Read Southern Kisi Sa᷅m 45 Bible Online

Sa᷅m 45 - Southern Kisi bible

Sa᷅m 45

¹[42] Dīōmndā kɛ̄ndɛ̄la̍ŋ lā chō bɔ̄ɔ̍ la̍ pi̍a̍ā o̍ kɔ̄l nūu̍ ni᷄ŋ, le̍ mī so̍li̍ chōnde̍i̍ he̍ī le̍ māsā bɛ̍ndōo̍. Mɛ̄ɛ̍ wāna̍ cha̍ā ho̍ō pōōnyīa̍a̍ chāā bɛ̄ndōo̍ wo̍ ō bīī nu̍a̍ā kpɛ̄kīle̍ŋ o̍ bā le̍ pōōnyīa̍a̍ yɛ̍, le̍nde̍ dīɔ̄ɔ̄mūlē nīle̍ŋ lē chō lē bɛ̍ɛ̍ndīa̍ŋ le̍ chōnde̍i̍ he̍ī sōlīo̍o̍ ni̍.

²Wāŋ pīāāndūa̍a̍ tɛ̄ɛ̄ŋ ki̍nɛ̍i̍, nu̍m hi̍o̍ū nāŋɔ̄ɔ̄ kpo̍u̍. Ndu̍yɛ̍, ā chāā vɛ̍lɛ̄ sūɛ̍i̍ bɔ̄ɔ̍. Mɛ̄lɛ̄ka̍ kpe̍e̍kpe̍i̍ dɔ̍ū nu̍m sa̍lā le̍ fɛ̍ɛ̍ŋ a̍ fɛ̍ɛ̍ŋ ni̍.

³O̍o̍ ku̍u̍ba̍nɔ̍ chɔ̄ūwo̍, sa̍i̍ya̍ŋ mu̍ɛ̍ī nūm i̍ fāŋnde̍. Ā chō māsa̍ lēbɛ̄ɛ̄, ndu̍yɛ̍ ma̍ wā māsa̍ kpāāyā bɛ̍ndū.

⁴Kɔ̍ o̍ so᷅ nu̍m chɔ̄ūwo̍ chōo̍ o̍ bɛ̄ɛ̄le̍ nu̍mndē bɛ̄ndūle̍ŋ ni᷄ŋ. Kɔ̍ sɔ̍ŋgā le̍ tōnya̍a̍, a̍ sa̍kpōyɛ̍i̍, ndu̍yɛ̍ a̍ hɔ̍ɔ̍ya̍lē wāna̍ chi̍o̍o̍ mā yēm. Kɔ̍ mā kɔ̍ to̍sā sɔ̄ɔ̍ŋ ŋ̄sīōōŋ bɛ̄ndo᷄ŋ.

⁵Wu̍u̍ chi̍ŋɔ̍ma̍ nu̍m mā sɛ̄ɛ̄mbīa̍ŋ, mī mā kɔ᷄ sɛ̍ɛ̍sīāā ya̍a̍mɔ̍ɔ̍wa̍a̍ nu̍mnda̍ kɔ̄lta̍ŋ, māsā bɛ̍ndōo̍. To̍sa̍ mī wāŋnda̍ o̍ lɛ̄ŋnde̍ ni᷄ŋ a̍ hi̍ni̍ lɛ̄ŋ nu̍m o̍ lābɛ̄ŋgu̍ ni̍ŋ.

⁶Māsāle̍ Mɛ̄lɛ̄ka̍ ō ke᷄ nu̍mnde̍ŋ lē chō le̍ fɛ̍ɛ̍ŋ a̍ fɛ̍ɛ̍ŋ. O̍ nɛ̄i̍ sa̍kpōo̍ chōo̍ nūm kūā a̍ māsāle̍ nu̍mnde̍ŋ ni̍.

⁷Sa̍kpōyɛ̍i̍ ndi̍ ŋ̄ kāāla̍ ni̍, ndu̍yɛ̍ ma̍ tūl dɛ̍nɛ̍ wɔ̍ɔ̍ŋndo̍ lēyɛ̄. Le̍la̍ŋ bɛ̍ɛ̍ Mɛ̄lɛ̄ka̍ nūmndo̍ ō yūlū nu̍m ni̍, le̍ mā wa̍ ō bɛ̄ndū mā hīōū chāāŋāā nūm a̍ ma̍sāa̍ kpo̍u̍, ndu̍yɛ̍ ma̍ wā a̍ kɔ̄l kɛ̄ndɛ̄.

⁸Dōmāla̍ nu̍mndā ŋ̄ wōōnūŋ nda̍ŋ, nyɛ̄m chūŋ kɛ̄ndɛ̄ŋ bɛ̄ndo᷄ŋ, mɔ̍ɔ̄, a̍ a̍lo̍o̍sī, a̍ ka̍a̍sīāā, mu̍ŋ kpo̍so̍ŋ wānā tu̍ɛ̍ī chu᷅ŋndo̍ o̍ la̍ŋ ni̍. Wānāā nyɛ̄ chāa̍, a̍ lo̍ō nu̍m nyɛ̄m chāāŋ lēyōō wo̍ŋ, mā tōsā mā nāŋ kɔ᷅l la̍, ā chō o̍ fo̍ndāŋndā nūmnda̍ lēmāsāla̍ŋ, la̍ cho̍ lā bɛ̍ɛ̍ndīāā a̍ chīŋīī ka̍mɛ̍i̍ kpo̍so̍ŋ nda̍ŋ.

⁹Wāŋ lāāndūa̍a̍ nɔ̍ bɛ̄ɛ̄le̍ŋ ma̍ wā nu̍m wa̍llo̍ o̍ bā bɛ̄ŋgu̍ wa̍, chūāūwāā māsāā bɛ̍ndūa̍a̍ ā chō nda̍ tɛ̄ɛ̄ŋ. Ndu̍yɛ̍ chūā lāāndū nūm māsā bɛ̍ndōo̍ ŋ̄ nɔ̄ le̍ chūa̍a̍ o̍ nɔ̄ɔ̍ ni᷄ŋ, mbo̍ nɔ̄ ko̍o̍līi̍ŋ kɛ̍ndɛ̄ kɛ̍ndɔ᷄ŋ lēkɔ̄ɔ̍ wo̍, ndu̍ cho̍ īsīsi̍ o̍ bā nūm kɛ̍ndɔ̄ɔ̍ chōo̍.

¹⁰Nūm chūā lāāndū Māsā bɛ̍ndōo̍ ō nɔ̄ ho̍ō le̍ chūa̍a̍ o̍ nɔ̄ɔ̍ ni᷄ŋ ndo̍, ya̍ŋ ni᷅la̍ŋ mā tūēī nyɛ̄ ya̍ I̍ cho̍ nu̍m dīmūllo̍. Pu̍ɛ̍ɛ̍nu̍ŋ a̍ wānāā nūmnda̍, ndu̍yɛ̍ a̍ chīɛ̍i̍ fi̍nyā nūmndo̍.

¹¹Nāŋɔ̄ɔ̄ nūmndo̍ tōsa̍ mi̍ Māsā bɛ̍ndōo̍ o̍ lūɛ̄ī kɔ̄llo̍ o̍ nūmndo̍. Ndu̍ cho̍ māsānɔ̄ nu̍mndo̍ ni̍, ā nɔ̄ ma̍ ke̍ ndu̍ bɛ̄ɛ̄le̍ŋ.

¹²Wāŋnda̍ Ta̍a̍yā a̍ hu᷅ŋ ni᷅ŋ a̍ nyɔ̄ɔ̍ŋ mā hu᷄ŋ ke᷅ nu̍m. Wānāā sūlāā bɛ̄ndūa̍a̍ ā wā nu̍m ni̍ŋ nyɔ̄ɔ̍ŋ chūūwo̍, le̍ hāli̍kpe̍ŋ mā chē nda̍ nyīnā.

¹³Chūā Māsā bɛ̍ndōo̍ ō chō chūa̍a̍ o̍ nɔ̄ɔ̍ ni᷄ŋ ndo̍ ō lūɛ̄ī o̍ fo̍ndā lēmāsāa̍. To̍fa̍ wɔ̍ na̍ŋɔ̄ɔ̄ bɛ̄ndū. Dōma̍ cho̍ ndu̍ lēkɔ̄ɔ̍ wo̍, a̍ kɛ̍īlā nda̍ bɛ̍ɛ̍ndi̍a̍a̍ a̍ ko̍o̍līi̍yo̍ŋ nda̍ŋ o̍ cho̍ ō tōōsīāā ni̍.

¹⁴Ō chō ō dōvīa̍ŋ o̍ nyɛ̄lā kɛ̄ndɛ̄ kɛ̍ndɛ̄lā bɛ̄ndūla̍ŋ ni᷄ŋ, ma̍ kūā a̍ ndu̍ o̍ māsā bɛ̍ndōo̍ lo̍. Chāa̍ŋāā ndūāā la̍a̍ndūāā yūfu̍a̍a̍ ā chō ndu̍ līīlāa̍. Ndu̍yɛ̍ nda̍ bɛ̍ɛ̍ ā hīŋ a̍ nda̍ o̍ Māsā bɛ̍ndōo̍ lo̍.

¹⁵Ā chō kɔ̄la̍ŋ a̍ nda̍ ma̍ wā nya̍a̍lo̍o̍, ndu̍yɛ̍ a̍ kɔ̄l kɛ̄ndɛ̄ bɛ̄ndōo̍ kpe̍e̍kpe̍i̍. Ā chō lūɛ̄īyɔ̄ɔ̍ o̍ fo̍ndā lēmāsāa̍.

¹⁶Nūm māsā bɛ̍ndōo̍, pūa̍a̍ nu̍mnda̍, a̍ pūa̍a̍ nu̍m ā māmāa̍, ā hīāū ni̍ŋ la̍chi̍ a̍ wāa̍ māsāā bɛ̍ndūa̍a̍ le̍ te̍le̍ŋ o̍ te̍le̍ŋ, mɛ̄ɛ̍ fi̍nyāā nūm a̍ ma̍māa̍ ā wa̍ yɛ̍. Nūm māsā bɛ̍ndōo̍ ā tōsā ni̍ŋ mī pūa̍a̍ nu̍mnda̍ ā wa̍ wāŋ bɛ̄ndūa̍a̍ wāŋnda̍ chōo̍ bā o̍ bā fe̍e̍ o̍ chi̍e̍ēŋndo̍ chōo̍.

¹⁷I̍ cho̍ tōsā mī wāŋnda̍ ā wa̍ lōōnɔ᷄ŋndo̍ le̍ te̍le̍ŋ o̍ te̍le̍ŋ a̍ sɔ̄ɔ̍ŋ bɛ̍ndūŋ ŋ̄ tōsa̍ wo̍ŋ o̍kɔ̄ɔ̄. Ndu̍yɛ̍ le̍ te̍le̍ŋ o̍ te̍le̍ŋ wāŋnda̍ ā wā nu̍m ni̍ŋ sa̍ŋgālāa̍.