Read Southern Kisi Sa᷅m 69 Bible Online

Sa᷅m 69 - Southern Kisi bible

Sa᷅m 69

¹[66] O̍o̍ Mɛ̄lɛ̄ka̍, yāndi̍i̍ pi̍ŋi̍ ya̍ fɔ̍! Mɛ̄ŋnda̍ŋ mā bīī ya̍ ni᷅ŋ o̍ bo̍lōla̍ŋ kpe᷅ŋ.

²I̍ mɔ̍ɔ̍wa̍ o̍ lōōlī yi̍ŋgi̍lɛ̍i̍yo̍ ni᷄ŋ. Nāa̍ ya̍ I̍ kɛ̍sɛ̍ pēlēi̍ bɛ̍ɛ̍ mī si᷄m ō cho̍ le̍. I̍ cho̍ o̍ mɛ̄ŋmā yīŋgi̍lɛ̍i̍ma̍ bɛ̍ndūa̍ŋ ni᷄ŋ, mɛ̄ŋmā hūna᷄ŋ mā mēl la̍ chɔ̍ŋgɔ̍mu̍.

³I̍ cha̍ŋ ni᷅ŋ te̍i̍ le̍ mālāa̍, I̍ sa̍ŋga̍. Bo̍lōla̍ŋ lā vēsa̍ ya̍ ni᷅ŋ sɛ̍ɛ̍ŋ a̍ cha᷄ŋndo̍. Hɔ̄lta̍ŋ lā yɔ̄nu̍ŋ ya̍ ni᷅ŋ yi̍fīdīī, a̍ nūa̍a̍ o̍ nɛ̄i̍ nāa̍ nūm Mɛ̄lɛ̄ka̍ nūu̍ chūā le̍ mā ma̍la̍.

⁴Wānāa̍ tu̍l la̍ yɛ̍le̍ŋ o̍ fo̍ndō fu̍u̍wo̍ chōo̍ wa̍, ā chō fāŋgā, ā hīōū yīīŋnde̍ ya̍ o̍ lēbōl. Wānāa̍ ye̍e̍ma̍ le̍ ya̍ tɛ̄ɛ̄mbūūwo̍ wa̍ ā nɔ̄ kpāāyāa̍ bɔ̄ɔ̍. Nyɛ̄ o̍ nyɛ̄ nda̍ chō dīmīo̍o̍ a̍ ya̍ o̍kɔ̄ɔ̄ chōōla̍ŋ kpo̍sōŋ. Nyɛ̄ ya̍ I̍ chi̍i̍mbu̍u̍ le̍ wo̍, ndu̍ nda̍ tōl la̍ kɔ̄ɔ̄lī ni̍ le̍ mī pa̍a̍wa̍.

⁵O̍o̍ Mɛ̄lɛ̄ka̍, ā sīnā a̍ dīɔ̄mīī nīi̍ o̍kɔ̄ɔ̄. Yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ ya̍ I̍ to̍sa̍, ō pīlɛ̍ bɛ̍ɛ̍ cho̍ mā kɛ̍ɛ̍ sīnā a̍ ndu̍ o̍kɔ̄ɔ̄ le̍.

⁶O̍o̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, yāndi̍i̍ to̍sā mī si̍ɔ̍mbu̍la̍ŋ lā bīī wānāa̍ dɔ̍ū tīīnda᷄ŋ ndāa̍ o̍ nūm ni̍ŋ nda̍ le̍ sa̍bū nūu̍ le̍. O̍o̍ Mɛ̄lɛ̄ka̍, Mɛ̄lɛ̄ka̍ I̍sɔ̄lūɛ̍i̍ya̍, to̍sā mī wānāa̍ cho̍ nu̍m sōōlūūwo̍ wa̍ ā tāmbu̍ lābɛ̄ɛ̄ le̍ sa̍bū nūu̍ le̍.

⁷Le̍ sa̍bū nūmndo̍ ya̍ I̍ cho̍ bɛ̄ɛ̄la̍ ta̍mbɛ̍i̍la̍ŋ bīūnɔ᷄ŋndo̍ ni̍, mi̍ si̍ɔ̍mbu̍la̍ŋ lā wā ya̍ lā bīyāā a̍ bōlle̍ŋ kpo̍u̍.

⁸Wānāya᷅ŋ nūu̍ŋ bɛ̍ɛ̍ kɛ̍sɛ̍ kɛ̍sɛ̍ ā chē ya̍ ni᷅ŋ māā wāna̍ lēkāa̍. I̍ si̍mnu᷄ŋ māā mīāl wānāā na̍a̍ ŋ̄ fūla̍ kālā pi᷅lɔ̍ɔ̍ wa̍ tɛ̄ɛ̄ŋ.

⁹Mɛ̄lɛ̄ka̍, kāāla̍ cho̍ ya̍ o̍ kɔ̄l le̍ chīɛ̄ī nūmndo̍ wo̍ ō hīōū ya̍ o̍ kɔ̄l kɔ̄ɔ̄lī bɔ̄ɔ̍. Yīōūlā nda̍ yīo̍u̍ nu̍mnda̍ŋ ya̍ bɛ̍ɛ̍ I̍ sɔ̍la̍ yīōūlā lāŋ.

¹⁰Tē I̍ tu̍si̍ŋ pɛ̍, mī bi̍ī su᷅mndo̍, wāŋnda̍ ā tɛ̄ɛ̄mbu̍u̍ ya̍ lābɛ̄ɛ̄.

¹¹Tē I̍ wo̍u̍nu̍ŋ nyɛ̍lā lābɛ̍kīla̍ŋ pɛ̍ le̍ kɔ̄l nī ta̍mbɛ̍i̍yo̍ chɔ̄mndo̍, wāŋnda̍ ā sīīŋgu̍u̍ ya̍ nyɛ̄ ndā ma̍māā.

¹²O̍ dīō sāāsa̍ chi̍o̍o̍ sōndōo̍ wāŋnda̍ ā chāl la̍ chōŋgūla̍ŋ ni̍. Wānāā kōlāa̍ bɛ̍ɛ̍ kpo̍u̍, ā chō ni᷅ŋ bālɔ̄ɔ̍ a̍ ya̍ o̍ lāsōndō māā īchōndu̍.

¹³Kɛ̍ ya̍ ya̍ nūm ya̍ I̍ cho̍ dīōmndo̍ nyūnāa̍ ni̍ Mɛ̄lɛ̄ka̍ Ya̍a̍wɛ̄ɛ̄. Mu̍li̍ ya̍ dīōm a̍ te̍le̍ŋ nu̍m ŋ̄ yēēma̍ wo̍ Mɛ̄lɛ̄ka̍. Mu̍li̍ ya̍ dīōm, fo̍ndōle̍, le̍ mɛ̄ɛ̍ ŋ̄ kāāla̍ ŋ̄wāŋndā chīe̍e̍ le̍ te̍le̍ŋ o̍ te̍le̍ŋ yɛ̍, le̍ mɛ̄ɛ̍ ŋ̄ pēēlū bu̍ŋgɛ̄ī nūmnde̍, mā chīīndi̍a̍a̍ ŋ̄wāŋndā chīe̍e̍ yɛ̍.

¹⁴So̍li̍ ya̍ o̍ pɔ̍lɔ̍ŋndo̍ ho̍ō ni᷄ŋ Mɛ̄lɛ̄ka̍, yɔ̄ŋi̍ ya̍ I̍ mɔ̍ɔ̍wa̍. So̍li̍ ya̍ ya̍a̍mɔ̍ɔ̍wa̍a̍ nīa̍a̍ o̍ bā Mɛ̄lɛ̄ka̍ nūu̍, so̍li̍ ya̍ o̍ lūmīī bɛ̄ndūe̍i̍ he̍ī ni᷄ŋ.

¹⁵Ma᷅l la̍ mī lo̍ o̍ mɛ̄ŋmā hūna᷄ŋ māŋ ni᷄ŋ te̍ Mɛ̄lɛ̄ka̍. Ma᷅l la̍ mī lo̍ o̍ lūmnde̍ he̍ī ni᷄ŋ, ɔ̄ɔ̄ mī to᷅l o̍ pūūlōo̍ bɛ̄ŋgu̍, mbō kīnda̍ŋ ya̍ kɔ̄ɔ̄lī le̍.

¹⁶O̍o̍ Mɛ̄lɛ̄ka̍ Ya̍a̍wɛ̄ɛ̄, mɛ̄ɛ̍ ŋ̄ chō wānā kɛ̍ndɛ̄ ndu̍yɛ̍ ma̍ nɔ̄ kāālāa̍ le̍ ŋ̄wāŋnda̍ chīe̍e̍ le̍ te̍le̍ŋ o̍ te̍le̍ŋ yɛ̍, yāndi̍i̍ mu̍li̍ ya̍ dīōm. Mɛ̄ɛ̍ ŋ̄ chō wāna̍ īnyīɛ̍ɛ̍ bɛ̄ndū yɛ̍, yāndi̍i̍ mu̍li̍ hɔ᷅lla̍ nāa̍ ya̍ chu̍a̍!

¹⁷Vi᷅ŋ bu̍ɛ̍ī nūmndo̍ hɔ̄lāā nūmnda̍ le̍ Mɛ̄lɛ̄ka̍, kāni̍ fo̍ndōle̍, nyɛ̄ pālāā ya̍ I̍ cho̍ ni᷄ŋ ndo̍ ō chō ō bɔ̄ɔ̍, ke̍le̍ŋa̍ ya̍ dīōm mūlī fɔ̍.

¹⁸Sɔ̍ɔ̍ŋgu̍u̍ ya̍ īkɛ̄i̍, mā pi̍ŋi̍ yōōmū nūu̍. So̍li̍ ya̍ ya̍a̍mɔ̍ɔ̍wa̍a̍ nīa̍a̍ o̍ bā.

¹⁹Ā sīnā bɛ̍ɛ̄la̍ ta̍mbɛ̍i̍la̍ cho̍ ya̍ kōmāllo̍ ki̍nɛ̍i̍ la̍ŋ. Ā sīnā mɛ̄ɛ̍ nda̍ chō ya̍ si̍ɔ̍mbu̍la̍ŋ tūsīo̍o̍, ndu̍yɛ̍ ma̍ wā ya̍ bɛ̄ɛ̄la̍ŋ tɛ̄ɛ̄mbūūwo̍ yɛ̍. Ā sīnā ya̍a̍mɔ̍ɔ̍wa̍a̍ nīa̍a̍ kpo̍u̍, Mɛ̄lɛ̄ka̍.

²⁰Kɔ̄l nūu̍ ō tāmbu̍ ō bɔ̄ɔ̍ a̍ bɛ̄ɛ̄la̍ nda̍ chō ya̍ tɛ̄ɛ̄mbūūwo̍ la̍ŋ. Kɔ̄l nūu̍ ō tāmbu̍ ha̍a̍a̍, I̍ nɔ̍ lɛ̍ tīīnda᷄ŋ o̍ tīīnda᷄ŋ māā I̍ fu̍lā ni̍ŋ le̍ni̍ŋ te̍. I̍ wa̍ yīya᷄ŋndo̍ māā I̍ sɔ̍lā ni̍ŋ wa᷅na̍ tu̍i̍i̍nūŋ ya̍ īnyīɛ̍ɛ̍ yo̍, kɛ̍ wānā bɛ̍ɛ̍ I̍ sɔ̍la̍ le̍. I̍ wa̍ tōfāa̍ o̍ nɛ̄i̍ le̍ wānāā ya̍ I̍ sɔ̍la̍ ni̍ŋ mā nyɔ̄ɔ̄lu̍ ya̍ kɔ̄llo̍ wa̍, kɛ̍ wānā bɛ̍ɛ̍ I̍ sɔ̍la̍ le̍.

²¹Mɛ̄ɛ̍ yīa̍a̍ŋ mā wa̍ ya̍ nɛ̄īyo̍, ma̍ kē ya̍ nyɛ̄ wɔ̄ɔ̍ŋndo̍ le̍ mī de᷅ Mɛ̄ɛ̍ kōlɔ̄ɔ̍ ō bīī ya̍, ma̍ kē ya̍ mūɛ̄īmā kīle̍pīi̍ma̍ wa̍a̍lɛ̍i̍ya̍ŋ le̍ mī ko̍l.

²²Mɛ̄lɛ̄ka̍, ye̍ŋ wa᷅ŋnda̍ ha̍ā yāŋɔ̄ɔ̄le̍ŋ mā hāu̍, a̍ bōōndi̍i̍ nda̍ wā o̍ bɔ̄ŋa᷅ŋnda̍ ndāla̍ nyɛ̄ dīāāla̍ŋ chōo̍ ve̍. Ye̍ŋ nda̍ yāŋɔ̄ɔ̄le̍ŋ mā hāu̍, a̍ te̍le̍ŋ nda̍ wā o̍ bɔ̄ŋa᷅ŋndā nda̍ dīā nyɛ̍ dīāā lāsa̍lāla̍ŋ chōo̍ wo̍.

²³To̍sa̍ mā sūma̍, ā chi᷅ le̍. To̍sa̍ mā sɔ̄la̍ nāā kɔ̄ɔ̍, mī kɔ̄ɔ̄la̍ŋ lā wa̍ nda̍ lā vīlɛ̍i̍ le̍ te̍le̍ŋ o̍ te̍le̍ŋ.

²⁴Dɔ̍ɔ̍nu̍ŋ tu̍mbe̍ a̍ nda̍ o̍ ka̍lā ka̍lā mā tu̍si̍ nda̍ nyɛ̄ pālāa̍ chōo̍. Ti̍sa̍ nda̍ kɔ̄ɔ̄lī a̍ tu̍mbe̍ ka̍lā ka̍lāa̍ mā bīī nda̍.

²⁵Mbɔ̄ māā chīɛ̄īlā ndāla̍ŋ lā lo̍ fo̍ndō, wānā o̍ wānā cha᷅l lɛ̍ lēni᷄ŋ te̍ fɔ̍.

²⁶Wānāā ŋ̄ tūsi̍ nyɛ̄ pālāa̍ chōo̍ wa̍, mi̍ nda̍ chɔ̄ɔ̄lū nda̍ vɛ̄lɛ̄ nyɛ̄ pālāā chēle̍ŋ tūsī chōo̍. Wānāā ŋ̄ yɔ̄ŋu̍l la̍, mi̍ nda̍ wā vɛ̄lɛ̄ bālɔ̄ɔ̍ a̍ wānāā kāŋ o̍ lāsōndō le̍ sāŋga̍ cho̍ nda̍ chōo̍ wo̍.

²⁷Yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nda̍ chō tōsāa̍, chɔ̍m nda̍ la̍ŋ chōo̍ kpo̍u̍. Ma᷅l nda̍ le̍ yɔ̄ŋndā ndāla̍ wɔ̍ɔ̍ŋnda̍ŋ te̍.

²⁸So̍li̍ di̍o̍la̍ ndāla̍ŋ o̍ yāu̍ wānāa̍ nɔ̍ yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍ ni᷄ŋ nda̍. Ā wa᷅ ā chɔ̄māā wānāa̍ cho̍ nu̍m o̍ hɔ̄l sa̍kpō wa̍ chōo̍ le̍.

²⁹Nyɛ̄ nɛ̄īyāa̍ cho̍ ya̍ chōo̍ wo̍, ō chō ō bɔ̄ɔ̍, nyɛ̄ kīndīlāa̍ chō ya̍ chōo̍ bɔ̍ɔ̍. Pi̍ŋi̍ ya̍ o̍ kpūndɔ̍ɔ̍ ho̍ō ni᷄ŋ Mɛ̄lɛ̄ka̍.

³⁰I̍ cho̍ Mɛ̄lɛ̄ka̍ sāŋgālā o̍ chōndo̍ŋ ni᷄ŋ. I̍ cho̍ kpāāya̍ ndɔ̄ bɛ̍ndōo̍ chɔ̄ɔ̄mūū o̍ ndu̍ ba̍li̍ka̍a̍ mēllo̍ ni᷄ŋ.

³¹Ko̍ŋ nɔ̍lā mbō hīni̍ Mɛ̄lɛ̄ka̍ Ya̍a̍wɛ̄ɛ̍ kɔ̄l, mbō hīōū sa̍lāa̍ sōlīo̍o̍ o̍ ndu̍ lo̍ a̍ nāūwa̍, kɛ̄lɛ̄ŋgāā a̍ nāū tōōyē bɛ̄ndōo̍.

³²Tē wānāā nda̍ chō nyɛ̄ pālāa̍ tūsīo̍o̍ chōo̍ wa̍ ā chē he̍ī pɛ̍, ā chō kɔ̄l nāŋɔ̄ɔ̄. Nya̍ wānāa̍ cho̍ Mɛ̄lɛ̄ka̍ sōōlūūwo̍ wa̍, lā wa̍ a̍ kɔ̄l kɛ̄ndɛ̄.

³³Tē wāna̍ bāhāvɛ̍i̍yo̍ ō ŋɔ̄ɔ̄cha̍ŋ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ o̍ pīɛ̄īle̍ŋ ni᷄ŋ pɛ̍, tūēīyɔ̄ɔ̍ Mɛ̄lɛ̄ka̍ tūɛ̄ī pi̍ɛ̍i̍lē ndɔ̄le̍ŋ ni̍. Ndu̍yɛ̍ Mɛ̄lɛ̄ka̍ pu̍ɛ̍ɛ̍nūŋ a̍ wānāa̍ cho̍ o̍ bīyɔ̄ɔ̍ ni᷄ŋ nda̍.

³⁴Nya̍ nyɛ̄ o̍ nyɛ̍ cho̍ o̍ ha̍la̍a̍ ni᷄ŋ cho̍o̍ cho̍o̍, a̍ o̍ chi̍e̍ēŋndo̍ chōo̍, lā sāŋgāla̍ Mɛ̍lɛ̄ka̍. Pēēla̍ mɛ̄ŋmā īhɛ᷄lta̍ŋ, ndu̍yɛ̍ a̍ nyɛ̄ o̍ nyɛ̄ yōōmāa̍ cho̍ le̍ni᷄ŋ, la̍ sāŋga̍la̍ ndu̍.

³⁵Mɛ̄lɛ̄ka̍ chō Sa̍a̍yo̍ŋ chīīndīāā, ndu̍yɛ̍ mbō mīŋgi̍ chi̍o̍o̍ŋ Chu̍dā tāŋgūl. Wānāā ndūa̍a̍ ā wā ni̍ŋ i̍cha̍li̍ lo̍ŋ, mī lɛ̄ŋnde̍ŋ lē wa᷄ nyɛ̄ ndā.

³⁶Yu̍ŋgu̍la̍ fu̍lā ni̍ŋ o̍ pūlāle̍ bu̍ɛ̍i̍yāā ndāa̍ chōo̍ la̍ŋ, nda̍ nɔ᷅ ni̍ŋ lɛ̍ŋndēlēŋ māā nyɛ̄m nda̍ ŋ̄kɛ᷅ ni̍. Ndu̍yɛ̍ wānāa̍ ka̍a̍la̍ ndu̍ wa̍, nda̍ wa᷅ ni̍ŋ i̍cha̍li̍ o̍ lɛ̄ŋnde̍ŋ nde᷅ŋ ni᷄ŋ ni̍.