Read Southern Kisi Sa᷅m 49 Bible Online

Sa᷅m 49 - Southern Kisi bible

Sa᷅m 49

¹[46] Lā tūe̍i̍ nyɛ᷅ ya̍ I̍ cho̍ nya̍ dīmūllo̍, nya̍ wāŋnda̍ kpo̍u̍. Nya̍ wānā o̍ wāna̍ cho̍ o̍ chi̍e̍ēŋndo̍ ni᷄ŋ, lā ya᷄ŋ ya̍ nīla̍ŋ,

²wānā bɛ̍ndū ni̍, wānā yɔ̍ŋāā ni̍, wānā su̍lāā ni̍, wānā ta̍mbɛ̍i̍ ni̍.

³Dīōmnda̍ cho̍ ya̍ fūlā o̍ sōndō la̍ŋ, lā chō dīōmndā kɔ̄l kālu̍la̍ bɛ̍ndū. Sɔ̄ɔ̍ŋ cho̍ o̍ kɔ̄l nūu̍ ni᷄ŋ le̍ nya̍ dīmūllo̍ wo̍ŋ, ŋ̄ chō sɔ̄ɔ̍ŋ sīnā pɛ̄ŋgu̍ŋ bɛ̍ndū.

⁴I̍ ya᷅ŋ ni᷅la̍ŋ o̍ tāle̍lā bɔ̄ɔ̍ bɔ̍ɔ̍, ndu̍yɛ̍ sɔ̄ɔ̍ŋ wa᷅ ŋ̍ vi̍a̍ŋna᷄ŋ o̍ tāle̍la̍ŋ ni᷄ŋ ndo̍ŋ, I̍ wa᷅ to̍wa̍ nūu̍ lɔ̄ɔ̍ mī nɔ̍la̍ mī tɛ̍ɛ̍si̍a̍a̍ mu̍ŋ.

⁵Ā yɔ᷄ŋ bɛ̍ɛ̍ mī sɔ̄ɔ̍ŋ pa̍la᷄ŋ ŋ̄ kōma̍l la̍, sīōōŋīī bi̍ī ya̍ le̍. Wānāā dɛ̍nɛ̍ wɔ̍ɔ̍ŋnda̍ ā bālu̍ ya̍ bɛ̍ɛ̍ le̍ ya̍ nyɛ̄ pālāa̍ tūsīo̍o̍ chōo̍ I̍ yɔ᷅ŋ i̍si̍o̍o̍ŋ te̍,

⁶nda̍ yɔ̍nūŋ ni̍ māā wānāa̍ dɔ̍ū ha̍ā tīīnda᷄ŋ ndāa̍ o̍ sūltā ndāla̍ŋ ni᷄ŋ, mā kīālū yo̍ŋgāa̍ a̍ sūltā ndāla̍ bɛ̄ndūla̍ŋ nda̍.

⁷Wānā o̍ wānā nɔ̍lā mā dɔ̄ū yōōmū nūmndo̍ wɔ̄ŋgū le̍, kɛ̄lɛ̄ŋgāāle̍ mī wānā nɔ̍la̍ mā pa̍a̍wa̍ Mɛ̄lɛ̄ka̍ le̍ yōōmū nu̍m nūm pi̍la̍a̍.

⁸Yōōmū wāna̍ chi̍o̍o̍ ō nɔ̄ ba̍a̍ bɔ̄ɔ̍. Nyɛ̄ o̍ nyɛ̄ cho̍ mī wānā ke̍ Mɛ̄lɛ̄ka̍ mbō wa᷄ lētūu̍,

⁹le̍ yōōmū nūmndo̍ bāŋāa̍ mā wa̍ yōōmū le̍ fɛ̍ɛ̍ŋ a̍ fɛ̍ɛ̍ŋ, a̍ ku̍ē o̍ sɛ̄īyo̍ ni᷄ŋ te̍ le̍.

¹⁰Wānā o̍ wānā si̍nā māā pīɔ̍mndo̍ ndu̍ ō chō le̍ wānā o̍ wānā fe̍e̍, wāna̍ kɔ̄l kālu̍ ni̍, dīɔ̄m ni̍, wāna̍ nɔ̍ ta̍āsi̍ le̍ ni̍, nda̍ kpo̍u̍ wūo̍o̍, mā me᷄l chāāŋnda̍ sūltā ndāla̍ŋ.

¹¹Mi̍ chē bɛ̍ɛ̍ mi̍ nda̍ a̍a̍ nɔ̍ lɛ᷅ŋnde̍, kɛ̍ sɛ̄īla̍ŋ, la̍ŋ la̍ wa᷅ ni̍ŋ chi̍ɛ̍īlā ndāla̍ŋ le̍ fɛ̍ɛ̍ŋ a̍ fɛ̍ɛ̍ŋ ni̍, nāa̍ ndāā cha̍lāa̍ nda̍ wa᷅ ni̍ŋ ka̍ŋ le̍ fɛ̍ɛ̍ŋ a̍ fɛ̍ɛ̍ŋ ni̍.

¹²Mɛ̄ɛ̍ mɛ̄ɛ̍ wāŋndo̍ ō su᷄l, sūl ndɔ̄ ko̍ŋ ō nɔ̍lā mbō tōsa̍ mī wānā ko̍ŋ ō wa̍ yōōmū le̍ fɛ̍ɛ̍ŋ a̍ fɛ̍ɛ̍ŋ te̍. Mɛ̄ɛ̍ vīsīo̍o̍ ō wū nu̍a̍ā yɛ̍, le̍nde̍ ko̍ni̍ wāna̍ chi̍o̍o̍ wū ni̍.

¹³Wānāa̍ ti̍i̍nda̍ŋ ha̍ā kpāāya̍ nda̍ nda̍ pi̍la̍a̍ wa̍, nu̍a̍ā i̍ yɔ̍nūŋ a̍ nda̍ ni̍, wānāa̍ hi̍nī ha̍ā kɔ̄l a̍ sūltā ndāla̍ŋ nda̍, nu̍a̍ā mɛ̄ɛ̄lu̍la̍ ndāla̍ŋ lā wā ni̍.

¹⁴Mɛ̄ɛ̍ sāa̍ ō wā nu̍a̍ā ō yūlāā le̍ pīɔ̍mndo̍ yɛ̍, le̍nde̍ i̍ yɔ̍nūŋ a̍ nda̍ ni̍. Mɛ̄ɛ̍ wānā ma̍ndāā lāsāa̍ ō kūā nu̍a̍ā a̍ sāa̍ ndūa̍a̍ le̍ nda̍ dīyɔ̄ɔ̍ yɛ̍, le̍nde̍ pīɔ̍mndo̍ ō kūā a̍ nda̍ ni̍. Ā chō tōlɔ̄ɔ̄ o̍ sɛ̄īyo̍ ni᷄ŋ sa̍kpō, ndu̍yɛ̍ mī dīāllūŋ ndāa̍ŋ ŋ̄ kēle̍ŋa̍ sīɔ̄. Chi̍e̍e̍ pīɔ̍m wa᷅ ni̍ŋ o̍ nda̍lo̍ chi̍e̍e̍ ni̍.

¹⁵Kɛ̍ ya̍ ya̍ Mɛ̄lɛ̄ka̍ chō yōōmū nūu̍ chīīndīāā, ō chō ya̍ sōlī pīɔ̍mndo̍ o̍ bā.

¹⁶Le̍la̍ŋ chɔ̍ bɛ̍ɛ̍ mī wāŋndo̍ ō su᷄l, mī chīɛ̄ī ndɔ̄ɔ̍ ō fūla̍ tɔ̍ɔ̍ a̍ sūllo̍, ta̍mbū kɔ̄l te̍,

¹⁷kāni̍ fo̍ndōle̍, wānā ko̍ŋ a̍ sūl ndɔ̄ ko̍ŋ kpo̍u̍, tē ō vī pɛ̍, ō ku̍ē a̍ nyɛ̄ o̍ nyɛ̄ le̍. Bɛ̄ɛ̄le̍ ndu̍ o̍o̍ nɔ̍ le̍ŋ bɛ̍ɛ̍, ā chɔ᷅ ndu̍ a̍ le̍ŋ te̍.

¹⁸Mi̍ chē bɛ̍ɛ̍ bōōndi̍i̍ wānā ko̍ŋ ō wa̍ yōōmū ve̍, mbo̍ chūānu̍ŋ māā nyɛ̄ o̍ nyɛ̄ chō bɛ̍ɛ̍ŋ a̍ ndu̍ o̍ yōōmū ndɔ̄ɔ̍ ni᷄ŋ, ndu̍yɛ̍ mi̍ wāŋnda̍ ā wā ndu̍ sāŋgālāa̍ le̍ mɛ̄ɛ̍ o̍ di̍ī dɛ̍nɛ̍ yɛ̍,

¹⁹kɛ̍ wānā ko̍ŋ ō nɔ̄ mbō vī mbō kōma̍l fi̍nyāā ndūāā ma̍māa̍ chi̍e̍e̍ pīɔ̍m. Le̍ fɛ̍ɛ̍ŋ ā fɛ̍ɛ̍ŋ ō de᷅l lɛ̍ nyɛ̄ wa̍wo̍ŋndo̍ lēhɔ̄l te̍.

²⁰Mɛ̄ɛ̍ o̍ mɛ̄ɛ̍ wāŋndo̍ ō su᷄l, sūl ndɔ̄ ko̍ŋ ō nɔ̍la̍ mbō chīīndi̍a̍a̍ yōōmū ndɔ̄ɔ̍ ō vi᷅ le̍ le̍. Mɛ̄ɛ̍ vīsīo̍o̍ ō wū nu̍a̍ā yɛ̍, le̍nde̍ ko̍ni̍ wānā ko̍ŋ ō wū ni̍.