Read Southern Kisi Sa᷅m 65 Bible Online

Sa᷅m 65 - Southern Kisi bible

Sa᷅m 65

¹[62] O̍o̍ Mɛ̄lɛ̄ka̍, a̍ bɛ̍nda̍ mā sɔ̍la̍ sāŋgāa̍ Sa̍a̍yɔ̄ŋ chi̍e̍e̍, ndu̍yɛ̍ būŋgāŋ na̍a̍ ŋ̄ chu̍e̍l nu̍m mi̍ ŋ̄ mēna᷄ŋ ndo̍ŋ, mī ŋ̄ pēēlu̍ mu̍ŋ.

²Nu᷄m cho̍ wāna̍ mu̍lī pi̍ɛ̍īle̍ŋ ndo̍ ni̍. Wāŋnda̍ o̍ chi̍e̍ēŋndo̍ ni᷄ŋ kpo̍u̍, ā chō hūnɔ̄ɔ̄ nāa̍ nūm chu̍a̍ mā hu᷄ŋ pi̍ɛ̍ī nu̍m,

³lē mā ma̍l nda̍ le̍ yɔ̄ŋndā ndāla̍ wɔ̍ɔ̍ŋnda̍ŋ. Mī ŋ̄ tōsa̍ yɔ̄ŋndā wɔ̄ɔ̍ŋnda̍ŋ mī lā hīōū na̍a̍ māyōōmū, kɛ̍ mā ma̍l na̍a̍ le̍ la̍ŋ.

⁴Wānāā ŋ̄ hɛ̄lī, ndu̍yɛ̍ mā hīŋ a̍ nda̍ le̍ mā hu᷄ŋ wa᷅ o̍ fo̍ndā nu̍m kāsīo̍o̍ wa̍, ā pɛ̄l tɔ̄nɔ̄ɔ̍. Ŋ̄ hīnī ni̍ŋ bɔ̍ɔ̍ kɔ̍l a̍ nyɛ̄m kɛ̄ndɛ̄ŋ na̍a̍ ŋ̄ sɔ̄lā ni̍ŋ o̍ chīɛ̄ī nūmndo̍ ni᷄ŋ ndo̍ŋ, ndu̍ yɔ̍nūŋ ni̍ māā chīɛ̄ī nu̍m kāsīo̍o̍.

⁵Tē ŋ̄ nyūna̍ nu̍m dīōm pɛ̍ le̍ na̍a̍ chīīndīa̍a̍, a̍ mu̍li̍ na̍a̍ dīōm a̍ sɔ̄ɔ̍ŋ kɔ̄ndɔ̄fi̍li̍ŋ bɛ̄ndo᷄ŋ tōsāa̍, a̍ chi̍i̍ndi̍a̍a̍ na̍a̍. Nu᷄m cho̍ wāna̍ pi̍ŋī na̍a̍ wo̍ ni̍. Wāŋnda̍ o̍ chi̍e̍ēŋndo̍ ni᷄ŋ kpo̍u̍, nūm nda̍ tīīnda̍ŋ ni̍, a̍ cho̍ bɛ̍ɛ̍ pɔ̍ɔ̍li̍ o̍ fo̍ndāŋndā lēvīlta̍ŋ o̍ pēe̍ mɛ̄ŋmā īhɛ᷄llo̍ lēkɔ̍ɔ̍lī wa̍.

⁶Nu᷄m to̍o̍si̍a̍a̍ lūāŋūŋ bɛ̄ndo᷄ŋ a̍ kpāāyā nu̍m bɛ̄ndōo̍ ni̍. Ma̍ lō o̍ ko̍ŋ, ma̍ chɔ̄m kpāāyā nu̍m bɛ̄ndōo̍.

⁷Pēe̍ mɛ̄ŋmā īhɛ᷄l wa̍ īyōkpa᷄ŋ yo̍kpa᷄ŋ bɛ̍ndōo̍, ndu̍yɛ̍ mbo̍ wā bɔ̄ɔ̄lūū bɛ̄ndōo̍ wo̍, ma̍ tōsā mbo̍ sīm yi̍. Bɔ̄ɔ̄lūū bɛ̄ndu̍ wa̍ o̍ lɛ̄ŋnde̍ ni᷄ŋ ndo̍, ma̍ tōsā mi̍ nyɛ̄ o̍ nyɛ̄ mēī do̍ŋ.

⁸Wāŋnda̍ o̍ chi̍e̍ēŋndo̍ ni᷄ŋ kpo̍u̍, kɔ̄ndɔ̄fi̍llo̍ bīī nda̍, a̍ wa̍lta̍ nu̍mndā kɔ̄ndɔ̄fi̍ltā bɛ̄ndūla̍ŋ. Wāŋnda̍ o̍ chi̍e̍ēŋndo̍ ni᷄ŋ kpo̍u̍, chɔ̍ŋ ba᷅ pāa̍le̍ŋ lē chāŋndo̍ mbo̍ kūā bā pāa̍le̍ŋ lē dēllo̍, ā chō bɔ̄ɔ̄lūū kɔ̄l kɛ̄ndɔ̄ɔ̍ tōsāa̍ kpe̍e̍kpe̍i̍, fo̍ndōle̍, le̍ nyɛ̄ ŋ̄ tōsa̍ wo̍.

⁹Nu᷄m cho̍ wāna̍ ma̍ndā chi̍e̍ēŋndo̍ ho̍ō mā yɔ̄ŋ pi̍ɔ̍ɔ̍ le̍ lɛ̄ŋnde̍ŋ pɔ̄ɔ̄līa̍a̍ wo̍ ni̍. Mā to̍sa̍ mī fo̍ndāŋnda̍ŋ lā sīmnu᷄ŋ fo̍ndāŋndā kɛ̄ndɛ̄ kɛ̍ndɛ̄lā tɔ̄lɔ̄ɔ̄la̍ŋ lā nāŋ nda̍ŋ. O̍o̍ Mɛ̄lɛ̄ka̍, pēē nu̍m bɛ̄ndōo̍ ō ve̍lā le̍, ndu̍ to̍sā ni̍ mī tɔ̄lɔ̄ɔ̄la̍ŋ lā na᷄ŋ o̍ chīɔ̍ɔ̍ŋ ni᷄ŋ, kāni̍ fo̍ndōle̍, le̍nde̍ ŋ̄ bɛ̍ɛ̍ndi̍a̍a̍ ndu̍ ni̍.

¹⁰Mā lo̍ o̍ ko̍ŋ mā yɔ̍ŋ pīɔ̍ɔ̍ o̍ chīɔ̄ɔ̄ŋ nda̍ wāa̍ wo̍ŋ ni᷄ŋ, ndu̍yɛ̍ mā pɔ̍ɔ̍li̍a̍a̍ mu̍ŋ nyɛ̄ kɛ̄ndɛ̄ kɛ̍ndɛ̄, mā to̍sa̍ mī tɔ̄lɔ̄ɔ̄la̍ŋ lā na᷄ŋ o̍ chīɔ̄ɔ̄ŋ mu᷅ŋ ni᷄ŋ ta̍u̍ ta̍u̍.

¹¹Le̍ mɛ̄ɛ̍ ŋ̄ chō wānā kɛ̍ndɛ̄ bɛ̄ndū yɛ̍, mā lo̍ o̍ ko̍ŋ mā ke̍ na̍a̍ nyɛ̄ dīa̍a̍ ta̍u̍ ta̍u̍ o̍ chīɔ̄ɔ̄ŋ nāa̍ŋ ni᷄ŋ. Mā to̍sa̍ mī ŋ̄ sɔ̄la̍ nyɛ̄ dīa̍a̍ ta̍u̍ ta̍u̍, ndu̍yɛ̍ bā o̍ bā ŋ̄ kēi̍ pɛ̍, nyɛ̄ dīa̍a̍ ō wā o̍ ku̍a̍ŋna᷄ŋ.

¹²Mā to̍sa̍ mī lɛ̄ŋndē po̍lte̍ŋ lē sīmnu᷄ŋ fo̍ndāŋ bīl pūīyāā kɛ̄ndɛ̄ kɛ̍ndɛ̄, nāa̍ chɔ̄lūa̍a̍ ā kūā di̍o̍la̍ŋ nda̍. Mā to̍sa̍ mī pēmbo᷄ŋ ŋ̄ yɔ̄nu̍ŋ mɛ̄ɛ̍ wāŋnda̍ ā wā nu̍a̍ā a̍ kɔ̄l kɛ̄ndɛ̄ bɛ̄ndōo̍ mā wa̍ nya̍a̍lo̍o̍ yɛ̍.

¹³Fo̍ndāŋndā chɔ̄lūa̍a̍ ā kūā di̍o̍la̍ŋ nda̍ŋ, mī lā pɛ̄ cha̍ cha̍ a̍ chɔ̄lūa̍a̍. Dɛ̍ŋgbɛ̍la̍ŋ o̍ pēmbo᷄ŋ tɛ̄ɛ̄ŋ mī wi̍tīi̍yo̍ŋ ŋ̄ wa᷄ kōōmbīa̍a̍ lēni᷄ŋ a̍ nāŋɔ̄ɔ̍. Mɛ̄ɛ̍ wāŋnda̍ ā wā nu̍a̍ā a̍ kɔ̄l kɛ̄ndɛ̄ bɛ̄ndōo̍, mā wa᷄ bɔ̄ɔ̄lūūwo̍, mā sōlī cho̍ndu̍ŋ kɔ̄l kɛ̄ndɛ̄ŋ bɛ̄ndo᷄ŋ yɛ̍, le̍nde̍ fo̍ndāŋnda̍ŋ nda᷅ŋ lā wā ni̍.