Read Southern Kisi Sa᷅m 68 Bible Online

Sa᷅m 68 - Southern Kisi bible

Sa᷅m 68

¹[65] O̍o̍ Mɛ̄lɛ̄ka̍, chɔ̍ŋ mī ya̍a̍mɔ̍ɔ̍wa̍a̍ nu̍mnda̍ ā sɛ̄ŋi̍ŋ. Chɔ̍ŋ mī wānāa̍ tu̍l nu̍m lēyɛ̄ wa̍ ā nyāānu̍ŋ pɔ̍ɔ̍ nu̍m lāchī.

²Nyi̍ndu̍ nda̍ mā kūɛ̄ a̍ nda̍ mɛ̄ɛ̍ hūēīye̍ ī kūānūŋ nu̍a̍ā a̍ ku᷄mnde̍ yɛ̍. To̍sa̍ mā wa᷄ ā tɛ̄ɛ̄mbāā nu̍m lāchī. To̍sa̍ mī ī yɔ̄nu̍ŋ a̍ nda̍ mɛ̄ɛ̍ nda̍ māl nu̍a̍ā wāa̍ mālīɔ̍ɔ̍ o̍ yīŋ mbō tēŋga̍ yɛ̍.

³Kɛ̍ wānāa̍ cho̍ nu̍m o̍ hɔ̄l sa̍kpō wa̍ ki̍nɛ̍i̍, mbɔ̄ māā ā wa᷄ a̍ kɔ̄l kɛ̄ndɛ̄, mā dɔ̄ɔ̄nu᷄ŋ nya̍a̍le̍ nu᷅m Mɛ̍lɛ̄ka̍ lāchī. Mbɔ̄ māā ā dɔ̄ɔ̄nu̍ŋ nya̍a̍le̍ mā dēŋi̍ chōo̍ cho̍o̍ a̍ kɔ̄l kɛ̄ndɔ̄ɔ̍ fɔ̍.

⁴Lā sōli̍ cho̍ndo̍ŋ nāa̍ Mɛ̄lɛ̄ka̍ chūā. Lā sāŋga̍la̍ ndu̍ o̍ chōndo̍ŋ ni᷄ŋ Lā bɛ̍ɛ̍ndi̍a̍a̍ nɛ̍īyo̍ wāna̍ cho̍ hūnɔ̄ɔ̍ o̍ ha̍la̍ hūmbōo̍ chōo̍ wo̍ lāchī. Wānā ko̍ŋ dīōlā ndɔ̄la̍ŋ āā Mɛ̄lɛ̄ka̍ Ya̍a̍wɛ̄ɛ̄. Lā dɔ̄ɔ̄nu̍ŋ nya̍a̍le̍ ndu̍ lāchī.

⁵Mɛ̄lɛ̄ka̍, o̍ cho̍ o̍ fo̍ndā ndɔ̄ kāsīo̍o̍ wo̍, ndu̍ cho̍ fi̍nyāa̍ le̍ wānāa̍ nɔ̍ ŋ̍fi̍nyā le̍ wa̍ ni̍. Ndu̍yɛ̍ ndu̍ cho̍ wāna̍ su̍ŋgū le̍ vīi̍ya̍a̍ nɔ̍ lɛ̍ ŋ̄pīāāndū le̍ wa̍ ni̍.

⁶Wānāa̍ nɔ̍ wa᷅na̍ o̍ wānā le̍ wa̍, mbō ke᷄ nda̍ fo̍ndāŋndā chālāāla̍ŋ, wānāa̍ cho̍ o̍ bīyɔ̄ɔ̍ ni᷄ŋ nda̍, mbō sōli̍ nda̍ o̍ bīyɔ̄ɔ̍ ni᷄ŋ, ndu̍yɛ̍ mbō tōsa̍ mā wa᷄ o̍ dɛ̍nɛ̍ kɛ̍ndɛ̄ bɛ̄ndōo̍ ni᷄ŋ. Kɛ̍ wānāa̍ si̍mu̍l ndu̍ wa̍ nda̍, mā wa᷄ o̍ lɛ̄ŋndē po̍lte̍ŋ ni᷄ŋ.

⁷O̍o̍ Mɛ̄lɛ̄ka̍, bōōndi̍i̍ ŋ̄ sōli̍ wānāā nūmnda̍ I̍chi̍pī, ma̍ wā kēēkōo̍ a̍ nda̍ o̍ lɛ̄ŋndē po̍lte̍ŋ ni᷄ŋ nde̍,

⁸nūm Mɛ̄lɛ̄ka̍ so̍ō o̍ Pēmbīī Sa̍a̍nāīve̍ chōo̍ wo̍, Mɛ̄lɛ̄ka̍ I̍sɔ̄lūɛ̍i̍ya̍, mɛ̄ɛ̍ ŋ̄ wa᷄ kɔ̄la̍ŋ, mi̍ lɛ̄ŋnde̍ŋ lē nyīīyā nu̍m lāchī, ndu̍yɛ̍, mi̍ mɛ̄ŋma̍ cho̍ o̍ ha̍la̍a̍ ni᷄ŋ nda̍ŋ mā hūlu᷄ŋ o̍ chi̍e̍ēŋndo̍ chōo̍.

⁹Ma̍ tōsā mi̍ pīɔ̍ɔ̍ sīā ta̍u̍ ta̍u̍, le̍ mā mi̍ŋgi̍ lɛ̄ŋndē ŋ̄ chu̍e̍l wānāā nūmnda̍ būŋgɛ̄i̍ le̍ŋ bɛ̄ɛ̄ndīāā, lɛ̄ŋndē le̍e̍ ye̍e̍mā ni᷅ŋ pīɔ̍ɔ̍ yēēmā bɛ̄ndōo̍ le̍ŋ.

¹⁰O̍ ko̍ŋ kɔ̍ɔ̍lī, mi̍ wānāā nūmnda̍ ā kɔ᷄ cha᷅l o̍ lɛ̄ŋndē lēŋ ni᷄ŋ, ndu̍yɛ̍ mɛ̄ɛ̍ ŋ̄ chō wāna̍ īkɛ̄ndɛ̄ bɛ̄ndū yɛ̍, ma̍ kē wānāā tāmbɛ̍i̍ya̍ nyɛ̄m nda̍ a̍a̍ ha̍u̍ ba̍ wo̍ŋ.

¹¹Mɛ̄ɛ̍ Māsānɔ̄ɔ̍ Mɛ̄lɛ̄ka̍ yōnda̍ māā ō yēm chɔ̄ūwo̍, wāŋ lāāndūāā bɔ̄ɔ̍ bɔ̍ɔ̍, ā kūɛ̄ a̍ wāŋnda̍ yōōŋgū kōŋ dīmūllo̍ āā,

¹²“Māsāā bɛ̍ndūa̍a̍, a̍ so̍vɛ̄i̍ya̍a̍ ndāa̍ lātūlu̍ ā chō nyāānɔ᷄ŋndo̍. Ā chō nyāānɔ᷄ŋndo̍ kpe̍e̍kpe̍i̍.” Wāŋ lāāndūāā I̍sɔ̄lūɛ̍i̍ya̍ ā chō nyɛ̄m I̍sɔ̄lūɛ̍i̍ya̍ ā pūŋga̍ o̍ chɔ̄ūwo̍ wo̍ŋ pīɔ̄ūvi̍āŋndo̍ kpe̍e̍kpe̍i̍,

¹³nyɛ̄m nda̍ tūūli̍a̍a̍ māā lāpīīŋ ma̍ kūmbū mu̍ŋ a̍ ka̍ni̍i̍ hu̍mbūe̍i̍, ndu̍yɛ̍ mi̍ ŋ̄ nɔ̄ kūmba᷅ŋnda̍ŋ lā bɛ̄ɛ̄ndīāā a̍ ko̍o̍līi̍ye̍ wo̍ŋ. Vɛ᷅ mi̍ nya̍ ā pūm nda̍ lā lōlnu᷄ŋ kɔ̍ɔ̍lī sāa̍ nyāa̍ īkɛ̄i̍, o̍ fo̍ndāŋndā nyāla̍ ma̍ndāā lāsāāla̍ŋ lā kūe̍ o̍ chɔ̄ūwo̍ le̍?

¹⁴Mɛ̄ɛ̍ Mɛ̄lɛ̄ka̍ nɔ̍ kpāāyāa̍ kpo̍u̍ wo̍ ō tōsa̍ mi̍ māsāā bɛ̍ndūa̍a̍ chu̍u̍ŋgi̍āŋ o̍ Pēmbīī Sa̍li̍mɔ̄ŋnde̍ chōo̍ wa̍ ā sɛ̄ŋi᷄ŋ, mbo̍ tōsā mi̍ lōōŋ kpu̍ŋgba᷄ŋ ŋ̄ dēlī o̍ Pēmbīī Sa̍li̍mɔ̄ŋnde̍ chōo̍.

¹⁵Pēmbēi̍ Ba̍sīāŋ i̍ cho̍ pēmbīī tɔ̍ɔ̍mɛ̍i̍ bɛ̄ndū. Pēmbīi̍ nɔ̍ du̍ku̍lta̍ŋ nde̍ i̍ cho̍ ni̍.

¹⁶Kɛ̍ nūm pēmbīī lādu̍ku̍i̍i̍ bɛ̍ndūe̍i̍ he̍ī, vɛ᷅ ma̍ wā pēmbīī Mɛ̄lɛ̄ka̍ Ya̍a̍wɛ̄ɛ̄ o̍ hɛ̍li̍ le̍ mī fo̍ndā ndɔ̄ cha̍lāa̍ o̍ wa̍ lēcho̍ō ve̍ tōfāa̍ a̍ nɛ̄īyɔ᷄ŋndo̍, nāa̍ o̍ cho̍ wā le̍ fɛ̍ɛ̍ŋ a̍ fɛ̍ɛ̍ŋ nda̍?

¹⁷Nūm Māsānɔ̄ɔ̍ Mɛ̄lɛ̄ka̍ a̍ fu̍la̍ o̍ Pēmbīī Sa̍a̍nāīve̍ chōo̍, a̍ nyɛ̄lā kpāāyāla̍ nyāāna᷄ŋnda̍ su̍a̍a̍ ā nāŋnda̍ŋ wāa̍la̍ŋ o̍ wāa̍la̍ŋ ni᷄ŋ nu̍m lā bālāā, mbo̍ hūŋ o̍ fo̍ndā ndɔ̍ kāsīo̍o̍.

¹⁸Mɛ̄ɛ̍ ŋ̄ wa᷄ hēlɔ̄ɔ̍ o̍ pēmbīī nūm vi̍lɛ̍i̍ye̍ chōo̍, ma̍ hēl a̍ wānāā ŋ̄ bīī o̍ chɔ̄ūwo̍ wa̍ o̍ bā ta̍u̍ ta̍u̍. Ndu̍yɛ̍ ma̍ sɔ̄lā wāŋnda̍ chīe̍e̍ya̍ nyɔ̄ɔ̍ŋ o̍ bā. Wānāa̍ si̍mu̍l nu̍m nda̍ bɛ̍ɛ̍ ma̍ sɔ̄lā nda̍ nyɔ̄ɔ̍ŋ o̍ bā. Ndu̍yɛ̍ nūm Mɛ̄lɛ̄ka̍ Ya̍a̍wɛ̄ɛ̄, ā wā ni̍ŋ i̍cha̍li̍ lo̍ŋ nda̍ tɛ̄ɛ̄ŋ.

¹⁹Sāŋgālāa̍ chō le̍ Māsānɔ̄ɔ̍ Mɛ̄lɛ̄ka̍, o̍ ma̍lā na̍a̍ o̍ bāhāvɛ̍i̍la̍ nāāla̍ŋ ni᷄ŋ lēpāa̍ o̍ lēpāa̍ wo̍. Mɛ̄lɛ̄ka̍ cho̍ wāna̍ nāā pi̍ŋīa̍a̍ ni̍.

²⁰Mɛ̄lɛ̄ka̍ nāa̍, Mɛ̄lɛ̄ka̍ pi̍ŋī ŋ̍wa̍ŋndā chīe̍e̍ wo̍ o̍ cho̍ ni̍. Mɛ̄lɛ̄ka̍ Ya̍a̍wɛ̄ɛ̄, Māsānɔ̄ɔ̍ Mɛ̄lɛ̄ka̍ nāa̍, ndu̍ ba̍ŋa̍ na̍a̍ pīɔ̍mndo̍ o̍ bā ni̍.

²¹Mɛ̄lɛ̄ka̍ chō ya̍a̍mɔ̍ɔ̍wa̍a̍ ndūa̍a̍ bōlle̍ pēsī. Ya̍a̍mɔ̍ɔ̍wa̍a̍ ndūa̍a̍ ka̍a̍la̍ ha̍ā yɔ̄ŋ wɔ̄ɔ̍ŋndo̍ wa̍, ō chō kpōkpōlā ndāla̍ŋ pēsī.

²²Māsānɔ̄ɔ̍ Mɛ̄lɛ̄ka̍ dīmī āā, “I̍ cho̍ ya̍a̍mɔ̍ɔ̍wa̍a̍ nyāa̍ sōlī o̍ būŋgɛ̄ī Ba̍sīāŋnde̍ ni᷄ŋ mi̍ mi̍ŋgi̍ nda̍. I̍ cho̍ nda̍ sōlī o̍ lūmūŋ yīŋgi̍lɛ̍i̍ ŋ̍ bɛ̍ndūŋ mu᷅ŋ mī mi̍ŋgi̍ nda̍.

²³Lā hūŋ ni̍ŋ mī lā wa᷄ kēēkōo̍ o̍ kōo̍ma̍ ndāa̍ŋ ni᷄ŋ, ndu̍yɛ̍ tūŋāā nyāa̍ bɛ̍ɛ̍ mā hu᷄ŋ de̍e̍mbūū kōo̍ma̍ ndāa̍ŋ.”

²⁴Mɛ̄lɛ̄ka̍, yōmɔ̄ɔ̄ ŋ̄ yēm ya̍a̍mɔ̍ɔ̍wa̍a̍ nu̍mnda̍ ma̍ wā kɔ̄lā lēku̍u̍ba̍la̍ la̍ŋ ndo̍, wāŋnda̍ kpo̍u̍ ā chē nu̍m kɔ̄la̍ŋ. Mɛ̄lɛ̄ka̍ nūu̍, māsa̍ nī bɛ̍ndōo̍, ā chō lūɛ̄īyɔ̄ɔ̍ o̍ fo̍ndā nu̍m kāsīo̍o̍.

²⁵Wānāā ŋ̄chōndu̍a̍a̍ ā chō īsīsi̍ la̍chi̍, mi̍ chūāā lāāndūa̍a̍ ā sīm nda̍ kɔ̄ɔ̄lī mā kūā a̍ dūndūla̍ pɔ̍mbɔ̄la̍ŋ lɔ̄ɔ̍, mi̍ wānāā nyɛ̄ chāa̍ nda̍ sīm nda̍ kɔ̄ɔ̄lī.

²⁶Lā sāŋga̍la̍ Mɛ̍lɛ̄ka̍ wānāa̍ chu̍u̍ŋgi̍āŋnda̍ tɛ̍ɛ̄ŋ. Nya̍ wānāa̍ fu̍la̍ o̍ pūlāle̍ Che̍kɔ̍pū le̍ŋ chōo̍ wa̍, lā sāŋga̍la̍ Ma̍sānɔ̄ɔ̍ Mɛ̄lɛ̄ka̍.

²⁷Yu̍ŋgu̍ Bɛ̍ŋnja̍mīŋ ndo̍, o̍ cho̍ yu̍ŋgu̍ pɔ̍mbɔ̄ɔ̍ yu̍ŋgu̍la̍ŋ I̍sɔ̄lūɛ̄ī tɛ̍ɛ̄ŋ ndo̍, ndu̍ si̍m yu̍ŋgu̍la̍ŋ lā pīlɛ̍ la̍ŋ lāchī ni̍. Ndu̍yɛ̍, mi̍ wānāā bɛ̄ndūa̍a̍ o̍ yu̍ŋgu̍ Chu̍dā wo̍ chōo̍ ku̍ndā ndāa̍ ndu̍ si᷅m nda̍ kɔ̄ɔ̄lī. Mi̍ wānāā bɛ̄ndūa̍a̍ o̍ yu̍ŋgu̍ Sɛ̍bu̍lɔ̄ŋ ndo̍ chōo̍, a̍ o̍ yu̍ŋgu̍ Nāfi̍ta̍lī yo̍ chōo̍ nda̍ sīm wāŋ bɛ̄ndūa̍a̍ o̍ yu̍ŋgu̍ Chu̍dā wo̍ chōo̍ kɔ̍ɔ̍lī.

²⁸O̍o̍ Mɛ̄lɛ̄ka̍, chɔ̍m ŋ̍wa̍ŋndā chīe̍e̍ mɛ̄ɛ̍ ŋ̄ chō wāna̍ kpāāyā bɛ̍ndū yɛ̍. Chɔ̍m na̍a̍ vɛ̄lɛ̄ mɛ̄ɛ̍ ŋ̄ chō wāna̍ dīāllūŋ kālā bɛ̄ndū yɛ̍, mɛ̄ɛ̍ ŋ̄ chɔ᷄m pāāndū yɛ̍.

²⁹To̍sa̍ mī māsāā bɛ̍ndūa̍a̍ o̍ chi̍e̍ēŋndo̍ ni᷄ŋ, ā hīŋ a̍ nyɔ̄ɔ̍ŋ o̍ chīɛ̍i̍ nūmndo̍ ni᷄ŋ Chūlu̍sɛ̄lɛ̄m.

³⁰Tu̍si̍ vi̍sī bɛ̄ndu̍ cho̍ ko̍ŋ o̍ fo̍ndāŋ māmɛ̄ŋndo̍ wo̍ nyɛ̄ pālāā bɛ̄ndōo̍ chōo̍. Tu̍si̍ lɛ᷅ŋndē lēŋ nyɛ̄ pālāa̍ chōo̍, lɛ̄ŋnde̍ cho̍ le̍ŋ mi̍ wānāa̍ cho̍ le̍ŋ chīla̍ŋ nda̍ ā wā māā chīi̍ya̍a̍ bɛ̍ndū le̍ŋ. To̍sa̍ mā hīŋ a̍ wūūwo̍ lɛ̄ŋ, le̍ hūnɔ̄ɔ̍ a̍ ka̍ni̍ŋ hu̍mbo᷄ŋ māā kē nāa̍ nūm chu̍a̍. To̍sa̍ mī lɛ̄ŋīi̍ ka̍a̍la̍ he̍ī chɔ̄ūla̍ŋ mālɔ̄ɔ̍ ve̍ ī sɛ̄ŋi̍ŋ.

³¹To̍sa̍ mī wāŋnda̍ I̍chi̍pī a̍ hi᷅ŋ a̍ nyɛ̄m cho̍ ŋ̄ tōōsīāā a̍ chīli̍ŋu̍ŋ būlɔ̍ŋsīi̍yo̍ŋ ndo̍ŋ o̍ nūmndo̍. To̍sa̍ mī wāŋnda̍ Īto̍o̍pīāā a̍ hi᷅ŋ a̍ nyɔ̄ɔ̍ŋ o̍ nūmndo̍ a̍ kīlta̍ŋ.

³²Nya̍ māsɛ̄i̍ o̍ chi̍e̍ēŋndo̍ ni᷄ŋ, lā sāŋga̍la̍ Mɛ̍lɛ̄ka̍ o̍ chōndo̍ŋ ni᷄ŋ. Lā sāŋga̍la̍ Ma̍sānɔ̄ɔ̍ Mɛ̄lɛ̄ka̍ o̍ chōndo̍ŋ ni᷄ŋ.

³³Lā sāŋga̍la̍ wa᷅na̍ cho̍ ho̍ō hūnɔ̄ɔ̍ o̍ ha̍lā hūmbu̍ cho̍ ni᷅ŋ ho̍ō kāni̍ ma̍si̍ndɛ̄ wo̍ chōo̍ wo̍. Ō chō hūnɔ̄ɔ̍ a̍ dēŋīo̍o̍ kpe̍e̍kpe̍i̍ a̍ dīōm bɛ̄ndōo̍, mɛ̄ɛ̍ ta᷅ŋnda̍ŋ mā dēŋī nu̍a̍ā yɛ̍.

³⁴Lā dīmu̍l wa᷅ŋnda̍ a̍ kpāāya̍ ndɔ̄ bɛ̍ndōo̍ o̍kɔ̄ɔ̄. Ndu̍ cho̍ māsāa̍ wāŋnda̍ I̍sɔ̄lūɛ̄ī cho̍o̍ ni̍. Kpāāya̍ ndɔ̄ bɛ̍ndōo̍ ō chō ō chɔ̄mna᷄ŋ o̍ ha̍la̍a̍ ni̍ŋ cho̍o̍ cho̍o̍.

³⁵Hūnɔ̄ɔ̄ Mɛ̄lɛ̄ka̍ I̍sɔ̄lūɛ̍i̍ya̍ ō chō o̍ fo̍ndā ndɔ̍ kāsīo̍o̍ wo̍, wāŋnda̍ kpo̍u̍ sīōōŋīi̍ bɛ̄ndūe̍i̍ ī chō nda̍ ī bīyāā. Ndu̍ ke᷅ wa̍nāā ndūa̍a̍ kpāāyāa̍ a̍ dīāllūŋ kāla᷄ŋ ni̍. Lā ŋ̄ yɔ̄ŋgu̍ŋ sāŋgālāa̍ nāa̍ Mɛ̄lɛ̄ka̍ chūā.