Read Southern Kisi Sa᷅m 35 Bible Online

Sa᷅m 35 - Southern Kisi bible

Sa᷅m 35

¹[33] O̍o̍ Mɛ̄lɛ̄ka̍ Ya̍a̍wɛ̄ɛ̄, hu̍ŋ mā hu̍ŋ si̍mūl wānāa̍ si̍mu̍l la̍ wa̍. Sɔ̍ŋga̍ a̍ wānāa̍ cho̍ sɔ̍ŋgɔ̄ɔ̍ a̍ ya̍ wa̍.

²Chu̍a̍ wo̍lɔ̄ɔ̄lā nūmnda̍ chɔ̄ūla̍ŋ. Chu̍a̍ bo̍o̍ īchīli̍ŋ so̍vɛ̄i̍ya̍ bīī o̍ bā le̍ nda̍ māndāa̍ wo̍, mā hu̍ŋ chi̍i̍ndīāā yōōmū nūu̍.

³He̍e̍lu̍l wa̍nāa̍ cho̍ ya̍ tōūwɔ̄ɔ̍ wa̍ ba̍l nu̍mndo̍, he̍e̍lu̍l nda̍ chūēī nūmnde̍ mā sɔ̍ŋga̍ a̍ nda̍. Di̍mu̍l la̍ māā ā chō yōōmū nūu̍ chīīndīāā.

⁴Wānāa̍ cho̍ ya̍ kɔ̄ɔ̄lī le̍ yōōmū nūu̍ tɛ̄ɛ̄mbūūwo̍ wa̍, yo̍m nda̍ o̍ chɔ̄ūwo̍, mī si̍ɔ̍mbu̍la̍ŋ lā bīī nda̍. Wānāa̍ yi̍i̍ ya̍ ka̍ŋ de̍fo̍o̍ wa̍, to̍sa̍ mī kɔ̄lta̍ŋ lā lāāsi̍a̍ŋ nda̍ mā nyāānu᷄ŋ.

⁵Mbɔ̄ māā ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ō kɔ̍ a̍ nda̍ tōūwɔ̄ɔ̍, mɛ̄ɛ̍ hūēīye̍ ī kūā nu̍a̍ā a̍ tɛ̄fɛ̍la̍ŋ yɛ̍ fɔ̍.

⁶Tē ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ō wa̍ nda̍ tōūwɔ̄ɔ̍ pɛ̍, mbɔ̄ māā nyūmnda̍ŋ mā to᷄l nda̍ lāchī fɔ̍, ndu̍yɛ̍ nɛ̄īla̍ nda̍ nyāānu᷄ŋ nda̍ŋ bɛ̍ɛ̍ lā chūlu̍ka̍ nda̍ lāchī fɔ̍.

⁷I̍ yɔ̍ŋ nda̍ nyɛ̄ o̍ nyɛ̄ le̍, ma̍ yēŋ ya̍ yāŋɔ̄ɔ̄lē sɔ̍ɔ̍sɔ̍ɔ̍le̍ŋ. Ā tūu̍ ya̍ so̍o̍ŋndo̍ le̍ mī hu̍ŋ de᷅l lēni᷄ŋ mā dīī ya̍.

⁸Kɛ̍ ndu̍yɛ̍, kpūndɛ̍ nda̍ cho̍ kɔ̍l te̍ wo̍ chō nda̍ dēlɔ̄ɔ̄ chōo̍ ni̍. Yāŋɔ̄ɔ̄lē nda̍ ye᷄ŋ ya̍ le̍ŋ, nda̍ pi̍la̍ chō hāū o̍ le̍ŋ. Ā chō dēlɔ̄ɔ̄ o̍ so̍o̍ŋ nda̍ tūu̍ ya̍ wo̍ ni᷄ŋ mā vī kpo̍u̍.

⁹Tē Mɛ̄lɛ̄ka̍ Ya̍a̍wɛ̄ɛ̄ to̍sa̍ ke̍ŋ pɛ̍, I̍ na̍ŋ kɔ̄l bu̍tē le̍ mɛ̄ɛ̍ o̍ chi̍i̍ndi̍a̍a̍ yōōmū nūu̍ yɛ̍.

¹⁰O̍ ko̍ŋ, I̍ li̍sā ni̍ŋ ndu̍ a̍ kɔ̄l nūu̍ kpo̍u̍, mī di̍mu̍l ndu̍ a̍a̍, “Mɛ̄lɛ̄ka̍ Ya̍a̍wɛ̄ɛ̄, wānā bɛ̍ɛ̍ cho̍ māā nūm te̍. Wāna̍ nɔ̍ kpa̍a̍yā le̍ wo̍, tē wāna̍ hi̍o̍ū ndu̍ wo̍ ō de᷄l ndu̍ chōo̍ pɛ̍, nu᷄m ba̍ŋā ndu̍ ni̍, tē ā de᷄l wāna̍ bāhāvɛ̍i̍yo̍ chōo̍ le̍ nyɛ̄m ndɔ̄ɔ̍ŋ pōōndīa̍a̍ pɛ̍, nu᷄m su̍ŋgū le̍ ndu̍ ni̍.”

¹¹Wānāā dɛ̍nɛ̍ wɔ̍ɔ̍ŋnda̍ ha̍ā ā tɛ̄nda̍l la̍ se̍īlē lāka̍fāle̍ŋ, ma̍ dūāū ya̍ sɔ̄ɔ̍ŋ ya̍ si̍nā bɛ̍ɛ̍ le̍ wo̍ŋ chōo̍.

¹²Tē I̍ to̍sa̍l nda̍ sūɛ̍i̍ kɛ̍ndɛ̄i̍ pɛ̍, nda̍ mīī ya̍ i̍ wɔ̄ɔ̍ŋnde̍ tōsāl. Kɔ̄l nūu̍ chō bɔ̄ɔ̍ o̍ pi̍a̍ā a̍ mɔ̍nɛ̍i̍.

¹³Kɛ̍ ya̍ ya̍, tē ā nāa̍ pɛ̍ I̍ bi̍ī mɔ̍nɛ̍i̍ le̍ nda̍. Mī wo̍u̍nu̍ŋ nyɛ̍lā lābɛ̍kīla̍ŋ, mī bi̍ī su᷅mndo̍, mī tu̍ndū bōlle̍ŋ mī pi̍ɛ̍i̍ Mɛ̄lɛ̄ka̍ le̍ nda̍.

¹⁴Cha᷄ŋndo̍ le̍ nda̍ mɛ̄ɛ̍ wāŋndo̍ chāŋ nu̍a̍ā le̍ ndi̍a̍a̍mɔ̍ɔ̍ ndɔ̄ɔ̍, kɛ̄lɛ̄ŋgāā le̍ wānāyɛ̍ī ndūɛ̍i̍ yɛ̍. Mī ba̍lu̍ a̍ cha᷄ŋndo̍ le̍ nda̍, mɛ̄ɛ̍ wāŋndo̍ chāŋ nu̍a̍ā kāla̍ ndɔ̄ yɛ̍.

¹⁵Kɛ̍ mɛ̄ɛ̍ dɛ̍nɛ̍ pālāa̍ kōma̍l la̍, ma̍ chūūŋgi̍āŋ ma̍ tūāl la̍ māmɔ̄ɔ̍. Wānāā lēkāa̍wa̍ ā ya̍ si̍nā bɛ̍ɛ̍ le̍ wa̍ ma̍ sūāŋ ya̍ sɔ᷄ŋnde̍ pi̍la̍.

¹⁶Mɛ̄ɛ̍ wānāa̍ wo᷅ Mɛ̍lɛ̄ka̍ le̍ wa̍ ā tōsā sɔ̍ɔ̍ŋ, ō wa̍ bɛ̍ɛ̍ nāmtāa̍ ā mām yɛ̍, le̍nde̍ wāŋnda̍ ha̍ā ā chō ni̍, nūa̍a̍ ya̍ nu̍a̍ā kpɛ̍ɛ̍ndɛ̄ŋ bɛ̄ndū, a̍ sūɛ̍i̍ nɛ̍i̍ya᷄ŋnde̍.

¹⁷Māsānɔ̄ɔ̍ Mɛ̄lɛ̄ka̍, a̍ cho̍ ya̍ tōfā kɛ̄ndɛ̄ le̍. Hu̍ŋ ni᷅ŋ mā hu̍ŋ so̍lī ya̍ ya̍a̍mɔ̍ɔ̍wa̍ ha̍ā o̍ ba̍ fɔ̍, hu̍ŋ ba̍ŋā yōōmū nūu̍ kpɔ̍kūŋnda̍ ha̍ā tɛ̄ɛ̄ŋ.

¹⁸Tē a̍ ba̍ŋa̍ ya̍ pɛ̍, I̍ me̍l ni̍ŋ nu̍m ba̍li̍ka̍a̍ fāŋgāa̍ tɛ̄ɛ̄ŋ. Tē wānāa̍ Mɛ̄lɛ̄ka̍a̍ chūūŋgi̍āŋ le̍ nu̍m sōōlūūwo̍ pɛ̍, I̍ cho̍ nu̍m sāŋgālā nda̍ o̍ hɔ̄l kpo̍u̍.

¹⁹Chɛ᷅l mī wānāa̍ tu̍l ha̍ā ya̍ yɛ̍le̍ŋ o̍ fo̍ndō fu̍u̍wo̍ chōo̍ wa̍ ā tīu̍ ya̍ bā mā wūu̍ kpe̍njo̍o̍ le̍. Chɛ᷅l mā kānya̍l la̍ hɔ̄lte̍ŋ te̍.

²⁰Wāŋnda̍ ha̍ā ā chi̍e̍ē su̍ɛ̍i̍ nāa̍ wāna̍ chi̍o̍o̍ chūā le̍. Wānāa̍ nɔ̍ i̍sɔ̍ɔ̍ a̍ wānā le̍ wa̍ bɛ̍ɛ̍, sɔ̄ɔ̍ŋ lāchōōwa᷄ŋ kɛ̄ɛ̄sīa̍a̍ mā dūāū nda̍ chōo̍.

²¹Ā chō ya̍ sɔ̄ɔ̍ŋ dɔ̄wɔ̄ɔ̍ chōo̍ mā dēŋī cho̍o̍ cho̍o̍ āā, “Le̍nde̍ ŋ̄ tōsa̍ ni̍, na̍a̍ pi̍la̍ ŋ̄ chē nu̍m a̍ lēhɔ̄l pɛ̍ɛ̍ŋ.”

²²Nyɛ̄ o̍ nyɛ̍ nda̍ chō to̍sāa̍ nūm pi̍la̍ cho̍ chɔ̄ɔ̍, Mɛ̄lɛ̄ka̍ Ya̍a̍wɛ̄ɛ̄. Me̍ī a̍ ndi̍ le̍. Ku̍ā ya̍ lē vīl te̍, Māsānɔ̄ɔ̍ Mɛ̄lɛ̄ka̍.

²³Chɔ̍ŋ mā sūŋgū le̍ ya̍, Mɛ̄lɛ̄ka̍ nūu̍. Chɔ̍ŋ mā ba̍ŋa̍ ya̍, Māsānɔ̄ɔ̍ Mɛ̄lɛ̄ka̍ nūu̍.

²⁴O̍o̍ Mɛ̄lɛ̄ka̍ Ya̍a̍wɛ̄ɛ̄, nūm yāma̍nɔ̄ sa̍kpōo̍, ki̍o̍lu̍ ya᷅mɛ̍i̍ mā ke̍ ya̍ di̍ nūu̍. Chɛ᷅l mī ya̍a̍mɔ̍ɔ̍wa̍a̍ nīa̍a̍ ā wūu̍ kpe̍njo̍o̍ mā ma᷄m ya̍ le̍.

²⁵Chɛ᷅l mī ya̍a̍mɔ̍ɔ̍wa̍ ha̍ā ā tūi̍i̍ ya̍ bā le̍, yɔ̄ŋi̍ nda̍ dīmi̍ a̍ ya̍ o̍kɔ̄ɔ̄ āā, “He̍ī na̍a̍ ŋ̄ wa̍ kɔ̄ɔ̄lī ni̍. Ŋ̍ chīi̍ ndu̍ bā tīū.”

²⁶Yo̍m nda̍ mā sɔ̄ɔ̄ndi̍a̍ŋ. Tē nyɛ̄ pālāa̍ ō kōma̍l la̍ pɛ̍, ā mīī ya̍ māmɔ̄ɔ̄. To̍sa̍ mī si̍ɔ̍mbu̍la̍ŋ lā bīī wānāā yōŋgāa̍ chi̍ ha̍ā ya̍ nyɛ̄ o̍ nyɛ̄ le̍ wa̍.

²⁷Kɛ̍ wānāa̍ hɛ̍na̍ŋ ha̍ā māā I̍ sɔ̍la̍ di̍ nūu̍ wa̍, to̍sa̍ mā na᷄ŋ kɔ̄l, ā wa̍ a̍ nya̍a̍lo̍o̍ le̍ fɛ̍ɛ̍ŋ a̍ fɛ̍ɛ̍ŋ. Ā sāŋga̍la̍ nu̍m mā dīmi̍ āā, “Mɛ̄lɛ̄ka̍ Ya̍a̍wɛ̄ɛ̄ cho̍ ō bɛ̄ndū. Tē bu̍ɛ̍ī ndɔ̄ɔ̍ wa᷄ o̍ dɛ̍nɛ̍ kɛ̍ndɔ̄ɔ̍ ni᷄ŋ pɛ̍, kɔ̄l lo̍ o̍ na᷅ŋ ni̍.”

²⁸Tē ī yɔ̄nu̍ŋ le̍nde̍ pɛ̍, I̍ li̍sa̍ nūm Mɛ̄lɛ̄ka̍ Ya̍a̍wɛ̄ɛ̄, le̍ pāa̍le̍ŋ kpɛ᷅ŋ. Mī di̍mi̍ a̍a̍, “Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄. Sa̍kpōyɛ̍i̍ ndūɛ̍i̍ ī chō bɔ̄ɔ̍.”