Read Southern Kisi Sa᷅m 42 Bible Online

Sa᷅m 42 - Southern Kisi bible

Sa᷅m 42

¹[40] O̍o̍ Mɛ̄lɛ̄ka̍, mɛ̄ɛ̍ kōlɔ̄ɔ̍ bīī nu̍a̍ā kīa̍llo̍ bīyɔ̄ɔ̄ bɛ̄ndōo̍ mbō yēēma̍ le̍ pīo̍o̍ sāālɔ᷄ŋndo̍ yɛ̍, le̍nde̍ yēēmɛ̍i̍ bɛ̍ndūe̍i̍ i̍ chō ya̍ le̍ nūm ni̍.

²I̍ ye̍e̍ma̍ nu̍m bɔ̄ɔ̍, nūm Mɛ̄lɛ̄ka̍ cho̍ yōōmū wo̍. Lɔ̍ɔ̍ kūɛ̍ɛ̍nɛ̍ kɛ̍i̍ ya̍ I̍ ku̍ā yɛ̍ ni̍ŋ o̍ chīɛ̄ī nūm chīɛ̄ī nūmndo̍ ni᷄ŋ, mī kɔ̍ si᷅m nu̍m o̍ hɔ̄l, mī so̍o̍lu̍u̍ nu̍m?

³Le̍ pāa̍le̍ŋ a̍ nyūmnda̍ŋ, nyɛ̄ nī di̍a̍a̍ cho̍ mɛ̍mɛ̍ma̍ nīa̍a̍ŋ ni̍. Le̍ lɔ̍ɔ̍ lɔ̍ɔ̍ ya̍a̍mɔ̍ɔ̍wa̍a̍ nīa̍a̍ ā chō ya̍ māmɔ̄ɔ̍, mā nyūnā ya̍ āā, “Vɛ᷅ ni̍ko̍ Mɛ̄lɛ̄ka̍ so̍lī nu̍m lēni᷄ŋ te̍?”

⁴Tē I̍ lo̍o̍nu̍ŋ pɛ̍ o̍ pāāndōo̍ ni᷄ŋ mɛ̄ɛ̍ na̍a̍ ŋ̍ nɔ̍ kɔ̄la̍ŋ fāŋgā bɛ̍ndōo̍ o̍ chīɛ̍i̍ Mɛ̄lɛ̄ka̍ ni᷄ŋ le̍ Mɛ̄lɛ̄ka̍ sōōlūūwo̍ yɛ̍ pɛ̍, kɔ̄llo̍ tāmbu̍ ya̍ ni᷄ŋ pɛ̍. I̍ lo̍o̍nu̍ŋ a̍ bōōndi̍i̍ ya̍ i̍i̍ si᷅m wa᷅ŋnda̍ lāchī mī ŋ̄ ku̍ā na̍a̍ nda̍ā o̍ chīɛ̍i̍ Mɛ̄lɛ̄ka̍a̍ ni᷄ŋ nde̍. I̍ lo̍o̍nu̍ŋ a̍ mɛ̄ɛ̍ wāŋnda̍ fāŋgā bɛ̍ndōo̍ nda̍ a̍a̍ ku̍ā a̍ chōndo̍ŋ, mā mēl Mɛ̍lɛ̄ka̍ ba̍li̍ka̍a̍ o̍ chōndo̍ŋ ni᷄ŋ yɛ̍. Le̍ he̍ī, kɔ̄llo̍ ō ta̍mbu̍ ya̍ ni᷄ŋ bɔ̍ɔ̍.

⁵Mi̍ nyu̍nā ya̍ pi̍la̍ a̍a̍, “Vɛ᷅ mi̍ kɔ̄llo̍ tāmbū ya̍ ni᷄ŋ ta̍mbi̍i̍ bɛ̍ndūe̍i̍ he̍ī?” I̍ dɔ̍ū tīīnda᷄ŋ nūu̍ o̍ Mɛ̄lɛ̄ka̍ ni᷄ŋ, ndu̍yɛ̍, I̍ cho̍ vɛ̄lɛ̄ ndu̍ līsā o̍ chōnde̍i̍ ni᷄ŋ. Ndu̍ cho̍ Mɛ̄lɛ̄ka̍ ya̍ so̍o̍lūū wo̍ ni̍, ndu̍yɛ̍, ndu̍ pi̍ŋī ya̍ ni̍.

⁶Nāa̍ ya̍ cho̍ ha̍ā o̍ bīyɔ̄ɔ̍ ni᷄ŋ na̍ŋnu᷄ŋ nda̍, kɔ̄l nūu̍ chō bɔ̄ɔ̍ o̍ ta̍mbɛ̍i̍. Le̍ he̍ī, o̍ Mɛ̄lɛ̄ka̍ lo̍ yīya᷄ŋ nūu̍ kpo̍u̍ o̍ cho̍ ni̍. Mɛ̄lɛ̄ka̍ tōsa̍ mi̍ kɔ̄l tāmbɛ̍i̍ bɛ̍ndōo̍ ō tūāl la̍ chōo̍, mɛ̄ɛ̍ mɛ̄ŋmā hūna᷄ŋ mā mīāl nu̍a̍ā nyɔ̍ɔ̍ yɛ̍. Kpūndɛ̍ cho̍ ya̍ chōo̍ wo̍ mɛ̄ɛ̍ a̍ kpōku̍ kpɔ̍ku̍ pēe̍ bāllo̍ mī tu̍u̍ ndu̍. Ō chō māchūāā mɛ̄ɛ̍ Chɔ̍ɔ̍dāŋ nda̍ŋ mā māl nu̍a̍ā o̍ Pēmbīī Ha̍a̍mɔ̄ŋnde̍, a̍ Pēmbīī Mi̍sāāve̍, mī mā pɛ̄, mī mā fūūlu̍u̍ nāa̍ ma̍ chi̍chā o̍ bāllo̍ wa̍ yɛ̍.

⁸Lēpāla̍ o̍ lēpāla̍, Mɛ̄lɛ̄ka̍ Ya̍a̍wɛ̄ɛ̄ cho̍ kāālā bɛ̄ndū o̍ ka̍a̍la̍ ŋ̄wāŋndā chīe̍e̍ wo̍ chɔ̄mndo̍. Le̍ he̍ī, tē nyūmnda̍ŋ mā tōl pɛ̍, I̍ sɔ̍la̍ chōndi̍i̍ sɛ̍nɛ̄īye̍ le̍ ndu̍ chūūndūūwo̍. Ndu̍yɛ̍, Mɛ̄lɛ̄ka̍ nūu̍ o̍ ke᷅ ya̍ yōōmōo̍ wo̍, I̍ cho̍ ndu̍ pīɛ̄īyo̍.

⁹Mi̍ nyūna̍ Mɛ̄lɛ̄ka̍ o̍ ma̍ndā ya̍ wo̍ a̍a̍, “Mɛ̄lɛ̄ka̍, vɛ᷅ ma̍ pūɛ̄ɛ̄nu᷄ŋ a̍ ya̍ nu̍a̍ā? Vɛ᷅ mi̍ kɔ̄llo̍ tāmbū ya̍ nu̍a̍ā? Vɛ᷅ mi̍ ya̍a̍mɔ̍ɔ̍wa̍a̍ nīa̍a̍ ā wā ya̍ pālā bɛ̄ndōo̍ ho̍ō?”

¹⁰Yīōūlā nda̍ chō ya̍ la̍ŋ lā chō ya̍ lɔ̄ɔ̍ o̍ kɔ̄llo̍ ni᷄ŋ bɔ̍ɔ̍, māmɔ̄ɔ̍ ya̍ mā dīmī āā, “Vɛ᷅ ni̍ko̍ Mɛ̄lɛ̄ka̍ so̍lī nu̍m le̍ni̍ŋ te̍?”

¹¹Mi̍ nyu̍nā ya̍ pi̍la̍ āā, “Vɛ᷅ mi̍ kɔ̄llo̍ tāmbū ya̍ ni᷄ŋ ta̍mbi̍i̍ bɛ̍ndūe̍i̍ he̍ī?” I̍ dɔ̍ū tīīnda᷄ŋ nūu̍ o̍ Mɛ̄lɛ̄ka̍ ni᷄ŋ. Ndu̍yɛ̍, I̍ cho̍ vɛ̄lɛ̄ ndu̍ līsā o̍ chōnde̍i̍ ni᷄ŋ. Ndu̍ cho̍ Mɛ̄lɛ̄ka̍ ya̍ so̍o̍lūūwo̍ ni̍, ndu̍yɛ̍, ndu̍ pi̍ŋī ya̍ ni̍.