Read Southern Kisi Sa᷅m 66 Bible Online

Sa᷅m 66 - Southern Kisi bible

Sa᷅m 66

¹[63] Nya̍ wāŋnda̍ o̍ chi̍e̍ēŋndo̍ ni᷄ŋ kpo̍u̍, lā tōsa̍ bɔ̍ɔ̍lūū kɔ̄l kɛ̄ndɛ̄ bɛ̄ndōo̍ le̍ Mɛ̄lɛ̄ka̍ sāŋgālāa̍.

²Lā sōli̍ cho̍ndo̍ŋ a̍ mɛ̄ɛ̍ dīōlā ndɔ̄la̍ŋ lā chō dīōlā lēbɛ̄ɛ̄ lā bɛ̄ndū yɛ̍ o̍kɔ̄ɔ̄. Lā sāŋga̍la̍ ndu̍ mī lā hēēlu̍ dīōlā ndɔ̄la̍ te̍mā.

³Lā dīmu̍l Mɛ̍lɛ̄ka̍ āā, “Mɛ̄lɛ̄ka̍, wa̍lta̍ nu̍mnda̍ŋ lā chō wa̍lta̍ kɔ̄ndɔ̄fi̍ltā bɛ̄ndū. Kpāāyā nu̍mndo̍ ō chō ō bɔ̄ɔ̍ Mɛ̄lɛ̄ka̍, ō tōsa̍ mi̍ ya̍a̍mɔ̍ɔ̍wa̍a̍ nu̍mnda̍ ā hūŋ a̍ nyīīyāa̍, mā hu᷄ŋ tu̍ndu̍ŋ nu̍m o̍ lābɛ̄ŋgu̍ ni̍ŋ a̍ sīōōŋnde̍.

⁴Wāŋnda̍ o̍ chi̍e̍ēŋndo̍ ni᷄ŋ kpo̍u̍ ā chō nu̍m sōōlūū. Ā chō nu̍m sāŋgālā o̍ chōndo̍ŋ ni᷄ŋ. Ā chō dīōlā nūmnda̍ŋ sāŋgālā o̍ chōndo̍ŋ ni᷄ŋ.”

⁵Lā hu᷄ŋ to̍fā wa̍lta̍ kɔ̄ndɔ̄fi̍ltā Mɛ̄lɛ̄ka̍ tōsa̍ la̍ŋ. Wa̍lta̍ o̍ to̍sā wa᷅ŋndā chīe̍e̍ya̍ tɛ̄ɛ̄ŋ nda̍ŋ lā chō wa̍lta̍ kɔ̄ndɔ̄fi̍ltā bɛ̄ndū.

⁶Mbo̍ tōsā mi̍ pēe̍ mɛ̄ŋmā īhɛ᷄llo̍ ō vēlā, mi̍ wānāā ndūa̍a̍ ā kēēkū o̍ lɛ̄ŋndē vēsɛ̍i̍le̍ŋ chōo̍ a̍ ŋ̄pēlū o̍ pēē ko̍ŋ tɛ̄ɛ̄ŋ ma̍ tāŋ. Mi̍ ŋ̄ dūāūnu᷄ŋ nya̍a̍le̍ o̍ fo̍ndāŋ kōŋ, fo̍ndōle̍, le̍ nyɛ̄ o̍ to̍sa̍l na̍a̍ wo̍.

⁷Ndu̍ cho̍ māsāa̍ a̍ kpāāya̍ ndɔ̄ bɛ̍ndōo̍ le̍ fɛ̍ɛ̍ŋ a̍ fɛ̍ɛ̍ŋ ni̍. Ndu̍yɛ̍ hɔ̄ltē ndɔ̄le̍ŋ lē chō lɛ̄ŋnde̍ kɔ̄ɔ̄lī, mbo̍ wā ndi̍ mɛ̄ɛ̄nda᷄ŋndo̍. Le̍la̍ŋ wānāa̍ si̍mu̍l ndu̍ wa̍, ā yi̍ya᷄ŋ nu̍a̍ā māā kpāāya̍ ndāa̍ ō chō nyɛ̄ o̍ nyɛ̄ le̍.

⁸Nya̍ wāŋnda̍ o̍ lɛ̄ŋnde̍ ni᷄ŋ, lā sāŋga̍la̍ Mɛ̄lɛ̄ka̍ nāa̍. Lā sāŋga̍la̍ ndu̍ chōo̍ cho̍o̍ mī wāŋnda̍ tūēī.

⁹Ndu̍ ma̍nda̍ yo̍o̍mūlā nāāla̍ŋ ni̍ mi̍ ŋ̄ wā hāū yo̍o̍mū, ndu̍yɛ̍ mbo̍ tōsā ya̍a̍mɔ̍ɔ̍wa̍a̍ nāa̍ ā nɔ̄la̍ na̍a̍ yōmɔ̄ɔ̄ le̍.

¹⁰Mɛ̄lɛ̄ka̍, le̍ mā si̍na̍ mɛ̄ɛ̍ kpɛ̍ na̍a̍ ŋ̄ dɔ̄ū tīīnda᷄ŋndo̍ o̍ nūm ni̍ŋ yɛ̍, ma̍ lō o̍ ko̍ŋ ma̍ kē na̍a̍ tōfāa̍. Mɛ̄ɛ̍ nda̍ wōū nu̍a̍ā ka̍ni̍i̍ hu̍mbūe̍i̍ o̍ yīŋ le̍ ndi̍ dīndīo̍o̍, mā sīna̍ tē ī chō pɛ̍ ka̍ni̍i̍ kɛ̍ndɛ̄ pɛ̍ yɛ̍, le̍nde̍ ŋ̄ ke᷄ na̍a̍ tōfāa̍ ni̍.

¹¹Ma̍ lō o̍ ko̍ŋ ma̍ bīī na̍a̍ o̍ yāŋɔ̄ɔ̄lē ŋ̄ ye᷄ŋ na̍a̍ le̍ŋ, ndu̍yɛ̍ ma̍ hāndū na̍a̍ nyɛ̄ kīndīlāā bɛ̄ndōo̍ chōo̍.

¹²Ma̍ tōsā mi̍ ya̍a̍mɔ̍ɔ̍wa̍a̍ nāa̍ ā yām na̍a̍, ndu̍yɛ̍ ma̍ fūlī na̍a̍ yu̍ku̍lu̍. Mi̍ ŋ̄ kēēkū o̍ yīŋnde̍ŋ ni᷄ŋ, ndu̍yɛ̍ a̍ o̍ mɛ̄ŋmā hūna᷄ŋ ni᷄ŋ mi̍ ŋ̄ fūlā. Kɛ̍ ma̍ hūŋ ni᷅ŋ a̍ na̍a̍ o̍ fo̍ndāŋ nyɛ̄ o̍ nyɛ̄ yɔ̍nūŋ na̍a̍ le̍ wo̍.

¹³I̍ cho̍ hūnɔ̄ɔ̄ sa̍lālā lūāmāāla̍ŋ sōlī o̍ nūmndo̍ chi̍ɛ̍ī ni̍ŋ, mī pe̍e̍lu̍ būŋgɛ̄ī ya̍ I̍ chūe̍l nu̍mnde̍.

¹⁴Bōōndi̍i̍ ya̍ I̍ wa̍ o̍ nyɛ̄ pālāa̍ ni᷄ŋ nde̍, būŋgɛ̄ī ya̍ I̍ chūe̍l nu̍mnde̍, I̍ cho̍ hūnɔ̄ɔ̄ būŋgɛ̄ī kēŋ pēēlū.

¹⁵I̍ cho̍ sa̍lālā lūāmāāla̍ŋ sōlī o̍ nūmndo̍ a̍ chɔ̄lūāā chēlu̍lɛ̍i̍ya̍a̍ kɛ̍ndɛ̄ kɛ̍ndīa̍a̍. I̍ cho̍ sa̍lālā lūāmāāla̍ŋ sōlī a̍ sāā ko̍ndu̍a̍a̍, a̍ nāūwāā tōōyīa̍a̍, ndu̍yɛ̍ a̍ chūīŋnda̍, mī kūmi̍i̍ ndɛ̄i̍ ī kōma̍l nu̍m o̍ ha̍la̍a̍ ni᷄ŋ cho̍o̍ cho̍o̍.

¹⁶Nya̍ wānā o̍ wāna̍ nɔ̍ bɛ̄ɛ̄le̍ŋ le̍ Mɛ̄lɛ̄ka̍, lā hu᷄ŋ mī lā hu᷄ŋ ya᷅ŋ nīla̍ŋ, mī chɔ̍m nya̍ nyɛ̄ o̍ to̍sa̍l la̍ wo̍.

¹⁷Mi̍ ko̍ŋūl nāa̍ Mɛ̄lɛ̄ka̍ chūā le̍ mbō māla̍ ya̍, ndu̍yɛ̍ mi̍ sa̍ŋgālā ndu̍ o̍ pīɛ̄īle̍ŋ ni᷄ŋ.

¹⁸Tē ya̍ i̍i̍ kɛ̍ɛ̍ le̍ yɔ̄ŋ nī wɔ̍ɔ̍ŋndo̍ chɔ̄ɔ̄mūūwo̍ pɛ̍, Māsānɔ̄ɔ̍ Mɛ̄lɛ̄ka̍ ō ve᷄ ya̍ lānī yāŋɔ̄ɔ̄ le̍.

¹⁹Kɛ̍ mɛ̄ɛ̍ ya̍ I̍ pi̍ɛ̍i̍ ndu̍, mbo̍ yāŋ ya̍ nīla̍ŋ, mbo̍ tūɛ̄ī pīɛ̄īlē nīle̍ŋ.

²⁰Sāŋgālāa̍ chō le̍ Mɛ̄lɛ̄ka̍, fo̍ndōle̍, le̍ mɛ̄ɛ̍ o̍ tu̍e̍ī pīɛ̄īlē nīle̍ŋ yɛ̍, le̍ mɛ̄ɛ̍ o̍ hi̍o̍ū lāchī a̍ ya̍ kāālā ndɔ̄ɔ̍ chɔ̄mndo̍ le̍ le̍ te̍le̍ŋ o̍ te̍le̍ŋ yɛ̍.