Read Southern Kisi Sa᷅m 39 Bible Online

Sa᷅m 39 - Southern Kisi bible

Sa᷅m 39

¹[37] I̍ di̍mu̍l ya̍ pi̍la̍ a̍a̍, “I̍ cho̍ mānda᷄ŋ a̍ mɛ̄ɛ̍ kūɛ̍ɛ̍la̍ nīla̍ŋ lā wā yɛ̍. I̍ cho̍ chɛ̍lɔ̄ɔ̄ mī īsɔ̄ɔ̍ o̍ īsɔ̄ɔ̍ wɔ̍ɔ̍ŋ ī fūla̍ ya̍ o̍ sōndō le̍. Ha̍a̍a̍ mi̍ wānāā dɛ̍nɛ̍ wɔ̍ɔ̍ŋnda̍ ā wā ya̍ īkɛ̄i̍, I̍ cho̍ sōndō nūu̍ kīndā kpɔ̍kū.”

²Ndu̍yɛ̍ mi̍ me̍ī le̍nde̍, I̍ su̍u̍ nyɛ᷅ o̍ nyɛ̄ le̍. A̍ nyɛ̄ kɛ̄ndɛ̄ o̍kɔ̄ɔ̄ bɛ̍ɛ̍ I̍ su̍u̍ nyɛ̄ o̍ nyɛ̄ le̍. Kɛ̍ o̍ ko̍ŋ ni̍ŋ fa̍ū, mi̍ nyɛ̄ nī nɛ̍i̍yāa̍ ō hīāū lāchī kɛ᷅.

³Mi̍ ka̍ndū būūla᷄ŋndo̍ ta̍u̍. Mɛ̄ɛ̍ kpɛ̍ ya̍ I̍ ke̍e̍lā kɔ᷅llo̍ yɛ̍, le̍nde̍ ko̍ni̍ būūla᷄ŋndo̍ ō hīāū la̍chi̍ a̍ wāa̍ o̍ kɔ̄l nūu̍ ni᷄ŋ ni̍. O̍ mɛ̄ɛ̄lu̍la̍ŋ kpɔ̍ŋ I̍ nɔ̍la̍ mī me̍i̍ le̍, mi̍ nyu̍nā Mɛ̄lɛ̄ka̍ a̍a̍,

⁴“Mɛ̄lɛ̄ka̍ Ya̍a̍wɛ̄ɛ̄, yāndi̍i̍ chɔ̍m ya̍ mɛ̄ɛ̍ pālɛ̍i̍ nīi̍ ya̍ nɔ̍ le̍ wāa̍ yōōmū ve̍ ī lo̍ yɛ̍. Chɔ̍m ya̍ lɔ̍ɔ̍ ya̍ I̍ cho̍ wu̍ wo̍. Lɔ̍ɔ̍ kūɛ̍ɛ̍nɛ̍ yōōmū nūu̍ chō yɛ̍ chūwɔ̄ɔ̄?”

⁵Ā bīī ma̍ kīālū yōōmū nūu̍ ō bīŋgī. Yōōmū nūu̍ ō cho̍ nu̍m o̍ hɔ̄l nyɛ̄ o̍ nyɛ̄ le̍. Wāŋndā chīe̍e̍ya̍ kpo̍u̍, yōōmūlā ndāla̍ŋ lā chō māchūāā nu̍m o̍ hɔ̄l mɛ̄ɛ̍ wāŋndo̍ ō sōlīŋ nu̍a̍ā hūēīye̍ o̍ sōndō yɛ̍.

⁶Wāna̍ chi̍o̍o̍ lō ma̍lu̍a̍ā nu̍a̍ā pɛ̍ mɛ̄ɛ̍ wūndu̍le̍ŋ lē lō nu̍a̍ā yɛ̍. Fāfa̍la̍ o̍ fāfa̍la̍ wāna̍ chi̍o̍o̍ ō fāfa̍la̍ fo̍ndō fu̍u̍. Lɔ̍ɔ̍ o̍ cho̍ yōōmū wo̍, mbō nūūvi̍a̍a̍ nyɔ̄ɔ̍ŋ mbō dēŋge̍la̍ mu̍ŋ, kɛ̍ tē ō vī pɛ̍ ō si̍nā bɛ̍ɛ̍ wa᷅na̍ di̍ā mu̍ŋ tɔ̄nɔ̄ le̍.

⁷Mɛ̄ɛ̍ mī o̍ yɛ̄ɛ̍nɛ̍ ni̍ŋ ya̍ I̍ dɔ̍ū yɛ̍ tīīnda᷄ŋ nūu̍, Māsānɔ̄ɔ̍ Mɛ̄lɛ̄ka̍? O̍ nūm ni̍ŋ ya̍ I̍ du̍a̍ū tīīnda᷄ŋ nūu̍ ni̍.

⁸So̍li̍ ya̍ o̍ yɔ̄ŋndā nīla̍ wɔ̍ɔ̍ŋnda̍ŋ ni᷄ŋ kpo̍u̍, chɛ᷅l mī dīɔ̄māā fo̍ndūa̍a̍ ā ma᷄m ya̍ le̍.

⁹I̍ me̍i̍ do̍ŋ bɛ̍ndū. Ba̍kō bɛ̍ɛ̍ I̍ su̍ū lɛ̍ le̍, kāni̍ fu̍u̍le̍, nūm pi̍la̍ ha̍ndu̍ ya̍ nyɛ̄ pālāa̍ ho̍ō chōo̍ ni̍.

¹⁰Pɛ̍ŋgi̍ ya̍ ni᷅ŋ nyɛ̄ pālāa̍ tūsīo̍o̍ chōo̍ fɔ̍, Mɛ̄lɛ̄ka̍. Ō lo̍ ni᷅ŋ cho̍be̍ mī vi᷅, a̍ lɔ̄ɔ̄ ŋ̄ chō ya̍ wo̍.

¹¹Tē wāŋndo̍ ō tōsa̍ yɔ̄ŋ wɔ̄ɔ̍ŋndo̍ pɛ̍, nyɛ̄ pālāā ŋ̄ tūsī ndu̍ chōo̍ le̍ ndu̍ sīlāa̍ wo̍, ndu̍ cho̍ dīōmndā kālā ka̍lālā ŋ̄ sūāā nāa̍ ndu̍ chu̍a̍ la̍ŋ ni̍. Nyɛ̄m kɛ̄ndɛ̄ŋ o̍ ha̍ndu̍ kɔ̄llo̍ chōo̍ wo̍ŋ, mā tɛ̄ɛ̄mbu̍u̍ mu̍ŋ o̍ te̍le̍ŋ bi̍ŋgī bɛ̄ŋgu̍, bɛ̍ɛ̍ŋ bɛ̍ɛ̍ŋ mɛ̄ɛ̍ kāāŋgūa̍a̍ tɛ̄ɛ̄mbūū nu̍a̍ā nyɔ̄ɔ̍. Ŋ̄wāŋndā chīe̍e̍ kpo̍u̍ ā chō māchūāā nu̍m o̍ hɔ̄l mɛ̄ɛ̍ wāŋndo̍ sōlīŋ nu̍a̍ā hūēīye̍ o̍ sōndō yɛ̍.

¹²O̍o̍ Mɛ̄lɛ̄ka̍ Ya̍a̍wɛ̄ɛ̄, tu̍e̍i̍ pi̍ɛ̍īlē ya̍ I̍ cho̍ nu̍m nde̍ŋ. Ya̍ŋ ni᷅la̍ŋ o̍ kōŋu̍l ya̍ I̍ cho̍ nāa̍ nūm chu̍a̍ wo̍. Tu̍e̍i̍ cha̍ŋ ya̍ I̍ cho̍ o̍ nu̍mndo̍ wo̍, kāni̍ fu̍u̍le̍, mīa̍l cho̍ nu̍m o̍ bɛ̄ŋgu̍ cho̍o̍ le̍ te̍le̍ŋ bi̍ŋgī wo̍ ya̍ Ī cho̍ ni̍, mɛ̄ɛ̍ fi̍nyāā nīa̍a̍ ā hīŋ ma̍ hīāū yɛ̍.

¹³Ma̍l la̍ fo̍ndāŋ nyɛ̄ pɔ̄mbɔ̄ fɔ̍, mī na̍ŋ ti᷄ŋ kɔ̄l, lɔ̍ɔ̍ pa̍ ya̍ I̍ fa̍ŋāŋ o̍ chi̍e̍ēŋndo̍ ho̍ō chōo̍, mī I̍ kūɛ̄nu᷄ŋ.