Read Southern Kisi Sa᷅m 57 Bible Online

Sa᷅m 57 - Southern Kisi bible

Sa᷅m 57

¹[54] O̍o̍ Mɛ̄lɛ̄ka̍, yāndi̍i̍ yi̍ya̍ŋ ya̍ chōo̍ fɔ̍, kāni̍ fo̍ndōle̍, o̍ nūmndo̍ ya̍ I̍ hu᷅ŋ ni̍ le̍ mā ma̍nda̍ ya̍. Tē kpūndɔ̍ɔ̍ ō kōma̍l la̍ pɛ̍, nāa̍ nūm chu̍a̍ ya̍ I̍ hu᷅ŋ ni̍ le̍ mā ma̍nda̍ ya̍, ha̍a̍a̍ mī kpūndɛ̍ kōŋ ō hīōū ya̍ chōo̍.

²I̍ cho̍ cha᷄ŋndo̍ nāa̍ Mɛ̄lɛ̄ka̍ hi̍o̍ū kpo̍u̍ wo̍, o̍ ma̍lā ya̍ o̍ bālāhāvɛ̍i̍la̍ nīla̍ŋ ni᷄ŋ, mbō tōsa̍ mī wa̍ mɛ̄ɛ̍ o̍ ye̍e̍ma̍ ya̍ mī wa̍ yɛ̍ wo̍.

³Mɛ̄lɛ̄ka̍ chō lō ɛ̄chɛ̍nɛ̄ mbō māla̍ ya̍, mbō chīīndi̍a̍a̍ yōōmū nūu̍. Wānāa̍ cho̍ ya̍ nyɛ̄ pālāa̍ tūsīo̍o̍ chōo̍ wa̍, ō chō tōsā mī si̍ɔ̍mbu̍la̍ŋ lā bīī nda̍. Mɛ̄lɛ̄ka̍ chō hīōūwɔ̄ɔ̄ lāchī a̍ ya̍ kāālāa̍ le̍ te̍le̍ŋ o̍ te̍le̍ŋ, ndu̍yɛ̍ mbō chɔ᷄m ya̍ sa̍kpōyɛ̍i̍ ndūɛ̍i̍.

⁴Ya̍a̍mɔ̍ɔ̍wa̍ ā chō ya̍ ā bālāā kpɔ̍kɔ̍su̍. Mɛ̄ɛ̍ kpɔ̍kūŋnda̍ ā wā nu̍a̍ā a̍ yīa̍a̍ŋ mā yēēma̍ le̍ vīsīŋ wāŋndā chīe̍e̍ya̍ dīo̍o̍ yɛ̍, le̍nde̍ ya̍a̍mɔ̍ɔ̍wa̍a̍ nīa̍a̍ ha̍ā ā chō ni̍. Chīŋndo̍ŋ nda̍ o̍ lāsōndō lūɛ̄īyɔ̄ɔ̍ nu̍a̍ā ŋ̄ chā āā ba̍lta̍ŋ, kɛ̄lɛ̄ŋgāā chīŋūa̍ŋ ni̍. Dīɔ̄ɔ̄mūīī ndɛ̄i̍ lūɛ̄īyɔ̄ɔ̍ nu̍a̍ā ŋ̄ chā āā mɔ̄ɔ̄ŋ fāŋndo̍ŋ ni̍.

⁵O̍o̍ Mɛ̄lɛ̄ka̍, chɔ̍m mɛ̄ɛ̍ ŋ̄ chō wāna̍ kpāāyā yɛ̍ o̍ ha̍la̍a̍ ni᷄ŋ cho̍o̍ cho̍o̍, ndu̍yɛ̍ mā chɔ̍m nāŋɔ̄ɔ̄ nu̍m bɛ̍ndōo̍ o̍ chi̍e̍ēŋndo̍ chōo̍ kpo̍u̍.

⁶Ya̍a̍mɔ̍ɔ̍wa̍a̍ nīa̍a̍ ā ye᷄ŋ ya̍ yāŋɔ̄ɔ̄le̍ŋ o̍ nɛ̄i̍ le̍ ya̍ bīyɔ̄ɔ̍. Kɔ̄l nūu̍ ō tāmbu̍ ō bɔ̄ɔ̍. Ā tūu̍ ya̍ so̍o̍ŋndo̍ o̍ nɛ̄i̍ le̍ mī de̍l lēni᷄ŋ, kɛ̍ nda̍ pi̍la̍ ā de᷄l o̍ so̍o̍ŋ ka̍lāa̍ ni᷄ŋ.

⁷O̍o̍ Mɛ̄lɛ̄ka̍, I̍ dɔ̍ū tīīnda᷄ŋ nūu̍ kpo̍u̍ o̍ nūm ni̍ŋ. Nūm ya̍ I̍ ti̍i̍nda̍ŋ ni̍. I̍ cho̍ nu̍m sāŋgālā o̍ chōndo̍ŋ ni᷄ŋ, ndu̍yɛ̍ mī lɔ̍ɔ̄ nyɛ̄ chāa̍.

⁸I̍ cho̍ tīōndɔ̄ɔ̄ ndu̍yɛ̍ mī so̍li̍ chōndo̍ŋ. I̍ cho̍ tīōndɔ̄ɔ̄ mī lɔ̍ɔ̄ tōwa̍ nūu̍, ndu̍yɛ̍ a̍ nyɛ̄ chāā lēyōō wo̍ ō pīlɔ̍ɔ̍. I̍ cho̍ tīōndɔ̄ɔ̄ lɔ̍ɔ̍ pa̍ mī pāa̍le̍ŋ lē sɛ̄.

⁹O̍o̍ Māsānɔ̄ɔ̍ Mɛ̄lɛ̄ka̍, I̍ cho̍ nu̍m ba̍li̍ka̍a̍ mēl wāŋnda̍ tɛ̄ɛ̄ŋ. I̍ cho̍ nu̍m sāŋgālā o̍ chōndo̍ŋ ni᷄ŋ lɛ᷅ŋnde̍ tɛ̄ɛ̄ŋ.

¹⁰Kāālā ŋ̄ kāāla̍ ŋ̄wāŋndā chīe̍e̍ wo̍, le̍ te̍le̍ŋ o̍ te̍le̍ŋ ō chō lēchōo̍, ndu̍yɛ̍ kāālā kōŋ chō ō bɛ̄ndū, māā chɔ̍ŋ lɛ᷅ŋ he̍l o̍ ha̍la̍. Sa̍kpōyɛ̍ī nūmnde̍ ī chō ī bɛ̄ndū, māā chɔ̍ŋ lɛ᷅ŋ kɔ̍ o̍ ha̍la̍.

¹¹O̍o̍ Mɛ̄lɛ̄ka̍, chɔ̍m mɛ̄ɛ̍ ŋ̄ chō wāna̍ kpāāyā yɛ̍ o̍ ha̍la̍a̍ ni᷄ŋ cho̍o̍ cho̍o̍, ndu̍yɛ̍ mā chɔ̍m nāŋɔ̄ɔ̄ nu̍m bɛ̍ndōo̍ o̍ chi̍e̍ēŋndo̍ chōo̍ kpo̍u̍.