Read Southern Kisi Sa᷅m 59 Bible Online

Sa᷅m 59 - Southern Kisi bible

Sa᷅m 59

¹[56] O̍o̍ Mɛ̄lɛ̄ka̍ nūu̍, yāndi̍i̍ so̍li̍ ya̍ ya̍a̍mɔ̍ɔ̍wa̍a̍ nīa̍a̍ o̍ bā. Ma̍nda̍ ya̍ Mɛ̄lɛ̄ka̍, wānāa̍ chi̍ŋa̍la᷅ŋ ya̍ ha̍ā wa̍ ā ti̍ū ya̍ bā le̍.

²Ba̍ŋa̍ ya̍ wānāā dɛ̍nɛ̍ wɔ̍ɔ̍ŋnda̍ ha̍ā o̍ bā. Pi̍ŋi̍ yo̍o̍mū nūu̍ wānāā dīyāā ŋ̄wāŋndā chi̍e̍e̍ya̍ ha̍ā o̍ bā.

³Mɛ̍ɛ̍nda̍ŋ mā chē mɛ̄ɛ̍ nda̍ chō ya̍ mɛ̄ŋgɛ̄lāa̍ le̍ ya̍ dīyɔ̄ɔ̍ yɛ̍. Wānāā kɔ̄l vēsɛ̍i̍ya̍a̍ bɛ̍ndūa̍a̍ ā bīī ma̍ yīīna᷅ŋ le̍ ya̍ sīmūllo̍. Ndu̍yɛ̍ I̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍ Mɛ̄lɛ̄ka̍ Ya̍a̍wɛ̄ɛ̄, kɛ̄lɛ̄ŋgāāle̍ mī to̍sa̍ yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ.

⁴I̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍, kɛ̍ ma̍ bɛ̍ɛ̍ndīa̍ŋ le̍ ya̍ chīŋa̍la᷅ŋndo̍. Chɔ̍ŋ fɔ̍ Mɛ̄lɛ̄ka̍ mā ma̍la̍ ya̍.

⁵O̍o̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, I̍sɔ̄lūɛ̍i̍ya̍ Mɛ̄lɛ̄ka̍ ndāa̍, yāndi̍i̍ chɔ̍ŋ fɔ̍ mā tu̍si̍ lɛ̄ŋīi̍ kɛ̍ɛ̍ he̍ī nu̍m ki̍nɛ̍i̍ ye̍ nyɛ̄ pālāa̍ chōo̍. Wānāā dɛ̍nɛ̍ wɔ̍ɔ̍ŋāa̍ pi̍sī ha̍ā chāāŋāā ndāa̍ a̍ lāsōndō wa̍ ki̍nɛ̍i̍, ō pīlɛ̍ bɛ̍ɛ̍ mɛ̍ī yōōmū le̍.

⁶Tē ā kɔ᷄ ni̍i̍lū bālɔ̄ɔ̍ pɛ̍ kpɛ᷅ŋ, mɛ̄ɛ̍ tūŋnda̍ ā wā nu̍a̍ā bālɔ̄ɔ̍ a̍ būsɔ̄ɔ̍ yɛ̍, le̍nde̍ nda̍ wā mi̍i̍ŋgōo̍ īchɔ̄l ā dēŋīo̍o̍ ni̍, mā hu᷄ŋ ba̍lū o̍ bɛ̍ɛ̄la̍ŋ kpo̍u̍.

⁷Ya̍ŋ ni᷅la̍ŋ mā tūēī dīōmndā wɔ̄ɔ̍ŋnda̍ cho̍ nda̍ fūlāa̍ o̍ lāsōndōla̍ŋ, ndu̍yɛ̍ a̍ kɔ̄ŋgɔ̄līa̍ŋnda̍ nda̍ chō la̍ŋ. Dīōmnda̍ fu̍lā nda̍ o̍ lāsōndōla̍ŋ, lūɛ̄īyɔ̄ɔ̍ nu̍a̍ā ŋ̄ chā āā mūɛ̄ī fāŋnde̍ ni̍. Kɛ̍ a̍ ko̍ŋ kpo̍u̍ ma̍ wā yīya᷄ŋndo̍ māā wānā o̍ wānā cho̍ tu̍e̍i̍yɔ̄ɔ̍ nyɛ̄ nda̍ chō dīmīo̍o̍ wo̍ le̍.

⁸Kɛ̍ nūm Mɛ̄lɛ̄ka̍ Ya̍a̍wɛ̄ɛ̄, māmɔ̄ɔ̍ ko̍ni̍ ŋ̄ mām nda̍ ni̍. Lɛ̄ŋīi̍ kɛ̍ɛ̍ he̍ī nu̍m ki̍nɛ̍i̍ ye̍, nyɛ̄ fo̍ndō fu̍u̍ ŋ̄ chē ndi̍ ni̍.

⁹O̍o̍ Mɛ̄lɛ̄ka̍, nu᷄m cho̍ kpāāya̍ nūu̍ ni̍. I̍ cho̍ nu̍m sāŋgālā o̍ chōndo̍ŋ ni᷄ŋ. Nu᷄m cho̍ wāna̍ ma̍ndā ya̍ wo̍ ni̍ Mɛ̄lɛ̄ka̍.

¹⁰Mɛ̄lɛ̄ka̍ nūu̍ ō kāāla̍ ya̍ bɔ̄ɔ̍, ō chō ya̍ sɔ̄ɔ̄ŋgūū īkɛ̄i̍ mbō māla̍ ya̍. Ō chō tōsā mī che᷅ a̍ hɔ̄ltē nīle̍ŋ pɛ̍ɛ̍ŋ, mɛ̄ɛ̍ o̍ ya᷅m ni̍ŋ ya̍a̍mɔ̍ɔ̍wa̍a̍ nīa̍a̍ yɛ̍.

¹¹Kɛ̍ yāndi̍i̍ Mɛ̄lɛ̄ka̍, di̍ī wāŋnda̍ ha̍ā le̍, yɔ̄ŋi̍ wānāā nīa̍a̍ ā pūɛ̄ɛ̄nu̍ŋ nyɛ̍ yɔ̍nu̍ŋ ndo̍. O̍o̍ Māsānɔ̄ɔ̍ Mɛ̄lɛ̄ka̍, Mɛ̄lɛ̄ka̍ ma̍ndā na̍a̍ wo̍, sɛ̍ŋi̍ wa᷅ŋnda̍ ha̍ā a̍ kpāāyā nu̍mndo̍ ndu̍yɛ̍ mā yēm nda̍.

¹²Wāŋnda̍ ha̍ā dīōmnda̍ fu̍lā nda̍ o̍ lāsōndōla̍ŋ ki̍nɛ̍i̍, dīōmndā yɔ̄ŋ wɔ̄ɔ̍ŋnda̍ŋ kpo̍sōŋ la̍ cho̍ ni̍. To̍sa̍ mā hāu̍ o̍ yōŋga̍ nda̍ pi̍la̍ chō kīōlɔ̄ɔ̍ wo̍, mɛ̄ɛ̍ vīsīo̍o̍ ō hāū nu̍a̍ā o̍ yāŋɔ̄ɔ̄le̍ŋ yɛ̍. Le̍ dīōmndā wɔ̄ɔ̍ŋnda̍ cho̍ nda̍ fūlāa̍ o̍ lāsōndōla̍ŋ, ndu̍yɛ̍ a̍ chōōlā nda̍ chō dīmīo̍o̍ la̍ŋ,

¹³dɔ̍u̍nu̍ŋ tu̍mbe̍ a̍ nda̍ ndu̍yɛ̍ mā tɛ̍ɛ̍mbu̍u̍ nda̍. Tɛ̍ɛ̍mbu̍u̍ nda̍ kpo̍u̍, ō pīlɛ̍ bɛ̍ɛ̍ mɛ̍ī yōōmū le̍. O̍ ko̍ŋ, mī wānā o̍ wānā si̍na̍ māā nūm Mɛ̄lɛ̄ka̍, nu᷄m cho̍ māsāa̍ lɛ̄ŋndē I̍sɔ̄lūɛ̍i̍le̍ŋ chōo̍ ni̍, ndu̍yɛ̍ ma̍ wā vɛ̄lɛ̄ māsāa̍ chi̍e̍ēŋndo̍ ho̍ō kpo̍u̍ cho̍o̍.

¹⁴Tē ā kɔ᷄ ni̍i̍lū bālɔ̄ɔ̍ pɛ̍ kpɛ᷅ŋ, mɛ̄ɛ̍ tūŋnda̍ ā wā nu̍a̍ā bālɔ̄ɔ̍ a̍ būsɔ̄ɔ̍ yɛ̍, le̍nde̍ nda̍ wā mi̍i̍ŋgōo̍ īchɔ̄l a̍ dēŋīo̍o̍ ni̍, mā hu᷄ŋ ba̍lū o̍ bɛ̍ɛ̄la̍ŋ kpo̍u̍.

¹⁵Mɛ̄ɛ̍ tūŋnda̍ ā wā nu̍a̍ā bālɔ̄ɔ̍ o̍ bɛ̍ɛ̄la̍ŋ le̍ nyɛ̄ dīa̍a̍ yɛ̍, le̍nde̍ nda̍ wā ba̍lɔ̄ɔ̍ ni̍. Ndu̍yɛ̍ tē ā sɔ̄la̍ nyɛ᷅ dīāā lētūu̍ le̍, mā kōŋu̍l kpe̍le̍ŋ.

¹⁶Kɛ̍ I̍ cho̍ chōnde̍i̍ sōlī a̍ kpāāyā nu̍mndo̍ o̍kɔ̄ɔ̄ Mɛ̄lɛ̄ka̍. Īdīi̍ o̍ īdīi̍ I̍ cho̍ wā chōnde̍i̍ sōlīo̍o̍ a̍ kāālā nu̍m ŋ̄ nɔ̄ le̍ ya̍ le̍ te̍le̍ŋ o̍ te̍le̍ŋ ndo̍, kāni̍ fo̍ndōle̍, nu᷄m cho̍ wāna̍ ma̍ndā ya̍ wo̍ ni̍ Mɛ̄lɛ̄ka̍. Tē dɛ̍nɛ̍ pa̍lāa̍ ō kōma̍l la̍ pɛ̍, nāa̍ nūm chu̍a̍ ya̍ I̍ hu᷅ŋ ni̍ le̍ mā ma̍nda̍ ya̍.

¹⁷O̍o̍ Mɛ̄lɛ̄ka̍, nu᷄m cho̍ kpāāya̍ nūu̍ ni̍. I̍ cho̍ nu̍m sāŋgālā o̍ chōndo̍ŋ ni᷄ŋ. Nu᷄m cho̍ wāna̍ ma̍ndā ya̍ wo̍ ni̍ Mɛ̄lɛ̄ka̍. Kāālā ŋ̄ kāāla̍ ya̍ wo̍ ō chō ō bɔ̄ɔ̍.