Read Southern Kisi Sa᷅m 71 Bible Online

Sa᷅m 71 - Southern Kisi bible

Sa᷅m 71

¹O̍o̍ Mɛ̄lɛ̄ka̍ Ya̍a̍wɛ̄ɛ̄, nūm ya̍ I̍ ti̍i̍nda̍ŋ le̍ ya̍ māndāa̍ ni̍. Chɛ᷅l mī si̍ɔ̍mbu̍la̍ŋ lā bīī ya̍ le̍.

²Mɛ̄ɛ̍ ŋ̄ chō wānā sa̍kpō yɛ̍, chi̍i̍ndi̍a̍a̍ ya̍ mā pi̍ŋi̍ yōōmū nūu̍. Tu̍e̍i̍ pi̍ɛ̍i̍lē nīle̍ŋ mā chi̍i̍ndi̍a̍a̍ ya̍.

³Wa̍ po̍ū kpo̍o̍wa̍ bɛ̍ndōo̍ ō ya̍ I̍ vi̍a̍ŋnūŋ le̍bɛ̍ŋgu̍ te̍le̍ŋ o̍ te̍le̍ŋ ndo̍. Wa̍ sa̍āsā ka̍lāa̍ ya̍ ō bālāā, le̍ ya̍ māndāa̍. Nu᷄m cho̍ pōū kpo̍o̍wa̍ bɛ̍ndū ya̍ I̍ vi̍a̍ŋnūŋ le̍bɛ̍ŋgu̍ wo̍ ni̍, Nu᷄m cho̍ sāāsā ka̍la̍ ba̍lu̍ ya̍ wo̍ ni̍.

⁴O̍o̍ Mɛ̄lɛ̄ka̍ nūu̍, yāndi̍i̍ pi̍ŋi̍ yā wānāā dɛ̍nɛ̍ wɔ̍ɔ̍ŋnda̍ o̍ bā. So̍li̍ ya̍ wānāā dɛ̍nɛ̍ wɔ̄ɔ̍ŋāa̍ nɔ̍ kɔ̄l vēsɛ̍i̍ bɛ̍ndōo̍ wa̍ o̍ bā.

⁵Nūm Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, nūm ya̍ I̍ ti̍i̍nda̍ŋ ni̍. O̍ nūm ni̍ŋ ya̍ I̍ dɔ̍ū tīīnda᷄ŋ nūu̍ ni̍, chɔ̍ŋ ha̍a̍a̍ a̍ chūāpīāāndūyɛ̍ī nīi̍.

⁶Chɔ̍ŋ a̍ vīōlɔ᷄ŋ nūu̍ mbo̍ bīya᷅ŋ a̍ te̍le̍ŋndo̍ ho̍ō, nūm ya̍ I̍ ti̍i̍nda̍ŋ ni̍. Nu᷄m so̍li̍ ya̍ kāla̍ nūu̍ o̍ dēmbē ni̍. Le̍la̍ŋ I̍ cho̍ nu̍m sāŋgālā le̍ te̍le̍ŋ o̍ te̍le̍ŋ.

⁷Wānāā bɔ̄ɔ̍ bɔ̍ɔ̍ ā chūa̍ yo̍o̍mū nūu̍ māā tāāmāsi̍ le̍ nda̍, kāni̍ fo̍ndōle̍, nu᷄m cho̍ wāna̍ ma̍ndā ya̍ wo̍ ni̍.

⁸Le̍la̍ŋ I̍ sa̍ŋgā a̍ nu̍m sāŋgālāa̍ le̍. Lēpāa̍ o̍ lēpāa̍ I̍ cho̍ chɔ̄mndo̍ a̍ nāŋɔ̄ɔ̄ nūm bɛ̍ndōo̍ o̍kɔ̄ɔ̄.

⁹Bōōndi̍i̍ ya̍ I̍ cho̍ ni᷅ŋ he̍ī ō yūvɛ̍i̍ ye̍, kɛ̍ɛ̄ ya̍ le̍ Mɛ̄lɛ̄ka̍ nūu̍. Bōōndi̍i̍ ya̍ I̍ cho̍ ni᷅ŋ he̍ī I̍ nɔ̍ lɛ̍ kpāāyā le̍ ve̍, yāndi̍i̍ mu̍lūl la̍ kɔ̄ɔ̍ le̍.

¹⁰Ya̍a̍mɔ̍ɔ̍wa̍a̍ nīa̍a̍ ā chō ya̍ kɔ̄ŋgɔ̄līa̍ŋnda̍ŋ bɔ̄ɔ̍. Wānāa̍ ye̍e̍ma̍ le̍ ya̍ dīyɔ̄ɔ̍ wa̍ ā yīi̍ ya̍ de̍fo̍o̍.

¹¹Ā chō dīmīo̍o̍ āā, “Mɛ̄lɛ̄ka̍ mūlu̍l ndu̍ kɔ̄ɔ̍. Lā ŋ̄ tīsa᷅ŋ ndu̍ kɔ̄ɔ̄lī mī ŋ̄ kɔ᷄ bi̍ī ndu̍. Ō nɔ̍ wa̍nā o̍ wāna̍ chi̍i̍ndi̍a̍a̍ ndu̍ le̍.”

¹²O̍o̍ Mɛ̄lɛ̄ka̍ nūu̍, yāndi̍i̍ ku̍ā ya̍ lēvīl te̍. Ke̍le̍ŋa̍ hu̍nɔ̄ɔ̄ fɔ̍, mā hu̍ŋ ma̍lā ya̍ Mɛ̄lɛ̄ka̍ nūu̍.

¹³Wānāa̍ cho̍ ya̍ sɔ̄ɔ̍ŋ hōlɔ̄ɔ̍ wa̍, mbɔ̄ māā si̍ɔ̍mbu̍la̍ŋ lā bīi̍ nda̍, ndu̍yɛ̍ mā wa᷄ ā tɛ̄ɛ̄mbāā fɔ̍. Wānāa̍ ye̍e̍ma̍ le̍ ya̍ yɔ̄ŋūllo̍ wa̍, mbɔ̄ māā si̍ɔ̍mbu̍la̍ŋ lā bīi̍ nda̍, ndu̍yɛ̍ mī bɛ̄ɛ̄la̍ ta̍mbɛ̍i̍la̍ŋ lā kōma̍l nda̍ fɔ̍.

¹⁴Kɛ̍ ya̍ ya̍, I̍ cho̍ hīōūwɔ̄ɔ̄ lāchī a̍ tīīnda᷄ŋ nūu̍ dɔ̄wɔ̄ɔ̍ o̍ nūm ni̍ŋ. I̍ cho̍ hīōūwɔ̄ɔ̄ lāchī a̍ nu̍m sāŋgālāa̍ kpe̍e̍kpe̍i̍.

¹⁵I̍ cho̍ wāŋnda̍ kpo̍u̍ di̍mūl a̍ mɛ̄ɛ̍ ŋ̄ chō wānā kɛ̍ndɛ̄ yɛ̍. Le̍ pāa̍le̍ŋ a̍ nyūmnda̍ŋ, I̍ wa᷅ ni̍ŋ wa᷅ŋnda̍ dīmūllo̍ a̍ mɛ̄ɛ̍ ŋ̄ chīīndi̍a̍a̍ wānāā nūmnda̍ yɛ̍, mi̍ chē bɛ̍ɛ̍ I̍ nɔ̍lā mī chi̍i̍ ndi̍ bɛ̍ɛ̍ si̍na̍ pɛ̍ŋgu̍ le̍ ni̍.

¹⁶O̍o̍ Mɛ̄lɛ̄ka̍ Ya̍a̍wɛ̄ɛ̍, Māsānɔ̄ɔ̍ Mɛ̄lɛ̄ka̍, I̍ cho̍ lākɔ̄ mī sa̍ŋga̍la̍ nu̍m, fo̍ndōle̍, le̍ wa̍lta̍ kɔ̄ndɔ̄fi̍ltā bɛ̄ndūlā ŋ̄ tōsā la̍ŋ. I̍ cho̍ wānā o̍ wānā fe̍e̍ di̍mūl māā nūm pīlɛ̍ kpe̍ cho̍ sa̍kpō, ndu̍yɛ̍ ma̍ wā wānā kɛ̍ndɛ̄ ni̍.

¹⁷O̍o̍ Mɛ̄lɛ̄ka̍, I̍ lo̍ ō pɔ̄mbɔ̄ ma̍ pɛ̄ɛ̄kū ya̍ a̍ wa̍lta̍ nu̍mndā kɔ̄ndɔ̄fi̍ltā bɛ̄ndūla̍ŋ o̍kɔ̄ɔ̄, ndu̍yɛ̍ I̍ cho̍ wɔ̄ wāŋnda̍ dīmūllo̍ a̍ la̍ŋ o̍kɔ̄ɔ̄ kɛ᷅.

¹⁸Le̍la̍ŋ yāndi̍i̍ Mɛ̄lɛ̄ka̍ nūu̍, bōōndi̍i̍ ya̍ I̍ cho̍ ni᷅ŋ he̍ī ō yūvɛ̍i̍, mi̍ yūlu̍ŋnde̍ ī wā ya̍ ni᷅ŋ o̍ lēbōl le̍, kɛ̍ɛ̄ ya̍ le̍ fɔ̍. Lo̍ ya̍ māchɛ̄lū ha̍a̍a̍, mī lo̍ o̍ ko̍ŋ mī chɔ̍m chūāūwāā nāa̍ a̍ chūāūwāā nāā ma̍māa̍ a̍ wa̍lta̍ kɔ̄ndɔ̄fi̍lta̍ bɛ̄ndūlā ŋ̄ tōsa̍ le̍ wānāā nūmnda̍ la̍ŋ.

¹⁹Mɛ̄lɛ̄ka̍, wa̍lta̍ nu̍mndā kɛ̄ndɛ̄lā ŋ̄ tōsā la̍ŋ o̍ ha̍la̍a̍ ni᷄ŋ cho̍o̍ cho̍o̍ bɛ̍ɛ̍ lā chō lā chɔ̄mna᷄ŋnda̍ŋ. A̍ to̍sa̍ sɔ̄ɔ̍ŋ bɛ̍ndūŋ fāŋā. Wānā o̍ wānā cho̍ māā nūm te̍.

²⁰Mi̍ chē bɛ̍ɛ̍ ma̍ chɛ̄l mi̍ sāŋgāa̍ ō tūāl la̍ chōo̍, mi̍ sɔ̄ɔ̍ŋ pa̍lāŋ bɔ̄ɔ̍ bɔ̍ɔ̍ ŋ̍ wa᷅ ya̍ kēēkōo̍ chōo̍ ni̍, Kɛ̍ I̍ si̍nā māā ā chō vɛ̄lɛ̄ ya̍ yōōmūa̍ŋ mīŋgī kē. Ā chō tōsā mī mi̍i̍ŋgu̍ vɛ̄lɛ̄ o̍ pēlūŋ nūu̍ŋ chōo̍.

²¹Ā chō tōsā mī chɔ̍ɔ̍lu̍ bɛ̄ɛ̄le̍ŋ sɔ̄lā mbō hīōū māā pāāndū, ndu̍yɛ̍ mā nyɔ̍ɔ̍lu̍ ya̍ kɔ̄llo̍ ni᷄ŋ.

²²O̍o̍ Mɛ̄lɛ̄ka̍, I̍ cho̍ nu̍m sāŋgālā a̍ tōwāa̍ lɔ̄ɔ̍, fo̍ndōle̍, le̍ mɛ̄ɛ̍ ŋ̄ chō Mɛ̄lɛ̄ka̍ lo᷅ o̍ lēdīōm ndo̍ yɛ̍. O̍o̍ Mɛ̄lɛ̄ka̍ Kāsī I̍sɔ̄lūɛ̍i̍ya̍, I̍ cho̍ nu̍m sāŋgālā o̍ chōndo̍ŋ ni᷄ŋ a̍ tōwāa̍.

²³I̍ cho̍ dēŋgī chōo̍ cho̍o̍ a̍ nya̍a̍lo̍o̍, mī sa̍ŋga̍la̍ nu̍m o̍ chōndo̍ŋ ni᷄ŋ a̍ kɔ̄l nūu̍ kpo̍u̍, kāni̍ fo̍ndōle̍, le̍ mɛ̄ɛ̍ ŋ̄ chīīndi̍a̍a̍ ya̍ yɛ̍.

²⁴Le̍ īdīi̍ a̍ īchɔ̄l, I̍ wa᷅ ni̍ŋ wa᷅ŋnda̍ dīmūllo̍ a̍ mɛ̄ɛ̍ ŋ̄ chō wānā kɛ̍ndɛ̄ yɛ̍ o̍kɔ̄ɔ̄, kāni̍ fo̍ndōle̍, wānāa̍ wa̍ kīndīo̍o̍ le̍ ya̍ dīyɔ̄ɔ̍ wa̍ ā yēm nda̍, ndu̍yɛ̍ ma̍ sɔ̄lā bɛ̄ɛ̄la̍ ta̍mbɛ̍i̍la̍ŋ.