Read Southern Kisi Sa᷅m 74 Bible Online

Sa᷅m 74 - Southern Kisi bible

Sa᷅m 74

¹[71] O̍o̍ Mɛ̄lɛ̄ka̍, vɛ᷅ ma̍ kɛ̄ɛ̄ na̍a̍ nu̍a̍ā le̍ fɛ̍ɛ̍ŋ a̍ fɛ̍ɛ̍ŋ? Vɛ᷅ ma̍ tūūlū kɔ̄l nu̍a̍ā a̍ sāā nu̍mnda̍, nda̍ yɔ̍nūŋ ni̍ māā wānāā nu̍m ā ŋ̄ chō māndāa̍ wa̍?

²Lo̍o̍nu̍ŋ a̍ wānāā nūmnda̍ ha̍ā o̍kɔ̄ɔ̄, wānāā ŋ̄ hɛ̄li̍ ha̍ā sīndɛ̄ pa̍ wa̍, nda̍ yɔ̍nūŋ ni̍ māā kāa̍le̍ ŋ̄ pīŋi̍ le᷅ŋ, ma̍ sīīŋgūū nda̍ nyɛ̄m nu̍m ŋ̄kɛ᷅ le̍ŋ. Lo̍o̍nu̍ŋ a̍ Pēmbīī Sa̍a̍yɔ̄ŋnde̍, pēmbīi̍ wa̍ nāa̍ nu̍m ā chālāa̍ ve̍.

³Hu̍ŋ mā hu̍ŋ ba̍lū chi̍e̍e̍ ya̍a̍mɔ̍ɔ̍wa̍ ā tɛ̄ɛ̄mbu̍u̍ ho̍ō tɛ̄ɛ̄mbūū bɛ̄ndōo̍ mbo̍ lō pɔ̄m ndo̍. Hu̍ŋ chɔ᷅ mɛ̄ɛ̍ ya̍a̍mɔ̍ɔ̍wa̍ ā tɛ̄ɛ̄mbu̍u̍ fo̍ndā nu̍m kāsīo̍o̍ yɛ̍.

⁴Ya̍a̍mɔ̍ɔ̍wa̍a̍ nu̍mnda̍ ā wa᷄ kūūlīāāla̍ŋ kpe̍e̍kpe̍i̍ o̍ fo̍ndā nu̍m kāsīo̍o̍ yɛ̍. Ma̍ lō o̍ ko̍ŋ ma̍ hēēlū bēēndi̍ɛ̍ī ndāa̍ chōo̍ cho̍o̍ le̍ chɔ̄mndo̍ māā ā bīī ndu̍.

⁵Dīōla̍ wa̍ le̍ lūɛ̄īyɔ̄ɔ̍ o̍ fo̍ndā nu̍m kāsīo̍o̍ la̍ŋ, a̍ chūo̍o̍ŋ nda̍ wa̍ la̍ŋ kīlī kīlīo̍o̍ ni̍ mɛ̄ɛ̍ wāŋnda̍ ā kīīŋūū nu̍a̍ā yɔ̄mnde̍ o̍ būndɔ̍ɔ̍ ni᷄ŋ yɛ̍.

⁶Dīōlā īyɔ̄mndā la̍ a̍a̍ nɔ̍ nyɛ̄la̍ŋ lā tūūlīāā lo̍ŋ lā kīŋī kīŋīāā la̍ŋ, ma̍ pēsī pēsī la̍ŋ kpo̍u̍, a̍ chūōōŋ ndāa̍ŋ ndu̍yɛ̍ a̍ ku̍ndūwa̍lā ndāla̍ŋ.

⁷Ndu̍yɛ̍ ma̍ māl fo̍ndā nu̍m kāsīo̍o̍ o̍ yīŋ, mbo̍ fūūlūū a̍ ŋɔ̄ɔ̍ lɛ̄ŋ ndi̍. Ma̍ tōsā mi̍ fo̍ndā na̍a̍ ŋ̄ sōōlūū nu̍m ko̍ŋ ndo̍ ō fūlā o̍ ba̍a̍ ni᷄ŋ.

⁸Ma̍ yīya᷄ŋ o̍ kɔ̄ltā ndāla̍ŋ ni᷄ŋ le̍ na̍a̍ tɛ̄ɛ̄mbūūwo̍ kpo̍u̍. Fo̍ndāŋndā na̍a̍ ŋ̄ chūūŋgi̍āŋ le̍ nūm Mɛ̄lɛ̄ka̍ sōōlūūwo̍ la̍ŋ, ma̍ lūmī la̍ŋ kpo̍u̍.

⁹Ndu̍yɛ̍ nyɛ̄ o̍ nyɛ̄ ŋ̄ cho᷄ bɛ̍ɛ̍ chɔ᷅ o̍ chɔ᷅m na̍a̍ māā ā lātūlu̍ a̍ na̍a̍ wo̍ le̍. Wānāā nāa̍ su̍a̍ā le̍ Mɛ̄lɛ̄ka̍ wa̍ kpo̍u̍ ā chūu̍, ō pīlɛ̍ bɛ̍ɛ̍ cho̍ lɛ̍ yōōmū le̍. Wānā o̍ wānā si̍nā lɔ̍ɔ̍ dɛ̍nɛ̍ pa̍lāa̍ ho̍ō ō fāŋāŋ na̍a̍ ni̍ŋ cho̍o̍ wo̍ le̍.

¹⁰O̍o̍ Mɛ̄lɛ̄ka̍, vɛ̄ɛ̍nɛ̍ kpɛ̍ ya̍a̍mɔ̍ɔ̍wa̍a̍ nāa̍ ā hīāū yɛ̍ ni̍ŋ la̍chi̍ a̍ nu̍m māmɔ̄ɔ̍? Bāā mī ya̍a̍mɔ̍ɔ̍wa̍ ha̍ā ā wa᷄ ni̍ko̍ nu̍m bɛ̄ɛ̄la̍ŋ tɛ̄ɛ̄mbūūwo̍ le̍ fɛ̍ɛ̍ŋ a̍ fɛ̍ɛ̍ŋ?

¹¹Vɛ᷅ ma̍ fāŋā na̍a̍ bāa̍ chōo̍, a̍ ma̍lā lɛ̍ na̍a̍ māā pāāndū le̍? Vɛ᷅ ma̍ sōlī bāla̍ŋ o̍ sūɛ̍i̍ nɛ̄i̍ ni᷄ŋ, ma̍ māl na̍a̍ nu̍a̍ā?

¹²Kɛ̍ I̍ si̍nā māā chɔ̍ŋ o̍ kāndɔ᷄ŋndo̍ pa̍ nu᷄m cho̍ māsa̍ nāā bɛ̍ndōo̍ ni̍. Nu᷄m chi̍i̍ndi̍a̍a̍ wāŋndā chīe̍e̍ya̍ o̍ chi̍e̍ēŋndo̍ ho̍ō chōo̍ ni̍.

¹³A̍ kpāāyā nu̍m bɛ̄ndōo̍, ma̍ tōsā mi̍ pēe̍ mɛ̄ŋmā īhɛ᷄llo̍ ō pīɔ̄ū tɛ̄ɛ̄ŋ. Tāmba̍lāka̍a̍, a̍ wa̍ o̍ pēe̍ mɛ̄ŋmā īhɛ᷄llo̍ ni᷄ŋ nda̍, ma̍ pīsī nda̍ bōlle̍.

¹⁴Vīsī tɔ̍ɔ̍ma̍ bɛ̄ndu̍ nɔ̍ ko̍ŋ di̍ōla̍ŋ āā Līvīa̍a̍tāŋndo̍, nu᷄m pe̍si̍ ndu̍ bōlle̍ ni̍, ma̍ to̍sā mi̍ vīsīa̍a̍ cho̍ o̍ lɛ̄ŋndē po̍lte̍ŋ ni᷄ŋ nda̍ ā dīā vīsīŋ ndɔ̄ɔ̍ŋ.

¹⁵Nu᷄m to̍o̍si̍a̍a̍ pēēla̍ pɔ̍mbɔ̄la̍ŋ a̍ pēēla̍ būūlūla̍ŋ ni̍. Ma̍ lō o̍ ko̍ŋ ma̍ vēēlīāā pēēla̍ bɛ̄ndūla̍ŋ.

¹⁶Nu᷄m to̍o̍si̍a̍a̍ pāa̍le̍ŋ a̍ nyūmnda̍ŋ ni̍. Ma̍ lō o̍ ko̍ŋ ma̍ kɛ̄sī pāa̍le̍ŋ a̍ pāŋge̍i̍ o̍ fo̍ndāŋndā ndāla̍ŋ kpɛ̍kpɛ̍.

¹⁷Nu᷄m ya̍mbu̍ pɛ̄ŋgu̍la̍ chi̍e̍ēŋndo̍ ho̍ō chɛ̍chɛ̍ ni̍. Nu᷄m to̍o̍si̍a̍a̍ wɔ̄ɔ̄le̍ŋ a̍ sīālte̍ŋ ni̍.

¹⁸O̍o̍ Mɛ̄lɛ̄ka̍ Ya̍a̍wɛ̄ɛ̄, lo̍o̍nu̍ŋ a̍ mɛ̄ɛ̍ ya̍a̍mɔ̍ɔ̍wa̍a̍ nu̍mnda̍ ā ma᷄m nu̍m yɛ̍, dīɔ̄mnda̍ ha̍ā, ma̍ lō o̍ ko̍ŋ ma̍ tɛ̄ɛ̄mbūū dīōlā nūmnda̍ŋ lābɛ̄ɛ̄.

¹⁹Wānāā nūmnda̍ ā nɔ̍ wa̍nā o̍ wāna̍ ma̍la̍ nda̍ le̍, ma᷅l nda̍ ya̍a̍mɔ̍ɔ̍wa̍a̍ ndāa̍ dɛ̍nɛ̍ wɔ̍ɔ̍ŋnda̍ ha̍ā o̍ bā le̍. Wānāā nūm a̍a̍ nda̍ chō nyɛ̄ pālāa̍ tūsīo̍o̍ cho̍o̍ wa̍, pu̍ɛ̍ɛ̍nu᷄ŋ a̍ nda̍ le̍.

²⁰Lo̍o̍nu̍ŋ a̍ kpe̍ma̍ ŋ̄ yīi̍ a̍ na̍a̍ wo̍. O̍ sɔ̍ŋgi̍ o̍ sɔ̍ŋgi̍ o̍ lɛ̄ŋnde̍ŋ nde᷅ŋ ni᷄ŋ, ā chō wāŋnda̍ nyɛ̄ pālāa̍ tūsīo̍o̍ chōo̍ o̍ nyūmnda̍ŋ ni᷄ŋ.

²¹Chɛ᷅l mī si̍ɔ̍mbu̍la̍ŋ lā bīī wānāā nda̍ chō nyɛ̄ pālāa̍ tūsīo̍o̍ chōo̍ wa̍ le̍. To̍sa̍ mī wānāā tāmbɛ̍i̍ya̍ a̍ wānāā bālāhāvɛ̍i̍ya̍ ā sāŋga̍la̍ dīōlā nūmnda̍.

²²O̍o̍ Mɛ̄lɛ̄ka̍, chɔ̍ŋ fɔ̍ mā sūŋgū le̍ wānāā nūmnda̍. Lo̍o̍nu̍ŋ a̍ mɛ̄ɛ̍ dīɔ̄mnda̍ ha̍ā ā chō nu̍m māmɔ̄ɔ̍ īdīi̍ a̍ īchɔ̄l lɛ̍.

²³Yi̍ya̍ŋ ndɔ̍ a̍ mɛ̄ɛ̍ ya̍a̍mɔ̍ɔ̍wa̍a̍ nu̍mnda̍ ā chō dēŋīo̍o̍ nu̍m chōo̍ kpe̍e̍kpe̍i̍ yɛ̍. Yi̍ya̍ŋ ndɔ̍ a̍ bɔ̍ɔ̍lūū bɛ̄ndū nda̍ chō nu̍m chōo̍ kpu̍ū wo̍.