Read Southern Kisi Sa᷅m 44 Bible Online

Sa᷅m 44 - Southern Kisi bible

Sa᷅m 44

¹[41] O̍o̍ Mɛ̄lɛ̄ka̍, na̍a̍ pi̍la̍ ŋ̄ tūēī a̍ nīlā nāāla̍ŋ, fi̍nyāā nāā ma̍māa̍ ā dīmu̍l na̍a̍ a̍ sɔ̄ɔ̍ŋ bɛ̍ndūŋ ŋ̄ tōsa̍ o̍ pālɛ̍i̍ ndɛ̄i̍ ni᷄ŋ, sīndɛ̄ wo̍ŋ o̍kɔ̄ɔ̄.

²Ā dīmu̍l na̍a̍ a̍ mɛ̄ɛ̍ ŋ̄ tōū kāa̍la̍ wa̍ nda̍ lāchī la̍ŋ a̍ kpāāyā nu̍m bɛ̄ndōo̍, ma̍ sōlī nda̍ ō lɛ̄ŋndē ndāle̍ŋ ni᷄ŋ, ndu̍yɛ̍ ma̍ kɔ̍ kɛ̍sī wānāā nūmnda̍ o̍ lɛ̄ŋndē lēŋ ni᷄ŋ yɛ̍. Ā dīmu̍l na̍a̍ a̍ mɛ̄ɛ̍ ŋ̄ tūsi̍ kāa̍la̍ŋ lā pīlɛ̍la̍ŋ nyɛ̄ pālāa̍ chōo̍, kɛ̍ fi̍nyāā nāā māmāa̍ nda̍ nda̍ ma̍ tōsā ma̍ sɔ̄lā dɛ̍nɛ̍ kɛ̍ndɛ̄ bɛ̄ndōo̍ yɛ̍.

³Wānāā nūmnda̍ ā yi᷄m lɛ᷅ŋndē lēŋ a̍ mɔ̄ɔ̄ŋ ndāa̍ŋ fāŋ te̍. Ō cho̍ a̍ kpāāya̍ ndā le̍ nda̍ yēm nde̍ŋ te̍. Kpāāyā nu̍mndo̍ a̍ dīāllūŋ nūm ka̍la᷄ŋ to̍sa̍ ni̍ ma̍ yām nde̍ŋ. Le̍ mɛ̄ɛ̍ ŋ̄ wa᷄ a̍ nda̍ lātūlu̍ le̍ te̍le̍ŋ o̍ te̍le̍ŋ, ndu̍yɛ̍ ma̍ chɔ̄m māā a̍ hi̍ni̍ kɔ̄l a̍ nda̍ yɛ̍, nyɛ̄ ko̍ŋ to̍sa̍ ni̍ ma̍ yām.

⁴Nu᷄m cho̍ māsa̍ nī bɛ̍ndōo̍ ni̍, ndu̍yɛ̍ nu᷄m cho̍ Mɛ̄lɛ̄ka̍ nūu̍ ni̍. Nu᷄m ke̍ yu̍ŋgu̍ Che̍kɔ̍pū wo̍ kpāāyāa̍ ni̍ ma̍ yām.

⁵Nu᷄m ke᷅ na̍a̍ kpāāyāa̍ ni̍ mī ŋ̄ nyīndū ya̍a̍mɔ̍ɔ̍wa̍a̍ nāa̍. O̍ dīōlā nūmnda̍ŋ ni᷄ŋ na̍a̍ ŋ̄ nɔ̄lā ni̍ mī ŋ̄ nīɔ̄ū ni̍ɔ̍u̍ ya̍a̍mɔ̍ɔ̍wa̍a̍ nāa̍.

⁶I̍ do̍u̍ ti̍i̍nda᷄ŋ o̍ chīɔ̄ū nūu̍ ni᷄ŋ le̍ ya̍ chīīndīāā le̍, kɛ̄lɛ̄ŋgāāle̍ mī mūɛ̄ī ni̍i̍ fāŋnde̍ ī nɔ̍lā mī ī chīīndi̍a̍a̍ ya̍.

⁷Kɛ̍ nu᷄m chi̍i̍ndīāā na̍a̍ ya̍a̍mɔ̍ɔ̍wa̍a̍ nāa̍ o̍ bā ni̍. Nu᷄m to̍sā ni̍ mī si̍ɔ̍mbu̍la̍ŋ lā bīī wānāa̍ tu̍l na̍a̍ yɛ̍le̍ŋ nda̍.

⁸O̍o̍ Mɛ̄lɛ̄ka̍, o̍ nūm ni̍ŋ na̍a̍ ŋ̄ kīālū yo̍ŋgāa̍ le̍ te̍le̍ŋ o̍ te̍le̍ŋ ni̍. Ndu̍yɛ̍ ŋ̄ chō nu̍m ba̍li̍ka̍a̍ mēl le̍ fɛ̍ɛ̍ŋ a̍ fɛ̍ɛ̍ŋ.

⁹Kɛ̍ ā bīī ni᷅ŋ ma̍ kɛ̄ɛ̄ na̍a̍, ndu̍yɛ̍ ma̍ tōsā mi̍ ya̍a̍mɔ̍ɔ̍wa̍a̍ nāa̍ ā yām na̍a̍. A̍ si᷅m ndɛ̍ so̍vɛ̄i̍ya̍a̍ nāa̍ lāchī māā pāāndū le̍ kɔ̄la̍ŋ o̍ chɔ̄ūwo̍ le̍.

¹⁰A̍ to̍sa̍ mi̍ ŋ̄ nyāānu᷄ŋ ya̍a̍mɔ̍ɔ̍wa̍a̍ nāa̍, ndu̍yɛ̍ mi̍ ya̍a̍mɔ̍ɔ̍wa̍a̍ nāa̍ ā pūŋgā nyɛ̄m nāa̍ŋ ma̍ kūānu᷄ŋ a̍ mu̍ŋ.

¹¹A̍ ma̍l na̍a̍ ya̍a̍mɔ̍ɔ̍wa̍a̍ nāa̍ o̍ bā, le̍ mā dīu̍ nāa̍ mɛ̄ɛ̍ nda̍ dīū nu̍a̍ā sāa̍ le̍ sa̍lāa̍ sōlīo̍o̍ yɛ̍, ndu̍yɛ̍ ma̍ tōsā ma̍ sɛ̄ŋi᷄ŋ a̍ na̍a̍ o̍ lɛ̄ŋnde̍ ni᷄ŋ.

¹²Mā lō o̍ ko̍ŋ mā pīsī wānāā nūmnda̍ o̍ nyɛ̄ sɔ̄lāā pɔ̄mbu̍i̍i̍ni̍i̍ bɛ̍ŋgu̍. A̍ pi̍si̍ nda̍ bɛ̍ɛ̍ o̍ ba̍ā bɛ̄ndū mā sɔ̍la̍ tɔ̄nɔ̄ le̍ni̍ŋ te̍.

¹³A̍ to̍sa̍ mi̍ wānāā na̍a̍ ŋ̄ chīɛ̄ɛ̄li̍āŋnda̍ ā chā ni᷅ŋ na̍a̍ nyɛ̄ fo̍ndō fu̍u̍. Wānāa̍ ba̍lu̍ na̍a̍ wa̍ ā sīīŋgu̍u̍ ni᷅ŋ na̍a̍ nyɛ̄ māmāā, ndu̍yɛ̍ ma̍ chā na̍a̍ nyɛ̄ fo̍ndō fu̍u̍.

¹⁴A̍ to̍sa̍ mi̍ ŋ̄ fūlā o̍ ba̍a̍ ni᷄ŋ lɛ᷅ŋnde̍ tɛ̄ɛ̄ŋ, mi̍ wāŋnda̍ ā wā ni᷅ŋ na̍a̍ hāū da̍a̍tīa̍a̍.

¹⁵Lēpāa̍ o̍ lēpāa̍, bɛ̄ɛ̄la̍ ta̍mbɛ̍i̍la̍ŋ la̍ŋ la̍ cho̍ ni᷅ŋ le̍ ya̍ ni̍. Si̍ɔ̍mbu̍la̍ŋ lā chō ya̍ lā bīyāā a̍ bōlle̍ŋ mɔ̍ɔ̍su̍.

¹⁶Le̍ te̍le̍ŋ o̍ te̍le̍ŋ dīōmndā bɛ̍ɛ̍ ta̍mbɛ̍i̍la̍ŋ ko̍ni̍ ya̍ I̍ tu̍ɛ̍i̍nūŋ o̍ lānī ni̍, dīōmndā wānāa̍ cho̍ ya̍ māmɔ̄ɔ̍ ma̍ wā ya̍ bɛ̄ɛ̄la̍ŋ tɛ̄ɛ̄mbūūwo̍ wa̍ ā chō ya̍ dīmūllo̍ la̍ŋ. Ya̍a̍mɔ̍ɔ̍wa̍a̍ nīa̍a̍, a̍ chō ya̍ māa̍ mīŋgūllo̍ wa̍, nda̍ ko̍ni̍ ya̍ I̍ chō chɔ̄ɔ̍ te̍le̍ŋ o̍ te̍le̍ŋ ni̍.

¹⁷Ŋ̄ fēŋa̍ŋ ndɛ̍ o̍ pɛ̄ɛ̄kūlā nūmnda̍ŋ chōo̍ le̍, kɛ̄lɛ̄ŋgāāle̍ mī ŋ̄ tɛ̄ɛ̄mbu̍u̍ kpe̍ma̍ ŋ̄ yīi̍ a̍ na̍a̍ wo̍. Kɛ̍ a̍ ko̍ŋ kpo̍u̍, ma̍ chɛ̄l mi̍ sɔ̄ɔ̍ŋ mu᷅ŋ ki̍nɛ̍i̍ ŋ̍ yɔ̄nu᷄ŋ a̍ na̍a̍.

¹⁸Ŋ̄ sōli̍ yɛ̍ nu̍m dīōm te̍, ŋ̄ fēŋa̍ŋ yɛ̍ o̍ nɛ̄i̍ nu̍mndo̍ chōo̍ le̍.

¹⁹Kɛ̍ ma̍ māl na̍a̍ mi̍ ŋ̄ wā ni᷅ŋ vīsīāā yōndūa̍a̍ tɛ̄ɛ̄ŋ, ŋ̄ nɔ̍ wa̍nā o̍ wāna̍ ma̍la̍ na̍a̍ le̍. Ma̍ māl na̍a̍ mi̍ ŋ̄ wā o̍ nyūmmā tīŋgīsi̍ma̍ bɛ̍ndūa̍ŋ ni᷄ŋ.

²⁰Tē na̍a̍ ŋ̍ kɛ̍ɛ̍ nūm Mɛ̄lɛ̄ka̍a̍ nāa̍ sōōlūūwo̍ pɛ̍, mī na̍a̍ mu̍li̍ŋ mɛ̍lɛ̄ka̍ chēle̍ŋndo̍ sōōlūūwo̍,

²¹a̍ wa̍ ndi̍ sīnā pɛ̄ŋgu̍ Mɛ̄lɛ̄ka̍, kāni̍ fo̍ndōle̍, nūm Mɛ̄lɛ̄ka̍ ā nɔ̄lā mā si̍na̍ nyɛ̄ wāna̍ chi̍o̍o̍ ō vīāŋ o̍ kɔ̄l ndɔ̄ɔ̍ ni᷄ŋ ndo̍.

²²Lēpāa̍ o̍ lēpāa̍, ā chō na̍a̍ kɔ̄ŋgɔ̄līa̍ŋnda̍ŋ le̍ na̍a̍ dīyɔ̄ɔ̍ le̍ sa̍bū nūmndo̍. Wāŋnda̍ ā chu̍a̍ na̍a̍ māchūāā mɛ̄ɛ̍ sāa̍ nda̍ wā kɔ᷅la̍ŋ dīyɔ̄ɔ̍ wo̍ ō wā nu̍a̍ā yɛ̍.

²³O̍o̍ Māsānɔ̄ɔ̍ Mɛ̄lɛ̄ka̍, ti̍o̍ndu̍ mā to̍sa̍ īsɔ̄ɔ̍! Lɔ᷅l nu̍a̍ā a̍ na̍a̍ le̍. Chɔ̍ŋ Mɛ̄lɛ̄ka̍. Ma᷅l na̍a̍ nu̍a̍ā le̍ fɛ̍ɛ̍ŋ a̍ fɛ̍ɛ̍ŋ te̍.

²⁴Vɛ᷅ ma̍ vīŋ na̍a̍ hɔ̄lla̍ nu̍a̍ā, Mɛ̄lɛ̄ka̍? Vɛ᷅ ma̍ wā na̍a̍ chɔ̄ɔ̍ o̍ sāŋgāa̍ ni᷄ŋ, mi̍ wāŋnda̍ ā wā na̍a̍ nyɛ̄ pālāa̍ tūsīo̍o̍ chōo̍, ma̍ māl na̍a̍ nu̍a̍ā?

²⁵Ya̍a̍mɔ̍ɔ̍wa̍a̍ nāa̍ ā fūli̍ na̍a̍ ma̍ fūūlūū na̍a̍ sōndōo̍ lɛ̄ŋ mɛ̍ɛ̄. Ā fūli̍ na̍a̍ ma̍ mīŋgī na̍a̍ lɛ̄ŋ mɛ̍mɛ̍.

²⁶Le̍la̍ŋ chɔ̍ŋ mā ma̍la̍ na̍a̍! Le̍ kāālā nu̍m ŋ̄ kāāla̍ na̍a̍ le̍ te̍le̍ŋ o̍ te̍le̍ŋ ndo̍, yāndi̍i̍ pi̍ŋi̍ yo̍o̍mūlā nāāla̍ŋ.