Read Southern Kisi Sa᷅m 37 Bible Online

Sa᷅m 37 - Southern Kisi bible

Sa᷅m 37

¹[35] Ta̍mbū kɔ̄l le̍ dɛ̍nɛ̍ kɛ̍ndɛ̄ wānāā kɔ̄l vēsɛ̍i̍ya̍ ā sɔ̄lā wo̍ le̍, pa̍ŋālā wānāa̍ to̍sā sɔ̍ɔ̍ŋ wɔ̍ɔ̍ŋndo̍ŋ nda̍ le̍ nyɛ̄m ndāa̍ŋ te̍.

²Ā chō hūnɔ̄ɔ̄ lō mɛ̄ɛ̍ bīllo̍ vēsā nu̍a̍ā mbō vī yɛ̍. Ndu̍yɛ̍ ā chō su̍ŋ su̍ŋ wu̍ mɛ̄ɛ̍ pēi̍ ī nyāmālā nu̍a̍ā o̍ tɔ̄lɔ̄ɔ̍ yɛ̍.

³Dɔ̍u̍ ti̍i̍nda᷄ŋndo̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ, mā to̍sa̍l wāŋnda̍ tōnya̍a̍, ko̍ŋ to̍sā mā hīōū lāchī a̍ wāa̍ yōōmū yɛ̍lɛ̍kɛ̍lɛ̍ɛ̍, nyɛ̄ o̍ nyɛ̄ yɔ̍nūŋ nu̍m te̍.

⁴Sa̍a̍ŋgi̍a̍l Mɛ̄lɛ̄ka̍ Ya̍a̍wɛ̄ɛ̄ a̍ kɔ̄l kɛ̄ndɛ̄, ō nɔ̄lā mbō ke̍ nu̍m nyɛ̄ kɛ̄ndɛ̄ ŋ̄ yēēma̍ o̍ kɔ̄l nūmndo̍ ni᷄ŋ ndo̍.

⁵Yɔ̍ŋgu̍ŋ nu᷅m pi̍la̍ kpo̍u̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍. Dɔ̍u̍ ti̍i̍nda᷄ŋ nu̍mndo̍ o̍ ndu̍ ni̍ŋ, ō nɔ̄lā mbō mānda̍ nu̍m.

⁶Ō chō yāmɛ̍ī tōnyɛ̍i̍ kīōlɔ̄ɔ̄ a̍ nūm o̍kɔ̄ɔ̄, mbō chɔ̄ɔ̄mu̍u̍ wāŋnda̍ o̍ hɔ̄l kpe̍nde̍ke̍le̍ māā wānā sa̍kpōo̍ ŋ̄ chō ni̍.

⁷Bi̍u̍nu̍ŋ mā chu̍m Mɛ̄lɛ̄ka̍ Ya̍a̍wɛ̄ɛ̄. Chɔ̍ bɛ̍ɛ̍ wa᷅ŋndo̍ mī dɛ̍nɛ̍ wa̍ ndu̍ nɛ̄ɛ̄ŋūū, ta̍mbū kɔ̄l te̍. Wānā wɔ̍ɔ̍ŋndo̍ ō wa̍ bɛ̍ɛ̍ tɔ̍nɔ̄ɔ̍ sɔ̄lāa̍ o̍ sɔ̄ɔ̍ŋ ndɔ̄ɔ̄ŋ wɔ̍ɔ̍ŋndo̍ŋ ni᷄ŋ, sa̍a̍la᷄ŋ te̍.

⁸Wa᷅ wāna̍ kɔ̄l tūū le̍, ndu̍yɛ̍, nɔ᷅ kɔ̄l tāmbɛ̍i̍ wānā le̍, kāni̍ fu̍u̍le̍ kɔ̄l tūūwo̍ māl wa̍nā o̍ sūɛ̍i̍ ni᷄ŋ.

⁹Wānāa̍ du̍a̍ū ti̍i̍nda᷄ŋ ndāa̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ nda̍, nda̍ o̍ ke᷅ lɛ᷅ŋndē o̍ chu̍a̍ būŋgɛ̄i̍ le̍ŋ ni̍. Kɛ̍ wānāa̍ to̍sā sɔ̍ɔ̍ŋ wɔ̍ɔ̍ŋndo̍ŋ nda̍, Mɛ̄lɛ̄ka̍ chō nda̍ sōlī po̍.

¹⁰Ō bēndu̍ lɛ̍ ti᷅ŋ te̍, mī Mɛ̄lɛ̄ka̍ tōsa̍ mī wānāā dɛ̍nɛ̍ wɔ̍ɔ̍ŋnda̍ ā lo̍ pɛ̍. Kɔ̍ bɛ̍ɛ̍ o̍ fo̍ndāŋndā ndāla̍ŋ a̍ se̍e̍lūŋ nda̍ ni̍ŋ te̍.

¹¹Kɛ̍ wānāa̍ tu̍sīŋ nda̍, nda̍ lɛ̄ŋndē Mɛ̄lɛ̄ka̍ chu̍a̍ būŋgɛ̄i̍ le̍ŋ le̍ wa᷅ ni̍ŋ nyɛ̍ ndā ni̍, ndu̍yɛ̍, nda̍ wa᷅ ni̍ŋ o̍ kɔ̄l nyūlōo̍ ni᷄ŋ, ndu̍yɛ̍, mā dē nyɛ̄m kɛ̄ndɛ̄ŋ Mɛ̄lɛ̄ka̍ŋ tɔ̄nɔ̄ ni̍.

¹²Wāna̍ dɛ̍nɛ̍ wɔ̍ɔ̍ŋndo̍ mbō yīi̍ wānā sa̍kpōo̍ de̍fo̍o̍, mbō nūa̍ ndu̍ kpɛ̍ɛ̍ndɛ̄ŋ a̍ sūɛ̍i̍ nɛ̍i̍ya᷄ŋ nde̍.

¹³Kɛ̍ māmɔ̄ɔ̍ ko̍ni̍ Mɛ̄lɛ̄ka̍ ō mām wa᷅na̍ yɔ̄ŋ wɔ̍ɔ̍ŋndo̍ ni̍, kāni̍ fu̍u̍le̍, Mɛ̄lɛ̄ka̍ ndu̍ si̍nā māā ō chō su̍ŋ chi̍ī a̍ ndu̍.

¹⁴Mī wānāā wɔ̍ɔ̍ŋnda̍ ā na᷄ŋ mɔ̄ɔ̄ŋ ndāa̍ŋ fāŋndo̍ŋ, mā kīndū chīɔ̄ūlā ndāla̍ŋ le̍ wānāā tāmbɛ̍i̍ya̍, a̍ le̍ wānāā bāhāvɛ̍i̍ya̍ dīūwo̍. Mā kīndi̍ le̍ wānāā sa̍kpūa̍a̍ dīyɔ̄ɔ̍.

¹⁵Kɛ̍ ndu̍yɛ̍ wānāā wa̍ā le̍nde̍ ā chō nda̍ hūnɔ̄ɔ̄ dīū a̍ mɔ̄ɔ̄ŋ ndāa̍ŋ nda̍ pi̍la̍ŋ, ndu̍yɛ̍ ā chō hūnɔ̄ɔ̄ chīɔ̄ūlā ndāla̍ŋ yīmī yīmī.

¹⁶Wāna̍ cho̍ sa̍kpō Mɛ̄lɛ̄ka̍ o̍ hɔ̄l lo̍, nyɛ̄ pɔ̄mbɔ̄ o̍ nɔ̍ wo̍, ndu̍ hi̍o̍ū bɛ̄ndā po̍lo̍ŋ, a̍ nyɛ̄m fāŋga᷄ŋ cho̍ wāna̍ dɛ̍nɛ̍ wɔ̍ɔ̍ŋndo̍ o̍ bā wo̍ŋ.

¹⁷Wānāā dɛ̍nɛ̍ wɔ̍ɔ̍ŋnda̍ ki̍nɛ̍i̍, Mɛ̄lɛ̄ka̍ Ya̍a̍wɛ̄ɛ̄ cho̍ nda̍ kpāāyāa̍ pūū o̍ bā. Kɛ̍ wānāa̍ cho̍ sa̍kpō Mɛ̄lɛ̄ka̍ o̍ hɔ̄l la̍, Mɛ̄lɛ̄ka̍ chō nda̍ māndā.

¹⁸Wānāa̍ to̍sā nyɛ᷅ Mɛ̄lɛ̄ka̍ Ya̍a̍wɛ̄ɛ̄ di̍mī wo̍ wa̍, māndāa̍ o̍ ma̍ndā yo̍o̍mūlā ndāla̍ŋ ni̍, ndu̍yɛ̍ mī lɛ̄ŋndē ndāle̍ŋ lē wa̍ le̍ nda̍ le̍ fɛ̍ɛ̍ŋ a̍ fɛ̍ɛ̍ŋ.

¹⁹Te̍le̍ŋ sɔ̄ɔ̍ŋ pa̍la᷄ŋ ŋ̄ hūŋ nda̍ chōo̍ wo̍ŋ bɛ̍ɛ̍, mī Mɛ̄lɛ̄ka̍ tōsa̍ si̍ɔ̍mbu̍la̍ bi̍ī nda̍ le̍. Ā yɔ᷄ŋ bɛ̍ɛ̍ āā te̍le̍ŋ yīmā bɛ̄ndūa̍ŋ ni̍, nyɛ̄ dīāā ve᷅ nda̍ lēpɛ̄ŋ te̍.

²⁰Kɛ̍ wānāā dɛ̍nɛ̍ wɔ̍ɔ̍ŋnda̍ nda̍, pīɔ̍mndo̍ nda̍ sɔ̄lā ni̍, ya̍a̍mɔ̍ɔ̍wa̍a̍ Mɛ̄lɛ̄ka̍ Ya̍a̍wɛ̄ɛ̄ wa̍ ā chō lō pɛ̍, mɛ̄ɛ̍ bīl lāpe̍e̍ŋgo̍o̍ ō lō nu̍a̍ā yɛ̍, ā chō lō mɛ̄ɛ̍ ku᷄mnde̍ ī lō nu̍a̍ā wānā chi᷅ lɛ̍ ndi̍ le̍ yɛ̍.

²¹Tē wāna̍ dɛ̍nɛ̍ wɔ̍ɔ̍ŋndo̍ ō bīī kūo̍o̍ pɛ̍, ō so̍lī le̍, kɛ̍ wāna̍ cho̍ sa̍kpō Mɛ̄lɛ̄ka̍ Ya̍a̍wɛ̄ɛ̄ o̍ hɔ̄llo̍ ndu̍, tōnya̍a̍ o̍ to̍sāl wa᷅ŋnda̍ a̍ nyɛ̄m ndɔ̄ɔ̍ŋ ni̍.

²²Wānāā Mɛ̄lɛ̄ka̍ Ya̍a̍wɛ̄ɛ̄ dɔ̍ū sa̍lā wa̍, lē nda̍ lɛ̄ŋndē o̍ chu̍a̍ būŋgɛ̄i̍ le̍ŋ le̍ chō wā ni̍. Kɛ̍ wānāā o̍ ha̍ndu̍ sēndi̍o̍o̍ chōo̍ wa̍ nda̍, ō chō nda̍ sōlī lo̍ŋ po̍.

²³Tē wāŋndo̍ tōsa̍ ka̍a̍ nɛ̍ŋī Mɛ̄lɛ̄ka̍ Ya̍a̍wɛ̄ɛ̍ kɔ̄llo̍ wo̍ pɛ̍, nyɛ̄ o̍ nyɛ̍ wānā ko̍ŋ ō wa̍ to̍sāa̍, māndāa̍ Mɛ̄lɛ̄ka̍ māndā ndu̍ ni̍.

²⁴Ā yɔ᷄ŋ bɛ̍ɛ̍ āā mī wānāā wāā le̍ndi̍a̍a̍ mā de᷄l, ō ve᷅ de̍lɔ̄ɔ̄ nda̍ būmba̍ chɔ̄nɔ᷄ŋ te̍, kāni̍ fu̍u̍le̍, Mɛ̄lɛ̄ka̍ Ya̍a̍wɛ̄ɛ̍ sa̍ā nda̍ bāa̍ mbō mīŋgi̍ nda̍ sīmī ni̍.

²⁵Kāni̍ bɛ̍ɛ̍ mi̍ cha̍ŋ o̍ chūāāmbɔ̄yɛ̍ī nīi̍ ni᷄ŋ, mbo̍ fūūla᷅ŋ a̍ bōōndi̍i̍ ya̍ I̍ cho̍ ni᷅ŋ he̍ī ō yūvɛ̍i̍ye̍, lē pīlɛ̍ bɛ̍ɛ̍ I̍ chi̍ wɔ̍, wa᷅na̍ cho̍ Mɛ̄lɛ̄ka̍ o̍ hɔ̄l sa̍kpō wo̍ mī Mɛ̄lɛ̄ka̍ pūɛ̄ɛ̄nu̍ŋ a̍ ndu̍ le̍, ndu̍yɛ̍, I̍ chi̍ wɔ̍ mī chūāūwāā ndūa̍a̍ ā bālu̍ wāŋnda̍ pīɛ̄īle̍ŋ le̍ nyɛ̄ ndā dīā wo̍ le̍.

²⁶Le̍ pɛ̄ŋgu̍ o̍ pɛ̄ŋgu̍ wānā wa̍ā le̍nde̍ ō chō wāŋnda̍ tōnya̍a̍ tōsāllo̍, ndu̍yɛ̍ mī Mɛ̄lɛ̄ka̍ dɔ̄ū ndu̍ sa̍lā a̍ chūāūwāā kɛ̄ndīa̍a̍.

²⁷Lā sōli̍ ba᷅la̍ŋ o̍ sɔ̄ɔ̍ŋ wɔ̍ɔ̍ŋndo̍ŋ ni᷄ŋ, mī lā tōsa̍ sɔ̄ɔ̍ŋ kɛ̍ndɔ᷄ŋ, ko̍ŋ to̍sā mī chūāūwāā nyāa̍ ā hīōū lāchī a̍ wāa̍ o̍ lɛ̄ŋnde̍ŋ nde᷅ŋ ni᷄ŋ,

²⁸kāni̍ fu̍u̍le̍, Mɛ̄lɛ̄ka̍ Ya̍a̍wɛ̄ɛ̄ ndu̍, ō kāāla̍ sa̍kpōyɛ̍i̍. Ndu̍yɛ̍ ō pu̍ɛ̍ɛ̍nūŋ wa̍nāa̍ yɔ̍ŋgu̍ŋ o̍ ndu̍ lo̍ sa̍kpō wa̍ le̍. Māndāa̍ o̍ ma̍ndā nda̍ le̍ fɛ̍ɛ̍ŋ a̍ fɛ̍ɛ̍ŋ ni̍. Kɛ̍ wānāā dɛ̍nɛ̍ wɔ̍ɔ̍ŋnda̍ nda̍, Mɛ̄lɛ̄ka̍ chō chūāūwāā ndāa̍ sōlī po̍ o̍ lɛ̄ŋndē ndāle̍ŋ ni᷄ŋ.

²⁹Wānāa̍ cho̍ sa̍kpō Mɛ̄lɛ̄ka̍ o̍ hɔ̄l la̍ nda̍, ā chō wā o̍ lɛ̄ŋndē Mɛ̄lɛ̄ka̍ chu̍a̍ būŋgɛ̄i̍ le̍ŋ ni᷄ŋ le̍ fɛ̍ɛ̍ŋ a̍ fɛ̍ɛ̍ŋ.

³⁰Wānā kɛ̍ndɔ̄ɔ̍ ndu̍, dīōmndā kɔ̄l kālu̍la̍ŋ o̍ su̍a̍ā ni̍, ndu̍yɛ̍ o̍ nɛ̄ī sa̍na̍a̍ o̍ ki̍a̍lū ya᷅ma᷅ŋ ni̍.

³¹Mɛ̄lɛ̄ka̍ ndɔ̄ɔ̍, mbō kɛ̄si̍ŋ sa̍wāla̍ ndɔ̄la̍ŋ o̍ kɔ̄l, ō fe̍ŋāŋ le̍cho̍o̍ le̍.

³²Mī wāna̍ dɛ̍nɛ̍ wɔ̍ɔ̍ŋndo̍ ō mɛ̄ŋgɛ̍la̍ wānā kɛ̍ndɔ̄ɔ̍, mbō kīndi̍ le̍ ndu̍ dīyɔ̄ɔ̍.

³³Kɛ̍ ndu̍yɛ̍, Mɛ̄lɛ̄ka̍ Ya̍a̍wɛ̄ɛ̄ me᷅l wa̍nā kɛ̍ndɔ̄ɔ̍ mī wāna̍ dɛ̍nɛ̍ wɔ̍ɔ̍ŋndo̍ ō tīu̍ ndu̍ bā le̍. Tē ā wa̍ kɔ̍ɔ̍sɔ̍ɔ̍ a̍ ndu̍ pɛ̍, Mɛ̄lɛ̄ka̍ chɛ᷅l mā kīlu̍l ndu̍ yāmɛ̍ī lāka̍fɛ̄i̍ mā yāāla̍ ndu̍ le̍.

³⁴Lā dɔ̄u̍ ti̍i̍nda᷄ŋndo̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ, mī lā tōsa̍ nyɛ̄ sāwāla̍ ndɔ̄la̍ŋ lā dīmi̍ wo̍. Mɛ̄lɛ̄ka̍ chō tōsā mī lā sɔ̄la̍ lɛ̄ŋndē o̍ chu̍a̍ būŋgɛ̄i̍ le̍ŋ, ndu̍yɛ̍ mī lā sɔ̄la̍ bɛ̄ɛ̄le̍ŋ ta̍u̍. Ndu̍yɛ̍, lā chā ni̍ŋ mɛ̄ɛ̍ Mɛ̄lɛ̄ka̍ sōlī ni̍ŋ wa̍nāā dɛ̍nɛ̍ wɔ̍ɔ̍ŋnda̍ o̍ lɛ̄ŋnde̍ŋ nde᷅ŋ ni᷄ŋ po̍ yɛ̍.

³⁵I̍ che᷅ ni᷅ŋ wānāā dɛ̍nɛ̍ wɔ̄ɔ̍ŋnda̍, a̍ nɔ̍ wāŋnda̍ pālā bɛ̄ndōo̍ wa̍, mī nyɛ̄ nɛ̄ɛ̄ŋūū ō pūm kpe̍e̍kpe̍i̍, mɛ̄ɛ̍ yɔ̄m si̍dāā vīlɛ̄ī bɛ̄ndōo̍ ō wā nu̍a̍ā Le̍ba̍nɔ̄ŋ yɛ̍.

³⁶Kɛ̍ bōōndi̍i̍ ti̍ŋ hīōūwɔ̄ɔ̍, mi̍ I̍ mi̍i̍ŋgū lo̍ŋ, I̍ se̍e̍lu̍ŋ ndɛ̍ ndu̍ o̍ fo̍ndāŋ ndɔ̄ɔ̍ le̍. Mi̍ nu̍u̍vīāā le̍ ndu̍, kɛ̍ i̍ se̍e̍lu̍ŋ ndu̍ le̍.

³⁷Kɛ̍ to̍fa̍ wɔ̍ a̍ wānāā kɛ̍ndīa̍a̍ o̍kɔ̄ɔ̄, mɛ̍ɛ̍ndi̍a̍ŋ ndɔ̍ a̍ wānāa̍ cho̍ sa̍kpō wa̍ o̍kɔ̄ɔ̄, ndu̍yɛ̍ a̍ wānāā kɔ̄l nyūlūa̍a̍. Chūāūwāā ndāa̍ nda̍ lo᷅ o̍ fo̍ndāŋndā ndāla̍ŋ ni̍.

³⁸Kɛ̍ wānāa̍ to̍sā sɔ̍ɔ̍ŋ wɔ̍ɔ̍ŋndo̍ŋ nda̍ ki̍nɛ̍i̍, ā chō nda̍ dīū, ndu̍yɛ̍ chūāūwāā ndāa̍ a̍ chūāūwāā ndāā ma̍māa̍ bɛ̍ɛ̍ mā dīu̍ nda̍ kpo̍u̍.

³⁹Wānāa̍ cho̍ sa̍kpō Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l la̍, chīīndīa̍a̍ o̍ chi̍i̍ndīāā nda̍ ni̍. Ndu̍yɛ̍ mbō bāŋa̍ nda̍ o̍ te̍le̍ŋ dɛ̍nɛ̍ pa̍lāa̍ ni᷄ŋ.

⁴⁰Mālāa̍ Mɛ̄lɛ̄ka̍ Ya̍a̍wɛ̄ɛ̄ ma̍lā nda̍ ni̍, mbō chīīndi̍a̍a̍ nda̍ wānāā dɛ̍nɛ̍ wɔ̍ɔ̍ŋnda̍ o̍ bā, kāni̍ fu̍u̍le̍, le̍ mɛ̄ɛ̍ nda̍ pīɛ̍i̍ ndu̍ le̍ nda̍ pīŋīo̍o̍ yɛ̍.