Read Southern Kisi Sa᷅m 55 Bible Online

Sa᷅m 55 - Southern Kisi bible

Sa᷅m 55

¹[52] O̍o̍ Mɛ̄lɛ̄ka̍, yāndi̍i̍ ya̍ŋ ni᷅la̍ŋ o̍ pīɛ̄īlē nīle̍ŋ. Kɛ̍ɛ̄ ya̍ dīōm te̍ Mɛ̄lɛ̄ka̍.

²Tu̍e̍i̍ pi̍ɛ̍īlē nīle̍ŋ ndu̍yɛ̍ mā mu̍li̍ ya̍ dīōm. Kɔ̄llo̍ ō lāāsi̍a̍ŋ ya̍ ni᷄ŋ kpo̍u̍ a̍ būūla᷄ŋndo̍,

³kāni̍ fo̍ndōle̍, ya̍a̍mɔ̍ɔ̍wa̍a̍ nīa̍a̍ ā chīŋa̍la᷅ŋ ya̍, ndu̍yɛ̍ ma̍ wā ya̍ dēŋīo̍o̍ chōo̍ kpe̍e̍kpe̍i̍. Ā chō ya̍ nyɛ̄ pālāa̍ tūsīo̍o̍ cho̍o̍ kpe̍e̍kpe̍i̍. Ā tūūlu̍ kɔ̄l a̍ ya̍, ā yēēma̍ bɛ̍ɛ̍ mā chē ya̍ le̍.

⁴Mɔ̍nɛ̍i̍ bɛ̍ndūe̍i̍ ī pɛ̄ o̍ kɔ̄l nūu̍ ni᷄ŋ. Sīōōŋīī bɛ̄ndūīī pīɔ̍mnde̍ ī bīī ya̍.

⁵I̍ cho̍ nyīīyāa̍ kpa᷅kpā a̍ sīōōŋīi̍ bi̍ī ya̍ ve̍. Kpɛ̍īyo̍ ō bīī ya̍ bɔ̄ɔ̍.

⁶Tē ya̍ i̍i̍ nɔ̍ bɔ̄ɔ̄la̍ŋ pɛ̍, mɛ̄ɛ̍ pīīŋndo̍ chō nu̍a̍ā yɛ̍, I̍ wa̍ chɔ̄nɔ᷄ŋ cho̍o̍ cho̍o̍ mī ya̍ i̍i̍ nya̍a̍nu᷄ŋ, le̍ mī yōōmū nūu̍ ndu̍ o̍o̍ sɔ̍la̍ pɛ̄ŋgīo̍o̍.

⁷I̍ wa̍ chɔ̄nɔ᷄ŋ cho̍o̍ cho̍o̍ mī ya̍ i̍i̍ ku̍ɛ̍ŋnu᷄ŋ pɔ̍ɔ̍li̍, mī ya̍ i̍i̍ kɔ̍ wa̍ŋnu᷄ŋ o̍ lɛ̄ŋndē po̍lte̍ŋ ni᷄ŋ.

⁸I̍ wa̍ kēlēŋā nāa̍ cha̍lāa̍ nūūwā chɔ̍chɔ̍, le̍ mī ya̍ i̍i̍ nya̍a̍nu̍ŋ hu̍e̍i̍yīī tɔ̍ɔ̍mɛ̍i̍ bɛ̄ndūe̍i̍ he̍ī, a̍ īkpōku̍ kpo᷅ku̍i̍i̍ bɛ̍ndūi̍i̍ cho̍ ya̍ he̍ī chōo̍ ve̍.

⁹O̍o̍ Māsānɔ̄ɔ̍ Mɛ̄lɛ̄ka̍, tɛ̍ɛ̍mbu̍u̍ tu̍ūlā wānāā dɛ̍nɛ̍ wɔ̍ɔ̍ŋnda̍ ha̍ā, ndu̍yɛ̍ la̍a̍si̍a̍a̍ nda̍ sūɛ̍i̍ o̍ lāsōndō. Bā o̍ bā ya̍ I̍ mu̍li̍ŋ, I̍ cho̍ chɔ̄ɔ̍ wāŋnda̍ sɔ̍ŋgɔ̄la̍ŋ mālɔ̄ɔ̍ a̍ sɛ̄ɛ̄ŋgi̍āŋnda̍ŋ chi̍o̍o̍ kpo̍u̍.

¹⁰Īpāla̍ ni̍, īchɔ̄l ni̍, ā lɔ᷅l te̍, ā chō chi̍o̍o̍ bālɔ̄ɔ̍ a̍ kpūndɛ̍la̍ŋ mālɔ̄ɔ̍, mā tūsī wa᷅ŋnda̍ nyɛ̄ pālāa̍ chōo̍,

¹¹ndu̍yɛ̍ mā tōsāl wa᷅ŋnda̍ ka̍fāla̍ŋ. Wānāa̍ ke̍ī kpu᷅ndɛ̍la̍ŋ mālɔ̄ɔ̍ wa̍, a̍ wānāā lāchōōwāa̍, ā chō bālɔ̄ɔ̍ o̍ bɛ̍ɛ̄la̍ŋ wāŋnda̍ nyɛ̄ pālāa̍ tūsīo̍o̍ chōo̍.

¹²Tē ndu̍ o̍o̍ wa̍ pɛ̍ āā ya̍a̍mɔ̍ɔ̍wa̍a̍ nīa̍a̍ nda̍ cho̍ ya̍ māmɔ̄ɔ̍ ni̍, I̍ wa̍ bīūnɔ᷄ŋ. Tē ndu̍ o̍o̍ wa̍ pɛ̍ āā wānāa̍ tu̍l la̍ yɛ̍le̍ŋ nda̍ nda̍ cho̍ ya̍ yōŋgāa̍ kīōlɔ̄ɔ̍ chōo̍ ni̍, I̍ wa̍ nda̍ vīōŋnɔ᷄ŋ.

¹³Kɛ̍ nūm sūla᷅ŋ nūu̍ kpe̍e̍kpe̍i̍, nu᷄m cho̍ ya̍ ndi̍ tōsāllo̍ ni̍, nu̍m cho̍ cha᷄ŋ nūu̍ wo̍, nūm na̍a̍ ŋ̄ nāāŋa᷅ŋ na̍āŋa᷅ŋ bɛ̄ndōo̍ wo̍,

¹⁴nūm na̍a̍ ŋ̍ chi̍ī ba̍lta̍ŋ ndo̍, nūm na̍a̍ ŋ̍ ku̍ā Mɛ̍lɛ̄ka̍ sōōlūūwo̍ dīōm pīlɛ̍ o̍ chi̍ɛ̍i̍ Mɛ̄lɛ̄ka̍a̍ ni᷄ŋ ndo̍, nu᷄m cho̍ ya̍ ndi̍ tōsāllo̍ ni̍.

¹⁵Kɛ̍ ya̍a̍mɔ̍ɔ̍wa̍a̍ nīa̍a̍ ki̍nɛ̍i̍, mbɔ̄ māā pīɔ̍mndo̍ ō kōma̍l nda̍ o̍ lēpīlɛ̍ ni᷄ŋ. Mbɔ̄ māā ā kēle̍ŋa̍ la̍kɔ̍ chi̍e̍e̍ pīɔ̍m chɔ̍ chɔ̍. Wāŋnda̍ ha̍ā yɔ̄ŋ wɔ̄ɔ̍ŋndo̍ chō ō pīāā o̍ chīɛ̄īlā ndāla̍ŋ ni᷄ŋ, ndu̍yɛ̍ mbo̍ wā ō pīāā o̍ kɔ̄ltā ndāla̍ŋ ni᷄ŋ cha̍.

¹⁶Kɛ̍ I̍ cho̍ Mɛ̄lɛ̄ka̍ Ya̍a̍wɛ̄ɛ̍ dīōmndo̍ nyūnāa̍ le̍ mbō māla̍ ya̍, ndu̍yɛ̍ ō chō ya̍ chīīndīāā.

¹⁷Īdīi̍ ni̍, īpāla̍ ni̍, īchɔ̄l ni̍, I̍ cho̍ cha᷄ŋndo̍ nāa̍ Mɛ̄lɛ̄ka̍ chūā a̍ nyɛ̄ kīndīlāa̍ cho̍ ya̍ chōo̍ wo̍, ndu̍yɛ̍ Mɛ̄lɛ̄ka̍ chō cha᷄ŋ nūu̍ tūēīyɔ̄ɔ̄.

¹⁸Wānāā bɔ̄ɔ̍ bɔ̍ɔ̍ a̍ sa̍a̍ ya̍ a̍ sɔ̍ŋgɔ̄ɔ̍, kɛ̍ Mɛ̄lɛ̄ka̍ chō yōōmū nūu̍ chīīndīāā o̍ sɔ̍ŋgɔ̄ ho̍ō ni᷄ŋ, mbō mīīŋgu̍ a̍ ya̍ kɛ̍ndi̍a̍a̍ yɛ̍lɛ̍kɛ̍lɛ̍ɛ̍.

¹⁹Mɛ̄lɛ̄ka̍ cho̍ o̍ kpe̍ŋgbe̍i̍ ndɔ̍ lēmāsāa̍ chōo̍ kāni̍ ma̍si̍ndɛ̄ wo̍, ō chō pīɛ̄īlē nīle̍ŋ tūēīyɔ̄ɔ̄ mbō yēm nda̍. Wāŋnda̍ ha̍ā ā cho̍ wa̍nāa̍ ma̍ŋga̍la̍ŋ te̍, ndu̍yɛ̍ ā nɔ̍ i̍si̍o̍o̍ŋ le̍ Mɛ̄lɛ̄ka̍ le̍.

²⁰Chāa̍ŋ ni̍ pa̍a̍ndōo̍ ō chīŋa̍la᷅ŋ cha̍a̍ŋāā ndūa̍a̍, ō tɛ̄ɛ̄mbu̍u̍ kpe̍ma̍ wa̍ nda̍ tɛ̄ɛ̄ŋ nda̍ nda̍ā wo̍.

²¹Dīōmndā kɛ̄ndɛ̄la̍ la̍a̍ fu̍lā ndu̍ o̍ sōndōla̍ŋ, mɛ̄ɛ̍ su̍kɛ̄i̍yo̍ yēēla̍ nu̍a̍ā yɛ̍, le̍nde̍ la̍a̍ ye̍e̍la̍ ni̍, kɛ̍ mɛ̄ɛ̄māā nɛ̄īyɔ᷄ŋ bɛ̍ndōo̍ wa̍ o̍ kɔ̄l ndɔ̄ɔ̍ ni᷄ŋ le̍ ya̍. Dīōmndā ndɔ̄la̍ŋ mɛ̄ɛ̍ chūɛ̄īya̍ŋ mā nīŋgīlā wa̍nā nu̍a̍ā yɛ̍, le̍nde̍ la̍ wa̍ ni̍. Kɛ̍ mi̍ dīōmndālāŋ lā hu᷄ŋ si̍mnu᷄ŋ mɛ̄ɛ̍ mūɛ̄ī fāŋīī lūɛ̍i̍yɛ̍i̍ ī wā nu̍a̍ā yɛ̍.

²²Chɔ̍m Mɛ̄lɛ̄ka̍ Ya̍a̍wɛ̄ɛ̍ bā nūm ha̍vɛ̍i̍yo̍, ō nɔ̄lā mbō māla̍ nu̍m. Mɛ̄lɛ̄ka̍ me᷅l wa̍nāa̍ cho̍ ndu̍ o̍ hɔ̄l sa̍kpō wa̍ mī ya̍a̍mɔ̍ɔ̍wa̍ yēm nda̍ le̍.

²³O̍o̍ Mɛ̄lɛ̄ka̍, I̍ si̍nā māā wānāā dīyāā ŋ̄wāŋndā chīe̍e̍ya̍ ha̍ā, a̍ wānāā lāchōōwāa̍ ha̍ā, te̍le̍ŋ nda̍ pīɔ̍mndo̍ ō cho̍ fu̍u̍lūū le̍, mā yɔ̍ŋ nda̍ chi̍e̍e̍ pīɔ̍m. Kɛ̍ ya̍ ya̍, I̍ dɔ̍ū tīīnda᷄ŋ nūu̍ o̍ nūm ni̍ŋ.