Read Southern Kisi Sa᷅m 40 Bible Online

Sa᷅m 40 - Southern Kisi bible

Sa᷅m 40

¹[38] Mi̍ hi̍a̍ū lāchī a̍ bīūwɔ᷄ŋndo̍ Mɛ̄lɛ̄ka̍ Ya̍a̍wɛ̄ɛ̍ chūmndo̍ le̍ mbō ma̍la̍ ya̍. Ndu̍yɛ̍ mi̍ Mɛ̄lɛ̄ka̍ yāŋ ya̍ nīla̍ŋ mbo̍ tūɛ̄ī pīɛ̄īlē nīle̍ŋ.

²Mbo̍ sōlī ya̍ o̍ so̍o̍ŋ pīɔ̍mndo̍ ni᷅ŋ, o̍ so̍o̍ŋ lōōlī bɛ̄ndōo̍ ni᷄ŋ, mbo̍ sīmī ya̍ o̍ pōūwo̍ chōo̍, mbo̍ tōsā mi̍ si᷅m yi̍li̍ nāa̍ nyɛ̄ o̍ nyɛ̄ hi̍i̍lūū ya̍ le̍ wa̍.

³Mbo̍ dūāū ya̍ chōndi̍i̍ sɛ̍nɛ̄īye̍ o̍ sōndō, chōnde̍i̍ le̍ ndu̍ Mɛ̍lɛ̄ka̍ nāa̍ sāŋgālāa̍. Wānāā bɔ̄ɔ̍ bɔ̍ɔ̍ ā chā ni̍ŋ he̍ī mī sīōōŋnde̍ bīī nda̍, ndu̍yɛ̍ mā dɔ̄ū tīīnda᷄ŋ ndāa̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ.

⁴Wānāa̍ du̍a̍ū ti̍i̍nda᷄ŋ ndāa̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ, ā so̍o̍lūū mɛ̍lɛ̄ka̍a̍ chēle̍ŋ te̍, ā sɔ̍ɔ̍ŋgūū wa̍nāa̍ so̍o̍lūū mɛ̍lɛ̄ka̍a̍ chēle̍ŋnda̍ chōo̍ le̍ wa̍, ā pɛ̄l tɔ̄nɔ̄ɔ̍.

⁵O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍, sūla᷅ŋ nūm cho̍ le̍, Sɔ̄ɔ̍ŋ kɔ̄ndɔ̄fi̍li̍ŋ ŋ̄ tōsa̍ wo̍ŋ ŋ̄ chō ŋ̄ bɔ̄ɔ̍. Ndu̍yɛ̍ sɔ̄ɔ̍ŋ ŋ̄ kɛ̄ɛ̄si̍a̍a̍ le̍ tōsāa̍ le̍ na̍a̍ wo̍ŋ ŋ̄ chō ŋ̄ bɔ̄ɔ̍, ŋ̄ chu̍ū chɔ᷅m te̍. I̍ nɔ̍lā mī chi̍i̍ īsɔ̄ɔ̍ a̍ mu̍ŋ o̍kɔ̄ɔ̄ le̍, kāni̍ fo̍ndōle̍, ŋ̄ chō fāŋā.

⁶Ō cho̍ la̍sa̍lā a̍ lākē le̍ ŋ̄ yēēma̍ le̍. A̍ nyu̍na̍ ya̍ le̍ mī so̍li̍ chɔ̄lūa̍a̍ sa̍lā lūāmāa̍, ɔ̄ɔ̄ mī so̍li̍ sa̍la̍ fa̍ŋā yɔ᷅ŋ wɔ̄ɔ̍ŋ te̍. Kɛ̍ ma̍ kūmbī ya̍ nīla̍ŋ le̍ mī ya̍ŋ nu̍m nīla̍ŋ.

⁷Mi̍ lo᷅ o̍ ko̍ŋ mi̍ di̍mī a̍a̍, “Ā chē ya̍, I̍ hi᷅ŋ. Sīlālā ŋ̄ ke᷄ ya̍ la̍ŋ lā chō lā pōōnyīāā o̍ yāu̍ nu̍m lāsāwāa̍ ni᷄ŋ.

⁸O̍o̍ Mɛ̄lɛ̄ka̍ nūu̍, I̍ hi̍nī bɔ̍ɔ̍ kɔ᷅l le̍ nyɛ̄ ŋ̄ hɛ̄na̍ŋndo̍ tōsāa̍. I̍ kɛ̍si̍ŋ sa̍wāla̍ nu̍mnda̍ŋ o̍ kɔ̄l.”

⁹Mɛ̄ɛ̍ wānāā nūmnda̍ ā chūūŋgi̍āŋ kpo̍u̍, mi̍ di̍mūl wāŋnda̍ yōōŋgū kɛ̄ndɔ̄ɔ̍ a̍ mɛ̄ɛ̍ ŋ̄ pīŋī wa᷅ŋndā chīe̍e̍ yɛ̍ o̍kɔ̄ɔ̄. Mɛ̄lɛ̄ka̍ Ya̍a̍wɛ̄ɛ̄, ā sīnā māā I̍ me̍ī mī kɛ̍ɛ̍ wāŋnda̍ dīmūl a̍ ndi̍ o̍kɔ̄ɔ̄ le̍.

¹⁰I̍ kɛ̍si̍ŋ yo̍o̍ŋgōo̍ ho̍ō o̍ kɔ̄l ni᷄ŋ mī kɛ̍ɛ̍ wāŋnda̍ dīmūl a̍ ndu̍ o̍kɔ̄ɔ̄ le̍. Le̍ te̍le̍ŋ o̍ te̍le̍ŋ I̍ cho̍ wāŋnda̍ dīmūllo̍ a̍ mɛ̄ɛ̍ ŋ̄ chō wānā sa̍kpō, ndu̍yɛ̍ mā pīŋī wa᷅ŋndā chīe̍e̍ yɛ̍. Mɛ̄ɛ̍ wānāā nūmnda̍ ā chūūŋgi̍āŋ kpo̍u̍, I̍ me̍i̍ mī kɛ̍ɛ̍ wāŋnda̍ dīmūl a̍ mɛ̄ɛ̍ ŋ̄ kāāla̍ ŋ̄wāŋnda̍ chi̍e̍e̍ le̍ te̍le̍ŋ o̍ te̍le̍ŋ, ndu̍yɛ̍ ma̍ wā wānā sa̍kpō yɛ̍ o̍kɔ̄ɔ̄ le̍.

¹¹O̍o̍ Mɛ̄lɛ̄ka̍ Ya̍a̍wɛ̄ɛ̄, yāndi̍i̍ pɛ̍ŋgī a̍ ya̍ nyīɛ̍ɛ̍ye̍ tūīīnɔ᷄ndo̍ le̍. Mbɔ̄ māā kāālā nu̍m cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍, a̍ sa̍kpōyɛ̍i̍ nūmnde̍ lā hīo̍u̍ la̍chi̍ a̍ ya̍ māndāa̍ fɔ̍.

¹²Sɔ̄ɔ̍ŋ pa̍la᷄ŋ ŋ̄ mēl la̍ chɔ̍ŋgɔ̍mu̍, I̍ chi̍ī mu̍ŋ bɛ̍ɛ̍ chɔ᷅m te̍. Yɔ̄ŋndā wɔ̄ɔ̍ŋndā ya̍ I̍ to̍sa̍ la̍ŋ lā chō ya̍ lā hīāūwāā yōōmū, pɛ̍ɛ̍ŋ bɛ̍ɛ̍ I̍ nɔ̍lā mī che᷅ le̍. Lā chō fāŋā ha̍a̍a̍ lā hīōū yīīŋnde̍ ya̍ o̍ lēbōl, I̍ nɔ̍ lɛ̍ tīīnda᷄ŋ o̍ tīīnda᷄ŋ te̍.

¹³O̍o̍ Mɛ̄lɛ̄ka̍, yāndi̍i̍ chi̍i̍ndi̍a̍a̍ ya̍ fɔ̍. Ke̍le̍ŋa̍ hu̍nɔ̄ɔ̄ chɔ̍chɔ̍ Mɛ̄lɛ̄ka̍ Ya̍a̍wɛ̄ɛ̄ mā hu̍ŋ ma̍lā ya̍.

¹⁴Wānāa̍ cho̍ kīndīo̍o̍ le̍ yōōmū nūu̍ tɛ̄ɛ̄mbūūwo̍ wa̍ ki̍nɛ̍i̍, to̍sa̍ mī si̍ɔ̍mbu̍la̍ŋ lā bīī nda̍, mī kɔ̄lta̍ŋ lā lāāsi̍a̍ŋ nda̍. Wānāa̍ cho̍ yēēmɛ̍i̍ māā nyɛ̄ pālāa̍ ō to᷄l la̍ chōo̍ wa̍, to̍sa̍ mā mīīŋgu̍ a̍ si̍ɔ̍mbu̍la̍ŋ.

¹⁵Wānāa̍ cho̍ ya̍ māmɔ̄ɔ̍ wa̍, to̍sa̍ mī si̍ɔ̍mbu̍la̍ŋ lā bīī nda̍ a̍ yōmɔ̄ɔ̄ nda̍ chō sɔ̄lā wo̍.

¹⁶Kɛ̍ wānāa̍ hu᷅ŋ nāa̍ nūm chu̍a̍ le̍ mālāa̍ wa̍ ki̍nɛ̍i̍, to̍sa̍ mā na᷄ŋ kɔ̄l mā dɔ̄ɔ̄nu᷄ŋ nya̍a̍le̍. Wānāa̍ ka̍a̍la̍ pīŋī ŋ̄ pīŋi̍ nda̍ wo̍ wa̍, mbɔ̄ māā le̍ te̍le̍ŋ o̍ te̍le̍ŋ ā wa̍ di̍mīo̍o̍ āā, “Mɛ̄lɛ̄ka̍ Ya̍a̍wɛ̄ɛ̄ cho̍ ō bɛ̄ndū.”

¹⁷Wānā ta̍mbɛ̍i̍yo̍ ya̍ I̍ cho̍ ni̍, wāna̍ bāhāvɛ̍i̍ bɛ̍ndōo̍, yāndi̍i̍ Māsānɔ̄ɔ̍ Mɛ̄lɛ̄ka̍, yi̍ya̍ŋ a̍ ya̍. Nu᷄m cho̍ wāna̍ ma̍lā ya̍ wo̍ ni̍, ndu̍yɛ̍ nu᷄m chi̍i̍ndīāā yā ni̍. Yāndi̍i̍ Mɛ̄lɛ̄ka̍, to̍sā lāta̍ma̍la̍ le̍, ke̍le̍ŋa̍ ya̍ mālā chɔ̍chɔ̍.