Read Southern Kisi Sa᷅m 52 Bible Online

Sa᷅m 52 - Southern Kisi bible

Sa᷅m 52

¹[49] Le̍ yɛ̄ɛ̍nɛ̍ mā pɛ̍ɛ̍lu̍ŋ a̍ yɔ̄ŋ wɔ̄ɔ̍ŋndo̍, nūm wāna̍ kpāāyā bɛ̄ndōo̍ ho̍ō? Le̍ yɛ̄ɛ̍nɛ̍ mā ni̍i̍lu̍ tūūlā wɔ̄ɔ̍ŋnda̍ŋ a̍ wānāa̍ Mɛ̄lɛ̄ka̍a̍ o̍kɔ̄ɔ̄?

²Le̍ te̍le̍ŋ o̍ te̍le̍ŋ ā chō wāŋnda̍ de̍fe̍la̍ŋ yīīyo̍ le̍ nda̍ sāāŋgīa̍a̍. Dīɔ̄ɔ̄mūlē nūmnde̍ŋ lē chō māchūāā mɛ̄ɛ̍ kūūsi̍e̍i̍ ī chō nu̍a̍ā yɛ̍. Le̍ te̍le̍ŋ o̍ te̍le̍ŋ ā chō pɛ̄ɛ̄kōo̍ le̍ wāŋnda̍ hūīyo̍.

³Yɔ̄ŋ wɔ̄ɔ̍ŋndo̍ ndu̍ ŋ̄ hīōū kāālā a̍ sūɛ̍i̍ kɛ̍ndɛ̄i̍ tōsāa̍, ndu̍yɛ̍ ma̍ kāālā chōōla̍ŋ dīmīo̍o̍ mbo̍ hīāū tōnya̍a̍.

⁴Dīōmnda̍ tu̍sī wa᷅ŋnda̍ nyɛ̄ pālāa̍ chōo̍ la̍ŋ, la̍ŋ kpo̍so̍ŋ ko̍ni̍ la̍ fu̍lā nu̍m o̍ sōndō ni̍. Wānā hu̍i̍yāa̍ ŋ̄ chō ni̍.

⁵Kɛ̍ ndu̍yɛ̍ Mɛ̄lɛ̄ka̍ chō hūnɔ̄ɔ̄ chīī a̍ nūm le̍ fɛ̍ɛ̍ŋ a̍ fɛ̍ɛ̍ŋ. Mɛ̄lɛ̄ka̍ chō nu̍m sāālā kpa̍ū, mbō sōli̍ nu̍m o̍ nūmndo̍ chi̍ɛ̍ī ni̍ŋ mbō sɛ̄ɛ̄si̍a̍a̍ nu̍m. Ō chō nu̍m fāŋā o̍ chi̍e̍ēŋndo̍ chōo̍ ba̍ū wa᷅ŋndā chīe̍e̍ya̍ tɛ̄ɛ̄ŋ.

⁶Wānāa̍ cho̍ sa̍kpō Mɛ̄lɛ̄ka̍ o̍ hɔ̄l la̍, tē ā chē nyɛ᷄ yɔ̍nūŋ ni̍ŋ a̍ nūmndo̍ pɛ̍, sīōōŋnde̍ chō nda̍ bīyāā. Ndu̍yɛ̍ ā chō nu̍m māmɔ̄ɔ̄ mā dīmi̍ āā,

⁷“Po̍ kɛ̍ɛ̍ le̍ Mɛ̄lɛ̄ka̍ tīīnda᷄ŋndo̍ le̍ mī Mɛ̄lɛ̄ka̍ ō mānda̍ ndu̍, mbo̍ tīīnda᷄ŋ su᷅ltā ndɔ̄la̍ bɛ̄ndūla̍ŋ le̍ ndu̍ māndāa̍ ndu̍yɛ̍ mbo̍ sīmnu᷄ŋ wa᷅na̍ kpāāyā o̍ wāŋnda̍ sɔ̄ɔ̍ŋ wɔ̍ɔ̍ŋndo̍ŋ tōsāllo̍ wo̍, ndu̍ cho̍ ni᷅ŋ nu̍a̍ā ni̍?”

⁸Kɛ̍ ya̍ ya̍, mɛ̄ɛ̍ ɔ̄li̍fīi̍yo̍ ō wā nu̍a̍ā le̍ te̍le̍ŋ o̍ te̍le̍ŋ ō wā pu̍īyo̍ tɛ̍ɛ̍ tɛ̍ɛ̍ yɛ̍, le̍nde̍ ya̍ I̍ cho̍ŋnu̍ŋ o̍ chīɛ̍i̍ Mɛ̄lɛ̄ka̍a̍ ni᷄ŋ ni̍. Ndu̍yɛ̍ I̍ nɔ̍ tīīnda᷄ŋndo̍ o̍ Mɛ̄lɛ̄ka̍ ni᷄ŋ le̍ mbō hīōū lāchī a̍ ya̍ kāālāa̍ le̍ fɛ̍ɛ̍ŋ a̍ fɛ̍ɛ̍ŋ.

⁹Le̍ fɛ̍ɛ̍ŋ a̍ fɛ̍ɛ̍ŋ ba̍li̍ka̍a̍ ō chō ya̍ o̍ sōndō le̍ nūm Mɛ̄lɛ̄ka̍, fo̍ndōle̍, le̍ nyɛ̄ ŋ̄ tōsa̍l la̍ wo̍. Tē wānāā nūmnda̍ ā chūūŋgi̍āŋ le̍ nu̍m sōōlūūwo̍ pɛ̍, I̍ si᷅m ni̍ŋ nda̍ o̍ hɔ̄l mī li̍sa̍ nu̍m, māā ā chō wānā kɛ̍ndɛ̄.