Read Southern Kisi Sa᷅m 73 Bible Online

Sa᷅m 73 - Southern Kisi bible

Sa᷅m 73

¹[69] A̍ tōnya̍, Mɛ̄lɛ̄ka̍ chō wāna̍ kɛ̍ndɛ̄ le̍ I̍sɔ̄lūɛ̍i̍ya̍. Ō chō wānā kɛ̍ndɛ̄ le̍ wānāā kɔ̄ltā ndāla̍ŋ lā chō lā dīāndāā wa̍la̍ŋ nda̍.

²Kɛ̍ ya̍ ya̍ ndu̍ o̍o̍ lo̍ ni᷅ŋ cho̍be̍ mī ya̍ i̍i̍ fa̍ŋa̍ŋ o̍ tīīnda᷄ŋ nūu̍ chōo̍. Ndu̍ o̍o̍ lo̍ ni᷅ŋ cho̍be̍ mī tīīnda᷄ŋ nūu̍ ndu̍ o̍o̍ ku̍ɛ̍ŋnu᷄ŋ,

³kāni̍ fo̍ndōle̍, mɛ̄ɛ̍ ya̍ I̍ che᷅ dɛ̍nɛ̍ kɛ̍ndɛ̄ wānāā dɛ̍nɛ̍ wɔ̍ɔ̍ŋnda̍ ā wa᷄ ni᷄ŋ ndo̍, ndu̍ yɔ̍nūŋ ni̍ māā wānāā yōŋgāā bɛ̄ndūa̍a̍ ha̍ā, mi̍ chu̍ā nɛ̄īyɔ᷄ŋ ndāa̍.

⁴Wāŋnda̍ ha̍ā mi̍ cha᷅ māā nda̍ nda̍ sāŋgā o̍ sāŋgā cho̍ nda̍ chōo̍ le̍. Le̍ te̍le̍ŋ o̍ te̍le̍ŋ dīāllūŋ ndāa̍ŋ ŋ̄ chōŋnu᷄ŋ kpe̍ŋgbe̍le̍ŋ, ā chōŋnu᷄ŋ kɛ̍ndi̍a̍a̍ che̍che̍ŋ.

⁵Nyɛ̄ pālāa̍ ko̍māl wa᷅ŋnda̍ wo̍ nda̍ nda̍ ō ko̍māl nda̍ le̍. Kpūndɛ̍ ko̍māl nda̍ mɛ̄ɛ̍ o̍ ko̍māl wa᷅ŋnda̍ yɛ̍ le̍.

⁶Le̍ he̍ī, ma̍ chūā ni̍ko̍ yo̍ŋgāa̍ māā yɔ̄lɔ᷄ŋ lābo̍lō. Ma̍ chūā dɛ̍nɛ̍ wɔ̍ɔ̍ŋndo̍ wāŋnda̍ tōsāllo̍ māā dōmā wo̍u̍na᷄ŋ.

⁷Yīya᷄ŋnda̍ dɛ̍nɛ̍ wɔ̍ɔ̍ŋnda̍ŋ, la̍ŋ kpo̍so̍ŋ la̍ cho̍ lā pīāā o̍ kɔ̄ltā ndāla̍ŋ ni᷄ŋ ni̍. Le̍ te̍le̍ŋ o̍ te̍le̍ŋ, tūūlā dɛ̍nɛ̍ wɔ̍ɔ̍ŋnda̍ŋ ko̍ni̍ la̍ hu᷅ŋ nda̍ o̍ lākɔ̄l ni̍.

⁸Ā chō wāŋnda̍ māmɔ̄ɔ̍ ndu̍yɛ̍ mā dīmī di̍o̍mndā wɔ̄ɔ̍ŋnda̍ŋ a̍ wāŋnda̍. A̍ yōŋga̍ ndā bɛ̍ndōo̍, ma̍ wā sɔ̄ɔ̍ŋ wɔ̍ɔ̍ŋndo̍ŋ kɛ̄ɛ̄sīa̍ŋndo̍ o̍ lākɔ̄l, le̍ wāŋnda̍ nyɛ̄ pālāa̍ tūsīo̍o̍ chōo̍.

⁹Ā chō Mɛ̄lɛ̄ka̍ o̍ cho̍ ɛ̄chɛ̍nɛ̄ wo̍ sōndōo̍ hēēlɔ᷄ŋndo̍, ndu̍yɛ̍ ma̍ wā chi̍e̍ēŋndo̍ hīɔ̄lɔ̄ɔ̍ a̍ lēdīɔ̄ɔ̄mū.

¹⁰Le̍ he̍ī, wānāa̍ cho̍ le̍ Mɛ̄lɛ̄ka̍ wa̍ bɛ̍ɛ̍ ā chō wāŋnda̍ ha̍ā nīla̍ŋ yāŋɔ̄ɔ̍, ndu̍yɛ̍ mā lāāla̍ŋ nyɛ᷅ nda̍ chō nda̍ dīmūllo̍ wo̍.[70]

¹¹Wāŋnda̍ ha̍ā ā chō dīmīo̍o̍ āā, “Mɛ̄lɛ̄ka̍ si̍nā nyɛ᷅ o̍ nyɛ̍ cho̍ yɔ̄nɔ᷄ŋndo̍ le̍. Mɛ̍lɛ̄ka̍ hi̍o̍ū kpo̍u̍ wo̍ ō si̍nā nyɛ̍ na̍a̍ ŋ̄ chō tōsāa̍ wo̍ le̍.”

¹²Nu̍a̍ā wānāā dɛ̍nɛ̍ wɔ̍ɔ̍ŋnda̍ ha̍ā ā chōŋnu᷄ŋ ni̍. Le̍ te̍le̍ŋ o̍ te̍le̍ŋ ā chōŋnu᷄ŋ o̍ yōōmū kɛ̄ndɔ̄ɔ̍ ni᷄ŋ, hīōūwɔ̄ɔ̍ tu̍ŋ nda̍ hīāū la̍chi̍ a̍ sūllo̍ ni̍.

¹³Mɛ̄ɛ̍ fo̍ndō fu̍u̍ ko̍ni̍ ya̍ I̍ kɛ̍si̍ ya̍ pi̍la̍ ō dīāndāā ni̍ wa̍. Fo̍ndō fu̍u̍ ko̍ni̍ ya̍ I̍ di̍mi̍ ni̍ māā I̍ cho̍ la̍ba̍ wōū o̍ yɔ̄ŋ wɔ̄ɔ̍ŋndo̍ ni᷄ŋ te̍.

¹⁴Le̍ te̍le̍ŋ o̍ te̍le̍ŋ kpūndɛ̍la̍ŋ ko̍ni̍ la̍ ko̍māl la̍ ni̍. Le̍ īdīi̍ a̍ īchɔ̄l ā chō ya̍ nyɛ̄ pālāa̍ tūsīo̍o̍ chōo̍.

¹⁵Kɛ̍ tē ya̍ i̍i̍ di̍mi̍ dīōmndā wāā nu̍a̍ā nāa̍ wānāa̍ cho̍ le̍ Mɛ̄lɛ̄ka̍ wa̍ chūā pɛ̍, mɛ̄ɛ̍ ya̍ i̍i̍ si̍mnu᷄ŋ wa̍nā wɔ̍ɔ̍ŋ a̍ nda̍.

¹⁶Mi̍ ki̍ndī kīndī le̍ mī si̍na̍ le̍ sa̍bū he̍ī ī yɔ̄nu̍ŋ ndo̍, kɛ̍ mi̍ cha᷅ māā ō cho̍ sūɛ̍i̍ ya̍ i̍ nɔ̍la̍ mī si̍na̍ pɛ̄ŋgu̍ le̍ ī cho̍ le̍.

¹⁷O̍ ko̍ŋ kɔ̍ɔ̍lī, mi̍ ku̍ā o̍ fo̍ndāŋ kāsi̍ Mɛ̄lɛ̄ka̍a̍. O̍ ko̍ŋ ya̍ I̍ si̍na̍ ni᷅ŋ ni̍, mɛ̄ɛ̍ mɛ̄ɛ̄lu̍la̍ wānāā dɛ̍nɛ̍ wɔ̍ɔ̍ŋnda̍ ha̍ā lā wā yɛ̍.

¹⁸Mɛ̄lɛ̄ka̍, tōnya̍ kpe̍e̍kpe̍i̍, nāa̍ wāŋnda̍ ha̍ā ā sīɛ̄ɛ̄lā mā de᷄l la̍ lo̍ŋ ŋ̄ sīmi̍ nda̍ ni̍. Ā chō dēlɔ̄ɔ̄ ndu̍yɛ̍ mā wa᷄ ā tɛ̄ɛ̄mbāā.

¹⁹Ā chō wā ā tɛ̄ɛ̄mbāā o̍ lēpīlɛ̍ ni᷄ŋ kpe̍. Sūɛ̍i̍ sīōōŋīī bɛ̄ndūe̍i̍ ī bīī nda̍ ni᷄ŋ nde̍ ī chō nda̍ yɔ̄nɔ᷄ŋ, ndu̍yɛ̍ mā wa᷄ ā bāsāā tɛ̍ɛ̍.

²⁰Wānāā dɛ̍nɛ̍ wɔ̍ɔ̍ŋnda̍ ha̍ā ī yɔ̄nūŋ ni̍ŋ ko̍ a̍ nda̍, mɛ̄ɛ̍ wāŋndo̍ ō sɔ̄l nu̍a̍ā lūa̍a̍ŋ, tē pāa̍le̍ŋ lē sɛ̄ dɔ̍ɔ̍ pɛ̍ ō pūɛ̄ɛ̄nu̍ŋ lɔ̍mā māŋ yɛ̍. O̍o̍ Māsānɔ̄ɔ̍ Mɛ̄lɛ̄ka̍, chɔ̄nɔ᷄ŋ ŋ̄ chō ta̍ŋgbāŋ a̍ wāŋnda̍ ha̍ā wo̍, nda̍ kpo̍u̍ ā chō lō pɛ̍.

²¹Bōōndi̍i̍ kɔ̄l nūu̍ wa᷄ mɔ̍nɛ̍i̍ bīyɔ̄ɔ̍ a̍ sūɛ̍i̍ he̍ī o̍kɔ̄ɔ̄, mi̍ yōōmū nūu̍ wā o̍ sāŋgāa̍ ni᷄ŋ nde̍,

²²mi̍ yɔ̄nu᷄ŋ māā dīɔ̄m, māā wāna̍ si̍nā ho̍ō nyɛ̄ o̍ nyɛ̄ le̍ wo̍. Mi̍ yɔ̄nu᷄ŋ māā vīsī nu̍m o̍ hɔ̄l a̍ dīɔ̄mnde̍.

²³Kɛ̍ I̍ si̍nā māā le̍ te̍le̍ŋ o̍ te̍le̍ŋ, I̍ cho̍ nu̍m o̍ ībūŋ, ndu̍yɛ̍ ma̍ wā ya̍ māndāa̍.

²⁴Sīlālā nūmnda̍ ŋ̄ chō ya̍ la̍ŋ, la̍ŋ la̍ chɔ᷅m ya̍ nɛ̄ī ya̍ I̍ ku̍ā cho̍o̍ wo̍ ni̍. Ndu̍yɛ̍ I̍ si̍nā māā o̍ mɛ̄ɛ̄lu̍la̍ŋ kpɔ̍ŋ, ā chō tōsā mī ku̍ɛ̄ o̍ nāŋɔ̄ɔ̄ nūmndo̍ ni᷄ŋ.

²⁵Ō nɛ̄ɛ̍nɛ̍ ya̍ I̍ nɔ̍ yɛ̍ ɛ̄chɛ̍nɛ̄ ō fūla̍ o̍ nūm kɔ̍ɔ̍lī? Ndu̍yɛ̍ ha̍a̍a̍ mi̍ nɔ᷅ nu̍m, ō yɛ̄ɛ̍nɛ̍ che᷅le̍ŋ ya̍ I̍ ye̍e̍mā yɛ̍ vɛ̄lɛ̄ o̍ chi̍e̍ēŋndo̍ chōo̍?

²⁶Te̍le̍ŋnda̍ŋ lā pūm I̍ nɔ᷅ kpa̍a̍yā o̍ kpāāyā o̍ yōōmū nūu̍ ni᷄ŋ te̍. Ndu̍yɛ̍ kɛ̍ndīāā nūu̍ bɛ̍ɛ̍ mbō fāŋa̍ŋ le̍cho̍ō. Kɛ̍ Mɛ̄lɛ̄ka̍ cho̍ wāna̍ ke᷅ ya̍ dīāllūŋ kāla᷄ŋndo̍ ni̍. Ndu̍yɛ̍ ndu̍ cho̍ Mɛ̄lɛ̄ka̍ nūu̍ le̍ fɛ̍ɛ̍ŋ a̍ fɛ̍ɛ̍ŋ ni̍.

²⁷Wānāa̍ ku̍ā nu̍m lēvīl la̍, dɛ̍nɛ̍ pa̍lāa̍ nda̍ sɔ̄lā ni̍. Ndu̍yɛ̍ wānāa̍ kɛ̍ɛ̍ le̍ wāa̍ sa̍kpō a̍ nūm nda̍, tɛ̄ɛ̄mbūūwo̍ ŋ̄ tɛ̄ɛ̄mbūū nda̍ ni̍.

²⁸Kɛ̍ ya̍ ya̍ I̍ che᷅ ndi̍ bɔ̍ɔ̍ su̍ɛ̍i̍ kɛ̍ndɛ̄ le̍ wāa̍ Mɛ̄lɛ̄ka̍ o̍ ībūŋ. Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ndu̍ ya̍ I̍ ti̍i̍nda̍ŋ ni̍ māā ō nɔ̄lā mbō mānda̍ ya̍. Ndu̍yɛ̍ I̍ cho̍ wāŋnda̍ kpo̍u̍ di̍mūl a̍ wa̍lta̍ ndɔ̄la̍ kɔ̄ndɔ̄fi̍lta̍ŋ o̍kɔ̄ɔ̄.