Read Southern Kisi Sa᷅m 38 Bible Online

Sa᷅m 38 - Southern Kisi bible

Sa᷅m 38

¹[36] O̍o̍ Mɛ̄lɛ̄ka̍ Ya̍a̍wɛ̄ɛ̄, ha̍ndū ya̍ nyɛ̄ pālāa̍ chōo̍ mɛ̄ɛ̍ ŋ̄ dɔ̄ɔ̍ŋ tu̍mbe̍ a̍ ya̍ yɛ̍ le̍. Mɛ̄ɛ̍ ŋ̄ tāmbu̍ kɔ̄l a̍ ya̍ yɛ̍ tu̍sī ya̍ dɛ̍nɛ̍ pa̍lāa̍ chōo̍ le̍nde̍ le̍.

²Ā vɛ̄ ya̍ a̍ chīŋɔ̍ma̍ nūmnda̍ŋ mi̍ mā lūɛ̄ī ya̍ o̍ ŋ̄dīāl. Ā kōŋ ya̍ a̍ bā nūmndo̍, mi̍ de᷅l.

³Ā dɔ̄ɔ̄nu᷄ŋ tu̍mbe̍ a̍ ya̍, le̍ he̍ī, nyɛ̄ nɛ̄īyāa̍ pi̍la̍ cho̍ ya̍ o̍ dīāllo̍ŋ ni᷄ŋ ni̍. Yɔ̄ŋ nī wɔ̍ɔ̍ŋndo̍ tōsa̍ kɛ̍ndi̍a̍a̍ cho̍ ya̍ o̍ ŋ̄dīāl te̍.

⁴Yɔ̄ŋndā wɔ̄ɔ̍ŋndā ya̍ to̍sa̍ la̍ŋ lā mēl la̍ a̍ bōlle̍ŋ chɔ̍ŋgɔ̍mu̍. Lūsu̍l ndɔ̄ɔ̍ fūūlu̍u̍ ya̍ mɛ̍ɛ̄, nu̍a̍ā ŋ̄ chā āā bɔ̍ndīi̍ bɛ̍ndōo̍ cho̍ ya̍ o̍ lēbōl ni̍.

⁵Kūsu̍a̍ŋ mā lūɛ̄ī ni᷅ŋ o̍ pāūve̍ ya̍ lēkɔ̄ɔ̍, mi̍ i̍ wa᷅ chūŋ wɔ̄ɔ̍ŋndo̍, kāni̍ fu̍u̍le̍, le̍ dīɔ̄mīī nīi̍.

⁶I̍ bi̍ī mi̍ de᷅l lɛ̄ŋ, mi̍ hi̍nī lɛ̄ŋ sa̍na̍a̍, a̍ nyɛ̄ nɛ̄īyāa̍. Lēpāla̍ o̍ lēpāla̍ I̍ ni̍i̍lū cha̍ŋndo̍.

⁷Dīāllo̍ŋ ŋ̄ tūūlu̍ ya̍ kpɛ̍i̍. I̍ cho̍ ni᷅ŋ pīɔ̍m kɔ̍ŋgɔ̍.

⁸Dīāllo̍ŋ ŋ̄ yɔ̄nu̍ŋ ni᷅ŋ ya̍ ti̍i̍fa᷄ŋ bɛ̍ndū, I̍ si̍nāŋ ndɛ̍ mu̍ŋ te̍, a̍ nāa̍ ho̍ō. Kɔ̄llo̍ ō tāmbu̍ ya̍ ni᷄ŋ pɛ̍. I̍ cho̍ kūŋnda̍ŋ kpe̍e̍kpe̍i̍ a̍ nyɛ̄ kīndīlāa̍.

⁹O̍o̍ Māsānɔ̄ɔ̍ Mɛ̄lɛ̄ka̍, ā sīnā nyɛ᷅ ya̍ I̍ ye̍e̍ma̍ wo̍, I̍ ye̍e̍ma̍ mā si̍ŋgi̍ ya̍. I̍ cho̍ kūnda̍ŋ a̍ nyɛ̄ nɛ̄īyāa̍.

¹⁰Kɔ̄llo̍ chō ya̍ kūndɔ̄ɔ̍ bɔ̄ɔ̍. Kpāāyā bɛ̍ɛ̍ cho̍ lɛ̍ ya̍ o̍ ŋ̄dīāl te̍. Hɔ̄lta̍ŋ bɛ̍ɛ̍ lā cho̍ lɛ̍ ya̍ lā kɛ̄ndɛ̄ le̍, nu̍a̍ā la̍ŋ yi̍fīdīī.

¹¹Ndi̍a̍a̍mɔ̍ɔ̍wa̍a̍ nīa̍a̍ ni̍, a̍ wānāā na̍a̍ ŋ̄ chīɛ̄ɛ̄li̍āŋ nda̍, ā sɔ̍ɔ̍ŋgūū lɛ̍ ya̍ īkɛ̄i̍ le̍, a̍ chūŋ pāvīī nīi̍ ī chō fūlāa̍ wo̍. Yu̍ŋgu̍ nūu̍ kɛ̍sɛ̍ kɛ̍sɛ̍ ā wo̍ ya̍ ni᷅ŋ, ā sɔ̍ɔ̍ŋgūū lɛ̍ ya̍ īkɛ̄i̍ le̍.

¹²Wānāa̍ hɛ̍na̍ŋ le̍ ya̍ dīyɔ̄ɔ̍ wa̍ ā ye᷄ŋ ya̍ yāŋɔ̄ɔ̄le̍ŋ. Wānāa̍ ye̍e̍ma̍ le̍ ya̍ yɔ̄ŋūllo̍ wa̍ ā chō kɔ̄ŋgɔ̄līa̍ŋnda̍ŋ le̍ ya̍ nyɛ̄ yɔ̄ŋ. Pɛ̄ŋgu̍ o̍ pɛ̄ŋgu̍ ā chō kɛ̄ɛ̄sīāālā wɔ̄ɔ̍ŋnda̍ŋ le̍ ya̍.

¹³I̍ si̍mnu᷄ŋ māā wāna̍ nīlā bāŋu̍lɛ̍i̍, I̍ tu̍i̍ī lɛ̍ le̍. I̍ si̍mnu᷄ŋ bo̍bo̍nɔ̍, I̍ nɔ̍lā lɛ̍ sūɛ̍i̍ le̍.

¹⁴Mɛ̄ɛ̍ wāna̍ nīlā bāŋu̍lɛ̍i̍yo̍ ō wā nu̍a̍ā ā dɔ̄u̍ ndu̍ bɛ̍ɛ̍ sɔ̍ɔ̍ŋ chōo̍ ō su̍ū le̍, kāni̍ ō tu̍i̍ī le̍ yɛ̍, le̍nde̍ ya̍ I̍ cho̍ ni̍.

¹⁵Kɛ̍ ndu̍yɛ̍ o̍ ko̍ŋ ni̍ŋ kpo̍u̍ Mɛ̄lɛ̄ka̍ Ya̍a̍wɛ̄ɛ̄, nūm ya̍ ti̍i̍nda̍ŋ ni̍. Ndu̍yɛ̍, nūm Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍, ā chō ya̍ dīōm mūlī.

¹⁶Chɛ᷅l mī ya̍a̍mɔ̍ɔ̍wa̍a̍ nīa̍a̍ ā ma᷄m ya̍ o̍ nyɛ̄ pālāa̍ ni᷄ŋ te̍. Tē I̍ si̍ɛ̍ɛ̍la̍ pɛ̍, chɛ᷅l mā ma᷄m ya̍, mā kēlū ndi̍ a̍ yōŋgā ya̍ chōo̍ le̍.

¹⁷Nyɛ̄ nɛ̄īyāa̍ ō cha᷄l le̍ bā hīōūwɔ̄ɔ̄ a̍ ya̍ fɔ̍. Ndu̍yɛ̍ ō cho̍ bɛ̍ɛ̍ nyɛ᷅ nɛ̄īyāa̍ chu̍ū ya̍ chōo̍ le̍.

¹⁸I̍ chɔ̍ɔ̍mu̍u̍ yɔ̄ŋndā nīla̍ wɔ̍ɔ̍ŋnda̍ŋ, Mɛ̄lɛ̄ka̍, ndu̍yɛ̍, sīōōŋnde̍ bīī ya̍ le̍ nyɛ̄ ya̍ I̍ to̍sa̍ wo̍.

¹⁹Wānāa̍ tu̍l la̍ ha̍ā lēyɛ̄ o̍ fo̍ndō fu̍u̍ wo̍ chōo̍ wa̍, nda̍ chōŋnu᷄ŋ kɛ̍ndi̍a̍a̍ pu̍lu̍ pu̍lu̍. Ndu̍yɛ̍, ya̍a̍mɔ̍ɔ̍wa̍a̍ nīa̍a̍ ha̍ā ā chō bɔ̄ɔ̍ fa̍ŋgā.

²⁰Wānāā ya̍ to̍sāl ha̍ā tōnya̍a̍ mā mīŋgūl la̍ a̍ ī wɔ̄ɔ̍ŋnde̍ wa̍, sa̍bū nda̍ tu᷄l la̍ yɛ̄le̍ŋ ndo̍ cho̍ ni̍, māā le̍ mɛ̄ɛ̍ ya̍ I̍ to̍sā su̍ɛ̍i̍ sa̍kpō yɛ̍.

²¹O̍o̍ Mɛ̄lɛ̄ka̍ Ya̍a̍wɛ̄ɛ̄, ma᷅l la̍ le̍. Ku̍ā ya̍ lēvīl te̍, Mɛ̄lɛ̄ka̍ nūu̍.

²²Māsānɔ̍ nūu̍, nūm wāna̍ ni̍ pi̍ŋīa̍a̍, ke̍le̍ŋa̍ mā ma̍la̍ ya̍ su̍ŋ su̍ŋ mɛ̄ɛ̍ na̍a̍ ŋ̄ sūāā nu̍a̍ā yɛ̍.