Read Southern Kisi Sa᷅m 58 Bible Online

Sa᷅m 58 - Southern Kisi bible

Sa᷅m 58

¹[55] Nya̍ wānāa̍ cho̍ wāŋnda̍ chīla̍ŋnda̍, lā lāāla̍ŋ māā lā dīmī to᷅nya̍a̍? Lā kīālū pa̍ ya᷅mɛ̍i̍ tōnyɛ̍i̍ wāŋnda̍ tɛ̄ɛ̄ŋ?

²Lā cho̍ wa̍nāa̍ di̍mi̍ tōnya̍ le̍. Le̍ te̍le̍ŋ o̍ te̍le̍ŋ lā chō kɛ̄ɛ̄sīa̍a̍ o̍ kɔ̄ltā nyāla̍ŋ ni᷄ŋ mɛ̄ɛ̍ nya̍ tōsāl wa᷅ŋnda̍ kāfāla̍ŋ yɛ̍. Mi̍ lā lō o̍ ko̍ŋ mi̍ lā wā kēīyo̍ sɔ̍ŋgɔ̄la̍ŋ mālɔ̄ɔ̍ o̍ chi̍e̍ēŋndo̍ chōo̍.

³Wānā dɛ̍nɛ̍ wɔ̍ɔ̍ŋnda̍ nda̍, dīmīo̍o̍ nu̍a̍ā mā vēlu᷄ŋ o̍ chi̍e̍ēŋndo̍ chōo̍, mā kāndu̍ bɛ̍ɛ̍ sɔ̍ɔ̍ŋ wɔ̍ɔ̍ŋndo̍ŋ tōsāa̍. Dīmīo̍o̍ nu̍a̍ā mā fūla̍ o̍ dēmbēla̍ kālāa̍ ndāa̍ ni᷄ŋ, mā kāndu̍ bɛ̍ɛ̍ bi̍o̍ndɔ᷄ŋnda̍ŋ tōsāa̍, mā sīmnu᷄ŋ wa̍nāā lāchōōwā.

⁴Wānāā dɛ̍nɛ̍ wɔ̍ɔ̍ŋnda̍, mɛ̄ɛ̍ yɛ̍īmā kɛ̄ūwo̍ mā wɔ̄u̍ nu̍a̍ā yɛ̍, le̍nde̍ dīōmndā ndāla̍ŋ lā wɔ̄u̍ ni̍. Mɛ̄ɛ̍ yɛ̍lɛ̄ nīlā bāŋu̍lɛ̍i̍yo̍ ō chō nu̍a̍ā yɛ̍, le̍nde̍ nda̍ chō ni̍.

⁵Yɛ̍lɛ̄ wāā le̍nde̍, ō tu̍i̍ī wāna̍ ŋ̄kɛ̄ū wo̍ dīōm te̍, mɛ̄ɛ̍ mɛ̄ɛ̍ wāna̍ ŋ̄kɛ̄ūwo̍ ō nɔ̍ kɔ̍l kālo̍o̍, ō tu̍i̍ī ndu̍ dīōm te̍.

⁶Ya̍a̍mɔ̍ɔ̍wa̍a̍ nīa̍a̍ ā chō māchūāā mɛ̄ɛ̍ kpɔ̍kūŋāā fɔ̍ŋndu̍a̍a̍ ā chō nu̍a̍ā yɛ̍ a̍ yōlɛ̄i̍. O̍o̍ Mɛ̄lɛ̄ka̍, bɛ̄ɛ̄ŋu̍u̍ nda̍ chīŋndo̍ŋ o̍ lāsōndō. So̍o̍lu̍u̍ nda̍ chīŋndo̍ŋ o̍ lāsōndō Mɛ̄lɛ̄ka̍ Ya̍a̍wɛ̄ɛ̄,

⁷To̍sa̍ mā lo̍ mɛ̄ɛ̍ mɛ̄ŋnda̍ŋ mā hīāū nu̍a̍ā wānā chi᷅ lɛ̍ ma̍ŋ te̍ yɛ̍. To̍sa̍ mā sīmnu᷄ŋ mɛ̄ɛ̍ nda̍ nīɔ̄ū nu̍a̍ā bīllo̍ mbō vēsa̍ yɛ̍.

⁸To̍sa̍ mā lo᷄ mɛ̄ɛ̍ chɔ̄mndo̍ ō lō nu̍a̍ā mɛ̄ɛ̍ bōo̍ ndɔ̄ɔ̍ mī wānā che᷅ ni᷅ŋ yɛ̍. To̍sa̍ mī ī yɔ̄nu̍ŋ a̍ nda̍ mɛ̄ɛ̍ nda̍ vīīkūū nu̍a̍ā chɛ̄lɛ̍kpɔ̍ɔ̍ ō de᷅l nyɛ᷅ wa̍wo̍ŋndo̍ lēhɔ̄l tē yɛ̍.

⁹Lɔ̍ɔ̍ pa̍ ni᷅ŋ mā sīna̍ a̍ ndi̍ o̍kɔ̄ɔ̄, ā wā ni᷅ŋ ā tɛ̄ɛ̄mbāā, mɛ̄ɛ̍ nda̍ tɛ̄ɛ̄mbūū nu̍a̍ā bīllo̍ yɛ̍. Ā chō lō yōōmū mī nūm Mɛ̄lɛ̄ka̍ mā dɔ̄ɔ̄nu᷄ŋ tu̍mbe̍ a̍ nda̍ o̍ ka̍lā ka̍lā, mā ba̍su̍ nda̍ tɛ̍ɛ̍.

¹⁰Tē wānāa̍ cho̍ sa̍kpō Mɛ̄lɛ̄ka̍ o̍ hɔ̄l la̍ ā chē pɛ̍ mɛ̄ɛ̍ Mɛ̄lɛ̄ka̍ mīŋgūl ni̍ŋ wa̍nāā dɛ̍nɛ̍ wɔ̍ɔ̍ŋnda̍ māa̍ yɛ̍ pɛ̍, ā chō nya̍a̍le̍ dɔ̍ɔ̍nɔ᷄ŋ. Ndu̍yɛ̍ ā hūŋ ni̍ŋ mā hu᷄ŋ wa᷅ kēēkōo̍ o̍ kōo̍ma̍ wānāā dɛ̍nɛ̍ wɔ̍ɔ̍ŋnda̍ ha̍ā ni᷄ŋ.

¹¹A̍ te̍le̍ŋ ko̍ŋ, wāŋnda̍ ā chō hūnɔ̄ɔ̄ dīmī āā, “Tōnya̍ kpe̍e̍kpe̍i̍ i̍ cho̍ ni̍, wānāa̍ cho̍ sa̍kpō Mɛ̄lɛ̄ka̍ o̍ hɔ̄l la̍, fāndāa̍ Mɛ̄lɛ̄ka̍ fāndā nda̍ ni̍. Mɛ̄lɛ̄ka̍ chō a̍ tōnya̍ kpe̍e̍kpe̍i̍, o̍ ki̍lūl wa᷅ŋnda̍ o̍ chi̍e̍ēŋndo̍ ni᷄ŋ ya᷅mɛ̍i̍ yo̍.”