Read Southern Kisi Sa᷅m 36 Bible Online

Sa᷅m 36 - Southern Kisi bible

Sa᷅m 36

¹[34] Wāna̍ yɔ̄ŋ wɔ̄ɔ̍ŋndo̍ nyɛ̄ yɔ̄ŋ wɔ̄ɔ̍ŋndo̍ dīmūl ndu̍ le̍ tōsāa̍ wo̍, o̍ kɔ̄l lo̍ ni᷄ŋ di̍ di̍ o̍ tu̍ɛ̍i̍nūŋ ndu̍ sūɛ̍i̍ ni̍. Wānā wa̍ā nu̍a̍ā sīōōŋīī o̍ sīōōŋīi̍ Mɛ̄lɛ̄ka̍ ō nɔ᷅ le̍.

²Ndu̍ pi̍la̍ bi̍ī pɛ̍ ō chūānu̍ŋ o̍ bɛ̍ndū, ō yīya̍ŋ māā Mɛ̄lɛ̄ka̍ se̍e̍lūŋ ni̍ŋ yɔ᷅ŋ wɔ̄ɔ̍ŋ o̍ cho̍ chōo̍ wo̍, mbō pɛ̄ɛ̄sa̍ ndu̍ le̍ ndu̍ le̍.

³Sɔ̄ɔ̍ŋ kɔ̄l vēsɛ̍i̍yo̍ŋ, a̍ sɔ̄ɔ̍ŋ lāchōōwa᷄ŋ ko̍ni̍ ŋ̍ fu̍lā ndu̍ o̍ sōndō ni̍. Kɔ̄l kālo̍o̍ bɛ̍ɛ̍ ō nɔ̍ lɛ̍ le̍, kɛ̄lɛ̄ŋgāā mbō tōsa̍ sūɛ̍i̍ kɛ̍ndɛ̄i̍.

⁴Tē ō hīni̍ īchɔ̄l pɛ̍, sɔ̄ɔ̍ŋ wɔ̍ɔ̍ŋndo̍ŋ ko̍ni̍ o̍ kɛ̍ɛ̍sīāŋ o̍ kɔ̄l le̍ tōsāa̍ ni̍. Ō to̍sā i̍sɔ̍ɔ̍ o̍ īsɔ̄ɔ̍ kɛ̍ndɛ̄ le̍. Ō chu̍ē yɔ᷅ŋ wɔ̄ɔ̍ŋndo̍ māā sūɛ̍i̍ wɔ̍ɔ̍ŋ te̍.

⁵O̍o̍ Mɛ̄lɛ̄ka̍ Ya̍a̍wɛ̄ɛ̄, kāālā ŋ̄ kāāla̍ ŋ̄wāŋndā chīe̍e̍ wo̍, le̍ lɔ̍ɔ̍ lɔ̍ɔ̍ ā chō lēchōo̍, ndu̍yɛ̍ kāālā kōŋ chō ō bɛ̄ndū, māā chɔ̍ŋ lɛ᷅ŋ he̍l o̍ ha̍la̍ di̍. Ndu̍yɛ̍, sāndɔ̄ɔ̄ ŋ̄ sāndu̍ a̍ wāna̍ chīo̍o̍ wo̍ ō chō ō bɛ̄ndū, māā chɔ̍ŋ lɛ᷅ŋ kɔ̍ o̍ ha̍la̍.

⁶Sa̍kpōyɛ̍ī nūmnde̍ ī chō ī bɔ̄ɔ̍, nu̍a̍ā ŋ̄ chā āā pēmbūŋ vīlɛ̄ŋ bɛ̄ndo᷄ŋ ni̍. Yāma᷅ŋ ŋ̄ kīālū wo̍ŋ bɛ̍ɛ̍ ŋ̄ chō sa̍kpō, ndu̍yɛ̍ ŋ̄ chō yāma᷅ŋ kɔ̄ndɔ̄fi̍li̍ŋ bɛ̄ndū. Na̍a̍ chūāā ŋ̄wāŋndā chīe̍e̍ ni̍, a̍ vīsīa̍a̍, nūm Mɛ̄lɛ̄ka̍ Ya̍a̍wɛ̄ɛ̍ cho̍ na̍a̍ māndāa̍ ni̍.

⁷O̍o̍ Mɛ̄lɛ̄ka̍, kāālā ŋ̄ kāāla̍ ŋ̄wāŋndā chīe̍e̍ wo̍, le̍ lɔ̍ɔ̍ lɔ̍ɔ̍ ō chō lēchōo̍. Ndu̍yɛ̍ chūāū ŋ̄wāŋndā chīe̍e̍ kpo̍u̍, o̍ wūndu̍le̍ nu̍mnde̍ŋ bɛ̄ŋgu̍ nda̍ vīāŋnūŋ le̍ mālāa̍ sɔ̄lāa̍ ni̍.

⁸Tē ŋ̄ hīŋ nāa̍ nūm chu̍a̍ pɛ̍, a̍ ke̍ na̍a̍ nyɛ̄ dīa̍a̍ ō kɛ̄ndɛ̄ kɛ̍ndɛ̄ bɛ̄ndōo̍, ŋ̄ dē, ŋ̄ pīm, ndu̍yɛ̍ mā to̍sa̍ mī ŋ̄ na᷄ŋ kɔ̄l ta̍u̍ ta̍u̍.

⁹Nu᷄m yɔ̍ŋgū yo̍o̍mōo̍ le̍ nyɛ̄ o̍ nyɛ̄ yōōmāā ni̍, ndu̍yɛ̍ nyɛ̄ wa̍wo̍ŋ ŋ̄ yɔ̄ŋgū wo̍ ndu̍ to̍sā ni̍ mī ŋ̄ chē nyɛ̄ wa̍wo̍ŋndo̍.

¹⁰Hi̍o̍u̍ la̍chi̍ a̍ wānāa̍ to̍sā nyɛ᷅ ŋ̄ dīmī wo̍ wa̍ kāālāa̍ māā pāāndū, ndu̍yɛ̍ wānāā kɔ̄ltā ndāla̍ŋ lā chō sa̍kpō nu̍m o̍ hɔ̄l la̍, mā to̍sa̍l nda̍ dɛ̍nɛ̍ kɛ̍ndɔ̄ɔ̍.

¹¹Chɛ᷅l mī wānāā yōŋgāa̍ ha̍ā ā sāa̍ ya̍ a̍ sɔ̍ŋgɔ̄ɔ̍ le̍. Chɛ᷅l mī wānāā kɔ̄l tā vēsɛ̍i̍ya̍ ha̍ā ā tōsa̍ mī I̍ nya̍a̍nu̍ŋ te̍.

¹²Mi̍ che᷄ŋ nāa̍ wānāā dɛ̍nɛ̍ wɔ̍ɔ̍ŋnda̍ ā de᷄l la̍. Ā vīɔ̍l nda̍ lɛ̄ŋ, ā nɔ̍lā lɛ̍ mā chɛ᷄ŋ te̍.