Read Southern Kisi Sa᷅m 33 Bible Online

Sa᷅m 33 - Southern Kisi bible

Sa᷅m 33

¹Nya̍ wānāā sa̍kpūa̍a̍ Mɛ̄lɛ̄ka̍ Ya̍a̍wɛ̄ɛ̄ wa̍ ki̍nɛ̍i̍, lā na᷄ŋ kɔ̍l mī lā chōndu̍ chōo̍ cho̍o̍ le̍ sɔ̄ɔ̍ŋ o̍ tōsa̍ wo̍ŋ. Ō bɛ̄nda̍ mī lā sāŋga̍la̍ ndu̍.

²Lā lɔ̄ɔ̍ nyɛ᷅m chāā īyōō wo̍ŋ, mī lā līsa̍ Mɛ̄lɛ̄ka̍ Ya̍a̍wɛ̄ɛ̄. Lā lɔ̄ɔ̍ to̍wāla̍ŋ mī lā sōli̍ chōndo̍ŋ.

³Lā sōlu̍l ndu̍ chōndu̍ŋ kɛ̍ndɛ̄ŋ sɛ̄nɛ̄īyo̍ŋ, lā lɔ̄ɔ̍ tōwāla̍ŋ nyɛ̄ kɛ̄ndɛ̄ kɛ̍ndɛ̄, mī lā dēŋi̍ chōo̍ cho̍o̍ a̍ kɔ̄l kɛ̄ndɔ̄ɔ̍.

⁴Dīōmndā Mɛ̄lɛ̄ka̍ Ya̍a̍wɛ̄ɛ̄ su̍a̍ā la̍ŋ lā chō dīōmndā tōnya̍, ndu̍yɛ̍ wa̍lta̍ o̍ to̍sā la̍ŋ, lā chō wa̍lta̍ wānā ti̍i̍nda̍ŋ.

⁵Mɛ̄lɛ̄ka̍ Ya̍a̍wɛ̄ɛ̄ kāāla̍ wānāa̍ cho̍ sa̍kpō ndu̍ o̍ hɔ̄l, ndu̍yɛ̍ mā dīmī sɔ̍ɔ̍ŋ wāŋnda̍ tɛ̄ɛ̄ŋ sa̍na̍a̍ wa̍. Kāālā o̍ ka̍a̍la̍ wāŋnda̍ wo̍ ō chō kāāla̍ cho̍ le̍ fɛ̍ɛ̍ŋ a̍ fɛ̍ɛ̍ŋ, ndu̍yɛ̍ kāālā ndɔ̄ ko̍ŋ chō ō tīūwāā bā o̍ bā fe̍e̍ o̍ chi̍e̍ēŋndo̍ chōo̍.

⁶A̍ dīōmndo̍ Mɛ̄lɛ̄ka̍ Ya̍a̍wɛ̄ɛ̄ to̍o̍si̍a̍a̍ ha̍la̍a̍ ni̍, a̍ dīōmnde̍ fu̍la̍ ndu̍ o̍ sōndō le̍ŋ o̍ to̍o̍si̍a̍a̍ pāa̍le̍ŋ a̍ pāŋge̍i̍ a̍ lōo̍ŋ ni̍.

⁷Ndu̍ chu̍u̍ŋgi̍a̍a̍ mɛ̄ŋnda̍ŋ o̍ pēēla̍ mɛ̄ŋmā īhɛ᷄lla̍ŋ mbo̍ hēēlū ma̍ŋ ku̍lta̍ŋ ni̍, ndu̍ ka̍nda̍ ma̍ŋ mbo̍ chūūŋgīāā ma̍ŋ nāa̍ pi᷅lɛ̍ ni̍.

⁸Nya̍ wāŋnda̍ o̍ chi̍e̍ēŋndo̍ ni᷄ŋ kpo̍u̍ lā nɔ̍ si̍o̍o̍ŋīī Mɛ̄lɛ̄ka̍ Ya̍a̍wɛ̄ɛ̄ ve̍. Nya̍ wānāa̍ cho̍ o̍ chi̍e̍ēŋndo̍ ni᷄ŋ nda̍ fa̍ū, lā nɔ̍ bɛ̍ɛ̄le̍ŋ le̍ ndu̍.

⁹Mɛ̄ɛ̍ o̍ di̍mi̍ māā chi̍e̍ēŋndo̍ ō wa̍, mbo̍ wā. Mɛ̄ɛ̍ o̍ so̍ō mi̍ nyɔ̄ɔ̍ŋ kpo̍u̍ ŋ̍ wa᷅.

¹⁰Kɛ̄ɛ̄sīāālā lɛ̄ŋīi̍ pi̍ɛ̍ī Mɛ̄lɛ̄ka̍ le̍ ve̍ ā kɛ̄ɛ̄sīāā la̍ŋ, tɛ̄ɛ̄mbūūwo̍ Mɛ̄lɛ̄ka̍ Ya̍a̍wɛ̄ɛ̄ tɛ̍ɛ̍mbūū la̍ŋ ni̍. Īsɔ̄ɔ̍ o̍ īsɔ̄ɔ̍ nda̍ tūu̍ le̍ tōsāa̍, lāāsīa̍a̍ o̍ la̍a̍sīāā ndi̍ ni̍.

¹¹Kɛ̍ Mɛ̄lɛ̄ka̍ Ya̍a̍wɛ̄ɛ̄ ndu̍ ndu̍, nyɛ̄ o̍ nyɛ̄ o̍ kɛ̍ɛ̍si̍a̍a̍, lōo̍ o̍ lo᷅ le̍chōo̍ le̍ fɛ̍ɛ̍ŋ a̍ fɛ̍ɛ̍ŋ ni̍. Nyɛ̄ o̍ yi̍yāŋ le̍ tōsāa̍ wo̍, le̍ fɛ̍ɛ̍ŋ a̍ fɛ̍ɛ̍ŋ ō fe̍ŋāŋ le̍cho̍o̍ le̍.

¹²Lēlɛ̄ŋ o̍ lēlɛ̄ŋ le̍ chɛ̍l Mɛ̄lɛ̄ka̍ Ya̍a̍wɛ̄ɛ̄ māā Mɛ̄lɛ̄ka̍ nda̍ nda̍ sōōlūū wo̍ pɛ̍, lɛ̄ŋndē lēŋ lē pɛ̄l tɔ̄nɔ̄ɔ̍, ndu̍yɛ̍ wānāā o̍ chu̍a̍ māā wānāā ndɔ̄ wa̍ ā pɛ̄l tɔ̄nɔ̄ɔ̍.

¹³Nāa̍ Mɛ̄lɛ̄ka̍ Ya̍a̍wɛ̄ɛ̄ cho̍ ɛ̄chɛ̍nɛ̄ wa̍, ō chō tōfāa̍ lɛ̄ŋ, mbo̍ wā chūāā ŋ̄wāŋndā chīe̍e̍ kpo̍u̍ chɔ̍ɔ̍.

¹⁴Mɛ̄lɛ̄ka̍ Ya̍a̍wɛ̄ɛ̄ o̍ cho̍ māsāa̍ chōo̍ cho̍o̍ wo̍, ō chō wāŋnda̍ kpe̍de̍ mɛ̍ɛ̍nda᷄ŋndo̍ o̍ chi̍e̍ēŋndo̍ chōo̍.

¹⁵Nyɛ̄ o̍ nyɛ̄ wāŋndā chīe̍e̍ya̍ ā tōsa̍ ō sīnā, kāni̍ fu̍u̍le̍, ndu̍ to̍o̍si̍a̍a̍ yīya᷄ŋnda̍ wāŋndā chīe̍e̍ya̍ ni̍.

¹⁶Mɛ̄ɛ̍ o̍ mɛ̄ɛ̍ māsā bɛ̍ndōo̍ ō nɔ̍ so̍vɛ̄i̍ya̍a̍ dīāllūŋ kālāa̍, ō cho̍ kpa̍āya̍ ndā ko̍ŋ te̍ to̍sā mā yēm ya̍a̍mɔ̍ɔ̍wa̍ o̍ chūūwo̍ le̍. Ndu̍yɛ̍, mɛ̄ɛ̍ o̍ mɛ̄ɛ̍ so̍vɛ̄i̍nɔ̍ɔ̍ ō nɔ̍ kpa̍a̍yāa̍, ō chō a̍ kpāāya̍ ndɔ̄ ko̍ŋ te̍ o̍ ya᷅m ya̍a̍mɔ̍ɔ̍wa̍a̍ ndūa̍a̍ le̍.

¹⁷Mɛ̄ɛ̍ o̍ mɛ̄ɛ̍ su̍a̍ā chɔ̄ūwa̍ ā nɔ̍ kpa̍a̍yāa̍, wānā ti̍i̍ndāŋ kpa̍āya̍ ndāa̍ le̍, ō cho̍ kpa̍āya̍ ndā ko̍ŋ te̍ to̍sā mī wānā ye᷅m chɔ̄ūwo̍ le̍.

¹⁸Hɔ̄lte̍ Mɛ̄lɛ̄ka̍ Ya̍a̍wɛ̄ɛ̄ le̍ŋ lē chō wānāa̍ nɔ̍ sīōōŋīī ndūɛ̍i̍ ya̍ chōo̍. Wānāa̍ tīīnda̍ŋ ka̍a̍lā fɛ̍ɛ̍ŋ a̍ fɛ̍ɛ̍ŋ o̍ ka̍a̍la̍ ŋ̄wāŋndā chīe̍e̍ wo̍ wa̍, hɔ̄ltē ndɔ̍le̍ŋ lē chō nda̍ chōo̍.

¹⁹Wānāā wāā le̍nde̍ tōsāa̍ o̍ to̍sā ni̍ mī pīɔ̍mndo̍ bēndū nda̍. A̍ te̍le̍ŋ yīmā bɛ̄ndūa̍ŋ bɛ̍ɛ̍ māndāa̍ o̍ ma̍ndā nda̍ ni̍.

²⁰Ŋ̄ dɔ̄ū tīīnda᷄ŋ nāa̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ. Ndu̍ cho̍ wāna̍ ma̍ndā na̍a̍ ndu̍yɛ̍, mbō mālā na̍a̍ wo̍ ni̍.

²¹Ō tōsa̍ mi̍ ŋ̄ wā a̍ kɔ̄ltā kɛ̄ndɛ̄, kāni̍ fu̍u̍le̍, le̍ mɛ̄ɛ̍ na̍a̍ ŋ̄ dɔ̄ū tīīnda᷄ŋ nāa̍ o̍ dīōlā ndɔ̄la̍ kāsīla̍ŋ ni᷄ŋ yɛ̍.

²²Mɛ̄lɛ̄ka̍ Ya̍a̍wɛ̄ɛ̄, ŋ̄ chō nu̍m pīɛ̄īyo̍, māā mɛ̄ɛ̍ na̍a̍ ŋ̄ dɔ̄ū tīīnda᷄ŋndo̍ o̍ nūm ni̍ŋ le̍ na̍a̍ mālāa̍ yɛ̍, mbɔ̄ māā hi̍o̍u̍ la̍chi̍ a̍ na̍a̍ kāāla̍ nu̍m cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍ chɔ̄mndo̍ fɔ̍.