Read Southern Kisi Sa᷅m 50 Bible Online

Sa᷅m 50 - Southern Kisi bible

Sa᷅m 50

¹[47] Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ chō sūɛ̍i̍. Ō vēēlu̍ wāŋnda̍ kpo̍u̍ o̍ chi̍e̍ēŋndo̍ ni᷄ŋ, chɔ̍ŋ ba᷅ pāa̍le̍ŋ lē chāŋndo̍ mbō kūɛ̄ bā pāa̍le̍ŋ lē dēl lo̍.

²Pa̍ŋgēle̍ chɔ᷅m na̍ŋɔ̄ɔ̍ Mɛ̄lɛ̄ka̍a̍ wo̍, ō chō dīōndɔ̄ɔ̍ kpe̍e̍kpe̍i̍ Sa̍a̍yɔ̄ŋ chi̍e̍e̍, chi̍e̍e̍ kɛ̍ndɛ̄ bɛ̄ndōo̍.

³Mɛ̄lɛ̄ka̍ nāa̍ ō chō hūnɔ̄ɔ̍, ndu̍yɛ̍ ō cho̍ hu̍nɔ̄ɔ̄ o̍ do̍ŋ do̍ŋ ni̍ŋ te̍. Yīŋndē wūle̍ wu᷅le̍ bɛ̍ndūle̍ŋ lē chō ndu̍ hūnɔ̄ɔ̍ lāchī, ndu̍yɛ̍ mi̍ hūēīyīī tɔ̍ɔ̍mɛ̍i̍ bɛ̄ndūe̍i̍ ī wā ndu̍ ī bālāā si̍lɔ̍.

⁴Ō dīmu̍l ha̍la̍a̍ chōo̍ cho̍o̍ a̍ chi̍e̍ēŋndo̍, le̍ mā tōfa̍ mā chē mɛ̄ɛ̍ o̍ tu̍sī ni̍ŋ wa̍nāā ndūa̍a̍ nyɛ̄ pālāa̍ chōo̍ yɛ̍.

⁵Ō dīmi̍ āā, “Lā chūūŋgi̍a̍a̍ wa̍nāā nīa̍a̍ cho̍ ya̍ o̍ hɔ̄l sa̍kpō wa̍, mī lā hīŋ a̍ nda̍ nāa̍ ya̍ chu̍a̍, wānāa̍ yi̍i̍ kpe̍ma̍a̍ a̍ ya̍, ma̍ sōlī sa̍lāa̍ o̍ ya̍ lo̍ le̍ kpe̍ma̍ ko̍ŋ yīī yo̍ wa̍.”

⁶Nyɛ᷄m cho̍ o̍ ha̍la̍a̍ ni᷄ŋ cho̍o̍ cho̍o̍ wo̍ŋ, ŋ̄ chɔ᷄m kpe̍nde̍ke̍le̍ māā Mɛ̄lɛ̄ka̍ chō wāna̍ tōnya̍ bɛ̄ndū, ndu̍yɛ̍ ndu̍ Mɛ̍lɛ̄ka̍ pīla̍ ndu̍ cho̍ wāna̍ ki̍lūl wa᷅ŋnda̍ yāmɛ̍i̍ yo̍ ni̍.

⁷Mɛ̄lɛ̄ka̍ dīmi̍ āā, “Lā ya᷄ŋ ya̍ nīla̍ŋ wānāā nīa̍a̍, I̍ cho̍ īsɔ̄ɔ̍ di̍mī. Wāŋnda̍ I̍sɔ̄lūɛ̄ī, ya̍ Mɛ̍lɛ̄ka̍ I̍ hi᷅ŋ nya̍ sɔ̄ɔ̍ŋ nya̍ tōsa̍ ki̍nɛ̍i̍ yo̍ŋ chɔ̄m chōo̍. Ya̍ cho̍ Mɛ̄lɛ̄ka̍ ni̍, Mɛ̄lɛ̄ka̍ nyāa̍.

⁸I̍ pɛ̍ɛ̍sa̍ nya̍ le̍ sālālā nyāla̍ nya̍ chō sōlīo̍o̍ o̍ ya̍ lo̍, ndu̍yɛ̍ a̍ sālālā nyāla̍ lu̍a̍māālā nya̍ chō sōlīo̍o̍ le̍ te̍le̍ŋ o̍ te̍le̍ŋ nda̍ŋ te̍.

⁹Kɛ̍ ndu̍yɛ̍, I̍ he̍u̍ bɛ̍ɛ̍ ba̍ le̍ nāūwāā nyāā to̍o̍yē, kɛ̄lɛ̄ŋgāāle̍ chūīŋāā nyāa̍ nya̍ hūŋ chɔ̄nɔ᷄ŋndo̍ a̍ nda̍ o̍ fo̍ndāŋndā nyāla̍ nya̍ māndā chɔ̍lūa̍a̍ la̍ŋ te̍.

¹⁰Kāni̍ fo̍ndōle̍, vīsīa̍a̍ cho̍ yōndōla̍ŋ ni᷄ŋ nda̍ kpo̍u̍ ya̍ nɔ̍ ni̍. Ndu̍yɛ̍ nāūwāa̍ cho̍ o̍ pēmbu᷄ŋ cho̍ o̍ wāa̍la̍ŋ ni᷄ŋ ndo̍ŋ chōo̍ wa̍ bɛ̍ɛ̍, ya̍ nɔ̍ ni̍.

¹¹Yōūwa̍ bɛ̍ɛ̍ kpo̍u̍, ndu̍yɛ̍ a̍ nyɛ̄ o̍ nyɛ̄ yōōmāa̍ cho̍ yōndōla̍ŋ ni᷄ŋ, nda̍ kpo̍u̍ ya̍ nɔ̍ ni̍.

¹²“Yīa̍a̍ŋ ma̍a̍ nɛ̍i̍ ya̍ bɛ̍ɛ̍, I̍ ve̍ nya̍ nyūnā le̍ ya̍ nyɛ̄ dīāā kē le̍, kāni̍ fo̍ndōle̍, chi̍e̍ēŋndo̍ ho̍ō kpo̍u̍, a̍ nyɛ̄ o̍ nyɛ̍ cho̍ lēni᷄ŋ, ya̍ nɔ̍ ni̍.

¹³Bāā vīsīŋ nāūwo̍ŋ ya̍ I̍ di̍ā ni̍, ɔ̄ɔ̄ kōo̍ma̍ chūīŋnda̍ ya̍ I̍ ko᷅l ni̍?

¹⁴Lā me᷄l ya̍ Mɛ̍lɛ̄ka̍ ba̍li̍ka̍a̍ o̍ chōnde̍i̍ ni᷄ŋ māā sa̍lā nāa̍ ya̍ chu̍a̍, ndu̍yɛ̍ mī lā pēēlu̍ būŋgāŋ nya̍ chūe̍l ya̍ Mɛ̄lɛ̄ka̍ hi̍o̍ū kpo̍u̍ wo̍ wo̍ŋ.

¹⁵O̍ ko̍ŋ, tē dɛ̍nɛ̍ pa̍lāa̍ ō kōma̍l nya̍ pɛ̍, mī lā nyūna̍ ya̍ le̍ mālāa̍, I̍ nɔ̍lā mī tu̍e̍ī nya̍ dīōm mī chi̍i̍ndi̍a̍a̍ nya̍, ndu̍yɛ̍ mī lā sāŋga̍la̍ ya̍.”

¹⁶Kɛ̍ Mɛ̄lɛ̄ka̍ dīmu̍l wānāā dɛ̍nɛ̍ wɔ̍ɔ̍ŋnda̍ āā, “Vɛ᷅ mī lā tōmbo̍la̍ sāwāla̍ nīla̍ŋ, ɔ̄ɔ̄ mī lā sōō bɛ̍ɛ̍ a̍ kpe̍ma̍ nūu̍ o̍kɔ̄ɔ̄?

¹⁷Lā bīī mi̍ lā tūl sīlālā ya̍ I̍ si̍lā nya̍ le̍ nya̍ mīŋgīo̍o̍ o̍ nɛ̄īla̍ŋ lēyɛ̄, ndu̍yɛ̍ mi̍ lā kɛ̄ɛ̄ pɛ̄ɛ̄kūlā nīla̍ŋ.

¹⁸Tē lā chē vīīya̍ pɛ̍, nda̍ nya̍ bīī cha᷅ŋnjɛ̍i̍ ni̍, ndu̍yɛ̍ mī lā yāā na̍āŋa᷅ŋnda̍ŋ a̍ wānāā sūūndɛ̍i̍ya̍.

¹⁹“Le̍ te̍le̍ŋ o̍ te̍le̍ŋ sōndōlā nyāla̍ŋ lā chō lā bɛ̄ɛ̄ndīa̍ŋ le̍ sɔ̄ɔ̍ŋ wɔ̍ɔ̍ŋndo̍ŋ dīmīo̍o̍, ndu̍yɛ̍ lā wo᷅ bɛ̍ɛ̍ le̍ lāchōō dīmī le̍.

²⁰Tē lā cha᷅l pɛ̍, lā cha᷄l a̍ wānāya᷅ŋ nyāa̍ŋ o̍ lāsōndō chōŋgūla̍ŋ nda̍, wānāā nya̍ fu̍la̍ ka̍lā pi᷅lɔ̍ɔ̍ wa̍ mī lā bālu̍ a̍ nda̍ o̍ lāsōndō.

²¹Sɔ̄ɔ̍ŋ mu᷅ŋ kpo̍u̍ lā chō mu̍ŋ tōsāa̍ mī me̍e̍nu̍ŋ nya̍, nyɛ̄ kōŋ nya̍ yīya̍ŋ ni̍ māā mɛ̄ɛ̍ nya̍ chō yɛ̍ ko̍ni̍ ya̍ I̍ cho̍ ni̍. Kɛ̍ I̍ hi᷅ŋ nya̍ sɔ̄ɔ̍ŋ nya̍ tōsa̍ wo̍ŋ chɔ̄m chōo̍, ndu̍yɛ̍ mī so̍li̍ mu̍ŋ kpe̍nde̍ke̍le̍ mī lā chē.

²²“Lā ya᷅ŋ ya̍ nīla̍ŋ nya̍ kɛ̍ɛ̍ ya̍ ha̍ā wa̍, yɔ̄ŋi̍ ya̍ I̍ tɛ̍ɛ̍mbu̍u̍ nya̍, ndu̍yɛ̍ wānā o̍ wānā ve᷅ ni̍ŋ mbō chīīndi̍a̍a̍ nya̍ le̍.

²³Wānā o̍ wānā me̍l la̍ ba̍li̍ka̍a̍ pɛ̍, mɛ̄ɛ̍ sa̍la̍ ke᷅ ya̍ bɛ̄ɛ̄le̍ŋ ndo̍ wānā ko̍ŋ ō wā ko̍ŋ so̍līo̍o̍ o̍ ya̍ lo̍ ni̍. Ndu̍yɛ̍ wānā o̍ wāna̍ to᷅l nɛ̄i̍ nūu̍ kɔ̄ɔ̄lī pɛ̍, chīīndīa̍a̍ ya̍ Mɛ̍lɛ̄ka̍ chīīndīāā ndu̍ ni̍.”