Read Southern Kisi Sa᷅m 34 Bible Online

Sa᷅m 34 - Southern Kisi bible

Sa᷅m 34

¹[32] I̍ cho̍ hīōūwɔ̄ɔ̄ lāchī a̍ Mɛ̄lɛ̄ka̍ Ya̍a̍wɛ̄ɛ̍ ba̍li̍ka̍a̍ mēllo̍ le̍ lɔ̍ɔ̍ lɔ̍ɔ̍, pɛ̄ŋgu̍ o̍ pɛ̄ŋgu̍ chāndɔ̄ɔ̄lā ndɔ̄la̍ŋ lā chō ya̍ wā o̍ sōndō.

²I̍ cho̍ Mɛ̄lɛ̄ka̍ Ya̍a̍wɛ̄ɛ̍ līsāa̍ le̍ nyɛ̄ o̍ to̍sa̍l la̍ wo̍. Nya̍ nda̍ chō nyɛ̄ kīndīlāa̍ hāndɔ̄ɔ̍ chōo̍ wa̍ bɛ̍ɛ̍ lā ya᷄ŋ ya̍ nīla̍ŋ, ndu̍yɛ̍ nya̍ bɛ̍ɛ̍ mī lā līsa̍ ndu̍.

³Lā sɔ̄ɔ̄ŋgu̍u̍ ya̍ īkɛ̄i̍ mī ŋ̄ sāŋga̍la̍ Mɛ̄lɛ̄ka̍ Ya̍a̍wɛ̄ɛ̄ lātūlu̍. Lā ŋ̄ līsa᷅ŋ ndu̍ lātūlu̍.

⁴Mɛ̄ɛ̍ ya̍ I̍ pi̍ɛ̍i̍ Mɛ̄lɛ̄ka̍ Ya̍a̍wɛ̄ɛ̄ le̍ ya̍ mālāa̍, mbo̍ mūlī ya̍ dīōm, mbo̍ bāŋā ya̍ wānāā ya̍ I̍ nɔ̍ sīōōŋīī ndɛ̄i̍ ya̍ o̍ bā.

⁵Lā pīɛ̍i̍ ndu̍ le̍ nya̍ mālāa̍, ō chō nya̍ mālā mī lā na᷄ŋ kɔ̄l. Ndu̍yɛ̍, ō chō tōsā si̍ɔ̍mbu̍la̍ bi̍ī nya̍ le̍.

⁶Tē wāna̍ cho̍ o̍ nyɛ̄ pālāa̍ ni᷄ŋ ndo̍ pīɛ̍i̍ ndu̍ le̍ ndu̍ mālāa̍ pɛ̍, mbō mūli̍ ndu̍ dīōm, mbō sōli̍ ndu̍ o̍ nyɛ̄m ndɔ̄ɔ̄ŋ pa̍la᷄ŋ ni᷄ŋ kpo̍u̍.

⁷Wānāa̍ nɔ̍ sīōōŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍ wa̍, māndāa̍ ki̍i̍la̍nɔ̍ Mɛ̄lɛ̄ka̍a̍ māndā nda̍ ni̍, ndu̍yɛ̍, mbō sōlī nda̍ o̍ kpūndɔ̍ɔ̍ ni᷄ŋ.

⁸Lā hu᷄ŋ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ mī lā chē mɛ̄ɛ̍ o̍ cho̍ wānā kɛ̍ndɛ̄ yɛ̍. Wānāa̍ hu᷅ŋ nāa̍ ndu̍ chu̍a̍ le̍ nda̍ māndāa̍ wa̍ ā pɛ̄l tɔ̄nɔ̄ɔ̍.

⁹Nya̍ wānāa̍ cho̍ sa̍kpō Mɛ̄lɛ̄ka̍ o̍ hɔ̄l la̍, lā sōōlu̍u̍ Mɛ̍lɛ̄ka̍ Ya̍a̍wɛ̄ɛ̄, kāni̍ fu̍u̍le̍, wānāa̍ so̍o̍lūū ndu̍ wa̍ ā he̍ū ba̍ le̍ nyɛ̄ o̍ nyɛ̄ le̍.

¹⁰Kpɔ̍kūŋāā fɔ̍ŋndu̍a̍a̍ bɛ̍ɛ̍, te̍le̍ŋnda̍ŋ lā pūm mā būmba̍ le̍ nyɛ̄ nda̍ dīā wo̍, mī yīa̍a̍ŋ mā nɛ̄i̍ nda̍, kɛ̍ wānāa̍ to̍sā nyɛ᷅ Mɛ̄lɛ̄ka̍ Ya̍a̍wɛ̄ɛ̄ o̍ di̍mī wo̍ wa̍ nda̍, nyɛ̄ o̍ nyɛ̄ kɛ̄ndɛ̄ ō ve᷅ nda̍ lēpɛ̄ŋ te̍.

¹¹Nya̍ fe̍le̍ŋgu̍a̍a̍ ya̍ cho̍ pɛ̄ɛ̄kōo̍ wa̍ ki̍nɛ̍i̍, lā hu᷄ŋ mī lā ya᷄ŋ ya̍ nīla̍ŋ, lā hu᷄ŋ mī pɛ̍ɛ̍ku̍ nya̍ mɛ̄ɛ̍ wānā ke᷅ Mɛ̍lɛ̄ka̍ Ya̍a̍wɛ̄ɛ̍ bɛ̄ɛ̄le̍ŋ yɛ̍.

¹²Ō nɛ̄ɛ̍nɛ̍ ye̍e̍ma̍ yɛ̍ mbō wa̍ o̍ yōōmū kɛ̄ndɔ̄ɔ̍ ni᷄ŋ? Ō nɛ̄ɛ̍nɛ̍ hɛ̍na̍ŋ yɛ̍ mbō vīōū yōōmū, ndu̍yɛ̍ mbō wa̍ o̍ dɛ̍nɛ̍ kɛ̍ndɔ̄ɔ̍ ni᷄ŋ?

¹³Wānā wa̍ā nu̍a̍ā, mɛ̄ɛ̍ mānda̍ŋ a̍ mɛ̄ɛ̍ ŋ̄ sūāā yɛ̍, dīōm wɔ̄ɔ̍ŋ ō nɔ̍ mbō fūla̍ nu̍m o̍ sōndō le̍, ndu̍yɛ̍ a̍ nɔ̍ mā di̍mi̍ lāchōō le̍.

¹⁴Wānā wa̍ā le̍nde̍ ā nɔ̄ mā ma̍l īsɔ̄ɔ̍ o̍ i̍sɔ̍ɔ̍ wɔ̍ɔ̍ŋ, mā wa̍ wānā kɛ̍ndɛ̄ nāa̍ wāŋnda̍ chūā, ndu̍yɛ̍ mā wa̍ wāna̍ ki̍ndi̍ ō kālā ka̍lā le̍ hūnɔ̄ɔ̍ a̍ kɔ̄l nyūlōo̍ wāŋnda̍ tɛ̄ɛ̄ŋ.

¹⁵Wānāa̍ cho̍ sa̍kpō Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l la̍, hɔ̄ltē ndɔ̄le̍ŋ lē chō nda̍ chōo̍ le̍ nda̍ māndāa̍. Ndu̍yɛ̍ tē ā pīɛ̍i̍ ndu̍ le̍ nda̍ mālāa̍ pɛ̍, tūēīyɔ̄ɔ̍ o̍ tu̍ɛ̍ī pi̍ɛ̍īlē ndāle̍ŋ ni̍.

¹⁶Kɛ̍ wānāa̍ to̍sā sɔ̍ɔ̍ŋ wɔ̍ɔ̍ŋndo̍ŋ nda̍ nda̍, dɛ̍nɛ̍ pa̍lāa̍ o̍ tu̍sī nda̍ chōo̍ ni̍. Ō chō nda̍ fāŋā kpo̍u̍ o̍ chi̍e̍ēŋndo̍ chōo̍, wānā o̍ wānā lo̍o̍nūŋ ndɛ̍ a̍ su̍ɛ̍i̍ nda̍ le̍.

¹⁷Tē wānāa̍ cho̍ sa̍kpō Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l la̍ ā pīɛ̍i̍ ndu̍ le̍ nda̍ mālāa̍ pɛ̍, tūēīyɔ̄ɔ̍ o̍ tu̍ɛ̍ī nda̍ dīōm ni̍ mbō sōli̍ nda̍ o̍ dɛ̍nɛ̍la̍ pa̍lāāla̍ŋ ni᷄ŋ kpo̍u̍.

¹⁸Wānāā kɔ̄lta̍ŋ lā wā ha̍ā lā tāmbɛ̍i̍ a̍ nyɛ̄ pālāa̍, ā nɔ᷅ lɛ̍ tīīnda᷄ŋ te̍ wa̍, Mɛ̄lɛ̄ka̍ Ya̍a̍wɛ̄ɛ̄ ō ku̍ē nda̍ lēvīl te̍, pīŋīo̍o̍ o̍ pi̍ŋī nda̍ ni̍.

¹⁹Mi̍ chē bɛ̍ɛ̍ wāna̍ cho̍ sa̍kpō Mɛ̄lɛ̄ka̍ o̍ hɔ̄l lo̍ bɛ̍ɛ̍ mī sɔ̄ɔ̍ŋ dɛ̍nɛ̍ pa̍la᷄ŋ ŋ̄ kōma̍l ndu̍ ta̍u̍ ni̍, kɛ̍ ndu̍yɛ̍, sōlīo̍o̍ Mɛ̄lɛ̄ka̍ Ya̍a̍wɛ̄ɛ̄ o̍ so̍lī ndu̍ o̍ mu̍ŋ ni̍ŋ kpo̍u̍ ni̍.

²⁰Māndāa̍ Mɛ̄lɛ̄ka̍ Ya̍a̍wɛ̄ɛ̄ ma̍ndā ndu̍ ni̍, pāālā ndɔ̄la̍ŋ ō pīlɛ̍ bɛ̍ɛ̍ ō yo᷅m o̍ dīāllūŋ ndɔ̄ɔ̍ŋ ni᷄ŋ te̍.

²¹Kɛ̍ wānāa̍ to̍sā sɔ̍ɔ̍ŋ wɔ̍ɔ̍ŋndo̍ŋ nda̍, a̍ wānāa̍ tu᷅l wa̍nāā sa̍kpūa̍a̍ Mɛ̄lɛ̄ka̍ wa̍ lēyɛ̄ wa̍, nda̍ pi̍la̍ dɛ̍nɛ̍ ndā wɔ̍ɔ̍ŋndo̍ cho̍ nda̍ dīyɔ̄ɔ̄ ni̍. Mɛ̄lɛ̄ka̍ Ya̍a̍wɛ̄ɛ̄ cho̍ nda̍ yāmɛ̍i̍ kīlūl mbō tūsi̍ nda̍ nyɛ̄ pālāa̍ chōo̍.

²²Bāŋāa̍ Mɛ̄lɛ̄ka̍ Ya̍a̍wɛ̄ɛ̄ o̍ ba̍ŋā yo̍o̍mūlā bu̍ɛ̍i̍yāā ndūa̍a̍ ni̍. Wānāa̍ hu᷅ŋ nāa̍ ndu̍ chu̍a̍ le̍ nda̍ māndāa̍ wa̍, ō ki̍lūl lɛ̍ nda̍ īyāma̍ mbō tūsi̍ lɛ̍ nda̍ nyɛ̄ pālāā chōo̍ le̍.