Read Southern Kisi Sa᷅m 62 Bible Online

Sa᷅m 62 - Southern Kisi bible

Sa᷅m 62

¹[59] Mɛ̄lɛ̄ka̍ ndu̍ pīlɛ̍ kpe̍ to̍sā ni̍ mī nyi̍nā nūu̍ ō sɔ̄la̍ pɛ̄ŋgīo̍o̍, ndu̍ cho̍ wāna̍ pi̍ŋī yo̍o̍mū nūu̍ wo̍ ni̍.

²Ndu̍ pīlɛ̍ kpe̍ cho̍ pōū kpo̍o̍wa̍ bɛ̍ndū ma̍ndā ya̍ wo̍ ni̍, ndu̍yɛ̍ ndu̍ cho̍ wāna̍ pi̍ŋī yo̍o̍mū nūu̍ wo̍ ni̍. Ndu̍ cho̍ sāāsā ka̍lā ka̍la̍ ma̍ndā ya̍ wo̍ ni̍, nyɛ̄ o̍ nyɛ̄ cho̍ mbō hīīlu̍u̍ ya̍ le̍.

³I̍ cho̍ ni᷅ŋ māchūāā mɛ̄ɛ̍ kpākīo̍o̍ ō wā nu̍a̍ā hīīlɔ᷄ŋndo̍ le̍ kōmbāa̍ yɛ̍, kɛ̄lɛ̄ŋgāā mɛ̄ɛ̍ sāāsāa̍ ō hūŋ nu̍a̍ā le̍ dēlɔ̄ɔ̍ yɛ̍. Vɛ̄ɛ̍nɛ̍ kpɛ̍ nya̍ chō yɛ̍ hīōūwɔ̄ɔ̄ lāchī, nya̍ kpo̍u̍ le̍ wānā wa̍ā le̍nde̍ chi᷅ŋa̍la᷅ŋndo̍ le̍ ndu̍ nyɛ̄ pālāa̍ tūsīo̍o̍ chōo̍?

⁴Lā yēēma̍ māyēēmāā tu̍ŋ mī lā tūsi̍ ya̍ tōōlō, mī bɛ̍ɛ̍le̍ ya̍ I̍ nɔ̍ le̍ŋ lē fāŋa̍ŋ ya̍ chōo̍. Chōōla̍ŋ la̍ŋ la̍ cho̍ wa̍li̍ nya̍ nya̍ kāāla̍ kāālā bɛ̄ndōo̍ wo̍ ni̍. Mī lā dūāū ya̍ sa̍lā a̍ lāsōndō, kɛ̍ o̍ kɔ̄ltā nyāla̍ŋ ni᷄ŋ mī lā yēēmā māā sēndi̍ Mɛ̄lɛ̄ka̍a̍ wa̍ ya̍ chōo̍.

⁵Mɛ̄lɛ̄ka̍ ndu̍ pīlɛ̍ kpe̍ ya̍ I̍ ti̍i̍nda̍ŋ ni̍, o̍ ndu̍ ni̍ŋ ya̍ I̍ dɔ̍ū tīīnda᷄ŋ nūu̍ ni̍.

⁶Ndu̍ pīlɛ̍ kpe̍ cho̍ pōū kpo̍o̍wa̍ bɛ̍ndū ma̍ndā ya̍ wo̍ ni̍, ndu̍yɛ̍ ndu̍ cho̍ wāna̍ pi̍ŋī yo̍o̍mū nūu̍ wo̍ ni̍. Ndu̍ cho̍ sāāsā ka̍lā ka̍la̍ ma̍ndā ya̍ wo̍ ni̍, nyɛ̄ o̍ nyɛ̄ cho̍ mbō hīīlu̍u̍ ya̍ le̍.

⁷Mɛ̄lɛ̄ka̍ cho̍ wāna̍ chi̍i̍ndīāā ya̍ wo̍ ni̍, ndu̍ to̍sa̍ ni̍ mī sɔ̍la̍ bɛ̄ɛ̄le̍ŋ, ndu̍yɛ̍ ndu̍ cho̍ pōū kpo̍o̍wa̍ ya̍ I̍ vi̍a̍ŋnūŋ le̍bɛ̍ŋgu̍ wo̍ ni̍. Ndu̍ cho̍ wāna̍ ma̍ndā ya̍ wo̍ ni̍.

⁸Wāŋnda̍, lā dɔ̄u̍ ti̍i̍nda᷄ŋ nyāa̍ o̍ Mɛ̄lɛ̄ka̍ ni᷄ŋ le̍ te̍le̍ŋ o̍ te̍le̍ŋ. Lā chɔ᷄m ndu̍ bālā nyāla̍ ha̍vɛ̍i̍la̍ŋ kpo̍u̍, kāni̍ fo̍ndōle̍ ndu̍ cho̍ wāna̍ ma̍ndā na̍a̍ wo̍ ni̍.

⁹Wāŋndā chīe̍e̍ya̍ kpo̍u̍ ā chō māchūāā mɛ̄ɛ̍ hūēīyīī fo̍ndūe̍i̍ ī chō nu̍a̍ā yɛ̍. Wānā bɛ̍ndū ni̍, wānā pɔ̍mbɔ̄ ni̍, kpo̍u̍ nyɛ̄ fo̍ndō fu̍u̍ nda̍ chō ni̍. Tē ō wa̍ nyɛ̄ wānā ha̍ndu̍ nda̍ o̍ sēke̍lēi̍ cho̍o̍ pɛ̍ le̍ lūsu̍l ndāa̍ sīnāa̍, lūsu̍l ndāa̍ cho᷄ nyɛ᷅ o̍ nyɛ̄ le̍. Mɛ̄ɛ̍ hūēīye̍ ī chō nu̍a̍ā ī lūsu̍l te̍ yɛ̍, le̍nde̍ nda̍ chō ni̍.

¹⁰Wānā o̍ wānā du̍a̍ū kɔ̄l nūmndo̍ o̍ dēlɔ̄ɔ̄ chōo̍ wo̍ le̍ wāŋnda̍ nyɔ̄ɔ̍ŋ pōōndīa̍a̍ o̍ lābā le̍. Du̍a̍ū kɔ̄l nūmndo̍ o̍ wāŋnda̍ ka̍fāla̍ŋ tōsāllo̍ ni᷄ŋ le̍ nyɔ̄ɔ̍ŋ sɔ̄lāa̍ le̍. Ā yɔ᷄ŋ bɛ̍ɛ̍ mā hīōū lāchī a̍ sūllo̍ sɔ̄lāa̍, ti̍i̍nda᷄ŋ su᷅l nūm ko̍ŋ te̍.

¹¹Māsānɔ̄ɔ̍ Mɛ̄lɛ̄ka̍ dīmi̍ ndi̍ mi̍ tu̍ɛ̍ī, ō hīōū bɛ̍ɛ̍ le̍pi᷅lɛ̍, māā ndu̍ pīlɛ̍ kpe̍ kpāāyāa̍ chō o̍ bā ni̍,

¹²ndu̍yɛ̍ māā kāālā o̍ nɔ̍ le̍ ŋ̄wāŋndā chīe̍e̍ wo̍ ō chō le̍ te̍le̍ŋ o̍ te̍le̍ŋ, kāni̍ fo̍ndōle̍, wānā o̍ wānā mɛ̄ɛ̍ kūɛ̍ɛ̍la̍ ndɔ̄la̍ŋ lā wā yɛ̍, le̍nde̍ o̍ pa̍a̍wā ndu̍ ni̍.