Read Southern Kisi Sa᷅m 51 Bible Online

Sa᷅m 51 - Southern Kisi bible

Sa᷅m 51

¹[48] Yāndi̍i̍ Mɛ̄lɛ̄ka̍, tu̍i̍i̍nu̍ŋ ya̍ īnyīɛ̍ɛ̍, fo̍ndōle̍, I̍ si̍nā māā wāna̍ ka̍a̍la̍ ŋ̄wāŋnda̍ chi̍e̍e̍ le̍ te̍le̍ŋ o̍ te̍le̍ŋ ndo̍ ŋ̄ chō ni̍. Mɛ̄ɛ̍ ŋ̄ chō wāna̍ īnyīɛ̍ɛ̍ bɛ̄ndū yɛ̍, wɔ̍ɔ̍su̍u̍ yɔ᷅ŋ nī wɔ̍ɔ̍ŋndo̍ mā fa̍ŋa̍ ya̍ ndu̍ kūēē.

²Dɛ̍nɛ̍ wɔ̍ɔ̍ŋ o̍ dɛ̍nɛ̍ wɔ̍ɔ̍ŋ ya̍ I̍ to̍sa̍, ma̍l la̍ le̍ ndu̍ mā di̍ndi̍ ya̍. Me̍lnu̍ŋ ya̍ le̍ yɔ̄ŋ nī wɔ̍ɔ̍ŋndo̍ mā to̍sa̍ mī si̍mnu᷄ŋ o̍ di̍a̍ndāā.

³I̍ si̍nā māā I̍ to̍sa̍ yɔ̄ŋ wɔ̄ɔ̍ŋndo̍ nu̍m o̍ hɔ̄l. Yɔ̄ŋndā nīla̍ wɔ̍ɔ̍ŋnda̍ŋ lā chō kpe̍nde̍ke̍le̍, lā cho̍ nyɛ᷅ ya̍ I̍ pu̍ɛ̍ɛ̍nu̍ŋ te̍.

⁴I̍ to̍sa̍ yɔ̄ŋ wɔ̄ɔ̍ŋndo̍ nu̍m o̍ hɔ̄l Mɛ̄lɛ̄ka̍, a̍ nūm kpe̍e̍kpe̍i̍ ya̍ I̍ tɛ̍ɛ̍mbu̍u̍ ni̍. I̍ so̍li̍ nu̍m dīōm ndu̍yɛ̍ mi̍ tɛ̍ɛ̍mbūū a̍ nūm. Le̍la̍ŋ ā nɔ̄ di̍ mā ki̍lu̍l la̍ yāmɛ̍i̍ le̍ ya̍ nyɛ̄ pālāa̍ tūsīo̍o̍ chōo̍ le̍ yɔ̄ŋ nī wɔ̍ɔ̍ŋndo̍. O̍ nɛ̄i̍ kpe̍e̍kpe̍i̍ ŋ̄ tōsa̍ ndi̍ ni̍.

⁵Chɔ̍ŋ a̍ te̍le̍ŋ nda̍ vēlū ya̍ wo̍ mbo̍ bīī a̍ hāū, o̍ yɔ̄ŋ wɔ̄ɔ̍ŋndo̍ ni᷄ŋ ko̍ni̍ ya̍ I̍ cho̍ŋnu̍ŋ ni̍, ndu̍yɛ̍ o̍ yɔ̄ŋ wɔ̄ɔ̍ŋndo̍ ni᷄ŋ ko̍ni̍ kāla̍ nūu̍ chūa̍ yo᷄l nūu̍ ni̍.

⁶Nyɛ̄ kpe̍e̍kpe̍i̍ ŋ̄ yēēma̍ wo̍ cho̍ ni̍ māā wāna̍ chi̍o̍o̍ ō wa̍ sa̍kpō o̍ kēlālā ndɔ̄la̍ŋ ni᷄ŋ. Le̍la̍ŋ pɛ̍ɛ̍ku̍ ya̍ mī si̍na̍ o̍ kɔ̄l nūu̍ ni᷄ŋ mɛ̄ɛ̍ ya̍ I̍ wa᷅ wa᷅na̍ kɔ̄l kālu̍ yɛ̍.

⁷Di̍ndi̍ ya̍ mī si̍mnu᷄ŋ o̍ di̍a̍ndāā fo̍ fo̍ nu̍m o̍ hɔ̄l. Pu̍lu̍ ya̍ mī si̍mnu᷄ŋ o̍ di̍a̍ndāā fo̍ fo̍, mī hi̍o̍ū mɛ̄ɛ̍ fe̍ŋgbɔ̍ɔ̍ ō wā nu̍a̍ā yɛ̍.

⁸To̍sa̍ mī tu̍e̍ī yōōŋgu̍ to̍sā mī dɔ̍u̍nu᷄ŋ nya̍a̍le̍, ndu̍yɛ̍ mī wa̍ a̍ kɔ̄l kɛ̄ndɛ̄ wo̍. Mi̍ chē bɛ̍ɛ̍ ma̍ tōsā mi̍ nyɛ̄ pālāa̍ ō fūūlūū ya̍, mbo̍ yīmī ya̍ me̍ŋgēle᷄ŋ ni̍, kɛ̍ to̍sa̍ mī dɔ̍u̍nu᷄ŋ vɛ̍lɛ̄ nya̍a̍le̍.

⁹Ke̍i̍ hɔ᷅lte̍ŋ o̍ yɔ̄ŋndā nīla̍ wɔ̍ɔ̍ŋnda̍ŋ chōo̍, ndu̍yɛ̍ mā fa̍ŋa̍ ya̍ yɔ̄ŋndā nīla̍ wɔ̍ɔ̍ŋnda̍ŋ kpo̍u̍ ku̍e̍ē.

¹⁰Dɔ̍u̍ yi̍ya̍ŋnda̍ kɛ̍ndɛ̄la̍ŋ o̍ kɔ̄l nūu̍ ni᷄ŋ Mɛ̄lɛ̄ka̍, ndu̍yɛ̍ mā to̍sa̍ ya̍ mī wa̍ wāna̍ dīōm tūɛ̄īyāā.

¹¹To̍sā mī fa̍ŋa̍ŋ nu̍m o̍ hɔ̄l te̍, kɛ̄lɛ̄ŋgāāle̍ mā to̍sa̍ mī Nyi̍nā nu̍m Kāsīo̍o̍ ō fāŋa̍ŋ ya̍ kɔ̄ɔ̄lī.

¹²To̍sa̍ vɛ̍lɛ̄ mī sɔ̍la̍ kɔ̄l nūm kɛ̍ndɔ̄ɔ̍ le̍ pīŋī ŋ̄ pīŋi̍ ya̍ wo̍, ndu̍yɛ̍ mā ke̍ ya̍ dīāllūŋ kāla᷄ŋ le̍ mī tu̍si̍ŋ o̍ dīōm nūmndo̍ bɛ̄ŋgu̍.

¹³O̍ ko̍ŋ, mī pɛ̍ɛ̍ku̍ wānāā yɔ̄ŋ wɔ̄ɔ̍ŋnda̍ sāwāla̍ nu̍mnda̍ŋ, ndu̍yɛ̍ mī to̍sa̍ mā mīīŋgu̍ nu̍m o̍ ībūŋ.

¹⁴Ma̍nda̍ ya̍ Mɛ̄lɛ̄ka̍ I̍ wa᷅ wānā di̍yāā wāna̍ chi̍e̍e̍ le̍. Nu᷄m pīlɛ̍ kpe̍ nɔ̍lā ni̍ mā pi̍ŋi̍ yōōmū nūu̍. Ko̍ŋ to̍sā ni̍ mī so̍li̍ chōnde̍i̍ chōo̍ cho̍o̍ a̍ kpāāyā nu̍m ŋ̄ nɔ̄ le̍ wāna̍ chīo̍o̍ pīŋīo̍o̍ wo̍ o̍kɔ̄ɔ̄.

¹⁵Māsānɔ̄ɔ̍ Mɛ̄lɛ̄ka̍, fa̍ŋa̍ ya̍ si̍ɔ̍mbu̍la̍ŋ mī nɔ̍la̍ mī so̍ō, ndu̍yɛ̍, mī sa̍ŋga̍la̍ dīōlā nūmnda̍ŋ.

¹⁶Ō cho̍ la̍sa̍lā le̍ la̍ nɛ̍ŋī nu̍m kɔ̄l te̍, tē ndu̍ o̍o̍ wa̍ sa̍lāla̍ŋ pɛ̍, I̍ wa̍ hūnɔ̄ɔ̄ a̍ la̍ŋ. Ō cho̍ sa̍lālā lūāmāā le̍ la̍ hi̍ni̍ nu̍m kɔ̄l te̍.

¹⁷O̍o̍ Mɛ̄lɛ̄ka̍, sa̍lā kpe̍e̍kpe̍i̍ ŋ̄ yēēma̍ na̍a̍ o̍ bā wo̍, ndu̍ cho̍ kɔ̄l tūsīa̍ŋndo̍ nɔ̄ɔ̍ ni̍. Wāna̍ nyīɛ̍ɛ̍ye̍ ī bīī ho̍ō le̍ yɔ̄ŋ ndɔ̄ wɔ̍ɔ̍ŋndo̍, ndu̍yɛ̍ mbō mūlu̍l yɔ̄ŋ wɔ̄ɔ̍ŋ kōŋ kɔ̄ɔ̍ mbō pɛ̄ŋgi̍ ndu̍ tōsāa̍ wo̍, a̍ kɛ̍ɛ̄ wa̍nā wa̍ā le̍nde̍ le̍ Mɛ̄lɛ̄ka̍.

¹⁸O̍o̍ Mɛ̄lɛ̄ka̍, hi̍ni̍ kɔ̍l a̍ Sa̍a̍yɔ̄ŋ mā ma̍la̍ ndu̍. Mi̍ŋgi̍ sa̍a̍sāla̍ ba̍lu̍ Chūlu̍sɛ̄lɛ̄m nda̍ŋ tāŋgūl.

¹⁹Ko̍ŋ to̍sā ni̍ mī sa̍lāla̍ nɛ̍ŋī nu̍m kɔ̄llo̍ la̍ŋ lā wa̍ sōli᷄ŋndo̍ o̍ nūmndo̍, sa̍lāla̍ŋ lā pīlɛ̍ la̍ŋ, a̍ sālālā lūāmāāla̍ŋ, ndu̍yɛ̍ mī nāūwāā tōōyīa̍a̍ ā wa᷄ sa̍lāla̍ŋ sōli᷄ŋndo̍ o̍ ma̍āŋ nūmndo̍ chōo̍.