Read Southern Kisi Sa᷅m 64 Bible Online

Sa᷅m 64 - Southern Kisi bible

Sa᷅m 64

¹[61] O̍o̍ Mɛ̄lɛ̄ka̍, ya̍ŋ ni᷅la̍ŋ mā tūēī ŋɔ̄ɔ̄chīa̍ŋ ya̍ I̍ cho̍ o̍ nūmndo̍ wo̍. Ma̍nda̍ ya̍, ya̍a̍mɔ̍ɔ̍wa̍a̍ cho̍ ha̍ā kɔ̄ŋgɔ̄līa̍ŋnda̍ŋ nda̍ ā ti̍ū ya̍ bā le̍.

²Vi̍o̍ŋ ya̍ Mɛ̄lɛ̄ka̍, yɔ̄ŋi̍ nda̍ tīu̍ ya̍ bā a̍ de̍fe̍ sɔ̍ɔ̍ sɔ̍ɔ̍ nda̍ yīi̍ ya̍ wo̍, yɔ̄ŋi̍ ku̍ndā wānāā dɛ̍nɛ̍ wɔ̍ɔ̍ŋāa̍ nɔ̍ ha̍ā tūūlā wɔ̄ɔ̍ŋnda̍ŋ a̍ ya̍ o̍kɔ̄ɔ̄ wa̍ ā nɔ̄la̍ ya̍.

³Wānāā dɛ̍nɛ̍ wɔ̍ɔ̍ŋnda̍ ha̍ā mɛ̄ɛ̍ mɔ̄ɔ̄ŋ fāŋndo̍ŋ ŋ̄ lūɛ̄ī nu̍a̍ā yɛ̍, le̍nde̍ nda̍ bɛ̄ɛ̄ndi̍a̍a̍ dīɔ̄ɔ̄mūīī ndɛ̄i̍ ni̍. Ndu̍yɛ̍ dīōmndā wɔ̄ɔ̍ŋndā nda̍ dīmūl wa᷅ŋnda̍ la̍ŋ, kōmāllo̍ nda̍ mɛ̄ɛ̍ nda̍ wā nu̍a̍ā wāŋndo̍ vīī vīīyo̍ a̍ chīŋu̍a̍ŋ yɛ̍.

⁴Tē ā bīī pɛ̍, ā kɔ᷄ vi̍ŋi᷄ŋ kpi̍ŋ kpi̍ŋ le̍ wānāa̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍ wa̍ vīīyo̍ a̍ chīŋɔ̍ma̍ ndāa̍ŋ. O̍ lēpīlɛ̍ ni᷄ŋ kpe̍ wāŋnda̍ ha̍ā ā ve᷅ kɔ᷅l te̍, mā vɛ̄ nda̍ a̍ chīŋɔ̍ma̍ ndāa̍ŋ. Ndu̍yɛ̍ īsīōōŋ bɛ̍ɛ̍ i̍ ve᷅ nda̍ le̍ nyɛ̄ o̍ nyɛ̄ le̍.

⁵Le̍ te̍le̍ŋ o̍ te̍le̍ŋ ā chō ā bɛ̄ɛ̄ndīa̍ŋnda̍ le̍ wāŋnda̍ dɛ̍nɛ̍ wɔ̍ɔ̍ŋndo̍ tōsāllo̍. Cha᷄lle̍ mā kɛ̄ɛ̄si̍a̍a̍ nda̍ pi̍la̍ tɛ̄ɛ̄ŋ, mɛ̄ɛ̍ nda̍ yēŋ wa᷅ŋnda̍ yāŋɔ̄ɔ̄la̍ŋ yɛ̍. O̍ ko̍ŋ kɔ̍ɔ̍lī, mā dīmī āā, “Wānā o̍ wānā nɔ̍lā mbō chē na̍a̍ le̍.”

⁶Tē ā cha᷄l pɛ̍ mā tūu̍ sɔ̄ɔ̍ŋ wɔ̍ɔ̍ŋndo̍ŋ a̍ wāŋnda̍ o̍kɔ̄ɔ̄, ā dīmi̍ āā, “Ŋ̄ chāa̍ bɔ̄ɔ̍ tu̍ūwo̍ ho̍ō, wānā o̍ wānā nɔ̍lā mbō sīna̍ a̍ ndi̍ o̍kɔ̄ɔ̄ le̍.”

⁷Kɛ̍ Mɛ̄lɛ̄ka̍ chō wānāā dɛ̍nɛ̍ wɔ̍ɔ̍ŋnda̍ ha̍ā vīī vīī a̍ chīŋɔ̍ma̍ ndūa̍ŋ. Ō lēpīlɛ̍ ni᷄ŋ kpe̍, ō chō nda̍ yɔ̄ŋūl a̍ chīŋɔ̍ma̍ ndūa̍ŋ.

⁸Mɛ̄lɛ̄ka̍ chō nda̍ hūnɔ̄ɔ̄ tɛ̄ɛ̄mbūū le̍ a̍ dīōmnda̍ cho̍ nda̍ fūlāa̍ o̍ sōndō la̍ŋ. Wānā o̍ wānā cho̍ nda̍ hūnɔ̄ɔ̄ chɔ̄ mbō hīīlu̍u̍ bōlle̍ŋ le̍ nda̍ māmɔ̄ɔ̍.

⁹Wāŋnda̍ kpo̍u̍, sīōōŋīī bɛ̄ndūe̍i̍ ī chō nda̍ bīyɔ̄ɔ̄. Ā chō hūnɔ̄ɔ̄ īchāli̍ mā yīya̍ŋ nyɛ᷅ Mɛ̄lɛ̄ka̍ tōsa̍ wo̍, mā dīmu̍l wāŋnda̍ a̍ wa̍lta̍ ndɔ̄la̍ŋ o̍kɔ̄ɔ̄.

¹⁰Wānāa̍ cho̍ sa̍kpō Mɛ̄lɛ̄ka̍ o̍ hɔ̄l la̍, ā chō hūnɔ̄ɔ̄ nya̍a̍le̍ dɔ̍ɔ̍nɔ᷄ŋ, fo̍ndōle̍, le̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ wo̍. Ndu̍yɛ̍, ā hūŋ ni̍ŋ nāa̍ ndu̍ chu̍a̍ le̍ mbō mānda̍ nda̍. Wānāa̍ cho̍ sa̍kpō Mɛ̄lɛ̄ka̍ o̍ hɔ̄l la̍ ā chō hūnɔ̄ɔ̄ Mɛ̄lɛ̄ka̍ sāŋgālā.