Read Southern Kisi Sa᷅m 6 Bible Online

Sa᷅m 6 - Southern Kisi bible

Sa᷅m 6

¹[4] O̍o̍ Mɛ̄lɛ̄ka̍ Ya̍a̍wɛ̄ɛ̄, tē ō wa̍ pɛ̍ mā dɔ̄ɔ̄nu᷄ŋ tu̍mbe̍ a̍ ya̍, tu̍sī ya̍ nyɛ̄ pālāa̍ chōo̍ mɛ̄ɛ̍ ŋ̄ tāmbū kɔ̍l lɛ̍ le̍. Ha̍ndū ya̍ nyɛ̄ kīndīlāa̍ chōo̍ mɛ̄ɛ̍ ŋ̄ tūūlū kɔ̍l lɛ̍ le̍.

²I̍ cho̍ ni᷅ŋ bɔ̄ɔ̍ o̍ yɔ̍kpāā a̍ nyɛ̄ nɛ̄īyāa̍, le̍la̍ŋ tūīīnu̍ŋ ya̍ īnyīɛ̍ɛ̍ Mɛ̄lɛ̄ka̍ Ya̍a̍wɛ̄ɛ̄. I̍ sa̍ŋga̍ ni᷅ŋ bɔ̄ɔ̍ Mɛ̄lɛ̄ka̍ Ya̍a̍wɛ̄ɛ̄, si̍ŋgi̍ ya̍ fɔ̍.

³Mɔ̍nɛ̍i̍ chō bɔ̄ɔ̍ o̍ yōōmū nūu̍ ni᷄ŋ. Lɔ̍ɔ̍ kūɛ̍ɛ̍nɛ̍ ŋ̄ chō yɛ̍ ya̍ mālā kɛ̍i̍, Mɛ̄lɛ̄ka̍ Ya̍a̍wɛ̄ɛ̄?

⁴Mɛ̄lɛ̄ka̍ Ya̍a̍wɛ̄ɛ̄, hu̍ŋ fɔ̍, hu̍ŋ mā hu̍ŋ ba̍ŋā ya̍. Wāna̍ īnyīɛ̍ɛ̍ yo̍ ŋ̄ chō ni̍, so̍li̍ ya̍ o̍ pīɔ̍mndo̍ ho̍ō ni᷄ŋ fɔ̍.

⁵Tē wāŋndo̍ vī ni᷅ŋ pɛ̍, ō lo̍o̍nūŋ ndɛ̍ pa̍ a̍ nyɛ̄ ŋ̄ tōsa̍l ndu̍ wo̍? Tē ō kūɛ̄ ni᷅ŋ chīe̍e̍ pīɔ̍m pɛ̍, ō sa̍ŋgālā lɛ̍ pa̍ nu̍m?

⁶I̍ cho̍ ni᷅ŋ ō yɔ̄kpɛ̍i̍ a̍ cha᷄ŋndo̍. Pi̍i̍ pi̍i̍ I̍ lɔ̍ɔ̍lū cha̍ŋndo̍, kpēle̍ ya̍ I̍ hi̍nī cho̍o̍ wo̍ ni̍, a̍ pi̍lēi̍ ya̍ I̍ ya̍mbū bɔ̍lle̍ŋ ndo̍, lā chūū ni᷅ŋ līwā a̍ mɛ̍mi̍a̍ŋ.

⁷Chɔ̄ kālāa̍ bɛ̍ɛ̍ I̍ si̍o̍ū lɛ̍ lāpi̍ le̍, a̍ cha᷄ŋndo̍. Hɔ̄lta̍ŋ lā yɔ̄nu̍ŋ ya̍ ni᷅ŋ dɔ̍fɔ̍ŋ dɔ̍fɔ̍ŋ a̍ cha᷄ŋndo̍, a̍ nyɛ̄ kīndīlāā ya̍a̍mɔ̍ɔ̍wa̍ cho̍ ya̍ hāndɔ̄ɔ̍ chōo̍ wo̍.

⁸Nya̍ wānāā yɔ̄ŋndā wɔ̄ɔ̍ŋnda̍ ki̍nɛ̍i̍, lā fāŋa̍ŋ ya̍ kɔ̄ɔ̄lī, Mɛ̄lɛ̄ka̍ Ya̍a̍wɛ̄ɛ̄ o̍ tu̍e̍ī cha᷄ŋ nūu̍.

⁹Mɛ̄lɛ̄ka̍ Ya̍a̍wɛ̄ɛ̄ tu̍e̍ī kōŋu̍l nūu̍. Ō chō pīɛ̄īlē nīle̍ŋ mūlī.

¹⁰Si̍ɔ̍mbu̍la̍ŋ lā chō ya̍a̍mɔ̍ɔ̍wa̍a̍ nīa̍a̍ kpe̍nde̍ bi̍yɔ̄ɔ̄, sīōōŋīī bɛ̄ndūe̍i̍ chō nda̍ bīyɔ̄ɔ̄, mā yo᷄m a̍ si̍ɔ̍mbu̍la̍ŋ o̍ lēpīlɛ̍ ni᷄ŋ kpe̍.