Read Southern Kisi Sa᷅m 41 Bible Online

Sa᷅m 41 - Southern Kisi bible

Sa᷅m 41

¹[39] Wāna̍ ma̍lā ho̍ō wāna̍ cho̍ o̍ nyɛ̄ pālāa̍ ni᷄ŋ ndo̍ wo̍ ō pɛ̄l tɔ̄nɔ̄ɔ̍. Wānā wa̍ā nu̍a̍ā, bāŋāa̍ Mɛ̄lɛ̄ka̍ Ya̍a̍wɛ̄ɛ̄ o̍ ba̍ŋā ndu̍ a̍ te̍le̍ŋ kpūndɔ̍ɔ̍ ni̍.

²Māndāa̍ Mɛ̄lɛ̄ka̍ Ya̍a̍wɛ̄ɛ̄ ma̍ndā ndu̍ ni̍, o̍ ko̍ŋ, mbō tōsa̍ mī wānā ko̍ŋ ō wa̍ yōōmū. Wānā wa̍ā nu̍a̍ā ō chō wā a̍ kɔ̄l kɛ̄ndɛ̄ o̍ lɛ̄ŋnde̍ŋ nde᷅ŋ ni᷄ŋ. Mɛ̄lɛ̄ka̍ Ya̍a̍wɛ̄ɛ̄ o̍ me̍l ndu̍ mī ya̍a̍mɔ̍ɔ̍wa̍a̍ ndūa̍a̍ ā yɔ᷄ŋ ndu̍ nyɛ̄ le̍.

³Tē ō de᷄l a̍ nāa̍ pɛ̍, Mɛ̄lɛ̄ka̍ Ya̍a̍wɛ̄ɛ̄ o̍ si̍ŋgi̍ ndu̍. Nāā o̍ nāa̍ wa̍ ndu̍, mbo̍ sīŋgī la̍ŋ kpo̍u̍.

⁴Mi̍ I̍ di̍mī a̍a̍, “O̍o̍ Mɛ̄lɛ̄ka̍ Ya̍a̍wɛ̄ɛ̄, tūīīnu̍ŋ ya̍ īnyīɛ̍ɛ̍, mā si̍ŋgi̍ ya̍. I̍ to̍sa̍ yɔ̄ŋ wɔ̄ɔ̍ŋndo̍, ma̍ tāmbū kɔ̄l a̍ ya̍.”

⁵Yēēmɛ̍i̍ ya̍a̍mɔ̍ɔ̍wa̍a̍ nīa̍a̍ cho̍ ni̍ māā sɔ̄ɔ̍ŋ wɔ̍ɔ̍ŋndo̍ŋ ŋ̄ wa̍ ya̍ ko̍ni̍ yɔ̍nɔ᷄ŋndo̍. Ā yēēma̍ māā I̍ wu̍, ndu̍yɛ̍ māā chūā bɛ̍ɛ̍ I̍ mɛ̍ī a̍ mākɔ̄ɔ̄ le̍.

⁶Wānāa̍ hu᷅ŋ ya̍ yīlɔ̄ɔ̍ wa̍ bɛ̍ɛ̍, sōndō yēēlɛ̍i̍yo̍ ko̍ni̍ nda̍ hūŋ to̍sāa̍ ni̍. Le̍ sɔ̄ɔ̍ŋ wɔ̍ɔ̍ŋndo̍ŋ tūēīyɔ̄ɔ̍ a̍ ya̍ o̍kɔ̄ɔ̄ ko̍ni̍ nda̍ hūŋ ni̍. Tē ā mīīŋgu̍ pɛ̍, ā kɔ̍ ba̍lū wāŋnda̍ dīmūllo̍ si̍lɔ̍ a̍ ya̍ o̍ kɔ̄ɔ̄.

⁷Wānāa̍ tu̍l la̍ yɛ̍le̍ŋ nda̍ kpo̍u̍ ā chō sɔ̄ɔ̍ŋ to̍o̍lo᷄ŋ a̍ ya̍ o̍kɔ̄ɔ̄. Sɔ̄ɔ̍ŋ wɔ̍ɔ̍ŋndo̍ŋ ko̍ni̍ nda̍ chō tūūnɔ᷄ŋndo̍ o̍ lākɔ̄l māā ŋ̄ chō yɔ̄nɔ᷄ŋ a̍ ya̍ ni̍.

⁸Ā chō dīmīo̍o̍ āā, “Mbɔ̄ nāa̍ ho̍ō hīōū bā a̍ ndu̍. Ō cho̍ chi̍ndā a̍ ndu̍ le̍.”

⁹Ndi̍a̍a̍mɔ̍ɔ̍ ni̍ ya̍ I̍ la̍a̍la̍ŋ ndo̍, ō na̍a̍ ŋ̄ di̍ā nyɛ̍ dīa̍a̍ o̍ hɛ̄ŋgɛ̍i̍ pi᷅lɔ̍ɔ̍ ni᷄ŋ ndo̍ bɛ̍ɛ̍, ō tu᷄l la̍ yɛ̍le̍ŋ.

¹⁰O̍o̍ Mɛ̄lɛ̄ka̍ Ya̍a̍wɛ̄ɛ̄, tūīīnu̍ŋ ya̍ īnyīɛ̍ɛ̍, mā si̍ŋgi̍ ya̍. O̍ ko̍ŋ, mī mi̍ŋgu̍l ya̍a̍mɔ̍ɔ̍wa̍a̍ nīa̍a̍ ha̍ā māa̍.

¹¹Tē a̍ to̍sa̍ pɛ̍ mī ya̍a̍mɔ̍ɔ̍wa̍a̍ nīa̍a̍ ā būmba̍ ya̍, I̍ si̍na̍ māā a̍ hi̍ni̍ kɔ̄l a̍ ya̍ kpe̍e̍kpe̍i̍.

¹²Ā chō ya̍ mālā, kāni̍ fu̍u̍le̍, le̍ mɛ̄ɛ̍ ya̍ I̍ to̍sa̍ su̍ɛ̍i̍ cho̍ sa̍kpō nu̍m o̍ hɔ̄l le̍ yɛ̍. Ndu̍yɛ̍, I̍ cho̍ wā a̍ nūm la̍tu̍lu̍ le̍ fɛ̍ɛ̍ŋ a̍ fɛ̍ɛ̍ŋ.

¹³Mbɔ̄ wāŋnda̍ ā sāŋga̍la̍ Mɛ̍lɛ̄ka̍ Ya̍a̍wɛ̄ɛ̄ fɔ̍, ō cho̍ Mɛ̄lɛ̄ka̍ wāŋnda̍ I̍sɔ̄lūɛ̄ī a̍ pi̍ɛ̍ī yo̍ wo̍. Wāŋnda̍ ā sāŋga̍la̍ ndu̍, pɛ̄ŋgo̍o̍ ho̍ō, a̍ fɛ̍ɛ̍ŋ fɛ̍ɛ̍ŋ fɔ̍. Āmi̍i̍nā.