛ̄ɛ̍ sōndōo̍ ndu̍ wōūwo̍ o̍ kēlɛ̄i̍ īchīli̍ŋnde̍ i̍ pūm ni᷄ŋ, a̍ yōōle̍ŋ lē bāā lo̍ŋ, le̍ ndu̍ hɔ̄lla̍ nyūmbɔ̄ɔ̍ nāa̍ ŋ̄ yēēmā mbō kūɛ̄ wa̍.”

¹⁰Wānāa̍ to̍sā yɔ᷅ŋndā wɔ̄ɔ̍ŋnda̍ŋ nda̍, dɛ̍nɛ̍ pa̍lāā nda̍ chō sɔ̄lā wo̍ chō ō bɔ̄ɔ̍. Kɛ̍ wānāa̍ dɔ̍ū tīīnda᷄ŋndo̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ nda̍, ō kāāla̍ nda̍ ta̍u̍ ta̍u̍, ndu̍yɛ̍ ō chō nda̍ māndā nyɛ̄ yɔ̍nūŋ nda̍ le̍.

¹¹Nya̍ cho̍ sa̍kpō Mɛ̄lɛ̄ka̍ o̍ hɔ̄l la̍, lā wa̍ a̍ kɔ̄ltā kɛ̄ndɛ̄, mī lā dɔ̄ɔ̄nu᷄ŋ nya̍a̍le̍ bu̍tē, kāni̍ fu̍u̍le̍, le̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ to̍sa̍ wo̍.