Read Southern Kisi Sa᷅m 75 Bible Online

Sa᷅m 75 - Southern Kisi bible

Sa᷅m 75

¹[72] O̍o̍ Mɛ̄lɛ̄ka̍, ŋ̄ me᷄l nu̍m ba̍li̍ka̍, ba̍li̍ka̍ ta̍u̍, fo̍ndōle̍, le̍ mɛ̄ɛ̍ ŋ̄ chō na̍a̍ māchɛ̄lū yɛ̍. Wāŋnda̍ bā o̍ bā fe̍e̍ ā chō dīmīo̍o̍ a̍ wa̍lta̍ nu̍mndā kɔ̄ndɔ̄fi̍lta̍ŋ o̍kɔ̄ɔ̄.

²Mɛ̄lɛ̄ka̍ dīmi̍ āā, “Te̍le̍ŋ ya̍ Mɛ̍lɛ̄ka̍ pīla̍ kɛ̄ɛ̄si̍a̍a̍ wo̍, a̍ te̍le̍ŋ ko̍ŋ ya̍ I̍ cho̍ wāŋnda̍ yāmɛ̍i̍ kīlūl o̍ nɛ̄i̍ sa̍kpōo̍ chōo̍ ni̍.

³Le̍la̍ŋ ā yɔ᷄ŋ bɛ̍ɛ̍ mī chi̍e̍ēŋndo̍, a̍ wānāa̍ cho̍ lēni᷄ŋ nda̍ kpo̍u̍ mā hīīlu̍ŋ, I̍ nɔ̍lā mī to̍sa̍ mī sūŋgbu̍ma̍ sa̍a̍ chi̍e̍ēŋndo̍ ho̍ō wa̍ŋ mā si᷄m yi̍li̍.

⁴I̍ nɔ̍lā mī di̍mu̍l wānāa̍ cho̍ hēēlɔ᷄ŋndo̍ wa̍ māā ā pɛ̄ŋgi̍ yo̍ŋgāa̍ kīōlɔ̄ɔ̍, ndu̍yɛ̍ mī di̍mu̍l wānāā dɛ̍nɛ̍ wɔ̍ɔ̍ŋnda̍ māā ā pɛ̄ŋgi̍ kpa̍āya̍ ndāa̍ chɔ̄mndo̍.

⁵Mī di̍mu̍l nda̍ māā ā pɛ̄ŋgi̍ cha̍u̍ŋnɔ᷄ŋndo̍ ā bɛ̄ndū, mā sūāā a̍ yōŋgā bɛ̍ndōo̍.”

⁶O̍ chi̍e̍ēŋndo̍ chōo̍ ki̍nɛ̍i̍, chɔ̍ŋ ba᷅ pāa̍le̍ŋ lē chāŋndo̍ mbō kūɛ̄ bā le̍ de᷅l lo̍, mbō kūɛ̄ le̍nde̍ a̍ lɛ̄ŋndē po̍lte̍ nɔ̍ pēmbo᷄ŋ nde̍ŋ kpo̍u̍, wānā o̍ wānā cho̍ mbō kīlu̍l wāŋndo̍ yāmɛ̍ī sa̍kpūe̍i̍ māā Mɛ̄lɛ̄ka̍.

⁷Mɛ̄lɛ̄ka̍ ndu̍ pīlɛ̍ kpe̍ nɔ̍lā ni̍ mbō kīlu̍l wāŋndo̍ yāmɛ̍i̍ wāā le̍nde̍, ndu̍ tu̍sī wa᷅ŋndo̍ tōōlō ni̍, ndu̍ hēēlu̍ wa᷅ŋndo̍ ni̍.

⁸Tāālāa̍ chō Mɛ̄lɛ̄ka̍ Ya̍a̍wɛ̄ɛ̄ o̍ bā, a̍ mūɛ̄īmā nɛ̄īya᷄ŋ lēni᷄ŋ ma̍ pi̍a̍ā cha̍, mūɛ̄īma̍ cho̍ mā mūūli̍āŋ a̍ nyɛ̄m yɛ̍ yi̍ɔ̍ɔ̍ŋ nda̍ŋ, ma̍ŋ ma̍ yɔ̍nūŋ ni̍ māā tu̍mbe̍ bɛ̍ndū Mɛ̄lɛ̄ka̍a̍. Ō chō ma̍ŋ tālā o̍ chi̍e̍ēŋndo̍ chōo̍, mī wānāā dɛ̍nɛ̍ wɔ̍ɔ̍ŋnda̍ ā ko᷄l ma̍ŋ kpo̍u̍, tu̍e̍ bɛ̍ɛ̍ ā mɛ̍ī ni̍ŋ te̍.

⁹Kɛ̍ ya̍ ya̍ le̍ te̍le̍ŋ o̍ te̍le̍ŋ, I̍ wa᷅ ni̍ŋ wa᷅ŋnda̍ chɔ̄mndo̍ nyɛ̄ Mɛ̄lɛ̄ka̍ tōsa̍ wo̍. I̍ cho̍ chōndo̍ŋ sōlī, mī sa̍ŋga̍la̍ Mɛ̄lɛ̄ka̍ Che̍kɔ̍pū wo̍ o̍ cho̍ndo̍ŋ ni᷄ŋ.

¹⁰Wānāā dɛ̍nɛ̍ wɔ̍ɔ̍ŋnda̍, Mɛ̄lɛ̄ka̍ cho̍ hūnɔ̄ɔ̄ kpāāya̍ ndāa̍ chīi̍, kɛ̍ wānāa̍ cho̍ ndu̍ o̍ hɔ̄l sa̍kpō wa̍ nda̍, mbō chɔ̄ɔ̄lu̍ nda̍ kpāāyāa̍ kē.