Read Southern Kisi Sa᷅m 72 Bible Online

Sa᷅m 72 - Southern Kisi bible

Sa᷅m 72

¹[68] O̍o̍ Mɛ̄lɛ̄ka̍, pɛ̍ɛ̍ku̍ ma̍sā bɛ̍ndōo̍ mɛ̄ɛ̍ ŋ̄ dīmī sɔ̍ɔ̍ŋ o̍ nɛ̄ī tōnya̍a̍ chōo̍ yɛ̍. Chɔ̍m ma̍sā bɛ̍ndōo̍ mɛ̄ɛ̍ ŋ̄ dīmī sɔ̍ɔ̍ŋ o̍ sa̍kpōyɛ̍i̍ chōo̍ yɛ̍.

²Ko̍ŋ to̍sā ni̍ mbō wa᷄ wānāā nūmnda̍ sɔ̄ɔ̍ŋ dīmīo̍o̍ tɛ̄ɛ̄ŋ o̍ nɛ̄ī sa̍kpōo̍ chōo̍, ndu̍yɛ̍ wānāā nda̍ chō nyɛ̄ pālāa̍ tūsīo̍o̍ chōo̍ wa̍ mbo̍ wā sɔ̄ɔ̍ŋ ndāa̍ŋ bīyɔ̄ɔ̍ o̍ nɛ̄i̍ tōnya̍a̍ chōo̍.

³Mbɔ̄ māā tɔ̄lɔ̄ɔ̄la̍ŋ lā na᷄ŋ o̍ pēmbo᷄ŋ chōo̍ mī wāŋnda̍ sɔ̄la̍ nyɛ̄ dīa̍a̍ ta̍u̍ ta̍u̍ fɔ̍. Mbɔ̄ māā wāŋnda̍ o̍ lɛ̄ŋnde̍ŋ nde᷅ŋ ni᷄ŋ ā wa᷄ sɔ̍ɔ̍ŋ tōsāa̍ o̍ nɛ̄i̍ sa̍kpōo̍ cho̍o̍ fɔ̍.

⁴Mbɔ̄ māā māsā bɛ̍ndōo̍ ō sūŋgu̍ le̍ wānāā nda̍ chō nyɛ̄ pālāa̍ tūsīo̍o̍ chōo̍ wa̍, ndu̍yɛ̍ mbō chīīndi̍a̍a̍ wānāa̍ cho̍ ā tāmbɛ̍i̍ya̍, o̍ ko̍ŋ kɔ̍ɔ̍lī, mbō tɛ̄ɛ̄mbu̍u̍ wānāa̍ cho̍ nda̍ nyɛ̄ pālāa̍ tūsīo̍o̍ chōo̍ wa̍.

⁵Mbɔ̄ māā māsā bɛ̍ndōo̍ māsāle̍ ndɔ̄le̍ŋ lē hīo̍u̍ la̍chi̍ a̍ wāa̍ le̍ fɛ̍ɛ̍ŋ a̍ fɛ̍ɛ̍ŋ, mɛ̄ɛ̍ pāa̍le̍ŋ a̍ pāŋge̍i̍ ŋ̄ chō le̍ fɛ̍ɛ̍ŋ a̍ fɛ̍ɛ̍ŋ yɛ̍.

⁶Mbɔ̄ māā māsāle̍ ndɔ̄le̍ŋ lē wa᷄ māsāle̍ tɔ̄nɔ̄ mɛ̄ɛ̍ pīɔ̍ɔ̍ sīā nu̍a̍ā o̍ tɔ̄lɔ̄ɔ̄la̍ŋ chōo̍ mī lā na᷄ŋ yɛ̍. Lē wa᷄ mɛ̄ɛ̍ mɔ᷄mndo̍ ō chūchū nu̍a̍ā o̍ tɔ̄lɔ̄ɔ̄la̍ŋ chōo̍ mī lā pūi̍ yɛ̍.

⁷Mbɔ̄ māā sa̍kpōyɛ̍i̍ ī wa᷄ wa᷅ŋnda̍ tɛ̄ɛ̄ŋ o̍ lɛ̄ŋnde̍ŋ ni᷄ŋ o̍ māsāle̍ ndɔ̄le̍ŋ bɛ̄ŋgu̍ a̍ te̍le̍ŋ o̍ cho̍ yōōmū wo̍ fɔ̍. Mbɔ̄ māā dɛ̍nɛ̍ kɛ̍ndɛ̄ bɛ̄ndōo̍ ō wa᷄ o̍ lɛ̄ŋnde̍ŋ ni᷄ŋ le̍ fɛ̍ɛ̍ŋ a̍ fɛ̍ɛ̍ŋ fɔ̍.

⁸Mbɔ̄ māā māsāle̍ ndɔ̄le̍ŋ lē chɔ᷄ŋ o̍ chi̍e̍ēŋndo̍ kpēŋgēi̍ pīlɛ̍i̍ mī lē fūūlu̍u̍ kpēŋgēi̍ ī pīlɛ̍i̍ fɔ̍. Mbɔ̄ māā lē chɔ᷄ŋ o̍ Pēē Bɛ̍ndōo̍ Yūfi̍lu̍a̍tīī mī lē fūūlu̍u̍ o̍ chi̍e̍ēŋndo̍ mɛ̄ɛ̄lu̍la̍ŋ fɔ̍.

⁹Mbɔ̄ māā kāa̍la̍ cho̍ o̍ lɛ̄ŋndē po̍lte̍ŋ ni᷄ŋ nda̍ŋ lā tūndu᷄ŋ ndu̍ o̍ lābɛ̄ŋgu̍ ni̍ŋ fɔ̍. Mbɔ̄ māā ya̍a̍mɔ̍ɔ̍wa̍a̍ ndūa̍a̍ ā hīni̍ lɛ᷅ŋ o̍ chu̍ndo̍o̍ ni᷄ŋ ndu̍ o̍ lābɛ̄ŋgu̍ ni̍ŋ fɔ̍.

¹⁰Mbɔ̄ māā māsā bɛ̍ndōo̍ o̍ lɛ̄ŋndē Ta̍a̍sī le̍ŋ ni᷄ŋ, a̍ māsā bɛ̍ndōo̍ o̍ lɛ̄ŋndē ībūŋgāle̍ cho̍ lē bālāā a̍ mɛ̄ŋnda̍ŋ nde̍ŋ ni᷄ŋ. Mbɔ̄ māā māsā bɛ̍ndōo̍ Si̍ɛ̍bā a̍ māsā bɛ̍ndōo̍ Si̍ɛ̍bā ā chūu̍ ndu̍ nyɔ̄ɔ̍ŋ fɔ̍.

¹¹Mbɔ̄ māā māsāā bɛ̍ndūa̍a̍ kpo̍u̍ ā tūndu̍ŋ ndu̍ o̍ lābɛ̄ŋgu̍ ni̍ŋ le̍ ndu̍ bɛ̄ɛ̄le̍ŋ kīo̍o̍ fɔ̍. Mbɔ̄ māā lɛ̄ŋnde̍ kpo̍u̍ ī sāāŋgi̍a̍l ndu̍ fɔ̍.

¹²Kāni̍ fo̍ndōle̍ ndu̍ chi̍i̍ndīāā ni̍ŋ wa̍nāā tāmbɛ̍i̍ya̍a̍ wa᷅ ni̍ŋ cha̍ŋndo̍ nāa̍ ndu̍ chu̍a̍ le̍ nda̍ mālāa̍ wa̍ ni̍. Wānāā nda̍ chō nyɛ̄ pālāa̍ tūsīo̍o̍ chōo̍, ā nɔ̍ wa̍nā o̍ wāna̍ ma̍lāā le̍ wa̍, ndu̍ ma̍lā nda̍ ni̍ŋ ni̍.

¹³Wānāa̍ cho̍ o̍ kūɛ̍i̍ ni᷄ŋ ā nɔ̍ kpa̍a̍yā o̍ kpāāyā le̍ wa̍, ō tūīīnūŋ nda̍ ni̍ŋ i̍nyi̍ɛ̍ɛ̍, ndu̍yɛ̍ mbō chīīndi̍a̍a̍ nda̍.

¹⁴Ndu̍ chi̍i̍ndīāā ni̍ŋ wa̍nāā tāmbɛ̍i̍ya̍a̍ nda̍ chō nyɛ̄ pālāa̍ tūsīo̍o̍ chōo̍ ma̍ wā nda̍ sɔ̄ɔ̍ŋ wɔ̍ɔ̍ŋndo̍ŋ tōsāllo̍ wa̍ ni̍. Wāŋnda̍ ha̍ā yōōmūlā ndāla̍ŋ lā chō nyɛ̄ kpe̍e̍kpe̍i̍ ndu̍ o̍ hɔ̄l.

¹⁵Mbɔ̄ māsāa̍ ho̍ō ō vīo̍u̍ yo̍o̍mū o̍ māsāle̍ ndɔ̄le̍ŋ chōo̍. Mbɔ̄ māā wāŋnda̍ o̍ lɛ̄ŋndē Si̍ɛ̍bā le̍ŋ ni᷄ŋ a̍ chu̍u̍ ndu̍ ko̍o̍līi̍ŋ ndāa̍ŋ fɔ̍. Mbɔ̄ māā wāŋnda̍ ā wa᷄ pi̍ɛ̍īle̍ŋ le̍ ndu̍ le̍ te̍le̍ŋ o̍ te̍le̍ŋ ndu̍yɛ̍ mā wa᷄ ndu̍ sa̍lāla̍ŋ dɔ̄wɔ̄ɔ̍ lēpāa̍ o̍ lēpāa̍ fɔ̍.

¹⁶Mbɔ̄ māā nyɛ̄ dīa̍a̍ wa᷄ ta̍u̍ ta̍u̍ o̍ lɛ̄ŋnde̍ŋ ni᷄ŋ fɔ̍. Mbɔ̄ māā tɔ̄lɔ̄ɔ̄la̍ŋ lā wa᷄ na̍ŋɔ̄ɔ̍ o̍ pēmbo᷄ŋ chōo̍ fɔ̍. Mbɔ̄ māā yɔ̄mīī tūālɛ̄i̍ o̍ kpe̍le̍la̍ŋ ni᷄ŋ ī wa᷄ ko̍mɔ̄ɔ̍ lɔ̍pī lɔ̍pī māā yɔ̄mnde̍ o̍ Pēmbīī Le̍ba̍nɔ̄ŋnde̍ chōo̍ fɔ̍. Mbɔ̄ māā ī wa᷄ pu̍īyo̍ tɛ̍ɛ̍ tɛ̍ɛ̍ mɛ̄ɛ̍ bīllo̍ ō pūī yo̍ndōla̍ŋ ni᷄ŋ yɛ̍ fɔ̍.

¹⁷Mbɔ̄ māā dīōlā māsā bɛ̍ndōo̍ lā hīo̍u̍ la̍chi̍ a̍ wāa̍ wāŋnda̍ tɛ̄ɛ̄ŋ le̍ fɛ̍ɛ̍ŋ a̍ fɛ̍ɛ̍ŋ fɔ̍. Mbɔ̄ māā tɔ̍ɔ̍ ndɔ̄ɔ̍ ō hīo̍u̍ la̍chi̍ a̍ wāa̍ o̍ chi̍e̍ēŋndo̍ chōo̍ le̍ fɛ̍ɛ̍ŋ a̍ fɛ̍ɛ̍ŋ, mɛ̄ɛ̍ pāa̍le̍ŋ lē chō le̍ fɛ̍ɛ̍ŋ a̍ fɛ̍ɛ̍ŋ yɛ̍ fɔ̍. Mbɔ̄ māā lɛ̄ŋnde̍ kpo̍u̍ ī sɔ̄la̍ dɛ̍nɛ̍ kɛ̍ndɛ̄ bɛ̄ndōo̍ sa̍na̍a̍ o̍ sa̍bū ndɔ̄ɔ̍ ni᷄ŋ. Mbɔ̄ māā wāŋnda̍ dɔ̄u̍ ndu̍ sa̍lā fɔ̍.

¹⁸Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍. Ndu̍ pīlɛ̍ kpe̍ nɔ̍lā ni̍ mbō tōsa̍ sɔ̄ɔ̍ŋ kɔ̄ndɔ̄fi̍li̍ŋ wāā nu̍a̍ā.

¹⁹Mbɔ̄ māā wāŋnda̍ ā ke᷅ di̍o̍la̍ nūmnda̍ŋ bɛ̄ɛ̄le̍ŋ o̍ nu̍m sāŋgālāa̍ ni᷄ŋ le̍ fɛ̍ɛ̍ŋ a̍ fɛ̍ɛ̍ŋ fɔ̍. Mbɔ̄ māā nāŋɔ̄ɔ̄ ndɔ̄ bɛ̍ndōo̍ o̍ tīu̍ o̍ chi̍e̍ēŋndo̍ ni᷄ŋ kpo̍u̍. Āmi̍i̍nā.

²⁰Dēēve̍ po̍ Chɛ̄ɛ̍se̍ wo̍, na̍nu᷄ŋ pīɛ̄īlē ndɔ̄le̍ŋ yɛ̍ yɛ̍le̍ ndɔ̄le̍ŋ lē mɛ̄ɛ̄lu̍ ni̍.