Read Southern Kisi Sa᷅m 46 Bible Online

Sa᷅m 46 - Southern Kisi bible

Sa᷅m 46

¹[43] Mɛ̄lɛ̄ka̍ cho̍ wāna̍ ma̍ndā na̍a̍ wo̍ ni̍, ndu̍yɛ̍ ndu̍ ke᷅ na̍a̍ kɔ̄ltā sīmūlāāla̍ŋ ni̍. O̍ kpūndɔ̍ɔ̍ ni᷄ŋ bɛ̍ɛ̍ ō chō na̍a̍ īkɛ̄i̍ te̍le̍ŋ o̍ te̍le̍ŋ le̍ na̍a̍ mālāa̍.

²Le̍la̍ŋ, ā yɔ᷄ŋ bɛ̍ɛ̍ mī lɛ̄ŋnde̍ŋ lē nyīīya̍ kpi̍lū kpīlū, sīōōŋīī bi̍ī na̍a̍ le̍. Ā yɔ᷄ŋ bɛ̍ɛ̍ mī pēmbūŋ bɛ̄ndo᷄ŋ ŋ̄ kɔ̍ de᷅l o̍ pēe̍ mɛ̄ŋmā īhɛ᷄llo̍ ni᷄ŋ,

³kɛ̄lɛ̄ŋgāā mī mɛ̄ŋnda̍ŋ o̍ pēe̍ mɛ̄ŋmā īhɛ᷄llo̍ mā wa̍ bɔ̄ɔ̄lūūwo̍ māā pɛ̄ɛ̄līāā kpɔ̍kūŋ, ā yɔ᷄ŋ bɛ̍ɛ̍ mī pēmbo᷄ŋ ŋ̄ wa᷄ nyīīyāa̍ hīīlɔ᷄ŋndo̍ īkpōku̍ kpo᷅ku̍e̍i̍, sīōōŋīī bi̍ī na̍a̍ le̍.

⁴Pīo̍o̍ ō chō, o̍ to̍sā mī chi̍e̍e̍ wānāa̍ Mɛ̄lɛ̄ka̍a̍ dɔ̄ɔ̄nu᷄ŋ nya̍a̍le̍ wo̍. Lo̍ŋ, o̍ fo̍nda᷄ŋ cho̍ ō yɔ̄ŋga᷄ŋ o̍ Mɛ̄lɛ̄ka̍ lo̍ wo̍, ndu̍ Mɛ̄lɛ̄ka̍ hi̍o̍ū kpo̍u̍ wo̍ ō chō īchāli̍ ni̍.

⁵O̍ chi̍e̍e̍ ko̍ŋ ni᷄ŋ Mɛ̄lɛ̄ka̍ chō īchāli̍ ni̍, le̍ he̍ī, ya̍a̍mɔ̍ɔ̍ nɔ̍lā ndu̍ nyɛ̄ yɔ̄ŋ te̍. Dīmīo̍o̍ nu̍a̍ā mī nyɛ̄ yɔ̄nu̍ŋ, mī Mɛ̄lɛ̄ka̍ sɔ̄ɔ̄ŋgu̍u̍ chɔ̍ chɔ̍ le̍ nda̍ mālāa̍.

⁶Wāŋnda̍ o̍ lɛ̄ŋīi̍ pi̍ɛ̍ī Mɛ̍lɛ̄ka̍ le̍ ve̍ ni᷄ŋ ā pɛ̄ a̍ sīōōŋnde̍, ā nyīīya̍ kpa᷅ kpā. Tē Mɛ̄lɛ̄ka̍ dēŋi̍ pɛ̍ pa̍ndāŋ, wāŋnda̍ o̍ chi̍e̍ēŋndo̍ ni᷄ŋ sīōōŋnde̍ bīī nda̍.

⁷Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō chō a̍ na̍a̍ la̍tu̍lu̍. Mɛ̄lɛ̄ka̍ Che̍kɔ̍pū fi̍nyā nāā ma̍mā ndu̍ o̍o̍ pi̍ɛ̍ī yo̍, ndu̍ cho̍ wāna̍ ma̍ndā na̍a̍ wo̍ ni̍.

⁸Lā hu᷄ŋ mī lā hu᷄ŋ chɔ᷅ wa̍lta̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ la̍ŋ. Lā hu᷄ŋ to̍fā kɔ̄ndɔ̄fi̍ltā o̍ to̍sa̍ o̍ chi̍e̍ēŋndo̍ chōo̍ la̍ŋ.

⁹Mbō tōsa̍ mī chɔ̄ūla̍ŋ lā chūū bā o̍ bā fe̍e̍ o̍ chi̍e̍ēŋndo̍ chōo̍. Ō chō chīɔ̄ūlā wāŋnda̍ ā sɔ̄ŋgā a̍ la̍ŋ nda̍ŋ bīūwo̍ mbō yīmi̍ yi̍mi̍, mbō tɛ̄ɛ̄mbu̍u̍ ba̍lta̍ŋ, ndu̍yɛ̍, bōo̍la̍ īchīli̍ŋnda̍ so̍vɛ̄i̍ya̍ bīī o̍ lābā la̍ŋ, mbō ma̍l la̍ŋ o̍ yīŋ.

¹⁰Mɛ̄lɛ̄ka̍ dīmi̍ āā, “Lā pɛ̄ŋgi̍ sɔ̍ŋgɔ̄ɔ̍, ndu̍yɛ̍, mī lā sīna̍ māā ya̍ cho̍ Mɛ̄lɛ̄ka̍ ni̍. Ya̍ cho̍ lɛ̄ŋnde̍ kpo̍u̍ bo᷅lle̍ŋ ni̍. Chi̍e̍ēŋndo̍ kpo̍u̍ ya̍ cho̍ ndu̍ bōlle̍ŋ ni̍.”

¹¹Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō chō a̍ na̍a̍ la̍tu̍lu̍. Mɛ̄lɛ̄ka̍ Che̍kɔ̍pū fi̍nyā nāā ma̍mā o̍ pi̍ɛ̍ī yo̍, ndu̍ cho̍ wāna̍ ma̍ndā na̍a̍ wo̍ ni̍.