Read Southern Kisi Sa᷅m 48 Bible Online

Sa᷅m 48 - Southern Kisi bible

Sa᷅m 48

¹[45] Mɛ̄lɛ̄ka̍ Ya̍a̍wɛ̄ɛ̄ o̍ cho̍ ō bɛ̄ndū, ō chō ō bɛ̄ndū le̍ mbō sɔ̄la̍ sāŋgālāa̍, o̍ chi̍e̍e̍ cho̍ le̍ ndu̍ Mɛ̄lɛ̄ka̍ nāa̍ wo̍ ni᷄ŋ, chi̍e̍e̍ cho̍ o̍ pēmbīī kāsīe̍i̍ chōo̍ wo̍, Pēmbīī Sa̍a̍yɔ̄ŋnde̍.

²Sa̍a̍yɔ̄ŋ, pēmbīi̍ Mɛ̄lɛ̄kɛ̍i̍ ī chō pēmbīī vīlɛ̄ī bɛ̄ndū, ndu̍yɛ̍ ī chō pēmbīī kɛ̄ndɛ̄ī bɛ̄ndū. Wāŋnda̍ o̍ chi̍e̍ēŋndo̍ ni᷄ŋ kpo̍u̍, mī pēmbēi̍ he̍ī tōsa̍ mā dɔ̄ɔ̄nu᷄ŋ nya̍a̍le̍. Pēmbīī Sa̍a̍yɔ̄ŋnde̍, pēmbīi̍ cho̍ bā lūāŋndo̍ pɔ̍ɔ̍li̍ ve̍, lēchōo̍ chi̍e̍e̍ cho̍ le̍ Mɛ̄lɛ̄ka̍, o̍ cho̍ māsā bɛ̍ndū tɔ̍ɔ̍ma̍a̍ wo̍ ō chō ni̍.

³Mɛ̄lɛ̄ka̍ chō o̍ chi̍e̍e̍ cho̍ ō bɛ̄ɛ̄ndīāā ō kālā ka̍lā le̍ yɔ̄ŋi̍ yɔ̍ɔ̍mɔ̍ɔ̍wa̍ ā lūɛ̍i̍ yo̍ ni̍ŋ. Ndu̍ cho̍ chi̍o̍o̍ ho̍ō māndāa̍ ni̍.

⁴Mi̍ māsāā bɛ̍ndūa̍a̍ ā lō o̍ ko̍ŋ ma̍ dūāūnu᷄ŋ na̍a̍ pi᷅lɛ̍, ma̍ hūŋ le̍ Pēmbīī Sa̍a̍yɔ̄ŋnde̍ chīŋa̍la᷅ŋndo̍.

⁵Kɛ̍ mɛ̄ɛ̍ nda̍ chē ndi̍, mi̍ kpɛ̍īyo̍ bīī nda̍ kpo̍u̍, mi̍ sīōōŋīī bɛ̄ndūe̍i̍ ī bīī nda̍ ma̍ nyāānu᷄ŋ.

⁶Mɛ̄ɛ̍ nda̍ hu᷄ŋ chɔ᷅ ndi̍, mi̍ sīōōŋnde̍ bīī nda̍ ma̍ nyīīyā kpa̍kpā, ma̍ yɔ̄nu᷄ŋ mɛ̄ɛ̍ wānā la̍nɔ̍ɔ̍ te̍le̍ŋ ndɔ̄ vi̍a̍lāa̍ ō fūūlūū nu̍a̍ā mbō wa̍ o̍ sāŋgā kōŋ ni᷄ŋ yɛ̍.

⁷Mɛ̄ɛ̍ hūēīyīī bɛ̄ndūi̍i̍ cha᷅ŋ ba᷅ pāa̍le̍ŋ lē chāŋndo̍ ve̍, ī kōmāl nu̍a̍ā dɛ̄ndɛ̄la̍ bɛ̄ndūla̍ ku̍ā o̍ mɛ̄ŋnda̍ŋ chōo̍ la̍ŋ, mī lā wa̍ īkpēŋgēla᷄ŋ kpe̍ŋgēla᷄ŋnde̍ yɛ̍, le̍nde̍ nda̍ yɔ̄nu̍ŋ ni̍.

⁸Nyɛ̄ na̍a̍ ŋ̄ tūēī yo̍, ndu̍ ko̍ni̍ na̍a̍ ŋ̄ chē ni̍ mbo̍ yɔ̄nu᷄ŋ o̍ chi̍e̍e̍ cho̍ le̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ni᷄ŋ ni̍. Mɛ̄lɛ̄ka̍ nāa̍ chi̍e̍e̍ ndɔ̄ɔ̍ chi̍o̍o̍ ho̍ō ō chō ni̍, chi̍e̍e̍ Mɛ̄lɛ̄ka̍ bɛ̄ɛ̄ndi̍a̍a̍ ho̍ō mbo̍ wā ndu̍ māndāa̍ le̍ fɛ̍ɛ̍ŋ a̍ fɛ̍ɛ̍ŋ nyɛ̄ o̍ nyɛ̍ yɔ̍nūŋ ndu̍ le̍ wo̍.

⁹O̍o̍ Mɛ̄lɛ̄ka̍, le̍ te̍le̍ŋ o̍ te̍le̍ŋ tē ŋ̄ wa̍ nu̍m sōōlūūwo̍ o̍ chīɛ̄ī nūmndo̍ ni᷄ŋ pɛ̍, ŋ̄ lōōnu̍ŋ a̍ kāālā bɛ̄ndū ŋ̄ kāāla̍ ŋ̄wāŋndā chīe̍e̍ le̍ te̍le̍ŋ o̍ te̍le̍ŋ ndo̍.

¹⁰O̍o̍ Mɛ̄lɛ̄ka̍, ā chō wāna̍ tɔ̍ɔ̍ bɛ̍ndū, ndu̍yɛ̍ wāŋnda̍ o̍ chi̍e̍ēŋndo̍ ni᷄ŋ kpo̍u̍, ā chō nu̍m sāŋgālāa̍. O̍ nɛ̄i̍ sa̍kpōo̍ chōo̍ ŋ̄ kīlūl wa᷅ŋnda̍ yāma̍ŋ ni̍.

¹¹Wāŋnda̍ o̍ Pēmbīī Sa̍a̍yɔ̄ŋnde̍ chōo̍ ā wa̍ a̍ kɔ̄ltā kɛ̄ndɛ̄. Wāŋnda̍ o̍ chi̍o̍o̍ŋ Chu̍dā, ā dɔ̄ɔ̄nu̍ŋ nya̍a̍le̍, fo̍ndōle̍ le̍ mɛ̄ɛ̍ ŋ̄ kīālū ya᷅mɛ̍i̍ o̍ nɛ̄i̍ sa̍kpōo̍ chōo̍ yɛ̍.

¹²Wānāa̍ Mɛ̄lɛ̄ka̍a̍, lā bālu̍ Pēmbīī Sa̍a̍yɔ̄ŋnde̍, mī lā chɔ᷄m fo̍ndāŋndā vīlɛ̄īlā kālā ka̍lāla̍ cho̍ le̍ nya̍ māndāa̍ la̍ŋ.

¹³Lā mɛ̄ɛ̄nda̍ŋ ndɔ̍ sāāsāla̍ cho̍ nya̍ lābālāā la̍ŋ, ndu̍yɛ̍ a̍ fo̍ndāŋnda̍ cho̍ lā bɛ̍ɛ̍ndīāā lā kālā ka̍lā le̍ nya̍ māndāa̍ la̍ŋ, le̍ mī lā hu᷄ŋ di̍mūl chūāūwāā nyāā ma̍māa̍.

¹⁴Mɛ̄lɛ̄ka̍a̍ ho̍ō, ndu̍ cho̍ Mɛ̄lɛ̄ka̍ nāa̍ le̍ fɛ̍ɛ̍ŋ a̍ fɛ̍ɛ̍ŋ ni̍. Ndu̍ hi̍a̍ū ni̍ŋ la̍chi̍ a̍ na̍a̍ māndāa̍ le̍ fɛ̍ɛ̍ŋ a̍ fɛ̍ɛ̍ŋ ni̍.