Read Southern Kisi Sa᷅m 56 Bible Online

Sa᷅m 56 - Southern Kisi bible

Sa᷅m 56

¹[53] O̍o̍ Mɛ̄lɛ̄ka̍, yi̍ya̍ŋ ya̍ chōo̍ fɔ̍, kāni̍ fo̍ndōle̍, ya̍a̍mɔ̍ɔ̍wa̍ ā sāa̍ ya̍ a̍ sɔ̍ŋgɔ̄ɔ̍. Wānāa̍ tu̍l la̍ yɛ̍le̍ŋ nda̍ ā chō ya̍ nīīlōo̍ nyɛ̄ pālāa̍ tūsīo̍o̍ chōo̍ kpɛ᷅ŋ.

²Ā chō ya̍ nīīlōo̍ chīŋa̍la᷅ŋndo̍ kpɛ᷅ŋ a̍ sɔ̍ŋgɔ̄ɔ̍. Wānāa̍ chi̍ŋa̍la᷅ŋ ya̍ a̍ sɔ̍ŋgɔ̍ɔ̍ wa̍ ā chō ā bɔ̄ɔ̍, chīŋa̍la᷅ŋndo̍ ya̍ o̍ yōŋgā bɛ̍ndōo̍ ni᷄ŋ.

³O̍o̍ Mɛ̄lɛ̄ka̍, tē sīōōŋnde̍ bīī ya̍ pɛ̍, nūm ya̍ I̍ ti̍i̍nda̍ŋ le̍ ya̍ mālāa̍ ni̍.

⁴I̍ dɔ̍ū tīīnda᷄ŋ nūu̍ o̍ Mɛ̄lɛ̄ka̍ ni᷄ŋ, le̍la̍ŋ sīōōŋīī bi̍ī ya̍ le̍. Mɛ̄ɛ̍ mī sa̍ŋga̍la̍ Mɛ̄lɛ̄ka̍, fo̍ndōle̍ le̍ būŋgāŋ o̍ chūe̍l la̍ wo̍ŋ. Ō yɛ̄ɛ̍nɛ̍ wāna̍ chi̍o̍o̍ ō nɔ̄lā yɛ̍ mbō tōsa̍l la̍?

⁵Ya̍a̍mɔ̍ɔ̍wa̍a̍ nīa̍a̍ ā nīīlū ya̍ sōndōo̍ nūūvīa̍a̍ kpɛ᷅ŋ, le̍ ya̍ nyɛ̄ pālāa̍ tūsīo̍o̍ chōo̍. Yīya᷄ŋnda̍ ndāla̍ŋ kpo̍u̍ le̍ ya̍ nyɛ̄ pālāa̍ tūsīo̍o̍ chōo̍ ko̍ni̍.

⁶Ā yīīna᷅ŋ, ma̍ kɔ̍ vi̍ŋi᷄ŋ, ma̍ wā ya̍ mɛ̄ŋgɛ̄lāa̍ le̍ yōōmū nūu̍ tɛ̄ɛ̄mbūūwo̍.

⁷Ma᷅l nda̍ mā hɛ̄lu᷄ŋ te̍ Mɛ̄lɛ̄ka̍. Dɔ̍u̍nu̍ŋ tu̍mbe̍ a̍ wāŋnda̍ ha̍ā mā yēm nda̍.

⁸Nyɛ̄ pālāā o̍ nyɛ̄ pālāa̍ cho̍ ya̍ kēēkōo̍ chōo̍, ā nɔ̄ ndu̍ o̍ bā ō pōōnyīāā kpo̍u̍. Mɛ̍mɛ̍ma̍ cho̍ ya̍ tōlɔ̄ɔ̍ ki̍nɛ̍i̍ ya̍ŋ, mā chō nu̍m o̍ bā mā pōōnyīāā mā pīlɛ̍ŋ pi̍lɛ̍ŋ kpo̍u̍, mi̍ mā wā mā kɛ̄sīāā o̍ yāu̍ nu̍m lāko̍na̍a̍ ni᷄ŋ.

⁹I̍ si̍nā māā tē I̍ nyu̍na̍ nu̍m dīōm le̍ mālāa̍ pɛ̍, ya̍a̍mɔ̍ɔ̍wa̍a̍ nīa̍a̍ ā chō mūli᷄ŋ mā nyāānu̍ŋ. Ke̍ŋ kpe̍e̍kpe̍i̍ chɔ̍m ya̍ ni̍ māā nūm Mɛ̄lɛ̄ka̍ ā chō a̍ ya̍ la̍tu̍lu̍.

¹⁰Mɛ̄ɛ̍ mī sa̍ŋga̍la̍ Mɛ̄lɛ̄ka̍ Ya̍a̍wɛ̄ɛ̄, fo̍ndōle̍ le̍ būŋgāŋ o̍ chūe̍l la̍ wo̍ŋ.

¹¹I̍ dɔ̍ū tīīnda᷄ŋ nūu̍ o̍ Mɛ̄lɛ̄ka̍ ni᷄ŋ, le̍la̍ŋ sīōōŋīī bi̍ī ya̍ le̍. Ō yɛ̄ɛ̍nɛ̍ wāna̍ chi̍o̍o̍ ō nɔ̄lā yɛ̍ mbō tōsa̍l la̍?

¹²O̍o̍ Mɛ̄lɛ̄ka̍, I̍ cho̍ būŋgɛ̄ī nīi̍ ya̍ I̍ chūe̍l nu̍mnde̍ pēēlū, mī to̍sa̍ nyɛ̄ ya̍ I̍ di̍mi̍ wo̍. I̍ cho̍ sa̍lāla̍ŋ sōlī o̍ nūmndo̍ le̍ nu̍m ba̍li̍ka̍a̍ mēllo̍.

¹³Kāni̍ fo̍ndōle̍, le̍ mɛ̄ɛ̍ ŋ̄ sōli̍ ya̍ pīɔ̍mndo̍ o̍ bā, ndu̍yɛ̍ ma̍ tōsā ya̍a̍mɔ̍ɔ̍wa̍a̍ nīa̍a̍ ā yi᷄m ya̍ le̍ yɛ̍. Nyɛ̄ ko̍ŋ to̍sa̍ ni̍ mi̍ wa᷅ hāū ba̍lɔ̄ɔ̍ nūm Mɛ̄lɛ̄ka̍ o̍ hɔ̄l, o̍ nyɛ̄ nūm wa̍wo̍ŋ cho̍ dīōndɔ̄ɔ̍ wānāa̍ cho̍ yōōmū wa̍ chōo̍ wo̍ ni᷄ŋ.