Read Southern Kisi Sa᷅m 60 Bible Online

Sa᷅m 60 - Southern Kisi bible

Sa᷅m 60

¹[57] O̍o̍ Mɛ̄lɛ̄ka̍, a̍ kɛ̍ɛ̍ na̍a̍ ndu̍yɛ̍ ma̍ pīāl sāāsā ka̍lā ka̍lā ndu̍ o̍o̍ ma̍ndā na̍a̍ wo̍. Ma̍ lō o̍ ko̍ŋ ma̍ dūāūnu᷄ŋ tu̍mbe̍ a̍ na̍a̍, kɛ̍ yāndi̍i̍ to̍sa̍ mī ŋ̄ mīīŋgu̍ mɛ̄ɛ̍ na̍a̍ ŋ̄ wa̍ yɛ̍.

²Ma̍ tōsā mi̍ lɛ̄ŋnde̍ŋ lē hīīlu᷄ŋ, ndu̍yɛ̍ mi̍ lē kūmbi᷄ŋ. Kɛ̍ yāndi̍i̍ to̍sa̍ mī lē mīīŋgu̍ mɔ̄ɔ̄sā mɛ̄ɛ̍ le̍ wa̍ yɛ̍, kāni̍ fo̍ndōle̍ lē chō hīīlɔ᷄ŋndo̍ bɔ̄ɔ̍.

³A̍ to̍sa̍ mi̍ na̍a̍ wānāā nūmnda̍ ŋ̄ sāŋgā sāŋgāa̍ pīla̍. A̍ to̍sa̍ mi̍ ŋ̄ yɔ̄nu᷄ŋ mɛ̄ɛ̍ wāŋndo̍ ō kōl nu̍a̍ā mūɛ̄īmā mākīle̍pīi̍ya̍ŋ mī mā bīī ndu̍ bīyɔ̄ɔ̄ bɛ̄ndōo̍ yɛ̍.

⁴Wānāa̍ nɔ̍ bɛ̄ɛ̄le̍ŋ le̍ nūm nda̍, ma̍ lō o̍ ko̍ŋ ma̍ hēēlūl nda̍ bēēndi̍ɛ̍īyo̍ māā tāāmāsi̍, le̍ mā nyāānu̍ŋ yɔ̄ŋi̍ ya̍a̍mɔ̍ɔ̍wa̍ ā tɛ̄ɛ̄mbu̍u̍ nda̍.

⁵Mu̍li̍ na̍a̍ dīōm ndu̍yɛ̍, mā to̍sa̍ a̍ kpāāyā nu̍m bɛ̄ndōo̍ mī ŋ̄ yēm. Ko̍ŋ to̍sā ni̍ mī na̍a̍ wānāā nūmnda̍, na̍a̍ ŋ̄ kāāla̍ ha̍ā wa̍ mī ŋ̄ chīnda̍.

⁶Mɛ̄lɛ̄ka̍ lo̍ ɛ̄chɛ̍nɛ̄, mbo̍ sūāā, mbo̍ dīmī āā, “A̍ kpāāya̍ ya̍ I̍ nɔ̍ le̍ ya̍a̍mɔ̍ɔ̍wa̍ yōmɔ̄ɔ̍ wo̍, I̍ cho̍ Si̍ɛ̍kɛ̄m chi̍e̍e̍ pi̍ɔ̍ū a̍ būŋga᷄ŋ, ndu̍yɛ̍ mī pi̍ɔ̍u̍ wānāā nīa̍a̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ Su̍kɔ̍tī.

⁷Ya̍ nɔ̍ Ki̍li̍a̍a̍dī ni̍, ndu̍yɛ̍ a̍ Mānāa̍sē. E̍fi̍lūēm ndu̍ cho̍ māchūāā māā mɔ̍si̍l ni̍ chɔ̄ū, ndu̍yɛ̍ mi̍ Chu̍dā ndu̍ wa᷅ māā tīnda̍ ni̍ lēmāsā.

⁸Mo̍wa̍bī cho̍ hɛ̄ŋgɛ̍i̍ nī pu̍la᷄ŋndo̍ ni̍. I̍dɔ̄m ndu̍ cho̍ māchūāā nāa̍ ya̍ I̍ kɛ̍sī kɔ̍vɛ̄i̍la̍ nīla̍ŋ nda̍, le̍ chɔ̄mndo̍ māā ya̍ nɔ̍ ndu̍ ni̍. I̍ cho̍ dēŋī chōo̍ cho̍o̍, fo̍ndōle̍, le̍ mɛ̄ɛ̍ ya̍ I̍ ye᷅m lɛ̄ŋndē Fīli̍i̍tīāŋnde̍ŋ yɛ̍.”

⁹O̍o̍ Mɛ̄lɛ̄ka̍, ō nɛ̄ɛ̍nɛ̍ cho̍ yɛ̍ lākɔ̄ a̍ ya̍ o̍ chi̍e̍e̍ cho̍ ho̍ō ō bɛ̍ɛ̍ndīāā ō kālā ka̍lā le̍ yɔ̄ŋi̍ ya̍a̍mɔ̍ɔ̍wa̍ ā bīī ndu̍ wo̍? Ō nɛ̄ɛ̍nɛ̍ cho̍ yɛ̍ lākɔ̄ a̍ ya̍ I̍dɔ̄m?

¹⁰Mɛ̄ɛ̍ kīɔ̍ɔ̍ ŋ̄ chīi̍ ni᷅ŋ na̍a̍ nu̍a̍ā ni̍ Mɛ̄lɛ̄ka̍? A̍ cho̍ lɛ̍ lāsīsi̍ so̍vɛ̄i̍ya̍a̍ nāa̍ lāchī le̍ nda̍ kɔ̄la̍ŋ chɔ̄ūwo̍ mālāa̍ le̍?

¹¹O̍o̍ Mɛ̄lɛ̄ka̍, ma̍la̍ na̍a̍ mī ŋ̄ yēm ya̍a̍mɔ̍ɔ̍wa̍a̍ nāa̍, kāni̍ fo̍ndōle̍, mālā wāna̍ chi̍o̍o̍ ō cho̍ nyɛ᷅ o̍ nyɛ̄ le̍.

¹²Ha̍a̍a̍ mi̍ Mɛ̄lɛ̄ka̍ ō wā na̍a̍ kɔ̄ɔ̄lī, ō chō na̍a̍ kpāāyāa̍ kē mī ŋ̄ yēm. Ndu̍ pi̍la̍ cho̍ ya̍a̍mɔ̍ɔ̍wa̍a̍ nāa̍ yōmɔ̄ɔ̄.