Read Southern Kisi Sa᷅m 5 Bible Online

Sa᷅m 5 - Southern Kisi bible

Sa᷅m 5

¹[3] O̍o̍ Mɛ̄lɛ̄ka̍ Ya̍a̍wɛ̄ɛ̄, tu̍e̍i̍ di̍ōmndā ya̍ cho̍ nu̍m dīmūllo̍ la̍ŋ. Ya̍ŋ ni᷅la̍ŋ o̍ kūŋndā nīla̍ dɛ̍nɛ̍ pa̍lāā la̍ŋ.

²Ya̍ŋ ni᷅la̍ŋ o̍ kōŋu̍l nūu̍ nāa̍ nūm chu̍a̍, Māsānɔ̍ nī bɛ̍ndōo̍, nūm Mɛ̄lɛ̄ka̍ nūu̍, kāni̍ fu̍u̍le̍, nūm ya̍ pi̍ɛ̍ī ni̍.

³O̍o̍ Mɛ̄lɛ̄ka̍ Ya̍a̍wɛ̄ɛ̄, dīmīo̍o̍ nu̍a̍ā mī pāa̍le̍ŋ lē sɛ̄, mā tūēī ya̍ pīɛ̄īle̍ŋ. Pāa̍le̍ŋ sīɔ̍ɔ̍ ko̍ni̍ mā tūēī dīōm nūu̍. O̍ ko̍ŋ, mī I̍ cha̍l mī I̍ chu̍m nu̍m le̍ mɛ̄ɛ̍ ŋ̄ chō ya̍ dīōm mūlī yɛ̍.

⁴Nūm Mɛ̄lɛ̄ka̍ a̍ ni᷅ŋ kɔ̍l a̍ sɔ̄ɔ̍ŋ wɔ̍ɔ̍ŋ wāŋnda̍ tōsā wo̍ŋ te̍. A̍ ke᷅ wa̍nā wɔ̍ɔ̍ŋndo̍ fo̍ndāa̍ o̍ cha᷄lta̍ nu̍mnda̍ŋ te̍.

⁵A̍ hɛ̍na̍ŋ bɛ̍ɛ̍ mā chēnu᷄ŋ wa᷅na̍ yōŋgāa̍ o̍ hɔ̄l te̍. Wānā o̍ wāna̍ cho̍ wāna̍ dɛ̍nɛ̍ wɔ̍ɔ̍ŋ a̍ tu̍l nda̍ lēyɛ̄.

⁶Tɛ̄ɛ̄mbūūwo̍ ŋ̄ tɛ̄ɛ̄mbūū wa̍nāā lāchōōwāa̍ ni̍. Wānāa̍ di̍ū wa᷅ŋnda̍ wa̍, a̍ wānāā lēyālāa̍, a̍ tu̍l nda̍ lēyɛ̄.

⁷Kɛ̍ ndu̍yɛ̍, le̍ kāālā bɛ̄ndū ŋ̄ kāāla̍ chūāā ŋ̄wāŋndā chīe̍e̍ wo̍, I̍ nɔ̍lā mī hi᷅ŋ nāa̍ nūm chu̍a̍, mī so̍o̍lu̍u̍ nu̍m o̍ bɛ̍ɛ̍le̍ bɛ̍ndūle̍ŋ ni᷄ŋ, o̍ chīɛ̄ī nu̍m Mɛ̄lɛ̄ka̍a̍ ni᷄ŋ, chīɛ̄ī kāsīo̍o̍.

⁸O̍o̍ Mɛ̄lɛ̄ka̍ Ya̍a̍wɛ̄ɛ̄, ma̍la̍ ya̍ mī to̍sa̍ nyɛ̍ cho̍ sa̍kpō nu̍m o̍ hɔ̄l le̍ tōsāa̍ wo̍, fo̍ndōle̍, I̍ nɔ̍ bɔ̄ɔ̍ ya̍a̍mɔ̍ɔ̍wa̍ kɔ̄ɔ̄lī. Chɔ̍m ya̍ nɛ̄ī nu̍mndo̍ nyɛ̄ kɛ̄ndɛ̄ wa̍la̍ŋ mī ku̍ɛ̄ lēchōo̍.

⁹Ya̍a̍mɔ̍ɔ̍wa̍a̍ nīa̍a̍ ha̍ā, ā cho̍ wa̍nāa̍ sa̍ndu̍ le̍. Yēēmɛ̍i̍ tɛ̍ɛ̍mbāā ŋ̄wāŋndā chīe̍e̍ve̍ ko̍ni̍ cho̍ nda̍ o̍ kɔ̄lta̍ŋ ni᷄ŋ ni̍. Wānāa̍ ya̍ā cha̍a̍ŋāā ndāa̍ o̍ pīɔ̍mndo̍ ni᷄ŋ nda̍ nda̍ chō ni̍. Wānāā lēyālāā bɛ̄ndū nda̍ chō ni̍.

¹⁰O̍o̍ Mɛ̄lɛ̄ka̍, ki̍lu̍l wa᷅ŋnda̍ ha̍ā yāmɛ̍i̍ mā tu̍si̍ nda̍ nyɛ̄ pālāa̍ cho̍o̍. To̍sa̍ mā hāu̍ o̍ yāŋɔ̄ɔ̄lē ndāle̍ nda̍ pi̍la̍ le̍ŋ. Le̍ yɔ̄ŋndā ndāla̍ wɔ̍ɔ̍ŋnda̍ŋ, a̍ le̍ sīmūl nda̍ sīmu̍l nu̍m ndo̍, tōu̍ nda̍ ā fāŋa̍ŋ nu̍m o̍ hɔ̄l.

¹¹Kɛ̍ wānāa̍ hu᷅ŋ nāa̍ nūm chu̍a̍ le̍ nda̍ mālāa̍ wa̍ nda̍ nda̍ ki̍nɛ̍i̍, to̍sa̍ mā dɔ̄ɔ̄nu᷄ŋ nya̍a̍le̍, to̍sa̍ mā na᷄ŋ lākɔ̄l mā wa̍ chōndo̍ŋ. Ma̍nda̍ wa̍nāa̍ ka̍a̍la̍ nu̍m nda̍, o̍ ko̍ŋ, mā na᷄ŋ kɔ̄l le̍ nyɛ̄ ŋ̄ tōsa̍l nda̍ wo̍.

¹²O̍o̍ Mɛ̄lɛ̄ka̍ Ya̍a̍wɛ̄ɛ̄, wa̍nāa̍ to̍sā nyɛ̍ cho̍ sa̍kpō nu̍m o̍ hɔ̄l lo̍ wa̍, sa̍lāa̍ ŋ̄ dūāū nda̍ ni̍, mā ma̍nda̍ nda̍ nyɛ̄ kɛ̄ndɛ̍ī, nyɛ̄ bɛ̍ɛ̍ yɔ̍nūŋ nda̍ le̍.